نام کتاب: قرآنی شمعیں
مصنف: حکیم مولانا محمد صادق سیالکوٹی
موضوع: رد شرک وبدعت
صفحات: 376
قیمت: 15 روپے
جلد: مضبوط
سرورق: رنگین
ناشر: مکتبہ نعمانیہ۔ اردو بازار گوجرانوالہ
ملنے کا پتہ: نعمانی کتب خانہ۔ حق اسٹریٹ۔ اردو بازار لاہور
یادرہے کہ قیمت پندرہ روپے سے یاد رکھیے گاکہ یہ کتاب کئی سال پہلے شائع ہوئی ہے جب کاغذ بہ نسبت آج کے بیش بہا سستا تھا۔
یہ کتاب گوجرانوالہ اور لاہور دونوں مقامات سے ہی مل سکتی ہے۔
پیش نگاہ کتاب مولانا محمد صادق سیالکوٹی رحمہ اللہ کی توحید وسنت کے ساتھ خصوصی دلچسپی کی دلیل ہے۔ مولانا درجنوں کتابوں کے منصف اورمؤلف ہیں کتاب کا پبلشر مولانا صاحب کا بڑا قدردان ہے اور ان کے علمی مقام کا معترف ہے۔
مولانا سیالکوٹی رحمہ اللہ اردو،پنجابی،فارسی،عربی اورانگریزی زبانوں سے واقف ہیں۔ مولانا صاحب کی کتب نہ صرف اندرون ملک بلکہ بیرون ملک بھی پڑھی جاتی ہیں۔ سیالکوٹ ایک مردم خیز خطہ ہے یہاں پر مولانا محمد ابراہیم سیالکوٹی رحمہ اللہ اورعلامہ ڈاکٹر محمد اقبال رحمہ اللہ جیسی نابغۂ روز گار شخصیات نے جنم لیا ہے۔
زیر نظر کتاب کے سرسری سے مطالعہ کرنے سے پتہ چلتاہے کہ مصنف نے اپنے موقف کو بیان اور پیش کرنے میں قلم کی حرمت کا بڑا خیال رکھا ہے اور اپنا نقطہ نظرپیش کرنے میں حتی الامکان میزانِ عدل کو قائم رکھنے میں امکانی حد تک کوشش کی ہے۔ پیشِ نگاہ کتاب فاضل مصنف کی چھان پھٹک، جانچ پڑتال، دماغ سوزی کا نتیجہ ہے۔ مسئلے میں گہرائی اور گیرائی تک پہنچنے کے لیے مطالعہ کی وسعت اور عنوانات کا انتخاب وترتیب اور اپنے موقف کی تسہیل وتوضیح کے لیے ایک درجن سے زائد شعراء(بعض شعراء کے اسماء گرامی جن کے کلام کو کتاب میں بطور توضیح وتسہیل کے نقل کیا گیا۔(۱) علامہ ڈاکٹر محمد اقبال۔ (۲) مولانا الطاف حسین حالی ، (۳) صفیہ شمیم، (۴) ماہر القادری، (۵) اثر لکھنوی، (۶) روشن نگینوی، (۷) گل صدیقی، (۸)مولانا روم، (۹)حضرت شیخ عطار، (۱۰) جوش ملیح آبادی)کے کلام کا انتخاب اورجابجا حاشیہ نگاری پر جانکاری کرنا اپنے موقف اور موضوع کے ساتھ اخلاص کی دلیل ہے۔ ان سب باتوں کے باوجود مصنف بالآخر انسان ہے جس کے ساتھ نسیان جڑا ہوا ہے ۔ بسا اوقات بہت کچھ کرنے کے باوجود کچھ نہ کچھ اس سے رہ ہی جاتاہے جیسا کہ پیش نگاہ کتاب کے صفحہ نمبر 296 پر ’’تین بہتر زمانے‘‘ کے زیر عنوان لکھا ہوا ہے۔
حضرت انور ﷺ فرماتے ہیں:
خَيْرُ الْقُرُوْنِ قَرْنِيْ ثُمَّ الَّذِينَ يَلُونَهُمْ ثُمَّ الَّذِينَ يَلُونَهُمْ (سنن الترمذي)
حالانکہ راقم الحروف کے علم کے مطابق ترمذی شریف میں ’’خیر القرون قرنی‘‘ کے الفاظ سے یہ حدیث منقول ہی نہیں ہے۔
مگر اس کا مطلب کوئی یہ بھی ہرگز نہ لے کہ مصنف کی ساری کی ساری محنت ہی رائیگاں چلی گئی۔ اگر اس کتاب میں بالفرض 5 فیصد کمی رہ گئی ہے تو 95 فیصد شاندار کام بھی ہوا ہے لہذا پانچ فیصد کمی یا خامی کو دیکھ کر 95 فیصد خوبی کو کبھی بھی رد نہیں کیاجاسکتا۔ پھر اللہ تعالیٰ کا فرمان ہے:
وَ فَوْقَ كُلِّ ذِيْ عِلْمٍ عَلِيْمٌ(یوسف:76)
’’اور ہر صاحب علم سے بڑھ کر ایک صاحبِ علم ہے۔‘‘کے تحت اگر ایک اہل علم سے کوئی چیز چھوٹ جاتی ہے تو دوسرا صاحبِ علم اس کی نشاندہی کر دیتاہے۔
19 صفحات پر مشتمل مقدمہ کے آخر میں فاضل مصنف نے لکھا ہے:
’’قرآن پاک سے بیگانگی کے اس دور میں نہایت ضروری ہے کہ مسلمانوں کو قرآن مجید کی صحیح اور سچی تعلیم سے روشناس کرایاجائے نیز ان آیات بیّنات کی شمعیں ان کے سینوں میں جگائی جائیں۔ جنہیں غلط کار صوفی وملاّ نے ’’جنگ زرگری‘‘ جیتنے کے لیے ہتھیار بنایا ہواہے۔ ہوس نفس نے جن پر جلبِ منفعت کے دبیز پردے ڈالے ہوئے ہیں بس اسی ضرورت کے ماتحت ہم نے یہ کتاب ’’قرآنی شمعیں‘‘ لکھی ہے۔ اللہ تعالیٰ اس سے مسلمان بھائیوں کو نفع بخشے۔ انہیں قرآن کی سمجھ دے اور ان کے لیے عمل کی راہیں کھولے۔
صبح اُمید کہ بُد معتکف پردۂ غیب
گوبروں آئی کہ کارِ شب تار آخر شد
جنوری 1957ء / محمد صادق سیالکوٹی
فاضل مصنف نے کتاب لکھنے کے دوران درج ذیل عظیم الشان کتب سے مددلی ہے۔
1۔ قرآن مجید
2۔ صحیح بخاری
3۔صحیح مسلم
4۔نووی شرح مسلم
5۔ ابو داؤد
6۔سنن ابن ماجہ
7۔مسند امام احمد
8۔سنن دارمی
9۔مؤطا امام مالک
10۔ سنن الکبری للبیہقی
11۔دلائل النبوۃ
12۔مشکوۃ شریف
13۔بلوغ المرام
14۔ترغیب وترہیب
15۔ تفسیر ابن کثیر
16۔تفسیر عزیزی
17۔تفسیر مظہری
18۔جمع الجوامع
19۔فتاویٰ بزازیہ
20۔فتاوی عبد الحی
21۔حجۃ اللہ البالغۃ
22۔عقد الجید
23۔فتوح الغیب
24۔فتوحات مکیہ
25۔طبقات ابن سعد
26۔شرح قصیدہ امالی
27۔ظفر الامانی
28۔شرح فقہ اکبر
29۔ ہدایہ
30۔رد المختار
31۔میزان شعرانی
32۔توضیح مصری
33۔گلشن راز
تبصرہ نگار کا کام اتنا ہی ہوتاہے کہ کتاب کے موضوع کو اُجاگر کرے کتاب کی اہمیت کو متعارف کرائے۔ قارئین کا کام ہوتاہے کہ وہ کتاب کا باریک بینی سےمطالعہ کریں۔ دلائل کی ٹوہ لگائیں اور آگہی حاصل کریں۔ اللہ تعالیٰ سے دعا ہے کہ وہ اس کتاب کو مصنف کے لیے صدقہ جاریہ بنائے اور پبلشر کے لیے ان کے حسن انتخاب پر دعا ہے انہوں نے اچھے مصنف کی اچھی کتاب کا انتخاب کیا۔