گرمیوں میں جبکہ درجہ حرارت ۵۰ ڈگری سینٹی گریڈ تک پہنچ جاتا ہے ،انسان ، جانور ، پرندے، اور دیگر مخلوقات، گرمی کی شدت سے بے کل ہوکر گھروں کے چھجوں، درختوں، تالابوں اور دریائوں کے  کنارے بیٹھ کر ٹھنڈک حاصل کرنے کے جتن کرتے ہیں۔ تیز گرم ہوائوں نے ان سب کو بے حال کیا ہوتا ہے۔ہمارا یہ سورج جو آج ہم پر مسلسل گرمی برسا رہا ہے، زمین سے اگرچہ لاکھوں میل دور ہے،لیکن پھر بھی کوئی بھی جاندار اس کی تاب لانے کی ہمت اپنے اندر نہیں پاتا۔                                                                                                

حشر کے میدان کا اولین دن ہی ۰ ۵ ہزار سال کی مدت کا ہے۔ اس دن وہاں اللہ تعالیٰ کے عرش کے سوا کوئی سایہ موجود نہ ہوگا۔ سیدہ عائشہ رضی اللہ تعالیٰ عنہا بیان کرتی ہیں کہ انہوں نے نبی کو فرماتے سناکہ میدان ِ حشر میں انسانوں کاجمِ غفیر ننگے پائوں، ننگے بدن، اور غیر ختنہ شدہ حالت میںجمع ہوگا ۔ آپ رضی اللہ تعالیٰ عنہا نے سوال کیا کہ ’’اے اللہ کے رسول کیا وہاں مردو عورت سب کے سب ایک ہی جگہ جمع ہوں گے؟ ، اورکیا سب کے سب ایک دوسرے کو دیکھ رہے ہوں گے؟‘‘۔ ( ایک روایت میں آ تاہے کہ ’’پھر تو ہمیں بڑی شرم آئے گی ‘‘ )۔ جوابا ً اللہ کے رسول نے فر مایا کہ ’’اے عائشہ وہ دن ا س قدر سختی اور گھبراہٹ کا ہوگا کہ سب کو وہاں بس اپنی اپنی ہی پڑی ہوگی،اور کوئی کسی کی طرف نہ دیکھ سکے گا‘‘۔(بخاری ومسلم)                                                                                                            

اللہ کے نبی صلی اللہ علیہ وسلم نے ارشاد کیا کہ ’’سات لوگ ایسے ہیں جنہیں عرش کے سائے میں اللہ اس دن جگہ دے گا جب کوئی بھی سایہ کہیں دستیاب نہ ہوگا۔

 (۱ ) عادل حکمران

(۲) وہ نوجوان جس نے اپنی جوانی اللہ کی یاد میں گذاری

(۳)وہ شخص جس کا دل ہروقت مسجد میں اٹکا رہتا ہے

(۴)وہ دو افراد جو ایک دوسرے سے محض اللہ کی خاطر محبت کرتے ہیں

(۵) وہ فرد جسے مرتبے والی کسی عورت نے بدکاری کی دعوت دی لیکن اس نے یہ کہہ انکا ر کردیا کہ ’’مجھے اللہ سے خو ف آتا ہے‘‘

(۶) وہ آدمی جو اس طرح سے صدقہ کرتا ہے کہ بائیں ہاتھ کو بھی خبر نہیں ہوتی کہ اس کے دائیں ہاتھ نے کیا دیا ہے؟

(۷) وہ آدمی جو تنہائی میں اللہ کو یاد کرکے رو پڑتا ہے‘‘۔(بخاری حدیث ۔۶۶۰)                                                                                                                                            

ایک مثال: ایک شخص اگر کسی کو ۱۰۰ روپے دیتا ہے اور اس سے مطالبہ کرتاہے کہ تپتی ہوئی دھوپ میں ننگے پیر کھڑے ہوکر وہ اس کا حساب دے تو اسے  حساب دینے میں آخر کتنی دیر لگے گی؟ ۔ لیکن اگر وہی شخص کسی شخص سے دس ہزار روپوں کی تفصیل ،اسی تپتی ہوئی دھوپ اور ننگے پائوں کی حالت میں لے تو ظاہر ہے کہ اس کاحساب دینے میںاسے بہت دیر لگ جائے گی!۔میدان ِ حشر کا معاملہ اسی مثال سے سمجھنا چاہئے۔                                                                                                                           

سیدابو ہریرہ رضی اللہ عنہ بیان کرتے ہیں کہ نبی نے فرمایا کہ غریب مسلمان ،دولت مند مسلمان سے پانچ سو سال پہلے جنت میں داخل ہوں گے۔سیدنا ابو بذرہ رضی اللہ تعالیٰ عنہ ،نبی صلی اللہ علیہ وسلم سے روایت کرتے ہیں کہ آپ نے فرمایا کہ ’’حشر کے دن آدمی کے قدم ہٹ نہیں سکیں گے جب تک کہ وہ ان ۵ سوالوں کے جواب نہ دیدے کہ

 (۱ )اس نے عمر کہاں گذاری؟

(۲) اس کی جوانی کیسی گذری؟

(۳) جو دولت اس نے حاصل کی تھی ، وہ کیسے کمائی (۴) اسے کیسے خرچ کیا ؟

(۵) جو علم اس نے حاصل کیا تھا ، اس پر خود کس حد تک عمل کیا ؟ ‘‘(ترمذی)                                                                                                       

اگر کسی نے اپنی مذہبی ذمے داریاں قرآن و حدیث کی روشنی میں ادا کی تھیں تب تو اس نے اللہ کی خوشنودی حاصل کی تھی۔ اور اگر کسی نے حلال ذرائع سے آمدنی حاصل کی تھی او ر خر چ بھی اسے جائز اور قانونی راستوں میں کیا تھا ،تب تو وہ اللہ کے سوالوں کے جواب دے سکے گا۔لیکن اگر اس نے یہ آمدنی شہرت اور ناجائز راستوں میں خرچ کی تھی تو احکامِ الٰہی کی خلاف ورزی کے جرم میں وہ گنہ گار ٹھہرے گا۔ کوئی صنعتکا ر یا کاروباری فرد ،بینک سے سودی قرض لے کر اپنی صنعت یا کاروبار چلاتا ہے ،تو اس قرض کی بدولت حاصل ہونے والا منافع ہدایات ِ الٰہی کی خلاف ورزی کہلائے گااور نتیجے میں وہ اللہ کے آگے گنہ گار ٹھہرے گا۔اسی طرح وہ فرد جو اپنا لباس، خوراک، اور دیگر گھریلو ضروریات ناجائز و غیر قانونی ذرائع سے حاصل کرتا ہے ،تو اس کی نماز، روزے، حج ، اور دیگر عبادتیں،سب کی سب اللہ کے ہاں مسترد کردی جائیں گی۔ یہی حال اس کے خرچوں کا بھی ہے۔لہٰذا جو کچھ بھی کسی کو خرچ کرنا ہو ، اللہ تعالیٰ کی رضامندی کو اسے ہر گز فراموش نہیں کرنا چاہئے۔آدمی کو چاہئے کہ وہ اپنے آپ کو ہر ناجائز ذریعے اور کام سے محفوظ رکھے تاکہ حشر کے دن اللہ تعالیٰ کے آگے رسوائی اور کڑے حساب وکتاب سے وہ محفوظ رہے، کیونکہ دوزخیوں کو اللہ تعالیٰ اس دن ان کے جرائم کے حساب سے بدترین عذاب میں جھونکے گا۔                                                                                                                                                      

حشر کے دن سورج لوگوں کے اس قدر قریب لے آیا جائے گا کہ اپنے اپنے گناہوں کی شدت کے حساب سے لوگ گھٹنوں تک، کمر تک، اور گردن تک پسینے میں ڈوبے ہوئے ہوں گے۔ نبی علیہ الصلوٰۃ وا لتسلیم نے یہ صور تِ حال بیان کرتے ہوئے اپنی گردن کا اشارہ کیا تھا۔                                                                      

اللہ تعالیٰ نے دوزخ کی آگ کو جب پہلی بار بھڑکایا تھا تو ایک ہزار سال تک اسے مسلسل بھڑکتا چھوڑ دیا تھا جس سے اس کا رنگ سفید ہوگیا تھا ۔پھر اس نے دوزخ کو دوسری بار مزید ایک ہزار سال تک بھڑکایا تھاجس سے اس کارنگ سرخ پڑگیا تھا۔پھر اس نے آگ کو مزید ایک ہزار سال کے لئے تیسری بار بھڑکا یا تھا جس سے آگ کا رنگ سیاہ ہوگیا تھا۔ (امام احمد۔حنبل رحمہ اللہ)                                                                                                                                 

یاد رکھنے کی بات ہے کہ دوزخ کی آگ دنیا کی موجودہ آگ سے ستر گنا زیادہ شدید ہے ۔اسی سے ہم اس کی سختی اور حدت کا اندازہ کرسکتے ہیں۔(بلکہ ہم اندازہ کر ہی نہیں سکتے!)۔                                                                                                                                          

دوزخ منکروں، منافقوں، متکبروں، مجرموں، قاتلوں، ظالموں، بے نمازیوں، نمازکو ٹال کر پڑھنے والوں، سچائی کو رد کردینے والوں، مومنوں کو تنگ کرنے والوں، ناپ تول میں کمی کرنے والوں، حد سے تجاوز کرنے والوں، خود کشی کرنے والوں اور گالیاں بکنے والوں ہی کے لئے تیا ر کی گئی ہے۔                                                                                                          

اللہ تعالیٰ سے ہمیں دعا کرنی چاہئے کہ وہ توفیق دے کہ ہم وہ اعمال کرسکیں جن کے باعث سے ہم اس کی خوشنودی حاصل کرسکیں اور خود کو اس  جھلسادینے والی آگ سے محفوظ رکھ سکیں جو تیار ہی اللہ کے باغیوں اور نافرمانوں کے لئے کی گئی ہے!

’’وَقودُھا النّا سُ والحجا رَۃ اُعدّت للِکافرین!‘‘

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے