Monthly Magazine of jamia Abi Bakar Al Islamia Karachi Pakistan جامعہ ابی بکر الاسلامیہ کراچی کا ماھنامہ مجلہ اسوہ حسنہ

اِسلام کے عائلی نظام کا مطالعہ کیا جائے تو معلوم ہوتا ہے کہ یہاں خاندان کے عناصر کی تعداد بہت وسیع ہے۔ اسلام نے اس حوالے سے جس اہتمام کے ساتھ احکام بیان کیے ہیں، اگر حقیقتاً مسلمان اُن سے آگاہ ہو جائیں، اُن پر اُسی طرح ایمان رکھیں جس طرح ایمان رکھنے کا حق ہے اور حقیقی طور پر اُن کا نفاذ کر لیں تو ایک مضبوط، خوشحال اور باہمی محبت کا خوگر خاندان وجود میں آسکتا ہے۔ اسلام کی تعلیم یہی ہے کہ ایک مربوط و مضبوط خاندان کی تشکیل عمل میں آئے۔

مغرب اور اسلام کے تصورِ خاندان میں یہ فرق ہے کہ مغرب میں یہ صرف ایک مرد اور ایک عورت کے جوڑے پر مبنی ہے اور کہیں اولاد میں سے بھی کوئی شامل ہوتا ہے ورنہ بیٹے بیٹیاں جوانی کو پہنچتے ہی اپنی راہ لیتے ہیں۔ بچوں کے جوان ہو جانے کے بعد والدین کا اُن سے کوئی عملی تعلق نہیں رہ جاتا۔ اسلام میں خاندان کی بنیادی اکائیاں اگرچہ میاں بیوی ہیں مگر ان کے ساتھ ماں باپ، بیٹے بیٹیاں، پوتے پوتیاں، بھائی بہنیں، چچا اور پھوپھیاں، ماموں اور خالائیں بھی خاندان کی تشکیل میں شریک ہیں۔ اسلام میں خاندان سمٹا اور سکڑا ہوا نہیں بلکہ وسیع اور پھیلا ہوا ہے۔ یہ چچاؤں اور پھوپھیوں کی اولاد (عَصَبَات) اور ماموؤں اور خالاؤں کی اولاد (اَرحام) پر مشتمل ہے۔

اسلام متعدد احکام کے ذریعے خاندان کے باہمی تعلقات کومضبوط اور مربوط کرتا ہے۔ اسلام نے ان خاندانی تعلقات کو احکام کے ایک جال کی صورت باہم مربوط کر رکھا ہے۔ صاحبِ استطاعت اور کشادہ دست کے اوپر ذمہ داری ڈالی گئی کہ وہ تنگ دست اور مجبور و ضرورت مند پر خرچ کرے۔ ایسے مسائل جن میں اس طرح کے مختلف مصارف پر خرچ کرنے کے احکام بیان کیے گئے ہیں انھیں احکامِ نَفَقات (فی سبیل اللہ خرچ کے احکام)کہا جاتا ہے۔ اَحکامِ دیت کے تحت قتلِ خطا کی دیت کا بیان ہے کہ مقتول کے عَصَبَات (باپ کی طرف سے قرابت دار) اور قبیلہ اس کا حق دار ہے۔ احکامِ میراث کے تحت وراثت کے مسائل بیان کیے گئے ہیں کہ اللہ تعالیٰ نے میراث میں معیّن درجات اور حصوں کے مطابق اقارب کا حق مقرر کیا ہے۔ اسلام کا یہ اہتمامِ احکام بتاتا ہے کہ خاندان کا شیرازہ اس نظام میں متحد رہنا چاہیے۔ کسی شاخ کو اپنی اصل سے جدا نہیں ہونا چاہیے۔

رشتہ و قرابت کے استحکام اور نشوو ارتقا میں اسلام نے خصوصی ترغیب و تحریص سے کام لیا ہے۔ قریبی رشتہ داروں کا حق بیان کرتے ہوئے فرمایا:

يَسْـَٔلُوْنَكَ مَاذَايُنْفِقُوْنَ١ؕ۬ قُلْ مَاۤ اَنْفَقْتُمْ مِّنْ خَيْرٍ فَلِلْوَالِدَيْنِ وَالْاَقْرَبِيْنَ وَالْيَتٰمٰى وَالْمَسٰكِيْنِ وَابْنِ السَّبِيْلِ

لوگ پوچھتے ہیں ہم کیا خرچ کریں؟ جواب دو کہ جو مال بھی تم خرچ کرو اپنے والدین پر، رشتے داروں پر، یتیموں اور مسکینوں اور مسافروں پر خرچ کرو۔ (البقرہ۲۱۵)

كُتِبَ عَلَيْكُمْ اِذَا حَضَرَ اَحَدَكُمُ الْمَوْتُ اِنْ تَرَكَ خَيْرَا١ۖۚ ا۟لْوَصِيَّةُ لِلْوَالِدَيْنِ وَالْاَقْرَبِيْنَ بِالْمَعْرُوْفِ١ۚ حَقًّا عَلَى الْمُتَّقِيْنَؕ۰۰۱۸۰ (البقرہ۱۸۰)

 تم پر فرض کیا گیا ہے کہ جب تم میں سے کسی کی موت کا وقت آئے اور وہ اپنے پیچھے مال چھوڑ رہا ہو، تو والدین اور رشتے داروں کے لیے معروف طریقے سے وصیت کرے۔ یہ حق ہے متقی لوگوں پر۔

لِلرِّجَالِ نَصِيْبٌ مِّمَّا تَرَكَ الْوَالِدٰنِ وَالْاَقْرَبُوْنَ١۪ وَلِلنِّسَآءِ نَصِيْبٌ مِّمَّا تَرَكَ الْوَالِدٰنِ وَالْاَقْرَبُوْنَ مِمَّا قَلَّ مِنْهُ اَوْ كَثُرَ١ؕ نَصِيْبًا مَّفْرُوْضًا۰۰۷

مردوں کے لیے اُس مال میں حصہ ہے جو ماں باپ اور قریبی رشتہ داروں نے چھوڑا ہو، اور عورتوں کے لیے بھی اُس مال میں حصہ ہے جو ماں باپ اور قریبی رشتہ داروں نے چھوڑا ہو۔ خواہ تھوڑا ہو یا بہت، اور یہ حصہ (اللہ کی طرف سے) مقرر ہے۔ (النساء۷)

احسان کی تعلیم دیتے ہوئے فرمایا:

وَاعْبُدُوا اللّٰهَ وَلَا تُشْرِكُوْا بِهٖ شَيْـًٔا وَّبِالْوَالِدَيْنِ۠ اِحْسَانًا وَّبِذِي الْقُرْبٰى وَالْيَتٰمٰى وَالْمَسٰكِيْنِ وَالْجَارِ ذِي الْقُرْبٰى(النساء۳۶)

اور تم سب اللہ کی بندگی کرو، اُس کے ساتھ کسی کو شریک نہ بناؤ، ماں باپ کے ساتھ نیک برتاؤ کرو، قرابت داروں اور یتیموں اور مسکینوں کے ساتھ حسنِ سلوک سے پیش آؤ۔

وَ اتَّقُوا اللّٰهَ الَّذِيْ تَسَآءَلُوْنَ بِهٖ وَ الْاَرْحَامَ١ؕ اِنَّ اللّٰهَ كَانَ عَلَيْكُمْ رَقِيْبًا۰۰۱ (النساء۱)

اُس اللہ سے ڈرو جس کا واسطہ دے کر تم ایک دوسرے سے اپنے حق مانگتے ہو، اور رشتہ و قرابت کے تعلقات کو بگاڑنے سے پرہیز کرو۔ یقین جانو کہ اللہ تم پر نگرانی کر رہا ہے۔

قطع رحمی کے انجام سے ڈراتے ہوئے فرمایا:

فَهَلْ عَسَيْتُمْ اِنْ تَوَلَّيْتُمْ اَنْ تُفْسِدُوْا فِي الْاَرْضِ وَ تُقَطِّعُوْۤا اَرْحَامَكُمْ۰۰۲۲ اُولٰٓىِٕكَ الَّذِيْنَ لَعَنَهُمُ اللّٰهُ فَاَصَمَّهُمْ وَ اَعْمٰۤى اَبْصَارَهُمْ۰۰۲۳

اب کیا تم لوگوں سے اس کے سوا کچھ اور توقع کی جا سکتی ہے کہ اگر تم الٹے منہ پھر گئے تو زمین میں پھر فساد برپا کرو گے اور رشتہ و قرابت کی رسیاں کاٹ ڈالو گے؟ یہ لوگ ہیں جن پر اللہ نے لعنت کی اور اُن کو اندھا اور بہرا بنا دیا۔ (محمد:۲۲۔۲۳)

قرآنِ مجید کی ان تعلیمات اور احکام کی تائید میں احادیثِ رسول ﷺ بھی وارد ہوئی ہیں: سیدنا عبدالرحمن بن عوف رضی اللہ عنہ سے روایت ہے کہ میں نے رسول اللہ ﷺکو یہ فرماتے ہوئے سنا: اللہ عزوجل نے فرمایا ہے:

أَنَا اللهُ، وَأَنَا الرَّحْمَنُ، خَلَقْتُ الرَّحِمَ وَشَقَقْتُ لَهَا مِنْ اسْمِي، فَمَنْ وَصَلَهَا وَصَلْتُهُ، وَمَنْ قَطَعَهَا بَتَتُّهُ

میں اللہ ہوں، میں رحمن ہوں، میں نے رحم (رشتے)کو پیدا کیا ہے، اور اس کا نام اپنے نام سے اخذ کرکے رکھا ہے۔ جو شخص اس رحم کو قائم رکھے گا میں بھی اُس کو قائم رکھوں گا، اور جو اِس کو توڑ دے گا میں بھی اُس کو توڑ دوں گا۔(سنن الترمذي:1907)

ایک حدیث میں آیا ہے:مسکین کو صدقہ دینے کا اجر ایک صدقے کا اجر ہے ، جب کہ رشتے دار کو صدقہ دینے کا اجر دوہرا ہے، ایک صدقے کا اور ایک رشتے کا۔

ایک حدیث میں تو یہاں تک آیا ہے:بہترین صدقہ وہ ہے جو ناراض (مخالف اور دشمن) رشتے دار کو دیا جائے۔ اس لیے کہ اُس کے اور صدقہ دینے والے کے تعلقات میں دراڑ آ گئی ہے، محبت اور مودّت باقی نہیں رہی، لہٰذا اُس کے اوپر صدقہ کرنا اپنے نفس کو مارنا اور اِس کے اُوپر غالب آنا ہے اور یہی نفسِ انسانی کی تربیت اور تزکیہ ہے۔

ان اسلامی تعلیمات کی روشنی میں ہم اپنے معاشرے کا جائزہ لیں تو معلوم ہوتا ہے کہ صورتِ حال بہت مختلف ہے۔ بھائی اپنے بھائی سے کینہ و کدورت رکھتا ہے۔ دنیا کے مال نے بھائی کو بھائی سے جدا کر دیا ہے۔ یہ صورتِ حال اُس وقت تو اور زیادہ بُر ی ہو جاتی ہے جب معاملہ کسی وراثت سے حصہ لینے کا ہو۔ ہر کوئی لینا ہی چاہتا ہے دینا نہیں چاہتا۔

عفوودرگزر، رواداری اور برداشت کہاں چلی گئی؟ ایثار اور مودّت کا کیا ہوا؟ حالانکہ یہی بھائی اجنبی لوگوں کے ساتھ نہایت درگزر، بے پناہ محبت و الفت کرتے دکھائی دیتے ہیں۔ ان کے ساتھ کمال اخلاق، کشادہ ظرفی اور اعلیٰ انسانیت کا مظاہرہ کرتے ہیں، مگر بھائی اپنے بھائیوں کے دشمن بن جاتے ہیں۔ ایک چاہتا ہے کہ دوسرے کو گرا مارے، اُسے تباہ کرکے اپنا آپ سنوار لے۔

یہ درست ہے کہ مفادات کی یہ کش مکش اور جنگ قدیم انسانی تاریخ میں بھی تھی جب انسان واحد کنبہ تھا۔ اُس وقت صرف میاں بیوی اور بیٹے بیٹیاں ہی انسانی خاندان کے کل عناصر تھے۔ اس چھوٹے سے خاندان کے ایک فرد نے بھی اپنے بھائی کوقتل کر دیا تھا اور حسد کا مظاہرہ کیا تھا۔

اس واقعے کی صداقت اپنی جگہ، مگر اس کا مطلب یہ ہرگز نہیں کہ آیندہ بھی ایسے ہی واقعات کا تسلسل جاری رہے۔ انسان کیوں یہ پسند کرتا ہے کہ وہ آدم کا شرپسند اور خبیث بیٹا بن جائے۔ وہ اچھا اور طیب ابن آدم بننا کیوں پسند نہیں کرتا؟ یعنی وہ صالح، نفیس اور امن پسند انسان جس نے قتل ہونا گوارا کر لیا مگر اپنے بھائی پر ہاتھ اٹھانا ایمان کے منافی سمجھا۔ اُس موقعے پر کہے گئے اُس کے الفاظ کے اندر اُس کے صالح جذبات اور ایمانی احساسات کا بھرپور مظاہرہ موجود ہے۔ اُس نے کہا:

لَىِٕنْۢ بَسَطْتَّ اِلَيَّ يَدَكَ لِتَقْتُلَنِيْ مَاۤ اَنَا بِبَاسِطٍ يَّدِيَ اِلَيْكَ لِاَقْتُلَكَ١ۚاِنِّيْۤ اَخَافُ اللّٰهَ رَبَّ الْعٰلَمِيْنَ۰۰۲۸(المائدہ۲۸)

اگر تو مجھے قتل کرنے کے لیے ہاتھ اٹھائے گا تو میں تجھے قتل کرنے کے لیے ہاتھ نہ اٹھاؤں گا۔ میں اللہ رب العالمین سے ڈرتا ہوں۔

آج کا انسان قابیل جیسا انسان کیوں بننا چاہتا ہے کہ قیامت تک جو بھی قتل ہو گا اُس کا جرم اور گناہ اُس پہلے قاتل پر بھی ہو گا کیونکہ اُسی نے اس زندگی میں قتل کی روایت کا آغاز کیا ہے۔ الله کی قسم یہ حقیر دنیا اس قابل نہیں کہ اس کی بنا پر انسانوں کا قتل ہوتا رہے۔ بھائی اپنے بھائی سے دست و گریباں ہو اور تھانے کچہریوں میں مقدمات چلیں، پھر جیلیں اور قید خانے آباد ہوں۔ رشتہ دار اپنے رشتہ دار سے دشمنی مول لیں۔ واللہ یہ دنیا اس قابل نہیں!اگر اس دنیا کا وزن اور قیمت اللہ کے ہاں مچھر کے پَر کے برابر بھی ہوتا تو اللہ کافروں کو اس سے پانی کا ایک گھونٹ بھی نہ پینے دیتا۔

یہ بات باعث افسوس ہے کہ باہمی عداوتوں اور جھگڑوں میں مبتلا لوگوں کی اکثریت صاحب مال، اہل دولت اور امیروں کی ہے۔ فقیر اور تنگ دستوں کی لڑائی جھگڑے کے واقعات بہت تھوڑے ہیں۔ اُن بے چاروں کے پاس ہوتا ہی کچھ نہیں جس کے اوپر وہ نزاع کھڑا کریں،جب کہ نزاع پیدا کرنے والے وہی لوگ ہوتے ہیں جن کی سوچ اور خیال یہ ہوتا ہے کہ میں کروڑوں نہیں اربوں کیسے حاصل کر سکتاہوں؟ سوچنا چاہیے کہ انسان یہ اربوں حاصل کرکے بھی اپنے استعمال میں کتنا لاتا ہے؟ انسان دولت کے یہ انبار چھوڑ کر چلا جائے گا کچھ بھی ساتھ نہیں لے جائے گا۔ انسان کو اپنے تعلقات ایسے بنانے چاہئیں کہ اُس کے بعد دوسرے اُس کے لیے دعائیں کریں، اور یہ کام خاندان کے افراد کے ساتھ تعلق اُستوار کرکے ممکن بنایا جا سکتا ہے۔

دولت کی قیمت پر خاندان کے تانے بانے کو بکھیرنا، بھائیوں کی جمعیت کو پارہ پارہ کرنا بہت ہلکا سودا ہے۔ یہ شیطان کی پیروی ہے۔ شیطان انسان کو اکساتا ہے، سازشیں کرتا ہے، یہاں تک کہ رشتے داریاں تڑوا ڈالتا ہے۔ دین انسانی زندگی کی دو بنیادیں فراہم کرتا ہے۔ پہلی بنیاد یہ ہے کہ انسان اور اُس کے معبود، یعنی اللہ کے درمیان تعلق مضبوط تر ہو۔ دوسری بنیاد یہ ہے کہ انسان کے دوسرے انسانوں کے ساتھ تعلقات قائم اور اُستوار ہوں، مضبوط اور بہتر ہوں۔ اس تعلق بین الناس کے بھی دو پہلو خصوصی اہمیت رکھتے ہیں:اہل ایمان کے مابین محبت و اُلفت اور اقارب و رشتہ داروں کے مابین تعلقاتِ محبت!چونکہ رشتہ و قرابت کے عناصر کو دیگر لوگوں کی نسبت زیادہ حقوق حاصل ہیں اس لیے مسلم خاندان کی بقا، تحفظ اور نشوو ارتقا کی خاطر ان روابط اور تعلقات کے معاملے میں ہرلمحے خوفِ خدا سے کام لیا جائے۔ ان معاملات میں اپنی دانش مندی، دین داری اور دین پسندی کا مظاہرہ ہو۔ رب کے قرآن اور رسول ﷺ کی سنت سے رہنمائی لی جائے۔

محبت و اُلفت اور احترام و اکرام پر مبنی روابط اور تعلقات کو قائم رکھنا سب کا فرض ہے۔ رشتہ و قرابت کے تعلقات کو برابری کی سطح پر قائم رکھنا بے معنی اور بے مقصد ہے۔ حدیث رسول ﷺ میں آیا ہے: رشتے کے ربط و تعلق کو وہ شخص قائم نہیں رکھتا جو بدلے اور برابری کی سطح پر ایسا کرے، بلکہ وہ شخص رشتہ قائم رکھتا ہے جس سے رشتے کو توڑا جائے تو وہ اُسے توڑنے کے بجاے جوڑے۔

صلہ رحمی وہ نہیں کرتا جو جواباً صلہ رحمی کرے۔ دوسرے سے محبت ملے تو وہ بھی اُس سے محبت کرے، کوئی احسان کرے تو وہ بھی احسان کرے، کوئی میل ملاقات رکھے تو وہ بھی اُسے ملتا رہے، کوئی تحفہ تحائف دے تو وہ بھی ایسا کرے۔ ایسا شخص حقیقی صلہ رحمی کرنے والا نہیں ہے۔ صلہ کا معنی ہی ٹوٹی ہوئی چیز کو جوڑنا ہے۔ حقیقی صلہ رحمی تو یہ ہے کہ جو تم سے کٹ جائے اُس سے جڑے رہو، اور جو تمھیں کچھ نہ دے اُسے تم عطا کرو۔ جو تم پر ظلم کرے اُسے معاف کر دو، اور جو تم سے بُرا سلوک کرے اُس سے تم حسنِ سلوک سے پیش آؤ۔ یہ ہے وہ شان جو ایک خاندان کے افراد و عناصر کے درمیان ہونی چاہیے۔

جب دولت کم تھی، صرف گزارا ہوتا تھا تب خاندان کے ہر معاملے میں لحاظ رکھا جاتا تھا، اب دولت کی ریل پیل ہے مگر خاندانی روابط کو مستحکم کرنے اور صلہ رحمی کا کوئی اہتمام نہیں۔ تنگی و خوش حالی کی ان دونوں حالتوں کا موازنہ کریں تو محسوس ہوتا ہے کہ تنگی کے وہ دن بہتر تھے جب خاندانی تعلقات کو قائم رکھنا اہم سمجھا جاتا تھا مگر آج یہ آسانی کے ایام بے وقعت ہیں جب خوش حالی کی بنا پر باہمی عداوتیں اور مخاصمتیں زوروں پر ہیں۔ تعلقات ٹوٹ رہے ہیں، محبتیں کمزور ہو رہی ہیں، کدورتیں پروان چڑھ رہی ہیں۔ محسن انسانیت ﷺ نے بجا فرمایا ہے کہ امیری سامان کی کثرت سے نہیں ملتی بلکہ نفس کی بے نیازی اصل امیری ہے۔

آئے دن ہم دیکھتے ہیں کہ ہزاروں کی تعداد میں لوگ پیدا ہورہے ہیں اور ہزاروں کی تعداد میں وفات پارہے ہیں ، دنیا میں ہرآنے والایہاں سے جارہا ہے اس لئے اس بات میں کسی کو شک واختلاف نہیں کہ موت ایک اٹل حقیقت ہے اور ہرکسی کو دنیا سے جانا ہے جیساکہ اللہ کا فرمان ہے ہرنفس کو موت کا مزہ چکھنا ہے ۔ جب اس دنیا میں آنے کے بعد ہمیں مرہی جانا ہے تو پھر اس دنیا کی کیا حقیقت ہے ، یہاں ہم کیوں آئے ہیں اور ہمیں دنیا میں کیا کرنا چاہیے ؟

یہ دنیا عمل کرنے کی جگہ ہے یعنی ہمیں اللہ نے دنیا میں اس لئے بھیجا ہے کہ ہم اس کی بندگی کریں اور اس نے جو صراط مستقیم دیا ہے اس پر چلتے ہوئے زندگی بسر کریں ۔ اللہ کے سوا کسی کو بقا نہیں ہے ، یہاں ہرکسی کی زندگی متعین ومحدود ہے جب اس کی زندگی کا متعین دن آجاتا ہےوہ اس دن یہاں سے کوچ کرجاتا ہے ۔ مطلب یہ ہوا کہ یہ دنیا ٹھہرنے کی جگہ نہیں ہے بلکہ مسافر کی طرح چند لمحہ بسر کرنے کی جگہ ہے ،ہمارا اصل ٹھکانہ آخرت ہے اور ہمیشہ رہنے والی ہے ،اللہ کا فرمان ہے :

يٰقَوْمِ اِنَّمَا هٰذِهِ الْحَيٰوةُ الدُّنْيَا مَتَاعٌ١ٞ وَّ اِنَّ الْاٰخِرَةَ هِيَ دَارُ الْقَرَارِ۰۰۳۹

’’اے میری قوم! یہ حیات دنیا متاع فانی ہے ، یقین مانوکہ قرار اور ہمیشگی کا گھر تو آخرت ہی ہے۔‘‘(غافر:39)

بلکہ آخرت کے مقابلے میں دنیا کی زندگی گھڑی بھر کا ٹھکانہ ہے ، اللہ کا فرمان ہے :

وَ يَوْمَ يَحْشُرُهُمْ كَاَنْ لَّمْ يَلْبَثُوْۤا اِلَّا سَاعَةً مِّنَ النَّهَارِ يَتَعَارَفُوْنَ بَيْنَهُمْ١ؕ قَدْ خَسِرَ الَّذِيْنَ كَذَّبُوْا بِلِقَآءِ اللّٰهِ وَ مَا كَانُوْا مُهْتَدِيْنَ۰۰۴۵

اور ان کو وہ دن یاد دلائیےجس دن اللہ ان کو اپنے حضور جمع کرے گا تو ان کو ایسا محسوس ہوگا کہ گویا وہ دنیا میں سارے دن کی ایک آدھ گھڑی رہے ہوں گے اور آپس میں ایک دوسرے کو پہچاننے کو ٹھہرے ہوں، واقعی خسارے میں پڑے وہ لوگ جنہوں نے اللہ کے پاس جانے کو جھٹلایا اور وہ ہدایت پانے والے نہ تھے۔ (یونس:45)

کیا ہم نہیں دیکھتے کہ دنیا میں ایک سے بڑھ کر ایک دنیا دار آیا ، فرعون آیا، قارون آیا، ھامان وشداد آیا مگر کسی کو اپنی فوج ، طاقت، سلطنت اور دنیا نے نہیں بچایا آخرکار دنیا چھوڑ کر سب کو جانا ہی پڑااس لئے کافر لوگ بھی موت سے انکار نہیں کرتے مگر وہ موت سے نصیحت نہیں لیتے اور مرنے کے بعد دوبارہ زندہ کئے جانے کا انکار کرتے ہیں ،اللہ کا فرمان ہے :

زَعَمَ الَّذِيْنَ كَفَرُوْۤا اَنْ لَّنْ يُّبْعَثُوْا١ؕ قُلْ بَلٰى وَ رَبِّيْ لَتُبْعَثُنَّ ثُمَّ لَتُنَبَّؤُنَّ بِمَا عَمِلْتُمْ١ؕ وَ ذٰلِكَ عَلَى اللّٰهِ يَسِيْرٌ۰۰۷

کافروں کا خیال یہ ہے کہ انہیں دوبارہ زندہ نہیں کیا جائے گا ، آپ کہہ دیجئے ! کیوں نہیں اللہ کی قسم ! تمھیں ضرور بالضرور اٹھایا جائے گا ، پھر جو کچھ تم نے کیا ہے اس کی تمھیں خبر دی جائے گی اور یہ کام اللہ پر انتہائی آسان ہے ۔ (التغابن:7)

ہر مسلمان آخرت پر ایمان رکھتا ہے کیونکہ ایمان کے چھ ارکان میں سے ایک رکن آخرت پر ایمان لانا ہے بلکہ اس آیت کی روشنی میں سب سے پہلے ہمارے اوپر لازم ہے کہ ہم یہ پختہ عقیدہ بنائیں کہ اس دنیا سے وفات پاجانے کے بعد اللہ تعالی سارے انسانوں کو قیامت کے دن دوبارہ زندہ کرے گا اور سب کے عملوں کا حساب وکتاب ہوگا پھر آخرت سے متعلق قرآن وحدیث میں جتنی باتیں مذکور ہیں ان سب پر ایمان لانا ہے مثلا برزخ کی زندگی،قبر کی نعمتیں، قبر کا عذاب، اسرافیل علیہ السلام کا صور پھونکنا، قبروں سے دوبارہ زندہ ہوکرکھڑا ہونا، محشر میں سب کا جمع ہونا،اللہ کی عدالت قائم ہونا، حساب وکتاب، حوض کوثر، پل صراط اور جنت وجہنم میں داخلہ وغیرہ ۔

آخرت برحق ہے اور دنیاوی زندگی دراصل آخرت کی تیاری کے لئے ہی ہے،اس لئے اللہ نے قرآن میں جابجا آخرت کی تیاری کا حکم دیا ہے ، اللہ کا فرمان ہے :

يٰۤاَيُّهَا الَّذِيْنَ اٰمَنُوا اتَّقُوا اللّٰهَ وَ لْتَنْظُرْ نَفْسٌ مَّا قَدَّمَتْ لِغَدٍ١ۚ وَ اتَّقُوا اللّٰهَ١ؕ اِنَّ اللّٰهَ خَبِيْرٌۢ بِمَا تَعْمَلُوْنَ۰۰۱۸

 اے ایمان والو! اللہ سے ڈرتے رہو اور ہرشخص دیکھ لے کہ کل قیامت کے واسطے اس نے اعمال کا کیا ذخیرہ بھیجا ہے۔ اور ہروقت اللہ سے ڈرتے رہو ، اللہ تمہارے سب اعمال سے باخبر ہے۔ (الحشر:18)

سورہ اسراء کی ایک آیت میں اللہ نے آخرت کی فکر کرنے کے ساتھ اس کی بہترتیاری کرنے والوں کو سعی مشکور(قدرکی جانے والی تیاری)کہہ کربشارت بھی دی ہے گویا وہاں فکرآخرت، تیاری اور نتیجہ تینوں بیان ہوا ہے، اللہ فرماتا ہے:

وَ مَنْ اَرَادَ الْاٰخِرَةَ وَ سَعٰى لَهَا سَعْيَهَا وَ هُوَ مُؤْمِنٌ فَاُولٰٓىِٕكَ كَانَ سَعْيُهُمْ مَّشْكُوْرًا۰۰۱۹

 جس نے آخرت کی فکر کی اور جیسی کوشش اس کے لئے ہونی چاہیے وہ کرتا بھی ہو اور وہ باایمان بھی ہو پس یہی لوگ ہیں جن کی کوشش کی اللہ کے یہاں پوری قدردانی کی جائے گی ۔ (الاسراء:19)

ایک دوسری جگہ اللہ کا فرمان ہے:

وَ مَا تُقَدِّمُوْا لِاَنْفُسِكُمْ مِّنْ خَيْرٍ تَجِدُوْهُ عِنْدَ اللّٰهِ هُوَ خَيْرًا وَّ اَعْظَمَ اَجْرًا

 اور جو نیکی تم اپنے لئے آگے بھیجو گے اسے اللہ تعالی کے یہاں بہتر سے بہتر اور ثواب میں بہت زیادہ پاؤگے ۔ (المزمل:20)

اس آیت سے سبق ملتا ہے کہ کل کے لئے خرچ کرنےاور کسی قسم کی قربانی دینےسے گریز نہیں کرنا چاہیے بلکہ آخرت میں بہتر بدلہ پانے کی امید میں ہر قسم کی خیروبھلائی کرتے رہنا چاہیے۔

یہاں ایک افسوسناک پہلو ذکرکرکے مضمون کے اصل ہدف کی طرف آؤں گا ۔ ہمارے دین کی اصل اور اس کا لب لباب آخرت کی تیاری اور اس کے ذریعہ آخرت کی کامیابی حاصل کرنا ہے،یہاں کی تمام دینی کارگزاریوں کا اصل ہدف آخرت کی تیاری ہے مگر افسوس کے ساتھ کہنا پڑتا ہے کہ آج مسلمانوں کی اکثریت فکر آخرت سے حددرجہ غافل ہے جس سے کبھی کبھی یوں محسوس ہوتا ہے کہ مسلمان بھی دوبارہ زندہ ہونے ، رب سے ملاقات کرنے اور آخرت کے حساب وکتاب کےمنکر ہوگئے؟۔انسانوں کی غفلت کی طرف اللہ تعالی نے بھی اشارہ کیا ہے ، رب العالمین کا فرمان ہے:

اِقْتَرَبَ لِلنَّاسِ حِسَابُهُمْ وَ هُمْ فِيْ غَفْلَةٍ مُّعْرِضُوْنَۚ۰۰۱

لوگوں کے حساب کا وقت قریب آگیا ہے پھر بھی وہ بے خبری میں منہ پھیرے ہوئے ہیں۔ (الانبیاء:1)

مذکورہ تمام باتوں کو مدنظر رکھتے ہوئےہمیں آخرت پر ایمان پختہ کرنے کے ساتھ اپنے اندر فکر آخرت پیداکرنےکی اشد ضرورت ہے ، آخر اسی بات سے ہم میں اور کافروں میں دنیاوی زندگی کے مقصد میں فرق ہے ، وہ آخرت سے غافل دنیا کو ہی مسکن سمجھ بیٹھے ہیں جبکہ ہمارے نزدیک اصل مسکن آخرت ہے۔چنانچہ میں ذیلی سطورمیں چند اہم نکات ذکر کرناچاہتا ہوں جوفکر آخرت پیدا کرنے میں معاون ہوں گے ۔ان شاء اللہ

1۔فکرآخرت پیداکرنے میں اہم رول اس احساس کا ہے کہ ہم ہمہ وقت اس شعورواحساس کے ساتھ جئیںکہ اللہ دیکھ رہا ہے ۔وہ ہمارے عملوں سے باخبر ہے ،اس سے چھپاکر ہم کوئی بھی کام انجام نہیں دے سکتے ہیں۔اللہ کا فرمان ہے :

اَلَمْ يَعْلَمْ بِاَنَّ اللّٰهَ يَرٰى ؕ۰۰۱۴

کیا اسے نہیں معلوم کہ اللہ اسے خوب دیکھ رہا ہے ۔ (العلق:14)

اس احساس کے ساتھ جینے والا مسلمان ایمان کی حفاظت کرے گا، عمل صالحہ کی طرف گامزن رہے گا اور برائی کے انجام سے خوف کھاتے ہوئے اس سے بچنے کی کوشش کرتا رہے گا، گویا وہ ہمیشہ فکر آخرت اور اس کی تیاری میں لگارہے گا۔

2۔تقوی اختیار کرنے والا آخرت کے لئے فکرمند رہتا ہے اس لئے اللہ نے سفر آخرت کے لئے تقوی کا توشہ لینے کا حکم دیا ہے ، فرمان الہی ہے:

وَتَزَوَّدُوْا فَاِنَّ خَيْرَ الزَّادِ التَّقْوٰى

اوراپنے ساتھ سفر خرچ لے لیا کرو ، سب سے بہتر توشہ تقوی یعنی اللہ تعالی کا ڈر ہے۔ (البقرۃ:197)

تقوی کی تعریف ہے:

التقوى هي الخوف من الجليل والعمل بالتنزيل والرضا بالقليل والاستعداد ليوم الرحيل

یعنی تقوی اللہ سے ڈرنے، اس کے حکم پر عمل کرنے ، تھوڑی چیز پر قناعت کرنے اور آخرت کی تیاری کرنے کا نام ہے ۔

آج انسان عمل سے کورا اور گناہوں کا رسیا اللہ سے بے خوف ہوجانے کی وجہ سے ہے ، جس کے دل میں خوف الہی ہو وہ آخرت کی فکر اور اس کی تیاری کرتا ہے ۔

(3) موت کو کثرت سے یاد کرنا اپنے اندر فکر آخرت پیداکرنے کے لئے بڑا معاون ذریعہ ہے ، موت دنیاوی زندگی کے خاتمے کا نام ہے، پھر اس کے بعد آخرت کی منزل شروع ہوجاتی ہےاس لئے نبی کریم ﷺ نے موت کو بکثرت یاد کرنے کا حکم دیا ہے ، آپ ﷺ کا فرمان ہے:

أَكْثِرُوا ذِكْرَ هَاذِمِ اللَّذَّاتِ يَعْنِي الْمَوْتََ(صحيح الترمذي:2307)

’’لذتوں کو توڑنے والی چیز یعنی موت کو کثرت سے یاد کرو۔‘‘

آپ ﷺ کے اس فرمان کا مقصد ہے کہ ہم دنیا کی عارضی لذتوں اور شہوتوں سے کنارہ کشی اختیار کریں، اللہ سے تعلق جوڑیں اور موت کو کثرت سے یاد کرکے موت کے بعد کی زندگی کی تیاری کریں ، اسی لئے متعدد اسلاف سے منقول ہے کہ نصیحت کے لئے موت ہی کافی ہے۔ویسے تو اللہ نے بڑے بڑے ظالم کو عبرتناک موت دی ہے لیکن ان سب میں فرعون کی موت کو خصوصی طورپر نشان عبرت بنایا ہے۔

4۔فکر آخرت پیداکرنے میں قبروں کی زیارت بھی اہم ذریعہ ہے، کسی کی موت سے بالفور نصیحت ملتی ہی ہے ساتھ ہی گاہے بگاہے قبرستان جاکران مرنے والوں کی قبروں سے بھی نصیحت حاصل کرنے کا حکم دیا گیا ہے تاکہ انسان میں خوف الہی، نرم دلی اور فکر آخرت پیدا ہو، نبی ﷺ کا فرمان ہے:

كُنْتُ نَهَيْتُكُمْ عَنْ زِيَارَةِ الْقُبُورِ أَلَا فَزُورُوهَا، فَإِنَّهُ يُرِقُّ الْقَلْبَ، وَتُدْمِعُ الْعَيْنَ، وَتُذَكِّرُ الْآخِرَةَ، وَلَا تَقُولُوا هُجْرًا(صحيح الجامع:4584)

’’میں نے تمہیں قبروں کی زیارت سے منع کیا تھا ، اب تم قبروں کی زیارت کرو کیونکہ یہ دلوں کو نرم کرتی ہے، آنکھوں سے خشیت کے آنسو بہاتی ہے اور آخرت یاد دلاتی ہے اور تم وہاں لغو بات نہ کرو۔‘‘

اس حدیث کے پس منظر میں سیدناعثمان رضی اللہ عنہ کی حالت پہ غور کریں،آپ رضی اللہ عنہ جب کسی قبر پرجاتے تو اتنا روتے کہ داڑھی تر ہوجاتی ، آپ سے پوچھا جاتا کہ جنت و جہنم کے ذکر پہ آپ اس قدر نہیں روتے اس پہ کیوں روتے ہیں ؟تو وہ جواب دیتے کہ نبی کریم ﷺ کا فرمان ہے :

إِنَّ الْقَبْرَ أَوَّلُ مَنَازِلِ الْآخِرَةِ، فَإِنْ نَجَا مِنْهُ، فَمَا بَعْدَهُ أَيْسَرُ مِنْهُ، وَإِنْ لَمْ يَنْجُ مِنْهُ، فَمَا بَعْدَهُ أَشَدُّ مِنْهُ» قَالَ: وَقَالَ رَسُولُ اللهِ صَلَّى اللهُ عَلَيْهِ وَسَلَّمَ: «مَا رَأَيْتُ مَنْظَرًا قَطُّ إِلَّا وَالْقَبْرُ أَفْظَعُ مِنْهُ»

آخرت کے منازل میں سے قبر پہلی منزل ہے، سواگر کسی نے قبرکے عذاب سے نجات پائی تواس کے بعد کے مراحل آسان ہوں گے اور اگر جسے عذاب قبر سے نجات نہ مل سکی تو اس کے بعد کے منازل سخت تر ہوں گے، سیدناعثمان رضی اللہ عنہ نے مزید کہاکہ رسول اللہ ﷺ نے ارشاد فرمایا:گھبراہٹ اور سختی کے اعتبار سے قبر کی طرح کسی اورمنظر کو نہیں دیکھا۔ (صحيح ابن ماجه:3461)

قبراور قبرستان ایک بھیانک جگہ ہے ، وہاں اپنے ان دوست واحباب ، رشتے دار اور اعزاء واقرباء کی قبروں کو پاتے ہیں جن کے ساتھ زندگی کے یادگار لمحات گزارے ہوتے ہیں کیا ان کے بچھڑنے کا غم نہیں ہوتا اور ان کی جگہ خود بھی جانے کی فکر پیدا نہیں ہوتی ؟

5۔موت کے بعد جتنے بھیانک مرحلے اور ہولناک مناظر ہیں ان سب پہ غور کیا کریں ۔ ان اسباق کوکتابوں سے اور علماء کے بیانات سے دہرایا کریں ،اس عمل سے آخرت کی تذکیر ہوتی رہے گی اور اس کی فکر پیداہونے میں مدد ملتی رہے گی۔ موت کی سختی، عذاب قبر، محشر کی ہولناکی، نفسی نفسی کا عالم ، حساب کی سختی ، پل صراط کی حقیقت اور جہنمیوں کی بھوک وتڑپ اور شدید سے شدید عذاب کا مطالعہ کرکے یقینا ایک مسلمان تڑپ اٹھے گا اور آخرت کی پریشانیوں اور سختیوں سے بچنے کی فکر کرے گا۔

6۔آخرت کی فکر اور اس کی تیاری میں سب سے بڑی رکاوٹ دنیا کی محبت یا دنیا طلبی ہے ، یہ حقیقت بھی ہے کہ جس کی دنیا جس قدر وسیع اور کشادہ ہے اس کے اندر دینداری کی اتنی ہی قلت ہے اور جس کی دنیا چھوٹی ہوتی ہے اس کے پاس دین زیادہ ہوتاہے۔اس بات کو دوسرے الفاظ میں یہ کہہ سکتے ہیں کہ جس نے دین پر دنیا کو ترجیح دیدی اس نے آخرت کو بھلادیا ، اس حقیقت کو اللہ قرآن میں بایں الفاظ ذکر کررہا ہے ۔

بَلْ تُؤْثِرُوْنَ الْحَيٰوةَ الدُّنْيَاٞۖ۰۰۱۶وَ الْاٰخِرَةُ خَيْرٌ وَّ اَبْقٰى ؕ۰۰۱۷

بلکہ تم دنیاوی زندگی کو ترجیح دیتے ہو جبکہ آخرت بہتر اور باقی رہنے والی ہے ۔ (الاعلی:16-17)

ہمارے عملوں پر تعجب ہے کہ ہم دارفانی اور اس کے لمحہ بھر کی لذتوں کوابدی زندگی اور ابدی سکون وراحت پر ترجیح دیتے ہیں جبکہ اللہ اس دنیا کو مچھر کے پَر برابربھی نہیں اہمیت دیتا ، سیدناسہل بن سعد رضی الله عنہ کہتے ہیں کہ رسول اللہ ﷺنے فرمایا:

لَوْ كَانَتِ الدُّنْيَا تَعْدِلُ عِنْدَ اللهِ جَنَاحَ بَعُوضَةٍ مَا سَقَى كَافِرًا مِنْهَا شَرْبَةَ مَاءٍ

اللہ تعالیٰ کے نزدیک دنیا کی وقعت اگر ایک مچھر کے پَر کے برابر بھی ہوتی تو وہ کسی کافر کو اس میں سے ایک گھونٹ پانی بھی نہ پلاتا۔ (صحيح الترمذي:2320)

7۔آخرت کی فکر اور اس کی تیاری میں ایک بڑی رکاوٹ دلوں کی سختی اور ان میں کفر ومعصیت کی آلودگی کا ہونا بھی ہے ۔ اگر ہم اپنے نفس کا تزکیہ اور دلوں کو کفر ومعصیت اوراخلاق رذیلہ سے پاک وصاف کرلیتے ہیں تو عبرت حاصل کرنے والی چیزوں سے ہمیشہ عبرت حاصل کرسکیں گے ورنہ دلوں کی سختی مانع عبرت کے علاوہ ترک واجبات اور فعل منکرات کا سبب بھی ہےاور اللہ کے یہاں وہی لوگ کامیاب ہوں گے جو اپنے نفس کو اخلاق رذیلہ سے اور دلوں کو شرک ومعصیت کی آلودگیوں سے پاک کریں گے جیساکہ اللہ کا فرمان ہے :

قَدْ اَفْلَحَ مَنْ تَزَكّٰى ۙ۰۰۱۴

’’بے شک اس نے فلاح پالی جو پاک ہوگیا۔‘‘ (الاعلیٰ:14)

8۔دنیا کی زندگی کو مسافر کی طرح گزاریں اس سے ہمارے اندرسے یہاں زیادہ دیر تک رہنے اور پُرتعیش زندگی گزارنےکا خیال جاتا رہے گا اس کی جگہ دل میں ذکر الہی اور فکر آخرت پیدا ہوگی۔یہ حقیقت بھی ہے کہ دنیا میں ہر آنے والا آخرت کے سفر کا مسافر ہے ، اس حقیقت کو جو سمجھ لیتا ہے وہ خود کو دنیا میں مسافر ہی سمجھتا ہے اوردنیاکا ایک مسافر جس طرح اپنا سامان سفر تیار رکھتا ہے کہ نہ جانے کب کوچ کرنا پڑے اسی طرح آخرت کا مسافر دین و ایمان اورعمل وعقیدہ کے ساتھ تیار رہتا ہے کہ نہ جانے کب موت کی سواری آجائے اور آخرت کی طرف کوچ کرجانا پڑے ۔ فکر آخرت کے اسی تناظر میں نبی اکرم ﷺ کا یہ فرمان بھی ہے :

كُنْ فِي الدُّنْيَا كَأَنَّكَ غَرِيبٌ أَوْ عَابِرُ سَبِيلٍ وَعُدَّ نَفْسَكَ فِي أَهْلِ القُبُورِ

تم دنیا میں ایسے رہو گویا تم ایک مسافر یا راہ گیر ہواور اپنا شمار قبر والوں میں کرو۔ (صحيح الترمذي:2333)

مجاہد کہتے ہیں: ابن عمر رضی الله عنہما نے مجھ سے کہا: جب تم صبح کرو تو شام کا یقین مت رکھو اور جب شام کرو تو صبح کا یقین نہ رکھو، اور بیماری سے قبل صحت و تندرستی کی حالت میں اور موت سے قبل زندگی کی حالت میں کچھ کر لو اس لیے کہ اللہ کے بندے! تمہیں نہیں معلوم کہ کل تمہارا نام کیا ہو گا۔

اس حدیث میں دنیا سے بے رغبتی اور دنیاوی آرزوئیں کم رکھنے کا بیان ہے، مفہوم یہ ہے کہ جس طرح ایک مسافر دوران سفر کچھ وقت کے لیے کسی جگہ قیام کرتا ہے، تم دنیا کو اپنے لیے ایسا ہی سمجھو، بلکہ اپنا شمار قبر والوں میں کرو، گویا تم دنیا سے جا چکے، اسی لیے آگے فرمایا: صبح پا لینے کے بعد شام کا انتظار مت کرو اور شام پا لینے کے بعد صبح کا انتظار مت کرو بلکہ اپنی صحت و تندرستی کے وقت مرنے کے بعد والی زندگی کے لیے کچھ تیاری کر لو، کیونکہ تمہیں کچھ خبر نہیں کہ کل تمہارا شمار مردوں میں ہو گا یا زندوں میں۔(منقول ازشرح ترمذی اردو)

9۔قرآن کو تفکر وتدبر کے ساتھ پڑھنا اپنے اندرفکر آخرت پیداکرنے کا ذریعہ ہے ۔ اللہ کی کتاب ہی تو ہدایت کا سرچشمہ اور دنیا وآخرت میں کامیابی کی ضامن ہے ۔ قرآن کو سمجھ کر پڑھنے سے ایک طرف ایمان میں زیادتی پیداہوتی ہے اور اعمال صالحہ کا داعیہ پیدا ہوتا ہے تو دوسری طرف اللہ کا خوف ، نیتوں کی اصلاح اور جہنم سے بچنے کی فکر دامن گیر ہوتی ہے،یہ دونوں کیفیات قرآن کے انذار وتبشیر سے پیدا ہوتی ہیں۔ جب مومن ایمان وعمل اور اس کے بدلے جنت ونعمت کی بشارت پڑھتا ہے تو وہ شوق جنت میں اس کےحصول کی طرف آتا ہے اور جب اللہ کے عذاب ، جہنم اور نافرمانوں کے حالات پڑھتا ہے تو مارے خوف کے جہنم سے بچنے کی فکر کرتا ہے ۔ اس لئے ہمیشہ سمجھ کر قرآن کی تلاوت جاری رکھیں تاکہ جنت کا شوق اور جہنم کا خوف لگارہے ۔

10۔آخری پوائنٹ اس بات کا احساس رہے کہ ہم مسلمان ہیں اور مرتے دم تک اس احساس کی حفاظت کرتے رہیں تاآنکہ موت آجائے ،ایک مسلمان کے سامنے مقصد تخلیق یعنی عبادت الہی رہنا چاہیے اور خلوص کے ساتھ ، سنت کے مطابق اللہ کی بندگی کرتے رہنا چاہیے تاآنکہ موت آجائے ، ان دونوں باتوں کا اللہ نے ہمیں حکم دیا ہے ۔ اللہ کا فرمان ہے :

يٰۤاَيُّهَا الَّذِيْنَ اٰمَنُوا اتَّقُوا اللّٰهَ حَقَّ تُقٰتِهٖ وَلَا تَمُوْتُنَّ اِلَّا وَاَنْتُمْ مُّسْلِمُوْنَ۰۰۱۰۲

اے ایمان والو! اللہ سے اتنا ڈرو جتنا اس سے ڈرنا چاہیے اور دیکھومرتے دم تک مسلمان ہی رہنا۔ (آل عمران:102)

اور فرمان رب العالمین ہے:

وَ اعْبُدْ رَبَّكَ حَتّٰى يَاْتِيَكَ الْيَقِيْنُؒ۰۰۹۹ ’’اوراپنے رب کی عبادت کرتے رہیں یہاں تک کہ آپ کو موت آجائے۔‘‘(الحجر:99)

یہ چند نکات تھے جو فکر آخرت پیدا کرنےمیں معاون ہوں گے ، ان کے علاوہ بھی بہت سارے نکات ان میں داخل کئے جاسکتے ہیں مثلا دلوں کو نرم کرنے والے اور ان میں خوف پیداکرنے والے سارے عملوں سے فکرآخرت کی ترغیب ملے گی حتی آخرت میں ملنے والے ہرقسم کے عیش وآرام سے بھی آخرت کی فکر پیدا ہوگی۔

اللہ تعالی ہمارے اندر فکر آخرت پیدا کردے تاکہ ہم اس کی جیسی تیاری ہونی چاہیے کرسکیں اور آخرت میں نجات پاسکیں۔

محبت کیا ہے؟

مغرب کی اندھی تقلید میں مگن مسلمانوں کے نام ایک چشم کشا تحریر

محبت کیا ہے؟ اوراسلام جذبہ محبت کے بارے میں ہماری کیا رہنمائی کرتا ہے؟

مغرب کی اندھی تقلید میں مگن مسلمانوں کے نام ایک چشم کشا تحریر !

محبت ایک فطری اور طاقتور جذبہ ہے‘ جو کبھی بھی، کسی کو بھی ، کسی سے بھی ہوسکتی ہے۔ محبت دو طرح کی ہوتی ہے: پاکیزہ محبت اور ناپاک محبت۔

پاکیزہ محبت:

پاکیزہ محبت خلوص،ایثار اور وفاداری پر قائم ہوتی ہے اور ہمیشہ پائیدار اور دائمی رہتی ہے۔ اور ہر قسم کے ذاتی مفاد، خود غرضی اور بے وفائی سے پاک ہوتی ہے۔

ناپاک محبت :

خبیث محبت مالی، ذاتی اور جنسی‘ رذیل مفادات، خودغرضی اور بے وفائی پر قائم ہوتی اور ہمیشہ کمزور رہتی اور جلد ختم ہوجاتی ہے،بلکہ اس کا انجام دشمنی پر ہوتا ہے۔

اسلام کا تصورِ محبت:

پوری کائنات میں سب سے زیادہ محبت کا داعی اور فروغِ محبت پر ابھارنے والا مذہب اگر کوئی ہے تو وہ صرف اسلام ہے‘ جس میں محبت کو ایمان کی بنیاد قرار دیا گیا ہے۔

نبی کائنات جناب محمد رسول اللہ ﷺکا ارشادِ گرامی ہے: ’’قسم ہے اس ذات کی جس کے ہاتھ میں میری جان ہے، تم اس وقت تک جنت میں داخل نہیں ہوسکتے‘ جب تک کہ ایمان نہ لے آؤ اور اس وقت تک مومن نہیں بن سکتے‘ جب تک کہ آپس میں محبت نہ کرو،کیا میں تمہیں ایسی چیز نہ بتاؤں جس سے تم آپس میں محبت کرنے لگو گے؟ آپس میں سلام کو فروغ دو۔‘‘ (صحیح مسلم:کتاب الایمان، باب بیان انہ لاید خل الجنۃ الا المؤمنون و ان محبۃ المؤمنین من الایمان )

پیغامِ محبت کا امین‘ دین اسلام چونکہ خود ایک پاکیزہ مذہب ہے، لہٰذا اپنے ماننے والوں کو بھی ہمیشہ اور ہر معاملے میں پاکیزگی اختیار کرنے کا حکم دیتا اور صرف پاکیزگی کو ہی قبول کرتا ہے۔ نبی رحمت رسول اللہ ﷺ کا ارشادِ گرامی ہے: ’’اے لوگو! بے شک اللہ تعالیٰ پاکیزہ ہے اور پاکیزگی کے سوا کوئی چیز قبول نہیں کرتا۔‘‘ (صحیح مسلم: کتاب الزكاة ، باب قبول الصدقة من الکسب الطیب وتربیتھا) 

اسی لئے پاکیزہ محبت صرف وہی لوگ اپناتے ہیں‘ جو اسلام جیسے پاکیزہ دین سے محبت کرتے اور خود بھی مسلمان او ر مومن ہوتے ہیں۔

ہر انسان اپنے ہی جیسے انسان سے محبت کرتا ہے:

ابتدائے کائنات سے یہ ایک مسلمہ قاعدہ چلا آرہا ہے کہ ہر انسان دنیا میں اپنے ہی جیسے کردار کے حامل لوگوں سے محبت کرتا اور ان ہی کی رفاقت کا طالب رہتا ہے۔ جیسے : مشرک، کافر، زانی، شرابی، چور، ڈاکو، قاتل وغیرہ سب گنہگار اپنے ہی جیسے گنہگاروں سے محبت کرتے ہیں، اسی طرح مسلمان اور مومن صرف اللہ اور اس کے رسول صلی اللہ علیہ و سلم  اور دیگر مومنین سے ہی محبت کرتے ہیں۔   اور اللہ تعالیٰ دنیا میں بھی ان لوگوں کو اسی ترتیب سے جمع کرتا ہے اور آخرت میں بھی ان کا انجام انہی لوگوں کے ساتھ ہوگا ‘جن سے وہ دنیا میں دلی محبت کرتے ہوں گے۔  اللہ تعالیٰ کا فرمان ہے:

اَلْخَبِيْثٰتُ لِلْخَبِيْثِيْنَ۠ وَ الْخَبِيْثُوْنَ لِلْخَبِيْثٰتِ١ۚ وَ الطَّيِّبٰتُ لِلطَّيِّبِيْنَ وَ الطَّيِّبُوْنَ لِلطَّيِّبٰتِ١ۚ

’’خبیث عورتیں‘ خبیث مردوں کے لائق ہیں اور خبیث مرد‘ خبیث عورتوں کے لائق ہیں۔ اور پاکیزہ مرد پاکیزہ عورتوں کے لائق ہیں اور پاکیزہ عورتیں پاکیزہ مردوں کے لائق ہیں۔‘‘(النور:26)

یہ تو دنیا میں ان کی اپنے ہی جیسے کرداروں سے باہمی محبت اور میل جول ہے، اسی طرح آخرت میں بھی یہ لوگ اپنے ہی جیسے کرداروں کے ساتھ اٹھائے جائیں گے۔

يَوْمَىِٕذٍ يَّصْدُرُ النَّاسُ اَشْتَاتًا١ۙ۬ لِّيُرَوْا اَعْمَالَهُمْؕ۰۰۶فَمَنْ يَّعْمَلْ مِثْقَالَ ذَرَّةٍ خَيْرًا يَّرَهٗؕ۰۰۷ وَ مَنْ يَّعْمَلْ مِثْقَالَ ذَرَّةٍ شَرًّا يَّرَهٗؒ۰۰۸

’’اس (قیامت کے) دن لوگ (اپنے اعمال کے مطابق) مختلف ٹولیوں کی صورت میں جمع کئے جائیںگے، تاکہ انہیں انکے اعمال دکھادیئے جائیں، پھر جس نے ایک ذرہ برابر بھی نیکی کی ہوگی تو وہ اسے دیکھ لے گا اور جس نے ایک ذرہ برابر بھی برائی کی ہوگی تو وہ اسے بھی دیکھ لے گا۔‘‘(الزلزال:6تا8)

نبی کریم ﷺکا فرمان: ’’(خواب میں)میرے پوچھنے پر جبریل اور میکائیل علیہما السلام نے مجھے بتایا کہ جو منظر آپ کو دکھائے گئے ہیں ان میں سے سب سے پہلے جس شخص پر آپ کا گزر ہوا اور اس کے جبڑے، نتھنے اور آنکھیں گدی تک لوہے کے آلے سے چیری جارہی تھیں‘ یہ وہ شخص تھا جو صبح کے وقت گھر سے نکلتا تھا تو جھوٹی خبریں گھڑتا تھا‘ جو ساری دنیا میں پھیل جاتی تھیں اور دوسرے برہنہ مرد اور عورتیں جو آپ نے تنور میں جلتے ہوئے دیکھے وہ زانی مرد اور عورتیں تھیں اور تیسرا وہ شخص جو خون کی ندی میں غوطے کھارہا تھا اور جس کے منہ میں بار بار پتھر ڈالے جارہے تھے یہ وہ شخص تھا جو دنیا میں سود خور تھا۔‘‘ (صحیح بخاری: الجنائز، باب ماقیل فی اولاد المشرکین)

نبی مکرم ﷺکا ارشادِ گرامی ہے: ’’(قیامت کے دن)آدمی اس کے ساتھ ہو گا جس کے ساتھ (دنیا میں) محبت کی ہوگی۔‘‘ (صحیح بخاری: کتاب الادب، باب علامۃ حب اﷲ عزوجل)

مذکورہ دلائل سے یہ بات ثابت ہوچکی ہے کہ قیامت کے دن ہر انسان کاانجام اس کی دنیوی دوستی، محبت اور اعمال کی بنیاد پر ہوگا اور ہر ایک اپنے ہی قبیلے کے فرد کے ساتھ یاتو سخت ترین عذاب دیاجائے گا یا پھر بہترین نعمتوں میں ہوگا۔

پاکیزہ محبت کے مستحق کون؟

اسلامی اعتبار سے پاکیزہ محبت کی سب سے زیادہ حقدار اللہ تعالیٰ کی ذات ہے، پھر اللہ کے حبیب جنابِ محمد رسول اللہ ﷺکی ذاتِ اقدس اور اس کے بعد تمام اہل ایمان۔  ان محبتوں کا حصول ہر مسلمان پر فرض ہے، اس کے بغیر ایمان مکمل نہیں ہوتا۔  اللہ تعالیٰ کا ارشاد ہے:

اِنَّمَا وَلِيُّكُمُ اللّٰهُ وَرَسُوْلُهٗ وَالَّذِيْنَ اٰمَنُوا الَّذِيْنَ يُقِيْمُوْنَ الصَّلٰوةَ وَيُؤْتُوْنَ الزَّكٰوةَوَهُمْ رٰكِعُوْنَ۰۰۵۵ وَ مَنْ يَّتَوَلَّ اللّٰهَ وَرَسُوْلَهٗ وَ الَّذِيْنَ اٰمَنُوْا فَاِنَّ حِزْبَ اللّٰهِ هُمُ الْغٰلِبُوْنَؒ۰۰۵۶ (المائدۃ:55۔56)

’’بے شک تمہارے دوست تو صرف اللہ، اسکا رسولﷺ اور وہ اہل ایمان ہیں‘ جو نماز قائم کرنے، زکوٰۃ ادا کرنے اور اللہ کے آگے جھکنے والے ہیں۔ اور جو شخص اللہ، اس کے رسولﷺ اور اہل ایمان کو اپنا دوست بنالے‘ وہ یقین مانے کہ اللہ کا گروہ ہی غالب رہنے والا ہے۔ ‘‘

نبی ٔ رحمت ﷺ کا فرمانِ مبارک ہے:’’تم مومن کے علاوہ کسی کو اپنا دوست نہ بناؤ۔ ‘‘(ابو داؤد: کتاب الادب، باب من یؤمران یجالس) 

’’آدمی اپنے دوست(محبوب) کے دین پر ہوتا ہے، لہٰذا ہر آدمی کو یہ دیکھنا چاہیے کہ وہ کسے اپنا دوست بنا رہا ہے؟‘‘ (حوالہ مذکورہ بالا)

دین اسلام ہر معاملہ میں اُخروی کامیابی کو اہمیت دیتا ہے، اس لحاظ سے ہر مسلمان کو کسی سے بھی محبت کرنے سے پہلے اسکے اُخروی انجام پر غور کرنا ضروری ہے۔

پاکیزہ محبت ہی ذریعہ نجات ہے !

اصل محبت وہی ہے جو بے غرض ہو،پرخلوص ہو اور ہمیشہ سلامت رہے۔ اور اس سے زیادہ پائیدار اور دائمی محبت اور کیا ہوسکتی ہے کہ جو نہ صرف دنیا، بلکہ آخرت میں بھی کارآمد ہو اور نجات کا ذریعہ بن جائے۔ اللہ تعالیٰ کا ارشاد ہے:

اَلَاۤ اِنَّ اَوْلِيَآءَ اللّٰهِ لَا خَوْفٌ عَلَيْهِمْ وَ لَا هُمْ يَحْزَنُوْنَۚۖ۰۰۶۲ الَّذِيْنَ اٰمَنُوْا وَ كَانُوْا يَتَّقُوْنَؕ۰۰۶۳ لَهُمُ الْبُشْرٰى فِي الْحَيٰوةِ الدُّنْيَا وَ فِي الْاٰخِرَةِ١ؕ لَا تَبْدِيْلَ لِكَلِمٰتِ اللّٰهِ١ؕ ذٰلِكَ هُوَ الْفَوْزُ الْعَظِيْمُؕ۰۰۶۴

’’خبردار! اللہ کے وہ دوست جو اللہ پر ایمان لائے اور پرہیزگار بن کر رہے ، ان کیلئے کسی قسم کا خوف اور غم نہیں ہوگا، ان کیلئے دنیا اور آخرت میں بھی بشارتیں ہی ہیں۔ اللہ کی باتیں کبھی نہیں بدلتیں۔ یہ بہت بڑی کامیابی ہے۔‘‘ (یونس :62تا64)

رسول اللہ ﷺنے فرمایا: ’’اللہ کے بندوں میں سے کچھ لوگ ایسے ہیں‘ جو نہ نبی ہیں اور نہ شہداء، لیکن قیامت کے روز اللہ تعالیٰ انہیں ایسے درجات سے نوازے گا جن پر انبیاء اور شہداء بھی فخر کریں گے۔ صحابہ رضوان اللہ علیہم اجمعین  نے عرض کیا ‘ اے اللہ کے رسول ﷺ! وہ کون لوگ ہونگے؟ آپ ﷺنے ارشاد فرمایا: یہ وہ لوگ ہونگے جو بغیر کسی رشتہ یا مالی لین دین کے محض اللہ کی رحمت(رضا) کے حصول کی خاطر ایک دوسرے سے محبت کرتے ہیں۔ اللہ کی قسم! انکے چہرے نورانی ہونگے اور وہ نور کے منبروں پر ہونگے۔ جب لوگ خوف زدہ ہونگے تو انہیں کسی قسم کا کوئی خوف نہیں ہوگا۔ جب لوگ غم زدہ ہونگے تو یہ بے غم ہونگے۔ اسکے بعد رسولِ اکرمﷺنے یہ (مذکورہ، یونس:62تا64) آیت تلاوت فرمائی۔‘‘ (سنن ابی داؤد: کتاب البیوع، باب فی الرھن)

ناپاک محبت کا بدترین انجام

دنیا میں اپنی خودساختہ دوستیوںپر فخر کرنے والے ، اپنے محبوبوں کی قربت کی چاہت میں اپنی آخرت برباد کرنے والے اور انکے اشارۂ ابرو پر اپنا سب کچھ قربان کرنے کے دعویدار قیامت کے دن آپس میں بدترین دشمن بن جائینگے ، اپنی محبت کے اس بدترین انجام پر ایک دوسرے کو مورودِ الزام ٹھہرائینگے اور اپنی حرکتوں پر شرمندگی و پشیمانی کا اظہار کرینگے۔

ذرا پڑھئے کہ اللہ کا سچا کلام قیامت کے دن کا کیا نقشہ کھینچتاہے:

اَلْاَخِلَّآءُ يَوْمَىِٕذٍۭ بَعْضُهُمْ لِبَعْضٍ عَدُوٌّ اِلَّا الْمُتَّقِيْنَؕؒ۰۰۶۷

’’بہت ہی گہرے دوست اس (قیامت کے) دن ایک دوسرے کے دشمن ہوں گے، سوائے پرہیزگاروں کے۔‘‘(الزخرف:67)

وَ يَوْمَ يَعَضُّ الظَّالِمُ عَلٰى يَدَيْهِ يَقُوْلُ يٰلَيْتَنِي اتَّخَذْتُ مَعَ الرَّسُوْلِ سَبِيْلًا۰۰۲۷ يٰوَيْلَتٰى لَيْتَنِيْ لَمْ اَتَّخِذْ فُلَانًا خَلِيْلًا۰۰۲۸ لَقَدْ اَضَلَّنِيْ عَنِ الذِّكْرِ بَعْدَ اِذْ جَآءَنِيْ١ؕ وَ كَانَ الشَّيْطٰنُ لِلْاِنْسَانِ خَذُوْلًا۰۰۲۹

’’اس (قیامت کے) دن ظالم اپنے ہاتھوں کو (احساسِ ندامت سے) چبا چبا کر کہے گا ‘ ہائے کاش! میں نے رسول(ﷺ) کا راستہ اختیار کیا ہوتا۔ ہائے افسوس‘ کاش میں نے فلاں کو اپنا دوست نہ بنایا ہوتا۔اس نے میرے پاس نصیحت آجانے کے بعد بھی مجھے گمراہ کردیا اور شیطان تو انسان کو (وقت پر) دغا دینے والا ہے۔‘‘(الفرقان :27تا29)

ویلنٹائن ڈے کی حقیقت

ویلنٹائین  ڈے کے متعلق کئی متضاد روایات تاریخی کتب میں موجود ہیں، مگر ان میں سے اکثر سے زیادہ من گھڑت قصہ کہانیوں پر مشتمل ہیں۔

بعض روایات معروف تحقیقی ادارے ’’Britannica  Encyclopedia ‘‘ کے حوالے سے ملتی ہیں، جنہیں پڑھ کر یہ معلوم ہوتا ہے کہ یہ دن عیسائیوں کے کیتھولک فرقے کی مذہبی رسومات کا ایک خاص دن ہے۔ اصل لفظ ’’Valentine Saint‘‘ہے۔ یہ لاطینی زبان کا لفظ ہے۔ ’’Saint ‘‘کاترجمہ ’’بزرگ‘‘ہے، جو پادریوںکیلئے بولا جاتا ہے۔ عیسائیوں کے کیتھولک فرقے کے لوگوں کا یہ عقیدہ ہے کہ ہر سال 14، فروری کو  ’’Valentine  ‘‘ نامی پادریوں کی روحیں دنیا میں آتی ہیں، اس لئے وہ اس دن کے تمام معمولات‘ بشمول عبادات و نذر و نیاز انہی کے نام سے سرانجام دیتے ہیں۔ اس عقیدے کی ابتداء رومیوں سے ہوئی۔ پھریہ دن فرانس اور انگلینڈ میں بھی بطورِ خاص منایا جانے لگا اور اس دن فرانس، انگلینڈ اور دیگر مغربی ممالک میں تعطیل ہوتی ہے اور وہ اس دن اپنی عبادت گاہوں میں خاص قسم کی عبادات سرانجام دیتے ہیں۔ اس رسم کے غیر معقول ہونے اور دنیائے عیسائیت کے معتبر پادریوں کی مخالفت کی وجہ سے یہ دن بالکل معدوم ہوچکا تھا، چودھویں صدی عیسویں کے ایک متعصب عیسائی اسکالر ’’Henry Ansgar Kelly ‘‘نے اپنی ایک کتاب (انٹرنیٹ پر دستیاب ہے)  ’’Chaucer and the Cult of Saint Valentine ‘‘ کے نام سے خاص اسی موضوع پر لکھی اور عشق و محبت کی خودساختہ کہانیوں کے ذریعے اسے محبت کے دن کے نام سے دوبارہ دنیا میں روشناس کروایا۔ اٹھارھویں صدی میں اسے فرانس اور انگلینڈ میں سرکاری سرپرستی حاصل ہوئی اور پھر رفتہ رفتہ عشق و محبت کا یہ خودساختہ دن دنیا بھر میں ہر سال مزید جدت اور جوش و خروش کے ساتھ منایا جانے لگا ۔ 

(مزید تفصیل کیلئے دیکھئے: http://en.wikipedia.org/wiki/Saint_Valentine وغیرہ)

پس پردہ حقائق

اس دن کی تاریخی حیثیت اور اسے منانے کا موجودہ طریقہ ہمیں اس کے جن مضمرات اور پس پردہ حقائق کو سمجھنے میں مدد فراہم کرتا ہے‘ وہ یہ ہیں: 

یہ دن عیسائیوں کی ایجاد ہے جوکہ ان کی مشرکانہ عبادت کا دن ہے خود عیسائی پادری بھی اسکے مخالف ہیں ڈاس کے معدوم ہونے کے بعد ایک متعصب عیسائی اسکالر نے اسے دوبارہ زندہ کیا۔ اوراسے عیسائی ممالک میں سرکاری سرپرستی میںمنایا جاتا ہے۔ ‘اس دن کی اہمیت میں بیان کی جانے والی عشق و محبت کی تمام داستانیں جھوٹی ہیں۔

موجودہ دور میں اس کو منانے والا عموماً ہم جنس پرست، زانی ، فحاشی پسند اور مغرب نواز طبقہ ہی ہے اور ایسے ہی لوگوںمیں اس دن کو بطورِ خاص اہمیت حاصل ہے، یعنی یہ ناپاک لوگوں کا تہوار ہے۔ 

یہودی، عیسائی اور تمام کفار و مشرکین اسلام اور مسلمانوں کے ازلی و ابدی دشمن ہیں، اسلام اور مسلمانوں کو مٹانے کے معاملے پر یہ تمام قولی و عملی طور پر متفق و متحد ہیں۔ ایک طرف مسلمان ملکوں پر ناجائز قبضے اور ان پر تباہ کن بم برساکر ان کے خلاف قتل و غارت گری کا بازار گرم کیا ہواہے، دوسری طرف ان کی عورتیں اور بچے اغوا کر کے ان سے جبراً حرام کاری کروائی جارہی اور  ُپر مشقت کام لئے جارہے ہیں اور تیسری طرف اسلام کو غیرمہذب، قدامت پسند اور بنیاد پرست مذہب قرار دیکر اپنی غلیظ اور ناپاک تہذیب کو جدید اور اعتدال پسند ظاہر کیا جارہا اور اسے مسلمانوں میں فروغ دے کر ان کی ایمانی غیرت و حمیت کو ختم کر کے نوجوان مسلمان مردوں اور عورتوں میں جنسی بے راہ روی کو عام کرنے کی بھرپور کوششیں کی جارہی ہیں۔ ان تمام باتوں کی صداقت ان کی کتابوں اور روزمرہ کے بیانات میں روزِ روشن کی طرح عیاں ہے۔ 

پس اے مسلمانو! کفار کی ان سازشوں کا مقابلہ اسلام سے محبت کی صورت میں کرو، تمہارا اپنے دین سے محبت، اس پر ایمان اور عمل انکی سازشوں کوانکے اپنے خلاف پھیر سکتا ہے، لہٰذا آج سے ہی ہر معاملے میں کفار سے مشابہت اور انکی رسومات میں شرکت اپنے اوپر حرام کر دو۔ اللہ مسلمانوں کا حامی و ناصر ہو۔ وما علینا الا البلاغ المبین

قوم یہودچالبازیوں، مکاریوں ، ریشہ دوانیوں اور ظلم و بربریت کا وہ عفریت ہے جس نے پوری دنیا اور خصوصاً عالم اسلام کا جینا حرام کیا ہوا ہے۔درندگی، سفا کیت اور غیر انسانی سلوک اس قوم کی فطرتِ ثانیہ ہے۔مسلمانوں کے خون کا پیاسا اسرائیل اپنی دفاعی قوت اور عالمی طاقتوں کی پشت پناہی کے بل پر گھمنڈ، تکبراور حیوانیت کی تمام حدیں پھلانگ گیا ہے۔

اگر قوم یہود کی تاریخ پر نظر ڈالیں تو یہ حقیقت واضح ہوگی کہ انیسویں صدی کے آخر میں شروع ہونے والی ایک منظم اور مربوط تحریک ’’ زاؤ نسٹ تحریک ‘‘ تھی۔جس کا بانی مشہور یہودی لیڈر تھیوڈور ہر تزل (Hartzl  )تھا۔ یہ ایک ایسی تحریک تھی جس نے تہذیب و شا ئستگی اور اعلیٰ انسانیت کے معیارات اور تقاضوں کو یکسر بدل دیا۔اور اس میں یہ طے کیا گیا کہ فلسطین پر دوبارہ قبضہ کر کے ہیکل سلیمانی کی تعمیر کی جائے۔یہودی سرمایہ داروں نے اس غرض کے لیے بڑے پیمانے پر مالی امداد فراہم کی کہ فلسطین منتقل ہونے والے یہودی خاندان وہاں زمینیں خریدیں  اور منظم طریقے سے اپنی بستیاں بسائیں۔پھر 1901ء میں ہر تزل نے سلطان عبد الحمید خان (سلطان ترکی) کو باقاعدہ پیغام بھیجا کہ یہودی ترکی کے تمام قرضے ادا کرنے کو تیار ہیں، آپ فلسطین کو یہودیوں کا قومی وطن بنانے کی اجازت دے دیں۔ مگر سلطان نے اس پیغام پرکسی ڈر اور خوف کے بغیر صاف کہہ دیا کہ ’’ جب تک میں زندہ ہوں اور جب تک ترکی سلطنت  موجود ہے اس کا کوئی امکان نہیں ہے کہ فلسطین یہودیوں کے حوالے کیا جائے۔تمہاری ساری دولت پر میں تھوکتا ہوں۔‘‘ چناں چہ اس واقعہ کے فوراً ہی بعد سلطان عبد الحمید کی حکومت کا تختہ الٹنے کی سازشیں شروع ہو گئیں ۔ اس سازش میں فری میسن اور وہ مسلمان نوجوان شریک تھے جو مغربی تعلیم کے زیر اثر آکر ترکی قوم پرستی کے علمبردار بن گئے تھے۔ان لوگوں نے ترکی فوج میں اپنے اثرات پھیلائے اور سات سال کے اندر ان کی سازشیں پختہ ہو کر اس منزل پر پہنچ گئیں کہ سلطان عبدالحمید کو معزول کر دیا گیا۔در اصل ہر وہ چیز اور اصول جو یہودی قوم کے مفاد میں ہو، وہ جائز اور اچھائی کی سند رکھتی ہے۔خواہ انہیں اس کے حصول کے لیے پوری عالم انسا نیت کو تہہ تیخ کرنا پڑے تو بھی کوئی مضائقہ نہیں ۔

  14 مئی  1948 ء کوعین اس وقت جب کہ اقوام متحدہ کی جنرل اسمبلی فلسطین کے مسئلے پر بحث کر رہی تھی ، یہودی ایجنسی نے رات کے دس بجے اسرائیلی ریاست کے قیام کا باقاعدہ اعلان کر دیا۔جس میں اندرونی طور پر برطانیہ اور امریکا کی پوری سرپرستی اسرائیل کو حاصل تھی یہی وجہ ہے کہ سب سے پہلے امریکا اور روس نے آگے بڑھ کر اس کو تسلیم کیا۔ حالانکہ اس وقت تک اقوامِ متحدہ نے یہودیوں کو فلسطین میں اپنی قومی ریاست قائم کرنے کا مجاز نہ کیا تھا۔اس اعلان کے وقت تک 6  لاکھ سے زیادہ عرب گھر سے بے گھر کیے جا چکے تھے، اور اقوام متحدہ کی تجویز کے بالکل خلاف یرو شلم (بیت المقدس) کے آدھے حصے پر اسرائیل قبضہ کر چکا تھا۔ اسرائیل کے قیام کے موقع پر بانی پاکستان قائد اعظم محمد علی جناح  نے یہ تاریخی جملہ کہا تھا کہ  ’’Israel is an illegitimate child of the west‘‘ یعنی اسرائیل مغرب کا ناجائز بچہ ہے!پاکستان کے پہلے وزیر اعظم لیاقت علی خان نے اپنے دورۂ امریکا کے دوران یہودیوں کی طرف سے متعدد مالی مراعات کی پیش کش کے جواب میں فرمایا تھا:   «Gentlemen!our souls are not for sale»  (ہماری روحیں بکاؤ مال نہیں ہیں)

غور طلب بات یہ ہے کہ برطانیہ اور امریکا دونوں عیسائی قومیں ہیں جن کا عیسیٰ علیہ السلام کی بعثت سے لے کر برسوں یہودیوں سے شدید اختلاف رہا ہے اور ایک دوسرے کے خون کے پیاسے تھے۔یہاںتک کہ بیت المقدس کی فتح کے موقع پر عیسائیوں نے سیدنا عمر بن خطاب رضی اللہ عنہ  سے درخواست کی تھی کہ آپ یہودیوں کو ہر گز یہاں آباد نہ ہونے دیں، سیدنا عمرفاروق رضی اللہ عنہ نے ان کی درخواست کے مطابق یہودیوں کو بیت المقدس میں رہائش اختیار کرنے کی تو اجازت نہیں دی البتہ ان کے ساتھ یہ رعایت برتی کہ وہ خرید و فروخت کے لیے یہاں آ جا سکتے ہیں۔اس واقعہ سے عیسائیوں کی یہود دشمنی اور مسلمانوںکی اعلیٰ ظرفی اور نرمی کا ثبوت ملتا ہے ۔جنگ عظیم سے پہلے جب یہودی جرمن میں آباد تھے تو برلن کے ہوٹلوں میں بورڈ آویزاں تھے جن پر جلی حروف میں لکھا ہوتا تھا  ’’ کتا اور یہودی اس ہوٹل میں داخل نہیںہو سکتا‘‘۔  جرمنوں نے ان یہودیوں کو ’’ دنیا کی قوموں کا خون چوسنے والی قوم‘‘  قرار دیا تھا ۔اور اس سے انگلستان کے باشندوں کو بھی کوئی انکار نہیں تھا۔ لیکن عیسائی اور یہود کے شدید اختلاف کے باوجود آج مسلمانوں کی نسل کشی اور سفاکیت میں دونوں قومیںاپنے اختلافات کو بھلا کر ایک پلیٹ فارم پر آگئی ہیں۔ازروئے قرآن حکیم:

يٰۤاَيُّهَا الَّذِيْنَ اٰمَنُوْا لَا تَتَّخِذُوا الْيَهُوْدَ وَالنَّصٰرٰۤى اَوْلِيَآءَ١ؔۘ بَعْضُهُمْ اَوْلِيَآءُ بَعْضٍ١ؕوَمَنْ يَّتَوَلَّهُمْ مِّنْكُمْ فَاِنَّهٗ مِنْهُمْ١ؕاِنَّ اللّٰهَ لَا يَهْدِي الْقَوْمَ الظّٰلِمِيْنَ۰۰۵۱

’’ اے ایمان والو! یہود اور نصاریٰ کو دوست نہ بناؤ، وہ آپس میں ایک دوسرے کے دوست ہیں،اور جو کو ئی تم میں سے ان کے ساتھ دوستی کرے تو وہ انہیں میں سے ہے۔ اور اللہ ظالموں کو ہدایت نہیں دیتا۔‘‘ (المائدہ51)

یہودی مملکت کے قیام سے لے کر آج تک اسرائیل کا وجود عالم انسانیت پر سرطان کے پھوڑے کی مانندپھیلتا جارہا ہے اور اس کی زہر آمیزی دنیا کی ہر قوم اور خاص طور پر امت مسلمہ کے لیے انتہائی ہلاکت خیز بنی ہوئی ہے۔اور امن عالم کا بہت بڑا ٹھیکے دار امریکا انسانی حقوق کی پا مالی اور ظلم و دہشت گردی پر خا موش تماشائی بنا ہوا ہے اور صیہونیوں کی پیٹھ تھپتھپا رہا ہے۔

پہلی جنگ عظیم کی بنیادی وجہ بھی یہودی حکومت کا با لفعل قیام تھا۔تاہم فلسطین کا قیام ہی ان کی اصل غرض و غایت نہیں تھی بلکہ یہودیت کے علاوہ تما م مذاہب کا خاتمہ، تمام غیر یہودی اقوام کو اپنا غلام اور اپنا دست نگر رکھنا ان کے ایجنڈے کا اصل منشور تھا اورہے۔   اپنے نسلی تفاخر کے سبب وہ جینے کا حقدار صرف یہودی قوم کو سمجھتے ہیں۔نزولِ قرآن کے وقت بھی وہ اللہ کی چہیتی قوم ہونے کے دعوے کر تے تھے۔ جس پر قرآن نے ان کے اس جھوٹے دعوے کی تردید کرتے ہوئے یوں تبصرہ کیا:

وَقَالُوْا لَنْ تَمَسَّنَا النَّارُ اِلَّاۤ اَيَّامًا مَّعْدُوْدَةً١ؕ قُلْ اَتَّخَذْتُمْ عِنْدَ اللّٰهِ عَهْدًا فَلَنْ يُّخْلِفَ اللّٰهُ عَهْدَهٗۤ اَمْ تَقُوْلُوْنَ عَلَى اللّٰهِ مَا لَا تَعْلَمُوْنَ۰۰۸۰

اور یہ کہتے ہیں (دوزخ کی) آگ ہمیں چند روز کے سوا چھو ہی نہیںسکے گی۔ان سے پوچھو کیا تم نےاللہ سے اقرا ر لے رکھا ہے کہ اللہ اپنے اقرار کے خلاف نہیں کرے گا۔(نہیں) بلکہ تم اللہ کے بارے میں ایسی باتیں کہتے ہو، جن کا تمہیں مطلق علم نہیں ۔( البقرہ 80)

آگے چل کر سورۃ البقرہ ہی کی آیت 94 میں ارشاد فرمایا:

قُلْ اِنْ كَانَتْ لَكُمُ الدَّارُ الْاٰخِرَةُ عِنْدَ اللّٰهِ خَالِصَةً مِّنْ دُوْنِ النَّاسِ فَتَمَنَّوُا الْمَوْتَ اِنْ كُنْتُمْ صٰدِقِيْنَ۰۰۹۴

’’ (اے نبیﷺ) کہہ دو اگرآخرت کا گھر اور لوگوں (مسلمانوں) کے لیے نہیں ہے اور اللہ کے نزدیک تمہارے لیے ہی مخصوص ہے تو اگر سچے ہو تو موت کی آرزو تو کرو۔‘‘

انسانی تاریخ میںدوسری جنگ عظیم کا ذمہ دار عام طور پر پر جرمن کے ڈکٹیٹر ہٹلر کو قرار دیا جاتا ہے جب کہ حقیقت یہ ہے کہ اس تباہ کن جنگ کے پس منظر میں بھی یہودی سوچ کار فرما تھی ۔وہ سمجھتے تھے کہ جرمن قوم کی مکمل تباہی دنیا میں ہماری کامیابی کی ضامن ہے۔ امریکا میں ان کا اثر و رسوخ اپنی جڑیں اتنی مضبوط کر چکا ہے کہ ان کا دعویٰ ہے کہ وہ ایک دن میں پورے واشنگٹن کو نذر آتش کر سکتے ہیں۔ اسی لیے علامہ اقبال نے کہا تھا کہ ’’ فرہنگ کی رگِ جاں پنجہ یہود میں ہے‘‘۔یہودی اپنی مکاری اور عیاری کے سبب امریکا میں اپنے ہاتھ اتنے مضبوط کر چکے ہیں کہ وہاں کے ریاستی ڈھانچے میں عزل و نصب کے تمام فیصلوں میں کلیدی مقام رکھتے ہیں۔

کسی کو جنگ کی آگ میں جھونک دینا اور کسی کو اس آگ میں سے بحفاظت نکال لینا قوم یہود کے لیے بائیں ہاتھ کا کھیل ہے۔در حقیقت یہ صرف اسلام ہی کے نہیں بلکہ عیسائیت، بدھ مت ،ہندو مت ہر غیر یہودی مذہب کے خلاف اپنے دل میں کینہ رکھتے ہیں۔ اپنی طویل تاریخ اور حکمرانی کے باوجود دنیا میں یہودیوں کی تعداد بہت تھوڑی ہے، اور ہمیشہ تھوڑی ہی رہی ہے۔ سیدنا داؤد علیہ السلام اور سلیمان علیہ السلام کے زمانے میں جو ان کے شان و شوکت اور عروج کا زمانہ تھا ، اس وقت بھی ان کی تعداد 10 لاکھ سے زیادہ نہیںتھی۔ عددی اعتبار سے وہ سب سے زیادہ عروج پر جنگِ عظیم دوئم سے قبل تھے۔ اس وقت ا ن کی تعداد ڈیڑھ کروڑ تھی ، یہودیوں کے دعوے کے مطابق اب ان کی تعداد دو کروڑ ہے۔گویا دنیا کی دیگرا قوام کے مقابلے میں وہ مٹھی برابر ہیں۔مگر اپنی عیاریوں، فتنہ انگیزیوں اور ریشہ دوانیوں سے انہوں نے ہر قوم کو اپنا غلام بنا رکھا ہے۔اوریہ غلام انہیں ان قوموں کے اندر ہی سے مل جاتے ہیں جنہیں وہ غلام بنانا چاہتے ہیں۔ جنگ عظیم میں جاپان جرمن کا اتحادی تھا ، امریکا سے اس کو کوئی خطرہ نہیں تھا، مگر یہود کی مکاری اور روباہی فطرت نے وہاں بھی کام دکھایا اور جاپان کی سپلائی لائن کاٹ کر حالات کا رخ کچھ اس طرح موڑا کہ وہ ’’پرل ہاربر‘‘ پر حملہ کرے اور امریکا اس جنگ میں کود پڑنے پر مجبور ہوجائے۔1967 ء کی عرب اسرائیل جنگ میں اسرائیلی گن بوٹس نے امریکی جہاز یو ایس لبرٹی کو ڈبو کر الزام عربوں پر لگا دیا  ۔ 9/11 کاڈرامہ بھی در اصل یہودیوں کے مکارانہ ذہن کی پیدا وار ہے۔جس کو جواز بنا کر افغانستان کی تباہی کے ذریعے سے عالم اسلام کی مجموعی حیثیت کے مکمل خاتمے کا آغاز کر دیا۔

یہ دنیا اسباب و علل کی دنیا ہے، مسلمانوں کی ذہنی غلامی کی وجہ ترک اجتہاد ہے۔ مسلمان جب تک تحقیق و اجتہاد کے میدان میں آگے بڑھتے رہے تمام دنیا کی قومیں ان کی پیروانِ مقلد رہیں۔جب وہ اکتسابِ عمل اور اجتہاد و فکر کی راہ سے تھک کر بیٹھ گئے ، تو گویا انہوں نے خود ہی د نیا کی راہ نمائی سے استعفا دے دیا۔نتیجہ یہ ہوا کہ مسلمان ، مسلمان تو رہنا چاہتے ہیں مگر ان کے دماغ مغربی تہذیب سے متاثر ہوکر اسلام سے منحرف ہورہے ہیں ۔اجتہاد کی مشکل جب تک حل نہیں ہوگی ، اس وقت تک مسلمانوں میں آزاد اہل فکر پیدا نہ ہوںگے۔ کیوں کہ اپنے عقائد و نظریات کی مضبوطی اور ان پر عمل پیرا ہونے کے لیے انسان کے جسم سے زیادہ اس کی فکر ی آزادی ضروری ہے۔ ورنہ تو اس وقت کم و بیش ساٹھ فیصد مما لک جسمانی طور پر کسی قید و بند کے پابند نہیں ہیں۔لیکن فکری، ذہنی اور قلبی طور پر آج بھی انہیں قوموں کے غلام ہیں جن سے انہوں نے آ زادی حاصل کی تھی۔

دین و اخلاق اور تہذیب و تمدن بلند تر انسانیت سے تعلق رکھتی ہیں۔اور ان کی قدر و منزلت وہی لوگ کر سکتے ہیں جو حیوانیت سے بالا تر ہوں ۔پیٹ ، روٹی ، کپڑا، آسائش بدن اور لذّاتِ نفس وہ چیزیں ہیں جو انسان کی حیوانی ضروریات سے تعلق رکھتی ہیں ، اور جب انسان مقام حیوان سے قریب تر ہوتا ہے تو اس کی نگاہ میں یہی چیزیں زیادہ اہم ہوتی ہیں، حتیٰ کہ وہ ان کی خاطر بلند تر انسانیت کی ہر متاع ِ گراں مایہ کو نہ صرف قربان کر دیتا ہے بلکہ حیوانی زندگی کی آخری حدوں پر پہنچ کر اس میں یہ احساس باقی نہیں رہتاکہ میرے لیے کوئی چیز ، ان چیزوں سے اعلیٰ اور ارفع ہوسکتی ہے۔کہا وت ہے کہ ’’ جانور بھوکا ہو تو خطرناک ہوتا ہے ، مگر انسان کا پیٹ بھر جائے تو وہ زیادہ خطرناک ہوجاتا ہے‘‘۔

کسی بھی ملک کی ترقی اور خوشحالی کی ضامن اس کی معیشت کو قرار دیا جاتا ہے۔بدقسمتی سے دنیا کے معاشی نظام میں یہود کو مکمل بالا دستی حاصل ہے۔کیوں کہ ان کے نزدیک جائز اور نا جائز کا تو کوئی تصور ہی نہیںہے۔جو کچھ یہود کے عظیم تر مفاد میں ہے وہ ہر طرح سے جائز اور حلال ہے۔بینکوں کا سارا نظام پھر اس میں سودی لین دین کا پورا جال اسی قوم کا بچھایا ہوا ہے۔یہود کی چالبازیوں اور تزویراتی ہتھکنڈوں کے سبب امریکا جیساا میر ترین اور سوپر پاور قرضوں کے جال میں بری طرح جکڑا ہو ہے۔

یہود کا ایک موثر ہتھیار عالمی میڈیا پر مکمل کنٹرول ہے۔گزشتہ صدی میں بھی ذرائع ابلاغ پر ان کا اتنا مضبوط کنٹرول تھا کہ اس نے جرمن قوم کو دنیا کے سامنے ظلم و بربریت کی علامت بنا کر پیش کیا۔جھوٹ گھڑنا،الزام تراشی، افواہیں پھیلانا اور اپنی مخالف قوموں کے خلاف پروپیگنڈا کر نا اس قوم کی گھٹی میں پڑا ہوا ہے۔اور انہیں ہتھکنڈوں سے یہ دنیا میں اپنے وجودکو قائم رکھے ہوئے ہے۔

قومِ یہود کی اسلام دشمنی،بغض و عداوت اور کینہ پروری کی شروعات نبی پاک ﷺ کی بعثت کے وقت سے ہی ہوگئی تھی جس کا تسلسل تاحال جاری ہے۔مدینہ منورہ میں آپ ﷺ کی تشریف آوری اور پھر وہاں ایک اسلامی فلاحی ریاست کے قیام نے ان کے روح و بدن میںنفرت و انتقام کی کبھی نہ بجھنے والی آگ لگا دی تھی جس کی تپش اور جلن آج تک ان کے وجود کو سوختہ کرتی رہتی ہے۔اور اس جلن اور تپش کو یہ مسلمانوں کا خون بہا کر کم کرنے کی اپنی سی کوشش کرتے رہتے ہیں۔اور امت مسلمہ کوسیا سی، معاشی اور سماجی سطح پر کمزور کرنے اور ان کی نسل کشی کرنے کے دور رس منصوبے بنا تے رہتے ہیں۔اور اپنے ان ناپاک ارادوں کی تکمیل کے لیے امت مسلمہ کے اندر سے ہی انہیں دست و بازو مہیا ہوجاتے ہیں۔حبّ جاہ اور حبّ مال نے مسلم اقوام کی اکثریت کو ان کے در کا بھکاری بنایا ہوا ہے۔عالم اسلام میں جو طبقہ جتنا با اثر ہے اتنا ہی وہ عملی اور فکری طور پر مغرب کا غلام ہے۔بقول شاعر:

وہ دن بھی خوب تھے ملائکہ میرے سامنے تھے جو سرنگوں

وہ میرا  عروج  کمال  تھا ،  یہ  زوال  کتنا  عجیب  ہے

اس صورت حال کا ایک اہم پہلو یہ بھی ہے کہ بدقسمتی سے دنیا ئے اسلام میں عام طور سے معاملات ایسے ہی لوگوں کے ہاتھ میں ہیں جو اپنے مغربی آقاؤں کے سبق کو دہرانے میں ہی اپنی کامیابی سمجھتے ہیں۔لیکن یہ صریح دھوکہ اور فریب ہے، یہود و نصاریٰ کو اپنا آقا، مشکل کشا اور حاجت روا سمجھ کر مسلمان خوش فہمی اور خود فریبی کے حصار میں پھنستے ہی چلے جارہے ہیں۔جس سے باہر نکلنا اب ان کے لیے ناممکن نہیں تو مشکل تر ہو گیا ہے۔اگرچہ عالمی سطح پر مغرب کی فریب کاریوں اور اس کا اثر  و رسوخ کی سنگینی کو ختم کر نے کی کوششیں بھی کی گئی ہیں، مگر بے سود ر ہیں۔

1970 ء کی دہا ئی میں سعودی فرماں روا شاہ فیصل شہید کی مدبرانہ اور حکیمانہ قیادت، لیبیا کے حکمراں کرنل معمر قذافی اور پاکستان کے سابقہ وزیر اعظم ذوالفقار علی بھٹو کی منصوبہ بندی کے باعث مشرق وسطیٰ سمیت جملہ اسلامی ممالک کو اغیار کی لوٹ مار سے نجات حاصل کرنے کا خیال آیا۔چناں چہ 1973 ء  میں ہونے والی عرب اسرائیل جنگ میں ذوالفقار علی بھٹو کی تجویز پر اہل عرب نے تیل کو پہلی مرتبہ ہتھیار کے طور پر استعمال کیا تو یورپ اور امریکا میں گاڑیوں کی میلوں لمبی قطاریں لگ گئیں۔یورپ اور امریکا کو عربوں سے ایسے حربے کی ہر گز توقع نہیں تھی۔لہٰذا جب بھٹو کے مشورے پر یورپ اور امریکا کو مشرق وسطیٰ سے تیل کی ترسیل بند ہوئی تو طاغوتی طاقتیں بلبلا اٹھیں، اور امریکا اور یورپ کی صنعت و معیشت کو بہت بڑا دھچکا پہنچا۔

فروری 1974 ء میں بھٹو کی میزبانی میں لاہور میں اسلامی سر براہی کانفرنس منعقد ہوئی تو عالم اسلام کے اس مثالی اتحا د پردشمنان مسلم انگشت بدنداں رہ گئے اور ان کے پیروں تلے سے زمین نکل گئی۔یہ سوچ کر کہ آپس میں شدید ترین شخصی و نظریاتی اختلاف رکھنے والے مسلم مما لک اور حکمران بھی غیر مشروط طور پر اس کانفرنس میں ایک دوسرے کے شانہ بشانہ موجود تھے۔ذوالفقار علی بھٹو کو اسلامی سربرہی کانفرنس کا چیئرمین چنا گیا۔اور ان کی مرتب کر دہ سفارشات کی روشنی میں درج ذیل نکات کی متفقہ طور پر منظوری دی گئی۔

1۔ تمام اسلامی ممالک یورپی اور امریکی بنکوں سے اپنا سرمایہ نکال کر مجوزہ ’’ اسلامی ترقیاتی بنک‘‘ میں جمع کرا ئیں گے۔جس کا ہیڈ کواٹر پاکستان میں ہوگا۔

2۔ تمام اسلامی ممالک اپنے باہمی تنازعات اقوام متحدہ میں لے جانے کے بجائے اسلامی سربراہی کانفرنس کی تنظیم میں طے کریں گے۔

3۔ عالم اسلام کو علوم و ہنر سے بہرہ مند کرنے کے لیے امریکا پر انحصار ختم کرکے جدید علوم اور ٹیکنالوجی کے شعبوں میں خود کفیل بنائیں گے۔

4۔ بھاری اور جنگی صنعتوں کے شعبہ میں اسلام دشمن طاقتوں پر انحصار ختم کر دیا جائے گا۔اس کے لیے ملت اسلامیہ کا ایک مشترکہ فنڈ قائم کیا جائے گا۔

5۔ عالم اسلام کے تمام ممالک بیرونی تجارت کے لیے ایک مشترکہ کمیشن قائم کریں گے جو ملت اسلامیہ کے مفادات کو مقدم رکھتے ہوئے بیرونی تجارت کے ایسے مشترکہ رہنما اصول وضح کر ے گا جس کی پابندی تمام اسلامی ممالک پر لازمی ہوگی۔

لیکن اسلام دشمن طاقتوں نے اسلامی سربراہی کانفرنس میں ہونے والے انقلابی اقدام پر عمل درآمد ہونے سے پہلے ہی ملت اسلامیہ کی شیرازہ بندی کا عمل سبوتاژ کرنے کی منصوبہ بندی شروع کر دی اور مشرق وسطیٰ کے تیل کی دولت پر قبضہ کرنے اور اسلامی ممالک کو اپنا محتاج بنائے رکھنے کے لیے ’’  نیو ورلڈ آرڈر‘‘ کے نام سے ایک طویل المیعاد اور کثیر الجہتی منصوبہ تیا رکیا۔اسی نیو ورلڈ آرڈر کے تحت ہی اسرائیل کی سرحدوں میں مسلسل توسیع کا عمل جاری ہے۔

یہ ہے یورپ و امریکا اور اسرائیل کا وہ گٹھ جوڑ جس کے تحت وہ عالمی سطح پر اور خاص طور پر اسلامی ممالک پر جس میں ان کا خاص ہدف اور ان کی آنکھ کا کانٹا پاکستان ہے، مسلسل اسرائیل کو تسلیم کر لینے پر دباؤ ڈال رہے ہیں جس کی شدت میں روز افزوں اضافہ ہورہا ہے۔عرب ممالک مخمصہ کا شکار ہیں۔ ترقی پزیر اسلامی حکومتیں لرزہ بر اندام ہیں کہ کیا فیصلہ کریں۔پاکستان کے بارے میں تو اسرائیل کے پہلے وزیر اعظم بن گوریان نے پیرس میں 1967 ء کی جنگ میں فتح کا جشن مناتے ہوئے کہا تھا،  ’’یہ عرب ہر گز ہمارے مقابل نہیں آسکتے۔ ہمارا اصل دشمن اور حریف پاکستان ہے،کیوں کہ پاکستان واحد اسلامی نظریاتی ملک ہے۔‘‘

مسلمانوں نے یہودیوں کو بد عہدی کی بنیا د پرپہلے مدینہ اور اس کے انواح و اطراف سے نکالااور بعد ازاں خیبر سے ان کو نکال باہر کیا گیا۔سیدناعمر بن خطاب رضی اللہ عنہ کے دور میں جب بیت المقدس پر قبضہ ہوا تو ہاں یہودیوں کو آباد ہونے کی اجازت نہ دی گئی اور یہ پابندی خلافت اسلامیہ کے خاتمہ تک قائم رہی۔اسی لیے یہودیوں کی دشمنی امت مسلمہ سے دوسری قوموں کے مقابلے میں کہیں زیادہ شدید ہے۔

قرآن حکیم نے یہود کے بارے میں اصولی طور پر تنبیہی یا تعزیری قسم کے تین ہی اعلانات تصریحاً بیان کیے ہیں:

۱۔ ذلت و مسکنت

۲۔ان پر بے چینیوں کا تسلسل

۳۔دینی حجت و برہان میں ان کی دوامی مغلوبیت ، علم الٰہی اور ہدایت ربانی سے محرومی۔

دنیا کی کسی قوم کی طرف سے عائد کر دہ ذلت و حقارت نہ حقیقی ہوتی ہے اور ہمہ جہتی۔ لیکن اللہ کی طرف سے اگر کسی پر پھٹکا ر پڑجائے تو  پھر اس کو دور کرنے والا اللہ کے سوا اور کوئی نہیں ہوسکتا۔ازروئے قرآن حکیم:

قُلِ اللّٰهُمَّ مٰلِكَ الْمُلْكِ تُؤْتِي الْمُلْكَ مَنْ تَشَآءُ وَ تَنْزِعُ الْمُلْكَ مِمَّنْ تَشَآءُٞ  وَتُعِزُّ مَنْ تَشَآءُ وَ تُذِلُّ مَنْ تَشَآءُ١ؕ بِيَدِكَ الْخَيْرُ١ؕ اِنَّكَ عَلٰى كُلِّ شَيْءٍ قَدِيْرٌ۰۰۲۶

کہو کہ اے اللہ (اے) بادشاہی کے مالک تو جس کو چاہے بادشاہی بخشے اور جس سے چاہے بادشاہی چھین لے اور جس کو چاہے عزت دے اور جسے چاہے ذلیل کرے ۔ ہر طرح کی بھلائی تیرے ہی ہاتھ میں ہے

اور بے شک تو ہر چیز پر قادر ہے۔‘‘ ( آلِ عمران :26)

اللہ کی طرف سے بھیجی ہوئی پھٹکار نہ وقتی ہوتی ہے نہ مقامی بلکہ یہ تو ہمہ گیریت اختیار کر لیتی ہے۔با لخصوص جب کہ اس مذِلّ حقیقی نے خود یہ فرمایا ہو: 

مَّلْعُوْنِيْنَ١ۛۚ اَيْنَمَا ثُقِفُوْۤا اُخِذُوْا وَ قُتِّلُوْا تَقْتِيْلًا۰۰۶۱

’’(وہ بھی) پھٹکارے ہوئے ، جہاں پائے گئے پکڑے گئے اور جان سے مار ڈالے گئے‘‘ ( الاحزاب  61)

ظاہر ہے ایسی ذلت و مسکنت شعار اور محتاج و مقہور قوم طبعاً کبھی سکھ اور چین نہیں پاسکتی، کیوں کہ اپنی اندرونی خرابیوںاور پھر پے بہ پے تذلیلوں اور بے اعتنایوں سے اس قوم کا ضمیر مردہ ہوجاتا ہے۔اور وہ مایوسی کی اندرونی کوفت اور قلق و اضطراب سے کسی وقت بھی اطمینان اور سکون کا سانس نہیں لے سکتی۔

تیسرا قرآنی دعویٰ یہ ہے کہ یہود دینی حجت اور علم حق سے یکسر محروم ہو چکے ہیں، اور اپنی مسلسل شرارتوں کی وجہ سے ان کے قلوب اور فطرتیں اس حد تک مسخ ہوچکی ہیں کہ قبولیت حق کی استعداد ہی من حیث القوم ان سے رخصت ہوچکی ہے۔جس سے وہ کبھی دینی حجت میں اپنے حریفوں پر غالب نہیں آسکتے۔

یہودی قوم شروع سے ہی پروپیگنڈا کرنا خوب جانتی ہے۔ افواہیں پھیلانا ، کسی مخالف کے خلاف اسکینڈلز کا نہ ختم ہونے والا سلسلہ شروع کرنے کا فن بھی انہیں خوب آتا ہے۔جس کی وجہ سے بڑی بڑی قد آور شخصیات ان کی مٹھی میں رہتی ہیں۔یہی لوگ برطانیہ اور امریکا میں ذرائع ابلاغ پر قابض ہیں اور عوام کے ذہنوں اور خیالات کو اپنی مرضی سے کوئی بھی رخ دینے کی پوری قوت رکھتے ہیں۔

پاکستان کے کسی بھی گاؤں میں ہونے والی کسی چھوٹی سی واردات کو چاہیں تو بین الاقوامی تشہیر کے ذریعے سے پاکستان کو بدنام کر دیں اور چاہیں تو لاکھوں مسلمانوں کی اجتماعی قبروں سے نگاہیں پھیر لیں اور کسی کو خبر بھی نہ ہو۔لومڑی جیسی مکار اور چیرہ دست یہودی قوم کی یہ ایک ہلکی سی تصویر ہے۔ ورنہ اس کے بہیمانہ اور سفاکانہ کارناموں سے تاریخ کے صفحات بھرے پڑے ہیں۔

یہودی قوم کی اس کینہ فطرت روش کے پیش نظر کیا پاکستان کے لیے اسرائیل کو تسلیم کرنے کا کوئی جواز بنتا ہے۔جب کہ اسرائیل کا اصل ہدف پاکستان ہی ہے ،وہ اس کی نظریاتی بنیادوں کو جڑ سے اکھیڑنے کے لیے ہمہ جہت سے حملہ آور ہے۔کیا اسرائیل کو تسلیم کر لینے کے بعد پاکستان کی سلامتی اور اس کی بقا کی کوئی ضمانت دی جاسکتی ہے۔یہ خیال ہے جو محال ہے۔پاکستان کی ایک مخصوص لابی ماضی کی طرح ایک بار پھر سرگرم ہے کہ اسرائیل کو تسلیم کرنے میں کیا ہرج ہے۔اسرائیل کو تسلیم کر لینے سے بے شمار مالی فوائد بھی گنوائے جارہے ہیں۔کیوں کہ ابن الوقت قسم کے لوگوں کی سوچ اپنے وجود کی سیوا تک ہی محدود رہتی ہے، انہیں اس بات کا کوئی ادرا ک ہی نہیں ہوسکتا کہ ایک مسلمان کی عزت نفس اور اس کی دینی غیرت و حمیت کاکیا مقام ہے۔بطن و فرج کے رسیا اس پہلو سے کبھی سوچ ہی نہیں سکتے۔اور ان کی اسی کمزوری نے دشمن اقوام کے حوصلے بلند کیے ہیںاور ان کے ہاتھ ہمارے گریبانوں تک پہنچے ہوئے ہیں۔  

آج اسرائیل کے عالمی ایجنڈے کے تحت ہر مسلم ملک کا حکمراں ان کا ہدف ہے۔سوڈان کو مراعات دینے کا اعلان بھی ہوچکا ہے،

پاکستان بھی اس اہم ممالک میں شامل ہے جن کو دباؤ میں لاکر اسرائیل کو تسلیم کر والیا جائے گا۔(خاکم بدہن)جو قومیں اپنے نظریے کو پس پشت ڈال کر زمانہ کے ڈھب پر خود کو ڈھال لیتی ہیں ان کے ساتھ دنیا اسی طرح کھلواڑ کرتی ہے۔تاریخ قوم کا حافظہ ہوتی ہے اور جو قوم اپنی تاریخ بھلادیتی ہے تو گویا وہ اپنا حافظہ کھو دیتی ہے ۔جو قوم اپنی تاریخ کو فراموش کردیتی ہے ، اس کا جغرافیہ اسے فراموش کردیتا ہے۔پھر وہ دوسروں کی حریت و مفادات تو کیا خود اپنی راہ بھی کھوٹی بیٹھتی ہے۔ ماضی کا مطالعہ حال کو سمجھنے اور مستقبل کو بہتر بنانے میں بڑی مدد دیتا ہے۔گزرے ہوئے زمانے کو فراموش کر کے حال اور مستقبل کو سازگار بنانا مشکل ہی نہیں ناممکن ہوتا ہے۔

 اگرآج پاکستان اپنی نظریاتی اور جغرافیائی حیثیت کو فراموش کر کے بڑی طاقتوں کے دباؤ میں آکر اسرائیل کو تسلیم کرلیتا ہے تو نہ صرف یہ کہ اسرائیل کے زہر آلود خنجر کی نوک ہمیشہ اس کی رگ جاں پر ٹکی رہے گی، بلکہ وہ کشمیر کے معاملہ پر بھی آواز اٹھانے کے قابل نہیں رہے گا۔کشمیر کی حمایت سے بھی اسے دستبردار ہونا پڑے گا۔اور کسی بھی مظلوم کے لیے آواز اٹھانا صدا بصحرا ثابت ہوگا،کیوں کہ کسی مظلوم کی داد رسی کے لیے ضروری ہے کہ اپنے قدم مضبوط ہوں ااور آہنی دیوار بن کر باطل کے سامنے کھڑے ہونے کی ہمت اور پہاڑ جیسی استقامت موجود ہو ورنہ ریت کی دیوار کو تو تیز ہواؤں کے جھکڑ بھی گرادیتے ہیں۔اپنے مقام اور حیثیت سے گری ہوئی قوم اس گرے ہوئے مکان کی طرح ہوتی ہے جس کی لوگ اینٹیں بھی اٹھا کر لے جاتے ہیں اورپھر اسے آنے جانے کا راستہ بنا لیتے ہیں۔اور وہ گھر شارع عام بن جاتا ہے۔

کتابیات

۱۔ترجمہ قرآن حکیم ، مولانا فتح محمد جالندھری

۲۔اسرائیل کتاب و سنت کی روشنی میںاز مولانا قاری محمد طیب

 ۳۔یہودیت قرآن کی روشنی میں ازسید ابو الاعلیٰ مودودی

۴۔ مشرق وسطیٰ اور عالم اسلام  از پیر محمد فضل حق

۵۔ تاریخ فرشتہ از محمد قاسم فرشتہ