ملحدین اور رائے پرست گمراہ فرقوں کو اہلِ حدیث ومحدثین سے ہمیشہ دشمنی رہی ہے،اور سلسلۂ سند جو کہ امتیازِ محدثین ہے، یہ ان کے لیے سب سے زیادہ تکلیف دہ اور ناپسندیدہ چیز ہے۔
جیسا کہ امام ابو نصر احمد بن سلام فقیہ رحمہ اللہ فرماتے ہیں:
«لَيْسَ شَيْءٌ أثْقَلَ عَلى أَهْلِ الْإِلْـحَادِ وَلَا أَبْغَضَ إِلَيْهِمْ مِنْ سَمَاعِ الْـحَدِيثِ ورِوايَتِهِ بِإسْنادٍ».
’’اہلِ الحاد کے لیے سب سے زیادہ بھاری اور ناپسندیدہ چیز حدیث سننا اور اسے سند کے ساتھ بیان کرنا ہے۔‘‘ (معرفة علوم الحدیث للحاكم ، ص : ٤، وسنده صحیح)
اس قول پر امام ابو عبداللہ محمد بن عبداللہ حاکم رحمہ اللہ (٤٠٥ھ) فرماتے ہیں :
وعَلَى هَذَا عَهِدْنَا فِي أَسْفَارِنَا وَأَوْطَانِنَا كُلَّ مَن يُنْسَبُ إِلى نَوْعٍ مِنَ الْإِلْـحَادِ وَالْبِدَعِ لَا يَنْظُرُ إِلَى الطَّائِفَةِ الْـمَنْصُوْرَةِ إِلَّا بِعَيْنِ الْـحَقَارَةِ، ويُسَمِّيها الْـحَشْوِيَّةَ.
”ہم نے اپنے سفر وحضر میں یہی تجربہ کیا ہے کہ جو شخص بھی اس قسم کے الحاد و بدعت کی طرف نسبت رکھتا ہے وہ طائفہ منصورہ کو حقارت کی نظر سے دیکھتا ہے اور انہیں حشویہ (بلا تمیز نقل و جمع کرنے والے) کہتا ہے۔“ (معرفة علوم الحدیث ، ص : ٤)
چونکہ ان کا اپنا علم بے سروپا ہوتا ہے، جب اصحاب الاسانید کو دیکھتے ہیں کہ اُن کے علم کا سلسلہ معروف لوگوں سے ہوتا ہوا ،رسول اللہ ﷺ تک اور پھر جبرائیل کے واسطے سے اللہ تعالی تک جا ملتا ہے جبکہ اِن کا علم ذاتی فلسفے قیل و قال، ذہنی اختراعات پر بلا اصول و فروع چل رہا ہے تو ان کے سینے حسد و جلن سے بھر جاتے ہیں، پھر جو شیطانی وسوسہ ان کے ذہن میں آتا ہے وہ یہی ہوتا ہے کہ سند کی اہمیت کا انکار کر دو، کہہ دو کہ حدثنا اور أخبرنا تو کوئی چیز ہی نہیں، لیکن اللہ تعالی کی سنت ہے کہ اصحاب الاسانید تاقیامت یونہی اپنے دین کو نسل در نسل منتقل کرتے رہیں گے اور ان کے دشمن نیست و نابود ہو جائیں گے، بہت سے منکرین پہلے بھی آئے، نام و نشان مٹ گیا اور سندیں اور آثار ویسے ہی قائم و دائم ہیں ۔ وللہ الحمد۔ دلائل کے مقابلے میں ایسی طعنہ بازی ہمیشہ سے ان کا وطیرہ ہے۔
جیسا کہ امام حاکم رحمہ اللہ بیان کرتے ہیں :
سَمِعْتُ الشَّيْخَ أبا بَكْرٍ أحْمَدَ بْنَ إسْحاقَ الفَقِيهَ وهُوَ يُناظِرُ رَجُلًا، فَقالَ: الشَّيْخُ: حَدَّثَنا فُلانٌ، فَقالَ لَهُ الرَّجُلُ: دَعْنا مِن حَدَّثَنا، إلى مَتى حَدَّثَنا، فَقالَ لَهُ الشَّيْخُ: «قُمْ يا كافِرُ، ولا يَحِلُّ لَكَ أنْ تَدْخُلَ دارِي بَعْدَ هَذا»، ثُمَّ التَفَتَ إلَيْنا، فَقالَ: «ما قُلْتُ قَطُّ لِأحَدٍ لا تَدْخُلْ دارِي إلّا لِهَذا».
’’میں نے اپنے شیخ ابو بکر احمد بن اسحاق فقیہ رحمہ اللہ کو ایک شخص سے مناظرہ کرتے دیکھا، شیخ نے سند پڑھی؛ حدثنا فلان.. تو وہ کہنے لگا : یہ ’’حدثنا ‘‘ چھوڑ، کب تک ’’حدثنا حدثنا‘‘ کرتے رہو گے۔ شیخ نے کہا : اے منکر اسلام !دفع ہو جا، آئندہ تو میرے گھر داخل نہیں ہو سکتا، پھر ہماری طرف متوجہ ہو کر فرمانے لگے: میں نے اس بندے کے علاوہ کبھی کسی سے یہ نہیں کہا کہ میرے گھر میں نہ آنا۔‘‘ (معرفة علوم الحدیث ، ص : ٤)
ان کا خیال ہے کہ بغیر کسی واسطے سے محض اٹکل پچو اور عقلی موشگافیوں سے اللہ کے دین کو حاصل کیا جا سکتا ہے یعنی بنا سیڑھی کے چھت پر چڑھنا چاہتے ہیں، اور حقیقت یہ ہے کہ ایسی کوشش ہمیشہ انہیں منہ کے بَل گرا دیتی ہے۔
جیسا کہ امام عبد اللہ بن مبارک رحمہ اللہ (١٤١ھ) فرماتے ہیں :
«مَثَلُ الَّذِي يَطْلُبُ أمْرَ دِينِهِ بِلا إسْنادٍ كَمَثَلِ الَّذِي يَرْتَقِي السَّطْحَ بِلا سُلَّمٍ». (الكفاية في علم الرواية للخطيب، ص:٣٩٣ وسنده صحیح)
’’جو بھی بغیر سند کے دین حاصل کرنے کی کوشش کرتا ہے اس کی مثال اس کی طرح ہے جو بغیر سیڑھی کے چھت پر چڑھنا چاہتا ہے۔‘‘
نیز فرماتے ہیں :
«اَلْإِسْنَادُ مِنَ الدِّينِ، وَلَوْلَا الْإِسْنَادُ لَقَالَ مَنْ شَاءَ مَا شَاءَ».
’’اسناد دین کا حصہ ہیں اور اگر یہ سندیں نہ ہوتیں تو جس کے منہ میں جو آتا کہہ دیتا۔‘‘( مقدمة صحیح مسلم : ٣٢ وسنده صحیح)
اسی طرح فرماتے ہیں :
«بَيْنَنا وَبَيْنَ القَوْمِ القَوائِمُ» يَعْنِي الْإِسْنَادَ.
”ہمارے اور بدعتی لوگوں کے درمیان فرق ان مضبوط پائیوں یعنی سندوں سے ہے۔‘‘ (مقدمة صحیح مسلم : 33 وسنده صحیح)
اس قول پر حافظ نووی رحمہ اللہ (٦٧٦ھ) فرماتے ہیں :
مَعْنى هَذَا الْكَلَامِ إنْ جَاءَ بِإسْنادٍ صَحِيحٍ قَبِلْنَا حَدِيثَهُ وَإِلَّا تَرَكْناهُ فَجَعَلَ الْـحَدِيثَ كَالْـحَيْوَانِ لَا يَقُومُ بِغَيْرِ إِسْنادٍ كَما لَا يَقُومُ الْـحَيَوانُ بِغَيْرِ قَوَائِمَ. (شرح صحیح مسلم ١/ ٨٨)
’’اس بات کا مطلب یہ ہے کہ اگر کوئی صحیح سند پیش کرے گا تو ہم اس کی حدیث قبول کریں گے وگرنہ رد کر دیں گے، اسی لیے امام ابن مبارک رحمہ اللہ نے حدیث کو جانور سے تشبیہ دی ہے کہ جس طرح جانور بغیر پائیوں کے کھڑا نہیں رہ سکتا بالکل اسی طرح حدیث سند کے بغیر قائم نہیں رہ سکتی۔‘‘
امام ابو سعید احمد بن داود، حداد رحمہ اللہ (٢٢١ھ) فرماتے ہیں :
«اَلْإِسْنَادُ مِثْلُ الدَّرَجِ وَمِثْلُ الْـمَراقِي فَإِذَا زَلَّتْ رِجْلُكَ عَنِ الْـمَرْقاةِ سَقَطْتَ، وَالرَّأْيُ مِثْلُ الْـمَرْجِ»
’’سندوں کی مثال سیڑھیوں اور زینوں کی طرح ہے، اگر آپ کا پاؤں زینے سے پھسل جائے تو نیچے آ گریں گے اور رائے زنی تو گندگی و آلودگی کی طرح ہے۔‘‘ (شرف أصحاب الحديث للخطیب، ص: ٤٢ وسنده صحیح)
امام یحیی بن سعید القطان رحمہ اللہ (١٩٨ھ) فرماتے ہیں :
«اَلْإِسْنَادُ مِنَ الدِّينِ»
’’اسناد دین کا حصہ ہیں۔‘‘
اور امام شعبہ بن الحجاج رحمہ اللہ (١٦٠ھ) سے بیان کرتے ہیں، انہوں نے فرمایا :
إِنَّما يُعْلَمُ صِحَّةُ الْـحَدِيثِ بِصِحَّةِ الإِسْنَادِ.
’’حدیث کی صحت، سند کی صحت سے ہی معلوم ہوتی ہے۔‘‘ (التمهيد لابن عبد البر : ١/ ٥٧ وسنده حسن)
اسی طرح امام شعبہ رحمہ اللہ فرماتے ہیں :
«كُلُّ عِلْمٍ لَيْسَ فِيْهِ حَدَّثَنَا أَوْ أَخْبَرَنَا فَهُوَ خَلٌّ وَبَقْلٌ».
’’ہر وہ علم جس میں حدثنا یا أخبرنا نہیں ہے وہ سرکہ و ترکاری ہے۔ (یعنی اس کی کوئی حیثیت نہیں۔)‘‘( المدخل إلى كتاب الاكليل للحاكم، ص : ٢٩ وسنده صحیح)
امام سفیان بن عیینہ رحمہ اللہ بیان کرتے ہیں، امام محمد بن مسلم بن شہاب زہری رحمہ اللہ (١٢٤ھ) نے ایک دن حدیث بیان کی تو میں نے کہا:
هَاتِه بِلاَ إسْنادٍ
’’یہ مجھے بغیر سند کے ہی بیان کر دیں ۔‘‘
تو زہری رحمہ اللہ فرمانے لگے:
أتَرْقَى السَّطْحَ بِلاَ سُلَّمٍ؟
’’کیا آپ چھت پر بغیر سیڑھی کے چڑھ جائیں گے؟‘‘ (المدخل إلى السنن الكبرى للبيهقي : ١/ ٣٨٩ وفيه من لم أعثر عليه)
عتبہ بن ابی حکیم بیان کرتے ہیں کہ امام زہری رحمہ اللہ نے اسحاق بن عبد اللہ بن فروہ کو (بغیر سند کے) یوں احادیث بیان کرتے سنا : ’’رسول اللہ ﷺ فرماتے ہیں، رسول اللہﷺفرماتے ہیں۔‘‘ تو آپ فرمانے لگے :
«قاتَلَكَ اللـهُ يا ابْنَ أبِي فَرْوَةَ ما أجْرَأكَ عَلى اللـهِ لا تُسْنِدُ حَدِيثَكَ؟ تُحَدِّثُنا بِأحادِيثَ لَيْسَ لَها خُطُمٌ، ولا أزِمَّةٌ».
’’اے ابن ابی فروہ! اللہ تجھے غارت کرے، تجھے اجر نہ دے، تم اپنی احادیث کو سندوں سے بیان نہیں کرتے؟ ہمیں ایسی احادیث سناتے ہو جو بے مہر و بے لگام ہیں؟‘‘ (العلل الواقع بآخر جامع الترمذي : ٦/ ٢٤٧، معرفة علوم الحدیث للحاکم، ص : ٦ واللفظ له وسنده حسن)
امام سفیان بن سعید ثوری رحمہ اللہ (١٦١ھ) سے مروی ہے :
«اَلَإِسْنادُ سِلاحُ المُؤْمِنِ فَإذا لَمْ يَكُنْ مَعَهُ سِلاحٌ فَبِأيِّ شَيْءٍ يُقاتِلُ».
’’اسناد مومن کا اسلحہ ہے، اگر اس کے پاس اسلحہ ہی نہ ہو تو کس چیز کے ساتھ قتال کرے گا؟‘‘ (المدخل إلى كتاب الإكليل، ص : ٢٩ وفي سنده ضعف)
سند ہم مسلمانوں کا شرف و امتیاز ہے اور یہی ہمیں دیگر امتوں سے ممتاز کرتا ہے کہ جن کے مذاہب مٹ گئے اور ان کے پاس اب کوئی مستند علم و حوالہ باقی نہیں رہا محض ظن و گمان رہ گیا ہے، گمراہ لوگوں کی ہمیشہ سے خواہش ہے کہ ہم بھی ’’حدثنا وأخبرنا‘‘ کو طعنہ بنا دیں اور دین کی بنیادوں کو گرا کر دیگر ادیان کی طرح کر دیں، لیکن یہ صرف ان کی خام خیالی ہے کیونکہ اللہ تعالی فرماتے ہیں:
﴿يُرِيْدُوْنَ اَنْ يُّطْفِـُٔوْا نُوْرَ اللّٰهِ بِاَفْوَاهِهِمْ وَيَاْبَى اللّٰهُ اِلَّاۤ اَنْ يُّتِمَّ نُوْرَهٗ وَ لَوْ كَرِهَ الْكٰفِرُوْنَ هُوَ الَّذِيْۤ اَرْسَلَ رَسُوْلَهٗ بِالْهُدٰى وَدِيْنِ الْحَقِّ لِيُظْهِرَهٗ عَلَى الدِّيْنِ كُلِّهٖ١ۙ وَلَوْ كَرِهَ الْمُشْرِكُوْنَ﴾
’’یہ لوگ چاہتے ہیں کہ اللہ کے نور کو اپنی پھونکوں سے بجھا دیں، لیکن اللہ تعالی کو یہ بات منظور نہیں بلکہ وہ اپنے نور کو پورا کرکے رہے گا، خواہ یہ بات کافروں کو کتنی ہی بری لگے، وہی تو ہے جس نے اپنے رسول کو ہدایت اور سچے دین کے ساتھ بھیجا تاکہ اس دین کو سب ادیان پر غالب کردے۔ خواہ یہ بات مشرکوں کو کتنی ہی ناگوار ہو۔‘‘ (سورة التوبة : ٣٢، ٣٣، نیز دیکھیے؛ سورة الصف : ٨، ٩)
مفسر قرآن، شیخ عبد الرحمن کیلانی رحمہ اللہ (١٤١٥ھ) فرماتے ہیں :
’’اللہ کے نور سے مراد آفتاب ہدایت یا کتاب و سنت کی روشنی ہے جس طرح سورج کی روشنی کو پھونکوں سے بجھایا یا ماند نہیں کیا جا سکتا۔ اسی طرح ان کافروں کی معاندانہ سرگرمیوں سے، ان کے لغو اعتراضات سے، ان کی آیات الٰہی میں شبہات پیدا کرنے سے یا اللہ کی آیات، اللہ کے رسول اور مسلمانوں کا مذاق اڑانے سے دین اسلام کی راہ کو روکا نہیں جا سکتا۔ جسے اللہ ہر صورت میں پورا کرنا چاہتا ہے اور یہ تو یقینی بات ہے کہ کافروں کو اسلام کی ترقی ایک آنکھ بھی نہیں بھاتی۔ ہر ترقی کے قدم پر وہ جل بھن کے رہ جاتے ہیں۔‘‘ (تیسیر القرآن)
امام عبد الرحمن بن عمرو اوزاعی رحمہ اللہ (١٥٧ھ) فرماتے ہیں:
«ما ذَهابُ العِلْمِ إلّا ذَهابُ الإسْنادِ».
’’علم کا خاتمہ، سند کے خاتمے کے ساتھ ہی ہے۔‘‘ (تاریخ أبي زرعة الدمشقي، ص : ٣١٧، التمهيد لابن عبد البر : ١/ ٢٥١ واللفظ له، وسنده حسن)
امام ابو حاتم رازی رحمہ اللہ (٢٧٧ھ) فرماتے ہیں :
«لَمْ يَكُنْ فِي أُمَّةٍ مِنَ الأُمَمِ مُنْذُ خَلَقَ اللـهُ آدَمَ أُمَناءُ يَحْفَظُونَ آثارَ الرُّسُلِ إلّا فِي هَذِهِ الأُمَّةِ».
’’اللہ تعالی نے جب سے آدم علیہ السلام کو پیدا کیا ہے اس وقت سے اس امت محمدیہ کے سوا کسی بھی امت میں ایسے حفاظت کرنے والے نہیں تھے کہ جو یوں رسولوں کے آثار کے محافظ ہوتے۔‘‘ (شرف أصحاب الحديث، ص : ٤٢ وسنده حسن)
امیرِ خرسان عبد اللہ بن طاہر رحمہ اللہ (٢٣٠ھ) سے مروی ہے کہ انہوں نے فرمایا :
فَإِنَّ إِسْنَادَ الْـحَدِيثِ كَرَامَةٌ مِنَ اللَّـهِ عَزَّ وَجَلَّ لأُمَّةِ مُحَمَّدٍ ﷺ.
’’حدیث کی سند اللہ تعالی کی طرف سے امت محمد ﷺ کے لیے خاص عنایت ہے۔‘‘ (أدب الإملاء والإستملاء للسمعاني، ص : ٦ وفيه من لم أعرفه)
امام ابو بکر محمد بن احمد بن یعقوب رحمہ اللہ (٣٣١ھ) فرماتے ہیں:
«بَلَغَنِي أنَّ اللـهَ، خَصَّ هَذِهِ الأُمَّةَ بِثَلاثَةِ أشْياءَ، لَمْ يُعْطِها مَن قَبْلَها الإسْنادِ والأنْسابِ والإعْرابِ».
’’مجھے یہ بات پہنچی ہے کہ اللہ تعالی نے اس امت کو تین چیزیں خاص عطا کی ہیں جو اس سے پہلے کسی امت کو عطا نہیں کیں، اسناد، انساب اور اعراب۔‘‘( شرف أصحاب الحديث، ص : ٤٠ وسنده صحیح)
یہی بات حافظ ابو علی الحسين بن محمد الغسانی رحمہ اللہ (٤٩٨ھ) نے اپنی کتاب ’’شرف المحدثين‘‘ میں فرمائی۔ (النكت على مقدمة ابن الصلاح للزركشي : ١/ ٨٧)
حافظ ابن الصلاح رحمہ اللہ (٦٤٣ھ) فرماتے ہیں :
اَلْإسْنادُ خَصِيصَةٌ فاضِلَةٌ مِن خَصائِصِ هَذِهِ الأُمَّةِ.
’’سند اس امت کے خصائص میں سے عظیم الشان خصوصیت ہے۔‘‘ (مقدمة ابن الصلاح، ص : ٢٥٥)
علامہ ابن حزم رحمہ اللہ (٤٥٦ھ) فرماتے ہیں :
مَا نَقَلَهُ الثِّقَةُ عَن الثِّقَة كَذَلِك حَتّى يبلغ إلى النَّبِي ﷺ يخبر كل واحِد مِنهُم باسم الَّذِي أخبرهُ ونسبه وكلهمْ مَعْرُوف الحال والعين والعَدالَة والزَّمان والمَكان…والْحَمْد لله رب العالمين وهَذا نقل خص الله تَعالى بِهِ المسملين دون سائِر أهل الملَل كلها وبناه عِنْدهم غضًا جَدِيدا على قديم الدهور مد أرْبَعمِائَة عام وخمسين عاما فِي المشرق والمغْرب والجنوب والشمال يرحل فِي طلبه من لا يُحْصى عَددهمْ إلّا خالقهم إلى الآفاق البَعِيدَة.
’’ثقہ روای کا ثقہ سے روایت کرنا، یہاں تک کہ اس سلسلے کو نبی کریم ﷺ تک پہنچا دینا، ہر راوی کا اپنے سے اگلے راوی کے نام ونسب کے ساتھ بتانا، تمام لوگ کا تذکرہ، حالات، عدالت، زمان و مکان سب کچھ معروف ہو، الحمد لله رب العالمين، اور اللہ تعالی نے اس نقل کے ساتھ صرف مسلمانوں کو خاص کیا ہے، اور چار سو پچاس سال کا عرصہ گزرنے کے باوجود اس امر قدیم کو تروتازہ رکھا ہے کہ مشرق و مغرب، شمال و جنوب سے اَن گنت لوگ کہ جن کا شمار صرف ان کا خالق ہی کر سکتا ہے اس کے حصول لیے سفر کرتے ہیں ۔‘‘( الفصل في الملل والنحل : ٢/ ٦٨)
شیخ الاسلام ابن تیمیہ رحمہ اللہ (٧٢٨ھ) فرماتے ہیں :
اَلْإسْنادُ مِن خَصائِصِ هَذِهِ الأُمَّةِ، وهُوَ مِن خَصائِصِ الإسْلامِ، ثُمَّ هُوَ فِي الإسْلامِ مِن خَصائِصِ أهْلِ السُّنَّةِ. (منهاج السنة : ٧/ ٣٧)
’’اسناد اس امت کے اور اسلام کے خصائص میں سے ہے پھر اہل اسلام میں سے بھی یہ اہل السنہ کی خصوصیات میں سے ہے۔‘‘
نیز فرماتے ہیں :
وعِلْمُ الإسْنادِ والرِّوايَةِ مِمّا خَصَّ اللـهُ بِهِ أُمَّةَ مُحَمَّدٍ ﷺ وجَعَلَهُ سُلَّمًا إلى الدِّرايَةِ. فَأهْلُ الكِتابِ لا إسْنادَ لَهُمْ يَأْثُرُونَ بِهِ المَنقُولاتِ، وهَكَذا المُبْتَدِعُونَ مِن هَذِهِ الأُمَّةِ أهْلُ الضَّلالاتِ، وإنَّما الإسْنادُ لِمَن أعْظَمَ اللـهُ عَلَيْهِ المِنَّةَ أهْلُ الإسْلامِ والسُّنَّةِ، يُفَرِّقُونَ بِهِ بَيْنَ الصَّحِيحِ والسَّقِيمِ والمُعْوَجِّ والقَوِيمِ وغَيْرِهِمْ مِن أهْلِ البِدَعِ والكُفّارِ إنّما عِنْدَهُمْ مَنقُولاتٌ يَأْثُرُونَها بِغَيْرِ إسْنادٍ، وعَلَيْها مِن دِينِهِمْ الِاعْتِمادُ، وهُمْ لا يَعْرِفُونَ فِيها الحَقَّ مِن الباطِلِ، ولا الحالِي مِن العاطِلِ. (مجموع الفتاوى : ١/ ٩)
’’اللہ تعالی نے اسناد اور روایت کا علم خاص امت محمدیہ کو عطا کیا ہے اور اسے درایت کے لیے سیڑھی بنایا ہے، اہل کتاب کے پاس کوئی سند نہیں کہ جس سے وہ اپنی منقولات کو آگے بیان کریں اور اسی طرح اس امت کے بدعتی و گمراہ لوگوں کا بھی یہی حال ہے، سند تو ان لوگوں کے پاس ہے جن اہل اسلام و اہل السنہ پر اللہ تعالی کا عظیم احسان ہے، جس کے ذریعے وہ صحیح و ضعیف، الٹے اور سیدھے میں فرق کرتے ہیں، ان کے علاوہ جو اہل بدعت و کفار ہیں، ان کے پاس ماثورات و منقولات ہیں جنہیں وہ بلا سند نقل کرتے ہیں، ان کے دین کا اعتماد انہی پر ہے اور انہیں اس میں سے حق و باطل اور کار و بیکار کی کوئی معرفت و پہچان نہیں۔‘‘
امام محمد بن ادریس شافعی رحمہ اللہ (٢٠٤ھ) فرماتے ہیں :
«مَثَلُ الَّذِي يَطْلُبُ العِلْمَ بِلا حُجَّةٍ، كَمَثَلِ حاطِبِ لَيْلٍ يَحْمِلُ حِزْمَةَ حَطَبٍ وفِيهِ أفْعى تَلْدَغُهُ وهُوَ لا يَدْرِي».
’’بلا دلیل (بلا سند) علم حاصل کرنے والے کی مثال اس کی طرح ہے جو رات کو لکڑیوں کا گٹھا جمع کر کے اٹھاتا ہے، اس میں اژدھا ہوتا ہے اور اسے علم نہیں ہوتا کہ وہ اسے کاٹ لیتا ہے۔‘‘ (المدخل إلى السنن الكبرى للبيهقي : ١/ ٢١١ وسنده صحیح)
بقیہ بن ولید رحمہ اللہ بیان کرتے ہیں :
ذاكَرْتُ حَمّادَ بْنَ زَيْدٍ أحادِيثَ فَقالَ: ما أجْوَدَ أحادِيثَكَ لَوْ كانَ لَها أجْنِحَةٌ يَعْنِي أسانِيدَ.
’’میں نے امام حماد بن زید رحمہ اللہ سے احادیث کا مذاکرہ کیا تو فرمانے لگے : اگر ان کے پَر یعنی اسانید ہوتیں تو آپ کی احادیث کتنی عمدہ ہیں۔‘‘ (الضعفاء الكبير للعقيلي : ١/ ١٦٢ وسنده حسن)
امام محمد بن سیرین رحمہ اللہ (١١٠ھ) فرماتے ہیں :
«إِنَّ هَذَا الْعِلْمَ دِينٌ، فَانْظُرُوا عَمَّنْ تَأْخُذُونَ دِينَكُمْ».
’’یہ علم دین ہے، لہذا تم دیکھ لو کہ کس سے اپنا دین لے رہے ہو۔‘‘ (مقدمة صحیح مسلم : ١/١٤ وسنده صحیح)
نیز فرماتے ہیں :
لَمْ يَكُونُوا يَسْأَلُونَ عَنِ الْإِسْنَادِ، فَلَمَّا وَقَعَتِ الْفِتْنَةُ، قَالُوا : سَمُّوا لَنَا رِجَالَكُمْ، فَيُنْظَرُ إِلَى أَهْلِ السُّنَّةِ فَيُؤْخَذُ حَدِيثُهُمْ، وَيُنْظَرُ إِلَى أَهْلِ الْبِدَعِ فَلَا يُؤْخَذُ حَدِيثُهُمْ.
”پہلے لوگ سند کے متعلق نہیں پوچھا کرتے تھے، پھر جب فتنہ بپا ہوا تو لوگوں نے پوچھنا شروع کر دیا کہ ہمیں اپنی سند کے راویوں کے نام بتاؤ، لہذا اہل السنہ کی طرف دیکھا جاتا اور ان کی احادیث قبول کر لی جاتیں اور اہل بدعت کی طرف دیکھا جاتا تو ان کی احادیث نہیں لی جاتی تھیں۔“( مقدمة صحیح مسلم : ١/١٤ وسنده صحیح)
سند کی حفاظت کرنا اور اپنے دین کو اسی کے ذریعے طلب کرنا، عظیم شہسواروں اور مردوں کا کام ہے، بزدل و کمزور لوگ اور صفاتِ صنفِ نازک کے حاملین اس کی طاقت و جرأت نہیں رکھتے ۔
امام یزید بن زریع رحمہ اللہ (١٨٢ھ) فرماتے ہیں :
«لِكُلِّ دِينٍ فُرْسانٌ وفُرْسانُ هَذا الدِّينِ أصْحابُ الأسانِيدِ».
’’ہر دین کے شہسوار ہوتے ہیں اور اس دین کے شہسوار سندوں والے ہیں۔‘‘( المدخل إلى الإكليل للحاکم، ص : ٣٠ وسنده حسن)
امام ابن حبان رحمہ اللہ (٣٥٤ھ) فرماتے ہیں :
فرسان هذا العلم الذين حفظوا على المسلمين الدين، وهدوهم إلى الصراط المستقيم، الذين آثروا قطع الفاوز والقفار على التنعم في الدمن والأوطار في طلب السنن في الأمصار، وجمعها بالرحل والأسفار والدوران في جميع الأقطار، حتى إن أحدهم ليرحل في الحديث الواحد الفراسخ البعيدة وفي الكلمة الواحدة الأيام الكثيرة، لئلا يُدْخل فصل في السنن شيئًا يضل به، وإن فعل فهم الذابون عن رسول الله ﷺ ذلك الكذب، والقائمون نصرة الدين.
’’اس علم کے شہسوار وہ لوگ ہیں، جنہوں نے مسلمانوں کے لیے دین محفوظ کیا اور ان کی سیدھےراستے کی طرف ان کی راہنمائی کی، وہ لوگ جنہوں نے احادیث کے حصول کی خاطر اور اسفار و دوران، مکمل جدوجہد کے ذریعے انہیں جمع کرنے کے لیے صحراؤں اور بیابانوں کے اسفار کو حضر کی نعمتوں پر ترجیح دی، یہاں تک کہ ان میں سے بعض تو ایک حدیث لینے کے لیے کئی فرسخ اور ایک لفظ کے لیے کئی کئی دن سفر کرتے، تاکہ کوئی گمراہ لوگوں کو گمراہ کرنے کے لیے احادیث میں کوئی چیز داخل نہ کر دے، اگر کسی نے ایسا کرنے کی کوشش کی تو انہی لوگوں نے اللہ کے رسول ﷺ کی ذات سے اس جھوٹ کو دور کیا ، انہی لوگوں نے دین کی نصرت وتائید کا بیڑا اٹھا رکھا ہے۔‘‘(المجروحين : ١/ ٣١)
امام حاکم رحمہ اللہ (٤٠٥ھ) فرماتے ہیں :
لَوْلَا الْإِسْنَادُ وَطَلَبُ هَذِهِ الطَّائِفَةِ لَهُ وَكَثْرَةُ مُوَاظَبَتِهِمْ عَلَى حِفْظِهِ لَدَرَسَ مَنَارُ الْإِسْلَامِ، وَلَتَمَكَّنَ أَهْلُ الْإِلْحَادِ وَالْبِدَعِ فِيهِ بِوَضْعِ الْأَحَادِيثِ، وَقَلْبِ الْأَسَانِيدِ، فَإِنَّ الْأَخْبَارَ إِذَا تَعَرَّتْ عَنْ وُجُودِ الْأَسَانِيدِ فِيهَا كَانَتْ بُتْرًا.
’’اگر سند نہ ہوتی اور محدثین کے گروہ کا اس کا حصول اور اس کی حفاظت پر تسلسل نہ ہوتا تو نشاناتِ اسلام مٹ جاتے اور ملحد و بدعتی لوگ حدیث کو گھڑنے اور سندوں کو اَدل بدل کرنے پر اختیار پا لیتے۔ احادیث جب سندوں سے عاری ہو جائیں تو بے سروپا ہوجاتی ہیں۔‘‘(معرفة علوم الحدیث، ص : ٦)
امام زہری رحمہ اللہ سے مروی ہے کہ انہوں نے فرمایا :
أما إنَّهُ يُعْجِبُ ذُكُورَ الرِّجالِ ويَكْرَهُهُ مُؤَنَّثُهُمْ، أمّا ذُكُورُ الرِّجالِ فَهُمُ الَّذِينَ يَطْلُبُونَ الحَدِيثَ والعِلْمَ وعَرَفُوا قَدْرَهُ، وأمّا مُؤَنَّثُهُمْ فَهُمْ هَؤُلاءِ الَّذِينَ يَقُولُونَ: إيشْ نَعْمَلُ بِالحَدِيثِ، ونَدَعُ القُرْآنَ؟ أوَما عَلِمُوا أنَّ السُّنَّةَ تَقْضِي عَلى الكِتابِ، أصْلَحَنا اللـهُ وإيّاهُمْ.
’’علم حدیث کو مَرد ہی پسند کرتے ہیں جبکہ مخنث اسے ناپسند کرتے ہیں اور حقیقی مَرد وہ ہیں جو حدیث و علم دین کے طالب ہیں اور اس کی قدر جانتے ہیں، رہے وہ جو مخنث ہیں وہ کہتے ہیں : ہم حدیث کو کیا کریں؟ کیا (اس کی وجہ سے) قرآن کو چھوڑ دیں؟ ۔ بھلا انہیں یہ بھی علم نہیں کہ سنت درحقیقت قرآن مجید (کی تشریح و توضیح کے اعتبار سے اس) پر فیصل و قاضی ہے،اللہ تعالیٰ ہماری اورا ن کی اصلاح فرمائے۔‘‘ (الجامع لأخلاق الراوی وآداب السامع للخطيب : ١/ ١٤٠، وله طريق ثان عند الرامهرمزي في المحدث الفاصل : ٣٢، وطريق ثالث عند ابن عبد البر في جامع بيان العلم : ٢٩٦، وله شاهد عند ابن حبان في مقدمة المجروحين : ١/ ٣١)
خلاصۂ کلام
حاصلِ کلا م یہ ہے کہ سند(حدثنا،اخبرنا) ہمارادین ہے،امتِ مسلمہ کی خصوصیت اوراہل السنہ،اہل الحدیث کا امتیازہے،ملحدین، اہلِ بدعت، گمراہ فرقے ہمیشہ سے اس کے مخالف رہے ہیں اور اسے گرانے کی سعی لاحاصل کر چکے ہیں،لیکن اللہ کے فضل وکرم سے یہ دین اسی طرح قائم ودائم ہے۔اللہ تعالیٰ سے دعا ہے کہ وہ ہمیں منہج سلف صالحین، مسلکِ محدثین پر گامزن رکھے، اہل بدعت کے مکروفریب سے محفوظ فرمائے۔آمین