Monthly Magazine of jamia Abi Bakar Al Islamia Karachi Pakistan جامعہ ابی بکر الاسلامیہ کراچی کا ماھنامہ مجلہ اسوہ حسنہ

الحمد للّٰہ الذی انزل علٰی عبدہ الکتاب ولم یجعل لہ عوجا، وصلّی اللّٰہ وسلّم علٰی من کانت حیاتہ واخلاقہ للقرآن تطبیقا قولا وعملا وخُلقا
امّا بعد: الحمدللہ ۱۴۳۲ھ کے بعدمیری کتاب ’’قواعد ِقرآنیہ‘‘ کئی بار شائع ہو چکی ہے۔ زیرنظر کتاب اسی کا خلاصہ ہے، جسے میں قارئین ِ کرام کی خدمت ُمیں پیش کر رہا ہوں۔ کیونکہ کئی حضرات نے بار بار مطالبہ کیا کہ اصل کتاب کو مختصر کیاجائے،تاکہ اِسے مساجد میں پڑھنے میں آسانی ہواور جو زبانیں مسلمان بولتے ہیں اُن زبانوں میں اِس کا ترجمہ کیا جا سکے۔ اور اس لیے بھی اختصار کر دیا کہ اصل کتاب میںبعض لمبی لمبی تفصیلات ہیں، مثلاً لغت اور بلاغت سے متعلقہ بحثیں ہیں، جسے صرف عربی کاماہر ہی سمجھ سکتا ہے، یا پھر جو شخص معانی میں تفصیلات کا خواہش مند ہو وہ سمجھ سکتا ہے۔ البتہ قواعد ِقرآنیہ میں بیان ہونے والی مثالوں میں سے چند ایک کو ضرور ذکر کردیا ہے۔
جو شخص حوالوں کے بارے میںتسلی کرنا چاہے میں اُسے اصل کتاب دیکھنے کامشورہ دوں گا، زیر نظر کتاب میں تفصیلی حوالوں کو بھی حذف کر دیا ہے، البتہ احادیث کے حوالوں کو اختصار کے ساتھ بیان کر دیا ہے۔
اللہ تعالیٰ کی جناب میں التجا کرتا ہوں کہ میری محنت کو قبول فرمالے اور جو بھی اس کو پڑھے اور اس کو عام کرنے میں حصہ ڈالے،ان سب کو نفع پہنچائے ۔ والحمد للّٰہ ربّ العالمین
پہلا اصول:
وَقُوْلُوْا لِلنَّاسِ حُسْنًا [البقرة: 83]
’’اور لوگوں سے اچھی بات کرو!‘‘
جیسا کہ بیان کیا جاتا ہے ‘مل جل کررہنا انسان کی فطرت کا حصہ ہے اور روزانہ مختلف قسم کے معاملات کو نمٹانے کی خاطر لوگوں سے ملنا اس کی مجبوری ہے۔ اور ان لوگوں کی عقل وسمجھ اوراخلاق بھی مختلف ہوتے ہیں۔ چنانچہ کبھی اچھی بات سنتا ہے اور کبھی برُی،اور کبھی ایسی بات سننی پڑتی ہے جس سے اس کو غصہ آجاتا ہے۔ ایسے موقع پر زیرنظر اصول کی ضرورت پیش آتی ہے (اور لوگوںسے اچھی بات کرو) تاکہ زبان سے متعلقہ معاملات کو قابو میں لایا جا سکے۔
اس اصول کو قرآنِ کریم میں کئی جگہ تکرار کے ساتھ ذکر کیا گیا ہے ۔ ایک جگہ اللہ تعالیٰ نے فرمایا:
وَقُل لِّعِبَادِیْ یَقُوْلُـوا الَّتِیْ ہِیَ اَحْسَنُ
’’اور میرے بندوںسے کہہ دیجئے کہ وہ بہت ہی اچھی بات منہ سے نکالیں۔‘‘(بنی اسرا ئیل:۵۳)
اوراسی کے قریب ترین اللہ تعالیٰ کا یہ حکم ہے کہ اہل ِ کتاب سے بھی بحث و مباحثہ ہو تو عمدہ طریقے سے کرو۔ چنانچہ اللہ تعالیٰ نے فرمایا:
وَلَا تُجَادِلُوْا اَہْلَ الْکِتٰبِ اِلَّا بِالَّتِیْ ہِیَ اَحْسَنُ اِلَّا الَّذِیْنَ ظَلَمُوْا مِنْہُمْ (العنکبوت:۴۶)
’’اوراہل کتاب کے ساتھ بحث و مبا حثہ نہ کرو،مگر اس طریقہ پر جو عمدہ ہو، سوائے ان کے جوان میں ظالم ہیں۔‘‘
چنانچہ اللہ تعالیٰ کا یہ فرمان:
وَقُوْلُوْا لِلنَّاسِ حُسْنًا (البقرۃ:۸۳)
’’اورلوگوںسے اچھی بات کرو۔‘‘بنی اسرائیل کو جو متعدد احکام دیے گئے اس ضمن میں یہ حکم آیا تھا ۔
سورۃ البقرہ مدنی سورت ہے، جبکہ اس سے پہلے مکی سورت میں یہ عمومی حکم بایں الفاظ آچکا تھا:
وَقُل لِّعِبَادِیْ یَقُوْلُوا الَّتِیْ ہِیَ اَحْسَنُ
’’اور میرے بندوںسے کہہ دیجیے کہ وہ بہت ہی اچھی بات منہ سے نکالیں۔‘‘ (بنی اسرا ئیل:۵۳)
اب ہمارے سامنے مضبوط اور واضح احکام ہیں، اِن میں سے کسی چیز کو مستثنیٰ نہیں کیا جاسکتا، البتہ اہل ِ کتاب کا معاملہ الگ ہے کہ بحث و مباحثہ کی صورت میں ان سے سخت بات کی جاسکتی ہے، جس کی تفصیل ودلیل گزر چکی ہے۔
ہمیں اس قاعدے کی اکثر ضرورت رہتی ہے، بالخصوص جب ہمیں معاملات نمٹانے میں مختلف قسم کے لوگوں سے واسطہ پڑتا رہتا ہے،اِن میں مسلمان بھی ہوتے ہیں اورکافر بھی، اچھے بھی ہوتے ہیں اور برے بھی، کوئی بڑا ہوتا ہے اور کوئی چھوٹا۔ بلکہ اچھی بات کی تو ہمیں اپنے قریبی رشتہ داروں سے معاملہ کرتے وقت ہمیشہ ضرورت رہتی ہے، جیسے کہ والدین، خاوند، بیوی اور اولاد، حتیٰ کہ جوملازم وغیرہ ہماری خدمت کر رہے ہوتے ہیں ان کے ساتھ بھی اچھی بات کی ضرورت رہتی ہے ۔
اے مؤمن ! جب تم قرآن کا مطالعہ کرو گے تو تمہیں بہت سارے مواقع پر نظر آئے گا کہ قرآن نے اس امر کی تاکید کی ہے۔ اس قاعدے کی چند مثالیں ملاحظہ فرمائیں:
1 والدین کے ساتھ معاملہ کرتے وقت :
وَلَا تَنْھَرْھُمَا وَقُلْ لَّھُمَا قَوْلاًكَرِيمًا [الإسراء: 23]
’’اورنہ انہیں ڈانٹ ڈپٹ کرنا،بلکہ ان کے ساتھ ادب و احترام کے ساتھ بات چیت کرنا۔‘‘
2 ضرورت مند مانگنے والے سے بات چیت کرتے وقت:
فرمایا: وَاَمَّا السَّآئِلَ فَلَا تَنْهَر [الضحى: 10]
’’اور نہ سائل کو ڈانٹ ڈپٹ کرنا۔‘‘
3جب انسان کے پلے ایسے لوگ پڑجائیں جن میں ادب واحترام کی کمی ہو:
اللہ تعالیٰ نے فرمایا:
وَاِذَا خَاطَبَھُمُ الْجَاهِلُونَ قَالُوْا سَلٰمًا
’’اور جب کم علم لوگ ان سے باتیں کرنے لگیں تو وہ کہہ دیتے ہیںکہ سلام ہے!‘‘[الفرقان: 63]
یعنی وہ لوگ اہل جہالت اور کم عقل لوگوں سے منہ پھیر لیتے ہیں، یا پھر اچھے لفظوں سے جواب دیتے ہیں۔ ایسا نہیں ہے کہ وہ جواب نہیں دے سکتے، بلکہ اس طرح کی بحثوں میں پڑ کر اپنی محنت اوروقت کو ضائع نہیں کرنا چاہتے۔
جب انسان دیکھتا ہے کہ قرآنِ حکیم کو ماننے والی امت اس قاعدے پر عمل کرنے میں شدید کوتاہی کا شکار ہے تو اسے سخت تکلیف ہوتی ہے۔ اور اس کوتاہی کی بہت ساری شکلیں ہوتی ہیں:
۱)غیر مسلموں کے ساتھ معاملہ کرتے وقت: قرآنِ کریم کی تلاوت کرنے والے پرلازم ہے کہ وہ اپنے دل سے پوچھے کیا ہم مسلمان اس بات کے زیادہ حق دار نہیں کہ عیسائیوں سے زیادہ اس قاعدے پر عمل کریں؟ یہ لوگ اچھی بات کی بہت زیادہ کوشش کرتے ہیں تاکہ لوگوں کو اپنے دین کی طرف کھینچ کر لے آئیں، جسے اللہ تعالیٰ نے اسلام کے آنے کے بعد منسوخ کر دیا ہے۔ کیا اہل اسلام اس قاعدے پر عمل کے زیادہ حق دار نہیں ہیں تاکہ لوگوں کو اس عظیم دین کی طرف لے آئیں جسے اللہ تعالیٰ نے اپنے بندوں کے لیے پسند فرما لیا ہے؟
۲)والدین کے ساتھ معاملہ کرنے میں ۔
۳)زندگی کے ساتھی(خاوند /بیوی)کے ساتھ معاملہ کرنے میں۔
۴)اولاد کے ساتھ معاملہ کرنے میں۔
۵)ملازمین اور خدمت گاروں کے ساتھ معاملہ کرنے میں۔
دوسرا اصول:
یہ ایک عظیم اصول ہے جس کاہر مسلمان کی زندگی میں خاصا بڑا اثر ہے بشرطیکہ اسے یہ بات سمجھ آجائے کہ ایمانیات کا اِس اصول سے بڑا گہرا رشتہ ہے۔ جان لیں اس کا نام ہے ’’قضاوقدر‘‘ پر ایمان لانا۔
یہ اصول اللہ تعالیٰ کی راہ میں جہاد کے سلسلے میں بیان ہوا ہے،جو سورۃ البقرہ میں آیا ہے۔ فرمایا:
وَعَسٰی اَنْ تَکْرَہُوْا شَیْئًا وَّہُوَ خَیْرٌ لَّکُمْ وَعَسٰی اَنْ تُحِبُّوْا شَیْئًا وَّہُوَشَرٌّ لَكُمْ [البقرة: 216]
’’اور ممکن ہے کہ تم کسی چیز کو بُری جانو، اوردراصل وہی تمہارے لیے بھلی ہو،اور یہ بھی ممکن ہے کہ تم کسی چیز کواچھی سمجھو،حالانکہ وہ تمہارے لیے برُی ہو۔ حقیقی علم اللہ ہی کو ہے، تم محض بے خبر ہو۔‘‘
اسی قسم کی بات سورۃ النسا ء میں عورتوں سے جدائی کے حوالے سے بھی بیان ہوئی ہے،فرمایا:
فَاِنْ کَرِہْتُمُوْہُنَّ فَعَسٰی اَنْ تَکْرَہُوْا شَیْئًا وَّیَجْعَلَ اللّٰہُ فِیْہِ خَیْرًا كَثِيرًا [النساء: 19]
’’گو تم انہیںناپسندکرو،لیکن بہت ممکن ہے کہ تم کسی چیز کوبُراجانو اور اللہ تعالیٰ اس میں بہت ہی بھلائی کردے۔‘‘
اس اصول کی مختصرسی وضاحت:
ہوتا یہ ہے کہ بسا اوقات انسان پر تکلیف دہ تقدیر کا فیصلہ آجاتا ہے، جو اس کے دل کو ناپسند ہوتا ہے ۔چنانچہ کبھی تو وہ گھبرا جاتا ہے یا غمگین ہو جاتا ہے۔ اس کا گمان ہوتا ہے کہ اس کی ساری اُمیدوں کا جنازہ نکل گیا ہے یا اس کی زندگی ہی ختم ہو گئی ہے۔ اچانک حالات پلٹا کھاتے ہیں اور یہی تکلیف دہ تقدیر اس کے حق میں رحمت بن جاتی ہے، اور اسے خبر بھی نہیں ہوتی۔
اور اس کا اُلٹ بھی ہو جاتا ہے۔ کتنے ہی انسان ایسے ہوتے ہیں جو کسی مقصد کی خاطر محنت کرتے ہیں کہ بظاہر اس میں خیر ہے اور اس کو پانے کے لیے آخری حد تک کوشش بھی کرتے ہیں، قیمتی سے قیمتی چیزکوحصولِ مقصد کے لیے خرچ کر ڈالتے ہیں اور نتیجہ بالکل اُلٹ نکلتا ہے۔
جب یہ بات واضح ہو گئی تو دل کو اس بات پر پختہ کر لوکہ اس قرآنی اصول پر زندگی گزارنے سے انسان کا دل اطمینان اور سکون سے بھر جاتا ہے، اور جس بے قراری نے لوگوں کی زندگی کو اجیرن بنا رکھا ہے یہ اس کو ختم کردیتا ہے، یہ پریشانی خواہ کسی حادثے کی وجہ سے آئی ہو یا کسی بھی دن کی تکلیف دہ تقدیر کی وجہ سے ہو ۔
اگر ہم قرآنِ کریم میں مذکور واقعات پر غور کریں یا تاریخ کے اوراق پلٹیں یا اپنے ارد گرد کے حالات کا جائزہ لیں تو بہت سارے عبرت ناک واقعات ملیں گے۔ ہم چند ایک کا تذکرہ کرتے ہیں تاکہ ہر غمگین آدمی کے لیے تسلی کا سامان ہو جائے اور ہر غم زدہ دل کے زخم کے لیے مرہم بن جائے۔
1سیدنا موسیٰ علیہ الصلاۃ والسلام کی والدہ ماجدہ کااپنے بیٹے (سیدنا موسیٰ علیہ السلام)کو سمندر میں ڈالنے کا واقعہ: جب آپ اس معاملے پر غورکرو تو آپ کو معلوم ہو گا کہ سیدنا موسیٰ علیہ السلام کے فرعونیوں کے ہاتھ لگنے کی سیدنا موسیٰ علیہ السلام کی والدہ کو کس قدر تکلیف ہو سکتی تھی۔ اس سب کے باوجود کہ اس کے نتائج کس قدر اچھے تھے اورمستقبل میں اس کے کتنے فائدے سامنے آئے۔
یہ قاعدہ بیان کرنے کے بعد آخر میں اللہ تعالیٰ فرماتے ہیں:
وَاللهُ يَعْلَمُ وَأَنْتُمْ لَا تَعْلَمُونَ [البقرة: 216]
’’اور اللہ کو خوب پتا ہے اور تمہیں کچھ معلوم نہیں!‘‘
2سیدنا یوسف علیہ الصلاۃ والسلام کا واقعہ : غور کرو گے تو معلوم ہو گا کہ مذکورہ بالا آیت سیدنا یوسف علیہ السلام اور آپ کے والد گرامی سیدنا یعقوب علیہ السلام کے واقعہ پر پوری طرح صادق آتی ہے۔
3 اُس لڑکے کا واقعہ جسے اللہ تعالیٰ کے حکم سےسیدنا خضر علیہ السلام نے قتل کر دیا تھا: اُنہوں نے قتل کرنے کی وجہ بتاتے ہوئے فرمایا:
وَاَمَّا الْغُلٰـمُ فَکَانَ اَبَوٰہُ مُؤْمِنَیْنِ فَخَشِیْنَا اَنْ یُّرْہِقَہُمَا طُغْیَانًا وَّکُفْرًافَاَرَدْناَ اَنْ یُّبْدِلَہُمَا رَبُّہُمَا خَیْرًاً مِّنْہُ زَکٰوۃً وَّاَقْرَبَ رُحْمًا [الكهف: 81]
’’اور اُس لڑکے کے ماںباپ ایمان والے تھے، ہمیںخوف ہوا کہ کہیںیہ انہیں اپنی سرکشی اور کفرسے عاجزوپریشان نہ کر دے۔ اس لیے ہم نے چاہا کہ انہیں اِن کا پروردگار اِس کے بدلے اس سے بہتر پاکیزگی والا اور اس سے زیادہ محبت اورپیاروالا بچہ عنایت فرمائے۔‘‘
یہاں کچھ دیر ٹھہر کر ہم غور کر لیںکتنے ہی لوگ ایسے ہیں جن کی تقدیر میں اللہ تعالیٰ نے اولاد نہیں لکھی۔ اس وجہ سے اُن کو پریشانی بھی ہوتی ہے اور یہ فطری بات ہے۔ لیکن ایسا نہیں ہونا چاہیے کہ اس کا غم ان کو نڈھال کیے رکھے اور محرومی کا احساس غالب رہے اور اس طرح وہ دنیا کا کوئی کام نہ کر پائیں۔
جس شخص کے ہاں اولادنہ ہو وہ اس آیت پر غور کر لے،صرف اس لیے نہیں کہ اس کا غم دور ہو جائےبلکہ اس لیے کہ اس کے دل کو اطمینان آجائے اور اسے انشراحِ صدر ہو جائے، اور وہ اللہ تعالیٰ کی تقدیرکو اپنے حق میں رحمت سمجھے اور اسے دل سے مان لےاور یہ کہ اللہ تعالیٰ نے اپنی رحمت کی وجہ سے اسے اس نعمت سے محروم کیا ہے۔ اسے کیا خبراگر اس کے ہاں اولاد ہو تی تو یہ اولاد اپنے والدین کی بدبختی کا سبب بن جاتی اور انہیں پریشان کرتی ان کی زندگی کو اجیرن بنا دیتی اور ان کی نیک نامی کو بٹہ لگا دیتی!
4 حدیث میں آیا ہے کہ جب سیدہ اُمّ سلمہ رضی اللہ عنہا کے خاوند کا انتقال ہو گیا، تو اُمّ سلمہ رضی اللہ عنہا بیان کرتی ہیں کہ میں نے رسول اللہ ﷺ کو فرماتے سنا:
مَا مِنْ مُسْلِمٍ تُصِيبُهُ مُصِيبَةٌ، فَیَقُولُ مَا أَمَرَهُ اللّٰهُ:[إِنَّا لِلَّهِ وَإِنَّا إِلَیْهِ رَاجِعُوْنَ][البقرة: 156]
اللهُمَّ أْجُرْنِی فِی مُصِیبَتِی، وَأَخْلِفْ لِی خَیْرًا مِنْهَا، إِلَّا أَخْلَفَ اللهُ لَهُ خَیْرًا مِنْهَا
’’جس مسلمان کو کوئی تکلیف پہنچے، پھر وہ اللہ تعالیٰ کے حکم مطابق کہے:
اِنَّا لِلّٰہِ وَاِنَّا اِلَیْہِ رَاجِعُوْنَ، اَللّٰہُمَّ اَجِرْنِیْ فِیْ مُصِیْبَتِیْ وَاخْلُفْ لِیْ خَیْرًا مِنْھَا
ہم سب اللہ تعالیٰ کے ہیں اور اسی کی طرف ہمیں پلٹ کر جانا ہے۔ اے اللہ ! میری مشکل پر مجھے اجر عطا فرما اور مجھے اس کے بدلے میں بہتر عطا فرما!) تو اللہ تعالیٰ اسے اس (گم ہونے والی چیز) سے بہتر عطا کر دیتا ہے۔‘‘
سیدہ اُمّ سلمہ رضی اللہ عنہا بیان کرتی ہیں کہ جب ابو سلمہ رضی اللہ عنہ فوت ہو گئے تو میں نے ( دل میں) کہا : کونسا مسلمان ابو سلمہ سے بہترہو سکتا ہے؟ ابو سلمہ کا گھرانہ سب سے پہلے ہجرت کرکے آپ ﷺ کی خدمت میں حاضر ہوا تھا۔پھر میں نے آپ ﷺ کی سکھائی ہوئی دعا کہہ لی تو اللہ تعالیٰ نے رسول اللہ ﷺ کو میرے نصیب میں لکھ دیا۔ (صحیح مسلم کتاب الجنائز:ح ۹۱۸)
اس احساس پر غور کریں جو سیدہ اُمّ سلمہ رضی اللہ عنہا کو لاحق ہوا۔ اور اس طرح کا احساس اُن عورتوں کو پریشان کرتا ہے جو ایسے رشتوں کو کھو بیٹھتی ہیں جن سے اُن کا اسی دنیوی زندگی میں گہرا رشتہ ہوتا ہے اور زبانِ حال سے کہہ رہی ہوتی ہیں کہ میرے خاوند سے بہتر کون ہوسکتا ہے؟ جب سیدہ اُمّ سلمہ رضی اللہ عنہا نے شریعت کے حکم کے مطابق صبر کیا۔
اِنَّا لِلہِ وَاِنَّا اِلَیْہِ رَاجِعُوْنَ [البقرة: 156]
پڑھا اور مسنون دعا پڑھی تو اللہ تعالیٰ نے اتنا خوبصورت نعم البدل عطا فرمایا، جس کا انہوں نے کبھی خواب بھی نہ دیکھا تھا ہر مؤمن عورت کا یہی کردار ہونا چاہیے کہ وہ اپنی خوش قسمتی کوچھوٹا نہ کر لے اور نہ ہی اسے زندگی کے دروازوں میں سے کسی ایک دروازے یا چوکھٹ کے ساتھ باندھ لے۔ یہ بات صحیح ہے کہ وقتی غم اور مصیبت سے سب کو سابقہ پیش آتا ہے، انبیاء و رُسل علیہم السلام اس سے محفوظ نہیں رہے۔ نامناسب بات صرف یہ ہے کہ انسان اپنی زندگی اور اس کی خوشیوں کو کسی ایک چیز کے ساتھ جوڑ لے، یا کسی مرد، عورت یا استاد سے نتھی سمجھ لے۔
5ارد گرد میںپھیلے ہوئے واقعات کو دیکھیں، اگرچہ وہ بہت زیادہ ہیں، بر سبیل ِ مثال ایک واقعہ بیان کر دیتا ہوں کہ ایک آدمی ایئر پورٹ پر آیا۔ وہ تھکا ہوا تھا اور سو گیا، نتیجہ یہ نکلا کہ جہاز پرواز کر گیا۔ اس جہاز میں تین سو سے زیادہ مسافر تھے۔ جب اس مسافر کی آنکھ کھلی تو جہاز تھوڑی دیر پہلے جا چکا تھا اور اس کا سفر رہ گیا۔ اسے سخت پریشانی اور شدید شرمندگی ہوئی۔ اس صورتِ حال پر چند ہی منٹ گزرے تھے کہ اس جہاز کے گرکر تباہ ہونے کی خبر آگئی، جس میں تمام لوگ جل کر مر گئے۔
یہاں ایک سوال سامنے آتا ہے : کیا پرواز کا نکل جانا اس آدمی کے حق میں بہتر ثابت نہیں ہوا؟ لیکن عبرت حاصل کرنے والے اور نصیحت پانے والے کہاں ہیں؟
خلاصہ کلام یہ ہے کہ ہر مسلمان پر فرض ہے کہ اللہ تعالیٰ پر بھر پور توکل کرے اور جائز اسباب کا ممکنہ حد تک استعمال بھی کرے۔ اس کے باوجود اگر نتیجہ مرضی کے خلاف نکل آئے تو قرآنِ کریم میں بیان ہونے والے اس اصول کو یاد کر لے:
وَعَسٰی اَنْ تَکْرَہُوْاْ شَیْئًا وَّہُوَ خَیْرٌ لَّکُمْج وَعَسٰی اَنْ تُحِبُّوْا شَیْئًا وَّہُوَ شَرٌّ لَّکُمْ وَاللّٰہُ یَعْلَمُ وَاَنْـتُمْ لاَ تَعْلَمُوْنَ [البقرة: 216]
’’اور ممکن ہے کہ تم کسی چیز کو بُری جانو اوردراصل وہی تمہارے لیے بھلی ہو،اور یہ بھی ممکن ہے کہ تم کسی چیز کواچھی سمجھو،حالانکہ وہ تمہارے لیے برُی ہو۔ حقیقی علم اللہ ہی کو ہے، تم محض بے خبر ہو۔‘‘
تیسرا اصول
وَلَا تَنْسَوُا الْفَضْلَ بَیْنَكُمْ [البقرة: 237]
’’تم آپس میں اعلیٰ اخلاق کو مت بھولو!‘‘
یہ آیت ِ کریمہ اخلاقیات کے اصولوں میں سے ایک اہم اصول کو بیان کر رہی ہے اور اس دین کی عظمت کو بیان کر رہی ہے اور بتارہی ہے کہ یہ دین ہر چیز کو شامل ہے اور اس کے اصول بہت عظیم ہیں۔ سورۃ البقرہ میں احکام ِ طلاق کے ضمن میں یہ آیت آئی ہے، اللہ تعالیٰ کا فرمان ہے:
وَإِنْ طَلَّقْتُمُوهُنَّ مِنْ قَبْلِ أَنْ تَمَسُّوهُنَّ وَقَدْ فَرَضْتُمْ لَهُنَّ فَرِیضَةً فَنِصْفُ مَا فَرَضْتُمْ إِلَّا أَنْ یَعْفُونَ أَوْ یَعْفُوَ الَّذِی بِیَدِهِ عُقْدَةُ النِّكَاحِ وَأَنْ تَعْفُوا أَقْرَبُ لِلتَّقْوَى وَلَا تَنْسَوُا الْفَضْلَ بَیْنَكُمْ إِنَّ اللَّهَ بِمَا تَعْمَلُونَ بَصِیرٌ [البقرة: 237]
’’اور اگر تم عورتوں کو اس سے پہلے طلاق دے دو کہ تم نے ’’انہیںہاتھ لگایا ہو،اور تم نے ان کا مہر بھی مقرر کر دیا ہو،تومقررہ مہر کا آدھا مہر دے دو۔یہ اوربات ہے کہ وہ خود معاف کر دیں یا وہ شخص معاف کر دے جس کے ہاتھ میں نکاح کی گرہ ہے۔ تمہارا معاف کر دینا تقویٰ کے بہت قریب ہے، اور آپس میں اعلیٰ اخلاق کو مت بھولو، یقینا اللہ تعالیٰ تمہارے اعمال کو دیکھ رہا ہے ۔‘‘
اس اصول کا خلاصہ یہ ہے کہ اللہ تعالیٰ ان حضرات کو حکم دے رہا ہے جن کو ایسے رشتے نے آپس میں جوڑ دیا تھا جو انسانی تعلقات میں سب سے زیادہ پاکیزہ رشتہ ہے،یعنی میاں بیوی کا رشتہ،کہ وہ جدائی اور دوری کے موقع پر بھی اپنے سابقہ تعلقات اور رشتہ کو مت بھولیں۔
پہلے ترغیب دی کہ معاف کر دیا جائے، چنانچہ فرمایا:
اِلاَّ اَنْ یَّعْفُوْنَ اَوْ یَعْفُوَ الَّذِیْ عُقْدَةُ النِّكَاحِ
’’یہ اور بات ہے کہ وہ خود معاف کر دیں یا وہ شخص معاف کر دے جس کے ہاتھ میں نکاح کی گرہ ہے‘‘ اور اس کے بعد مذکورہ بالا قاعدہ بیان کیا، اور یہ سب ا س لیے کیا کہ معاف کرنے کی تر غیب ہواور اعلیٰ اخلاق کا مظاہرہ کیا جائے ۔ (البقرة: 237)
عام طور پر میاں بیوی کے رشتے میں روشن پہلو غالب رہتے ہیں اور دونوں میاں بیوی ایک دوسرے کی خاطر قربانی دیتے ہیں۔ پھر اگر کسی موڑ پر پہنچ کر معاملہ طلاق تک آجائے تو اب یہ نہیں بھول جانا چاہیے کہ اس میاں بیوی کے جوڑے میں وفا شعاری اور اعلیٰ اخلاق کا رشتہ بھی تھا۔ اگرچہ بدن ایک دوسرے سے دور ہو گئے ہیں، لیکن اخلاقی تعلق تو باقی ہے، اور اس قسم کے پیش آنے والے حالات ان اخلاقی قدروں کو ختم نہیں کر سکتے ۔
معاف کر دینے کا نتیجہ کس قدرعظیم ہے کہ وہ دور ہونے والے کو نزدیک کر دیتا ہے اور دشمن کو دوست بنا دیتا ہے۔
جب لوگوں میں اعلیٰ اخلاق کی عادت پڑ جائے تو خطا کار کے لیے اپنے گناہ کا اعتراف کر لینا آسان ہو جاتا ہے اور حقدار کے لیے معاف کر دینا آسان ہو جاتا ہے۔ اور جب لوگ اپنے حقوق معاف نہ کریں تو نتائج بھی اُلٹ ہی نکلتے ہیں۔اگر میاں بیوی کے درمیان اس قاعدے کو اپنا لیا جائے یا ہر اُس شخص کے درمیان اختیار کر لیا جائے جس کے ساتھ ہمارا کسی بھی قسم کا تعلق ہے، تو زندگی خوبصورت ہو جائے۔وفا اوراعلیٰ ترین تعلقات کی چندجوڑوں نے نادرمثالیں چھوڑی ہیں، اگرچہ ان کے درمیان طلاق یا وفا ت کی وجہ سے علیحدگی ہو چکی تھی۔
ایک مثال پیش کرتا ہوں جو مجھے معلوم ہے،ممکن ہے نادر مثال ہو۔ ایک آدمی کو میں ذاتی طور پر جانتا ہوں، اُس نے اپنی بیوی کو طلاق دے دی جو اُس کے بچوں کی ماں بھی تھی۔ اُس نے اس طلاق یافتہ بیوی کو بچوں سمیت اوپر کی منزل میں رہائش دے دی اور خود نیچے والی منزل میں رہنے لگا، خود ہی بجلی اور ٹیلیفون کا بل دیتا، سارے گھر کا خرچہ برداشت کرتا۔ (معاملات اس قدر مثالی تھے کہ) اہل محلہ میں سے اکثر کو خبر ہی نہیں ہوئی کہ ان کے درمیان طلاق ہوچکی ہے۔ میرے خیال میں اس شخص نے قرآنِ کریم کے اس حکم کی عظیم مثال قائم کر دی ہے جس میں فرمایا گیا ہے:
وَلَا تَنْسَوُا الْفَضْلَ بَیْنَكُمْ [البقرة: 237]
’’اور آپس میں اعلیٰ اخلاق کو مت بھولو!‘‘
سیرت النبی ﷺ میں ایک عظیم مثال موجود ہے، اور آپﷺ کا توسارا کردار ہی قرآنِ کریم کی زندہ تفسیر تھی،کیونکہ آپ ﷺ نے قرآنِ کریم کو اپنی عملی زندگی میں نافذ کر کے دکھایا تھا۔ ہوا یوں کہ آپﷺ طائف گئے اور وہاں کے لوگوں کو مہینہ بھر اسلام کی دعوت دیتے رہے، لیکن سوائے تکلیف اور پریشانی کے کچھ ہاتھ نہیں لگا، بالآخر مکہ مکرمہ تشریف لے آئے اور مطعم بن عدی کی پناہ میں مکہ میں داخل ہوئے۔ اس موقع پر مطعم بن عدی نے اپنے چاروں بیٹوں کو حکم دیا، وہ مسلح ہو کر خانہ کعبہ کے چاروں کونوں پر کھڑے ہو گئے۔ جب قریشیوں کو اس بات کی خبر ہوئی تو انہوں نے مطعم سے کہا : ’’تم اس مقام کے آدمی ہو کہ جس کی پناہ کوتوڑانہیں جاسکتا۔‘‘
مطعم بن عدی حالت ِ شرک پر ہی مر گیا تھا، لیکن آپ ﷺ اس کا احسان نہیں بھولے، کیونکہ مطعم نے آپ ﷺ کو اُس وقت پناہ دی تھی جب چند لوگوں کو چھوڑ کر سارا مکہ آپ کا دشمن تھا۔ آپﷺ نے اس کے احسان کا اعتراف اُس وقت کیا جب غزوۂ بدر ختم ہو گیا تو آپﷺ نے فرمایا: ’’آج اگر مطعم بن عدی زندہ ہوتااور وہ ان غلیظ لوگوں (کافر قیدیوں) کے بارے میں سفارش کرتا تو میں اُس کی خاطر اِن سب کو چھوڑ دیتا۔‘‘ (صحیح البخاری؍۳۹۷۰)
حدیث کا معنیٰ یہ ہے کہ اگر مطعم مجھ سے بغیر کسی معاوضے اور بدلے کے ان لوگوں کو چھوڑنے کا کہتا تو میں انہیں چھوڑ دیتا، کیونکہ اُس نے مجھے اپنی پناہ میں قبول کیا تھا تو میں اس کے احسان کا بدلہ چکا دیتا۔ لوگوں کو بھلائی سکھانے والی ذات (محمدﷺ) پر اللہ تعالیٰ کی طرف سے ہزاروں صلاۃ وسلام ہوں۔
ہماری روزانہ کی زندگانی میں اس قاعدے کو نافذ کرنے شکلیں:
1 کام کے مقام پر لوگوں سے تعلقات: سرکاری نوکری ہو یا نجی اداروں میں ملازمت یا اپنی ذاتی تجارت،ہر شکل میں ہمیں دوسروں کے ساتھ اکٹھا ہونا ہوتا ہے۔ ایسا اتفاق ہوتا رہتا ہے کہ کوئی ساتھی کام سے فارغ کر دیا جاتا ہے،یا اپنی مرضی و اختیار سے وہ کام چھوڑ کر دوسری جگہ چلا جاتا ہے۔ اِن حالات میں مذکورہ بالا قاعدے پر عمل کرنے کا موقع ہوتا ہے۔ چنانچہ دونوں فریقوں کو اعلیٰ اخلاق کو فراموش نہیں کر دینا چاہیے۔ کیا ہی خوبصورت بات ہو کہ اگر ایک ساتھی یہ بات برملا کہہ دے کہ ایک وقت تک مل جل کر کام کرنے کے بعد اگرچہ ہم دور ہو گئے ہیں، لیکن اس جدائی کا یہ معنیٰ ہرگز نہیں کہ ہم باہمی محبت واحترام بھی بھول جائیں اور مشترکہ مفادات میں تعاون کو ترک کر بیٹھیں۔ یہی وجہ ہے کہ جو افراد یا ادارے جانے والے ساتھی کے احترام میں اعزازی یاالوداعی پارٹی دیتے ہیں اور اس اصول پر عمل کر کے دکھاتے ہیں یقینا تم انہیں عظیم کہتے ہو۔ یہ ایسی خوشگوار یادیں ہوتی ہیں جو جانے والا بھول نہیں پاتا۔ اگر تم اس خوبصورت واقعے کے اثرات کو محسوس کرنا چاہتے ہو تو جو لوگ سرکاری محکموں میں یا نجی اداروں میںلمبے عرصے تک کام کرتے رہے ہوں اور جب وہ جا رہے ہوں اور کوئی ان کے بارے میں ایسا اہتمام نہ کرے، حتیٰ کہ شکریے کا سر ٹیفکیٹ تک نہ دیا جائے تو ان کی نفسیاتی حالت میں جو ٹوٹ پھوٹ آتی ہے اس کا ذرا اندازہ کر لیں۔
2 اپنے اساتذہ کے ساتھ وفا کرنا،اور طالب علم کے دل میں اچھے جذبات کا محفوظ رہنا۔ میں ذاتی طور پر ایک استادکو جانتا ہوں جو سعودی عرب کے ایک علاقے میں خدمات انجام دے رہا ہے، اُس نے وفا کی مثال قائم کی ہے۔ اُس نے نا صرف اپنے اساتذہ کے ساتھ حسن ِ معاملہ رکھا، بلکہ جب اُس کے استاد فوت ہوگئے تو آگے بڑھ کر ان کی اولاد کے ساتھ بھی حسن سلوک کیا۔ تمہاری خوشگوار حیرت میں اضافہ ہوگا جب تمہیں یہ معلوم ہوگاکہ اس نے سعودی عرب سے باہر سے آنے والے اساتذہ سے بھی رابطہ رکھا، خواہ ان اساتذہ کا تعلق مصر،شام یا کسی دوسرے ملک سے تھا۔ اللہ تعالیٰ اس شخص کا بھلا کرے،اور امت میں اس جیسے وفا شعاروں کا اضافہ کرے۔
3 پڑوسیوں اور اہل مسجد کے ساتھ اعلیٰ اخلاق سے پیش آنا۔
ہم اللہ تعالیٰ سے دعاگوں ہیں کہ ہمیں اچھے اخلاق اوراچھے اعمال کی ہدایت دے۔ اللہ تعالیٰ کے علاوہ کوئی بھی اچھائی کی ہدایت نہیں دے سکتا، اور ہمیں برے اخلاق سے محفوظ رکھے، اور وہی برے اخلاق سے محفوظ رکھ سکتا ہے۔ (جاری ہے)

قرآن مجید کا تعارف:

اللہ تعالی نے ہمارے پیارے رسول ﷺ کو انتہائی بلند مقام عطا فرمایا اور مختلف معجزات (Miracles) سے نوازا۔ جن میں سب سے عظیم و سنہری معجزہ قرآن کریم ہے۔

قرآن کریم کا انتہائی مختصر تعارف اور خصوصیات درجِ ذیل ہیں:

1ـ قرآن مجید اللہ تعالی کا کلام ہے :

جیسا کہ اللہ سبحانہ و تعالی کا ارشاد ہے:

وَاِنْ اَحَدٌ مِّنَ الْمُشْرِکِیْنَ اسْتَجَارَکَ فَاَجِرْہُ حَتّٰی یَسْمَعَ کَلٰمَ اللّٰہِ ثُمَّ اَبْلِغْہُ مَاْمَنَہٗ ذٰلِکَ بِاَنَّہُمْ قَوْمٌ لَّا یَعْلَمُوْنَ (التوبۃ: 6)

اور اگر ان مشرکوں میں سے کوئی آپ سے پناہ طلب کرے تو اسے پناہ دیجئے تاآنکہ وہ (اطمینان سے) اللہ کا کلام سن لے۔ پھر اسے اس کی جائے امن تک پہنچا دو۔ یہ اس لیے (کرنا چاہئے) کہ وہ لوگ علم نہیں رکھتے۔

2ـ قرآن مجید اللہ کے پاس لوح محفوظ میں ہے:

فرمان الٰہی ہے:

بَلْ ہُوَ قُرْاٰنٌ مَّجِیْدٌ فِیْ لَوْحٍ مَّحْفُوْظٍ (آیت:22)

بلکہ یہ قرآن بلند پایہ ہے، جو لوح محفوظ میں (درج ہے)۔

3ـ قرآن مجید کی حفاظت کی ضمانت خود اللہ تعالیٰ نے دی ہے:

اِنَّا نَحْنُ نَزَّلْنَا الذِّکْرَ وَاِنَّا لَہٗ لَحٰفِظُوْنَ (الحجر:9)

بےشک ہم نے ہی یہ نصیحت نازل کی ہے اور بےشک ہم اس کی ضرور حفاظت کرنے والے ہیں ۔

صرف قرآن مجید کو ہی یہ اعزاز حاصل ہے کہ اللہ کی قدرت کاملہ کے ذریعہ قرآن کریم ہمیشہ محفوظ رہے گا۔

4ـ قرآن کریم انمول معجزہ ہے:

قرآن مجید اللہ کی طرف سے پیارے نبی جناب محمد رسول اللہ ﷺ پر نازل کیا گیا ایک ایسا انمول معجزہ (Miracle) ہے جس کی زبان صرف نفیس ہی نہیں بلکہ عربی زبان کا شاہکار (Master piece)ہے، اسلوب بڑا نرالہ ہے، اور اثر انگیزی کا تو یہ عالم ہے کہ مشرکین مکہ بھی اس کے قائل تھے، نیز یہ معجزہ مستقل و ابدیہے ۔قرآن مجید جیسا کلام کوئی نہیں لا سکتا جیساکہ ارشاد الٰہی ہے:

قُلْ لَّیِٕنِ اجْتَمَعَتِ الْاِنْسُ وَالْجِنُّ عَلٰٓی اَنْ یَّاْتُوْا بِمِثْلِ ہٰذَا الْقُرْاٰنِ لَا یَاْتُوْنَ بِمِثْلِہٖ وَلَوْ کَانَ بَعْضُہُمْ لِبَعْضٍ ظَہِیْرًا (بنی اسرائیل:88)

کہہ دے اگر سب انسان اور جن جمع ہوجائیں کہ اس قرآن جیسا بنا لائیں تو اس جیسا نہیں لاسکیں گے، اگرچہ ان کا بعض بعض کا مددگار ہو ۔

5قرآن مجید کامل ہدایت ہے (Complete Guidance)

قرآن کریم تمام شعبہ ہائے زندگی میں بہترین رہنمائی فراہم کرتا ہے۔ اللہ تعالی نے فرمایا:

شَہْرُ رَمَضَانَ الَّذِیْٓ اُنْزِلَ فِیْہِ الْقُرْاٰنُ ھُدًی لِّلنَّاسِ وَ بَیِّنٰتٍ مِّنَ الْہُدٰی وَالْفُرْقَانِ (البقرۃ: 185)

’’رمضان کا مہینہ وہ ہے جس میں قرآن اتارا گیا، جو لوگوں کے لیے سراسر ہدایت ہے اور ہدایت کی اور (حق و باطل میں) فرق کرنے کی واضح دلیلیں ہیں‘‘

6قرآن مجید تمام جہانوں کے لئے ہدایت ہے:

وَمَا ہُوَ اِلَّا ذِکْرٌ لِّلْعٰلَمِیْنَ (القلم:52)

حالانکہ وہ تمام جہانوں کے لیے نصیحت کے علاوہ کچھ بھی نہیں

7ـقرآن مجید میں کسی قسم کا کوئی بھی تضاد (Contradiction) نہیں:

قرآن مجید میں کسی قسم کا کوئی تضاد نہیں ہے بلکہ اس کے مضامین میں مکمل ہم آہنگی (Harmony) اور ارتباط (Integrity)پایا جاتا ہے۔اللہ تعالی وحدہ لا شریک کا فرمان ہے:

اَفَلَا یَتَدَبَّرُوْنَ الْقُرْاٰنَ ۭوَلَوْ کَانَ مِنْ عِنْدِ غَیْرِ اللّٰہِ لَوَجَدُوْا فِیْہِ اخْتِلَافًا کَثِیْرًا(النساء: 82)

تو کیا وہ قرآن میں غورو فکر نہیں کرتے، اور اگر وہ غیر اللہ کی طرف سے ہوتا تو وہ اس میں بہت زیادہ اختلاف پاتے۔

8ـقرآن مجید انتہائی مؤثر (Effective) کلام ہے:

قرآن کی تاثیر کا عالم یہ ہے کہ کوئی شخص قرآن کے معانی و مفہوم کو نہ بھی سمجھتا ہو اس کے باوجود اگر وہ قرآن کی تلاوت سنے تو اس کے دل کی کیفیت بدل جاتی ہے اور اسے سکون ملتا ہے۔ اسی لئے مشرکین مکہ اسے جادو سے تعبیر کیا کرتے تھے۔فرمان الٰہی ہے:

وَاِذَا تُتْلٰی عَلَیْہِمْ اٰیٰتُنَا بَیِّنٰتٍ قَالَ الَّذِیْنَ کَفَرُوْا لِلْحَقِّ لَمَّا جَاۗءَہُمْ ۙ ھٰذَا سِحْرٌ مُّبِیْنٌ (الأحقاف: 7)

’’اور جب ان کے سامنے ہماری واضح آیات پڑھی جاتی ہیں تو وہ لوگ جنھوں نے کفر کیا حق کے بارے میں، جب وہ ان کے پاس آیا، کہتے ہیں یہ کھلا جادو ہے‘‘

9ـ قرآن کریم ہر قسم کے شک و شبہ سے پاک ہے:

ذٰلِکَ الْکِتٰبُ لَا رَیْبَ ٻ فِیْہِ ڔ ھُدًی لِّلْمُتَّقِیْنَ

یہ ایسی کتاب ہے جس میں شک کی کوئی گنجائش نہیں، اس میں ان ڈرنے والوں کے لیے ہدایت ہے (البقرۃ:2)

10ـ قرآن مجید میں سچی پیشن گوئیاں ہیں:

قرآن مجید میں اللہ رب العزت نے جو پیش گوئیاں ذکر فرمائی ہیں ان میں سے کچھ واقع ہوچکی ہیں جبکہ باقی پیش گوئیاں بھی واقع ہوکر ہی رہیں گی۔جیسا کہ سورۃ بنی اسرائیل میں اللہ تعالی نے فرمایا:

وَاِنْ کَادُوْا لَیَسْتَفِزُّوْنَکَ مِنَ الْاَرْضِ لِیُخْرِجُوْکَ مِنْہَا وَاِذًا لَّا یَلْبَثُوْنَ خِلٰفَکَ اِلَّا قَلِیْلًا (سورۃ الاسراء: 76)

قریب تھا کہ یہ لوگ آپ کو اس سرزمین (مکہ) سے دل برداشتہ کردیں تاکہ آپ کو یہاں سے نکال دیں ۔ اور ایسی صورت میں آپ کے بعد یہ لوگ بھی یہاں زیادہ دیر نہ ٹھہر سکیں گے۔

یہ پیشین گوئی غزوہ بدر اور فتح مکہ کے موقعوں پر پوری ہوئی اور کئی کفار ہلاک ہوگئے اور کئی ذلت و رسوائی کے ساتھ بھاگ گئے۔ اور کچھ مسلمان ہوگئے۔

11ـ قرآن کی بدولت ہی عزت و کامیابی نصیب ہوتی ہے:

فرمان نبوی ﷺ ہے:

إِنَّ اللّٰہَ یَرْفَعُ بِہَذَا الْکِتَابِ أَقْوَاما وَیَضَعُ بِہِ آخَرِیْنَ

بے شک اللہ تعالی اس کتاب (قرآن) کی بدولت بہت سی قوموں کو ترقی دیتا ہے اور اسی کی وجہ سے بہت سی قوموں کو رسوا کردیتا ہے۔(مسلم)

اقبال نے کہا تھا:

قرآن میں ہو غوطہ زن اے مرد مسلماں

اللہ کرے تجھ کو عطا جدّتِ کردار

12قرآن کریم کے نزول، حفظ و کتابت، جمع و تدوین کے اعتبار سےمراحل :

اللہ سبحانہ وتعالی کے فضل و کرم سے قرآن کریم نزول سے لے کر مصحف کی صورت تک چند اہم مراحل سے گزر کر ہم تک پہنچا ہے۔اس لئے اختصار کے ساتھ ان مراحل کو تحریر کرنا نہایت قابل ذکر ہے۔

پہلا مرحلہ:

قرآن مجید کا نزول:

سیدناعبداللہ ابن عباس رضی اللہ عنہما کے قول کے مطابق قرآن مجید دو (2) مرتبہ نازل ہوا:

(پہلی مرتبہ) قرآن مجید لیلۃ القدر میں لوح محفوظ سے آسمان دنیا کے بیت العزت یعنی ’البیت المعمور‘ میں ایک ہی مرتبہ مکمل نازل کیا گیا۔ اور اس کے بعد دوسری مرتبہ آسمان دنیا سے بتدریج (وقتا فوقتا) ہمارے پیارے نبی جناب محمد رسول اللہﷺ کے مبارک قلب (دل) پر نازل کیا گیا۔ (الحاکم)

پہلی مرتبہ مکمل قرآن مجید رمضان کے مہینے میں لیلۃ القدر میں لوح محفوظ سے آسمان دنیا کے ’البیت المعمور، میں نازل کیا گیا۔ اس بارے میں اللہ تعالی نے فرمایا:

اِنَّآ اَنْزَلْنٰہُ فِیْ لَیْلَةٍ مُّبٰرَکَةٍ اِنَّا کُنَّا مُنْذِرِیْنَ

’’بےشک ہم نے اسے ایک بہت برکت والی رات میں اتارا، بےشک ہم ڈرانے والے تھے ‘‘(الدخان:3)

اس آیت کریمہ میں جس برکت والی رات کا ذکر ہے اس سے مراد لیلۃ القدر کی رات ہے جیساکہ سورۃ القدر میں ارشاد الٰہی ہے:

اِنَّآ اَنْزَلْنٰہُ فِیْ لَیْلَةِ الْقَدْرِ (القدر:1)

’’بلاشبہ ہم نے اسے قدر کی رات میں اتارا‘‘

اور یہ بات واضح ہے کہ لیلۃ القدر کی رات رمضان میں ہوتی ہے اور قرآن مجید کا نزول بھی رمضان کے مہینہ میں لیلۃ القدر میں ہوا۔جیساکہ مندرجہ ذیل آیت میں مذکور ہے:

شَہْرُ رَمَضَانَ الَّذِیْٓ اُنْزِلَ فِیْہِ الْقُرْاٰنُ (البقرۃ:185)

’’رمضان وہ مہینہ ہے جس میں قرآن نازل کیا گیا‘‘

دوسری مرتبہ آسمان دنیا سے بتدریج (وقتا فوقتا) قرآن نازل ہونے کی دلیل اللہ تعالی کا یہ فرمان ہے :

وَقُرْاٰنًا فَرَقْنٰہُ لِتَقْرَاَہٗ عَلَی النَّاسِ عَلٰی مُکْثٍ وَّنَزَّلْنٰہُ تَنْزِیْلًا(سورۃ الاسراء: 106)

اور عظیم قرآن، ہم نے اس کو جدا جدا کرکے (نازل) کیا، تاکہ تو اسے لوگوں پر ٹھہر ٹھہر کر پڑھے اور ہم نے اسے نازل کیا، (تھوڑا تھوڑا) نازل کرنا۔

دوسرا مرحلہ:

جمع و تدوینِ قرآن مجید بمعنی حفظ و کتابت قرآن مجید، یہ چونکہ اللہ کی سچی کتاب ہے اور قیامت تک آنے والے لوگوں کے لئے ہدایت ہے اس لئے اللہ تعالی نے ہی اس کی حفاظت کی ذمہ داری لی ہے اور فرمایا:

اِنَّا نَحْنُ نَزَّلْنَا الذِّکْرَ وَاِنَّا لَہٗ لَحٰفِظُوْنَ (الحجر:9)

’’یقینا ہم نے ہی الذکر اتارا ہے اور یقینا ہم ہی اس کے محافظ ہیں‘‘

قرآن کریم کی حفاظت کے مختلف انداز ہیں جن کا تعلق مختلف ادوار سے ہے۔

(۱) نبی مکرمﷺ کا زمانہ۔

(2) سیدناابوبکرصدیق رضی اللہ عنہ کا زمانہ

(3) سیدناعثمان رضی اللہ عنہ کا زمانہ

1 نبی کریمﷺ کے زمانے میں جمع القرآن:

پیارے نبیﷺ کے زمانے میں قرآن مجید کی حفاظت دو طریقوں سے ہوئی۔

1ـ حفظ                      2ـ کتابت

(الف) عہد نبوی ﷺ میں جمع القرآن بمعنی حفظِ قرآن:

اللہ ذوالجلال کا فرمان ہے:

اِنَّ عَلَیْنَا جَمْعَہٗ وَقُرْاٰنَہ (القیامۃ:17)

بلاشبہ اس کو جمع کرنا اور ( آپ کا ) اس کو پڑھنا ہمارے ذمے ہے۔

اللہ تعالی نے قرآن مجید کو نبی مکرمﷺ کے سینے میں محفوظ فرمایا اور یہی وجہ ہے اللہ کے رسولﷺ نے دو مرتبہ قرآن حکیم جبرائیل علیہ السلام کو سنایا۔نیز صحابہ کرام رضی اللہ عنھم نے بھی قرآن مجید کو حفظ کیا، جن میں سے سات حفاظ صحابہ رضوان اللہ علیہم اجمعین کے نام صحیح بخاری میں سرفہرست ہیں۔ سیدناعبد اللہ بن مسعودرضی اللہ عنہ، سیدناسالم بن معقل (مولی ابی حذیفہ) رضی اللہ عنہ ،سیدنا معاذ بن جبل رضی اللہ عنہ ،سیدنا ابی بن کعب رضی اللہ عنہم،سیدنا زید بن ثابت رضی اللہ عنہ ،سیدنا ابوزید رضی اللہ عنہ۔(بخاری)

(ب) عہد نبوی ﷺ میں جمع القرآن بمعنی کتابتِ قرآن

پیارے نبیﷺ نے بعض جلیل القدر صحابہ رضوان اللہ علیہم اجمعین کو وحی لکھنے کی ذمہ داری دی جن میں سرفہرست سیدنا علی،سیدنا معاویہ،سیدنا ابی بن کعب اورسیدنا زید بن ثابت رضی اللہ عنہم وغیرہ ہیں۔ پیارے نبیﷺ ان صحابہ رضوان اللہ علیہم اجمعین کی رہنمائی کرتے کہ کس آیت کو کونسی سورت میں لکھنا ہے۔یہ صحابہ رضوان اللہ علیہم اجمعین (کاتب وحی) متعدد جگہوں اور مختلف چیزوں (درختوں کی چھال، پتھر، چمڑے وغیرہ) پر قرآن لکھا کرتے تھے۔ (الحاکم)

2 سیدناابو بکرt کے زمانے میں جمع القرآن:

سیدنا ابوبکر صدیق رضی اللہ عنہ کے زمانے میں قرآن کی حفاظت کا انداز:

سیدنا ابوبکر صدیق رضی اللہ عنہ کے زمانے میں سنہ 12 ہجری میں جنگ یمامہ واقع ہوئی جس میں ستر (۷۰) حفاظ صحابہ رضوان اللہ علیہم اجمعین شہید ہوئے۔سیدناعمر فاروق رضی اللہ عنہ نے اس ڈر کو محسوس کیا کہ قرآن کے ضائع ہونے کا اندیشہ ہے، اسی لئے ابوبکر رضی اللہ عنہ سے گزارش کی کہ قرآن کو ایک جگہ لکھ کر جمع کیا جائے،لہذا سیدنا ابوبکر صدیق رضی اللہ عنہ نے یہ ذمہ داری زید بن ثابت رضی اللہ عنہ کو سونپ دی۔

ابوبکر t کے زمانے میں جمع القرآن بمعنی کتابتِ قرآن:

سیدنازید بن ثابت t فرماتے ہیں کہ میں نے قرآن مجید کو ان مختلف جگہوں سے جمع کرلیا جہاں صحابہ رضوان اللہ علیہم اجمعین نے زمانہء نبوت میں لکھا تھا نیز جن صحابہ رضوان اللہ علیہم اجمعین کو قرآن مجید یاد تھا ان سے بھی موافقت لی۔وہ قرآن مجید کے جمع شدہ نسخہ ابوبکر t کے پاس تھا پھرسیدنا عمر tکے پاس رہا اور پھرسیدہ حفصہ بنت عمر رضی اللہ عنھما کے پاس رہا۔ (بخاری)

سیدناابوبکر رضی اللہ عنہ کے زمانے میں قرآن کریم کو ایک جگہ جمع کیا گیا نیز اس میں وہ سات حروف (قراءت و لہجے) اسی انداز سے موجود تھے جس طرح قرآن مجید نازل ہوا تھا۔

3سیدنا عثمان tکے زمانے میں جمع القرآن:

اسلامی فتوحات کی وجہ سے حفاط صحابہ رضوان اللہ علیہم اجمعین مختلف جگہوں میں چلے گئے، اور ہر علاقہ والوں نے اپنے علاقہ میں رہائش پذیرصحابہ رضوان اللہ علیہم اجمعین سے ان کے لہجہ میں قرآن سیکھا۔چونکہ قرآن مجید کے بعض الفاظ مختلف حروف کے ساتھ نازل ہوئے تھے لہٰذا جب مختلف علاقوں کے لوگ ایک جگہ جمع ہوتے اور ایک دوسرے کا مختلف اندازِ تلاوت سنتے تو حیران ہوجاتے، اکثر لوگ تو مان لیتے کہ یہ سب ہی طریقے صحیح ہیں لیکن کبھی کبھی یہ بات ضرور انہیں ستاتی تھی کہ ان حروف یا لہجوں میں سے کون سا لہجہ سب سے اعلی ہے۔

ایک وقت ایسا آیا جس کی تفصیل صحیح بخاری میں درج ذیل ہے:

سیدناحذیفہ بن الیمان رضی اللہ عنہ فرماتے ہیں کہ اہلِ عراق اور اہلِ شام کی جنگوں (جنگ ارمینیہ اور جنگ آذربایجان) کے موقعہ پر میں نے لوگوں میں قراءتِ قرآن کے بارے میں شدید اختلاف دیکھا اور سیدنا عثمان رضی اللہ عنہ کو اس سے آگاہ کیا، تو انہوں نے سیدہ حفصہ رضی اللہ عنہا سے وہ قرآن کریم کے نسخہ (جو زید بن ثابت رضی اللہ عنہ نے سیدناابوبکر صدیق رضی اللہ عنہ کے زمانے میں لکھے تھے) منگوالئے، اور زید بن ثابت، عبد اللہ بن زبیر، سعید بن عاص اور عبدالرحمن بن حارث بن ھشام رضی اللہ عنہم (ان چاروں صحابہ کرام) نے سیدناعثمان رضی اللہ عنہ کے حکم سے ان صحیفوں کو مزید نقل کرکے ایک ہی قراءت (قریش کی زبان) میں متعدد مصاحف میں جمع کیا۔ اس کے بعد سیدناعثمان رضی اللہ عنہ نے حفصہ رضی اللہ عنھا کو ان کے صحیفے بھجوادیے اور ایک ہی قراءت والے مصاحف کو مختلف مقامات پر بھجواکر حکم دیا کہ اس کے علاوہ جو بھی نسخہ کسی کے پاس ہو تو وہ جلا دے تاکہ آئندہ اختلاف کی گنجائش نہ رہے۔

اس طرح عثمان رضی اللہ عنہ کے دور میں قرآن حکیم کے سات حروف (قراءت) کی بجائے ایک ہی قراءت (قریش کی زبان) پر جمع کیا گیا جو کہ اللہ کے فضل و کرم سے کسی تبدیلی کے بغیر ہم تک پہنچا۔

سوالات:

س۱: مشرکین مکہ قرآن کریم کو جادو سے کیوں تعبیر کرتے تھے؟

س2: نزول کے اعتبار سے قرآن مجید کی کونسی دو (۲) قسمیں ہیں، مختصر جواب دیں۔

س3: پہلی مرتبہ قرآن مجید کہاں سے کہاں تک نازل ہوا؟

س4: پہلی مرتبہ قرآن کریم کس رات میں نازل ہوا؟ وہ رات رمضان کی لیلۃ القدر تھی یا شعبان کی پندھرویں شب؟

س 5:دوسری مرتبہ قرآن حکیم کا نزول کہاں سے کہاں تک ہوا؟

س6: کیا قرآن مجید نبیﷺ کے مبارک دل پر ایک ہی مرتبہ نازل ہوا یا مختلف اوقات میں نازل ہوا؟

س7: کیا قرآن اللہ کا کلام ہے؟

س8: کیا نبی مکرمﷺ اور صحابہ کرام y کو قرآن مجید یاد تھا؟

س9:پیارے رسول ﷺ کے زمانے میں صحابہ رضوان اللہ علیہم اجمعین نے قرآن کو کس طرح لکھا؟ ایک ہی جگہ یا مختلف چیزوں پر؟

س10:سیدنا ابوبکر رضی اللہ عنہ کے زمانے میں قرآن کی قرآن کریم کو کس طرح جمع کیا گیا نیز کس انداز سے لکھا گیا؟

س11: سیدناعثمان رضی اللہ عنہ میں زمانے قرآن مجید کو کس طرز پر جمع کیا گیا؟

ہمارے ملک پاکستان کا بااثر طبقہ ، حکمران اور سیاستدان اکثر اغیار کی تقلید کرتے ہوئے نظر آتے ہیں گویا کہ انہی کے تنخواہ دار ہیں ان کی نمک حلالی کرنے میں بہت پیش پیش رہتے ہیں انہی کے ہم نوالہ ، ہم پیالہ ہونے کا دم بھر تے ہیں ، شکل وصورت ، وضع قطع حتیٰ کہ لباس بھی انہی کا زیب تن کرتے ہیںپھر زبان بھی انہی کی بولیں گے ، اپنے مذہب ، قوم اور ملک کی کیا پرواہ؟، ملک کی اشرافیہ کی یہ حالت ہے کہ انہیں اپنی قومی زبان تک نہیں آتی کہ وہ اپنا مافی ضمیر قوم کو سمجھا سکیں، دل ودماغ کچھ اور سوچ رہے ہوتے ہیں اور زبان سے کچھ اور پھول جھڑ رہے ہوتے ہیں، اپنے مذہب کے بنیادی عقائد وارکان کی بھی انہیں خبر تک نہیں، شریعت اسلامیہ سے بالکل نابلد ہیں ایک سابق وزیر کو یہ کہتے ہوئے سنا گیا کہ آذان بج رہا ہےایک ملک کے نامی گرامی قانون دان ہیں، انہیں اس بات کا بھرم ہے کہ میرے دم سے ہی پاکستانی عدالتوں کا نظام چل رہا ہے جب انہوں نے عوام کے سامنے سورت فاتحہ پڑھنا چاہی جو صرف سورت فاتحہ بھی نہ پڑھ سکے، یہ و وہ سورت ہے جو ہر نماز کی ہر ہر رکعت میں پڑھی جاتی ہے اور بچوں کو بھی یاد ہوتی ہےاور ایک سابق وزیر داخلہ کو سورہ اخلاص بھی پڑھنی نہ آئی ، یہ ان کی دینی قابلیت ہے ، مسلمان ہونے کے ناطے ، جس علم کا حصول ہر مسلمان پر فرض ہے اور یہ اشرافیہ ملک و قوم اور نہ ہی مذہب کے وفادار ہیں بلکہ یہ وفاداریاں اغیار کی ننبھاتےتے ہیں، سابق انڈس واٹر کمشنر سید جماعت علی شاہ ہندوستان میں پاکستان کے مندوب بن کر جاتے تھے مگرنمائندگی ہندوستان کی کرتےہیں۔

ایسے ہی ایک صاحب قوم کے خیر خواہ اور مسیحا بننے کی ان تھک کوشش کر رہے ہیں ، وہ قوم کو سبز باغ دکھلارہے ہیں ، حقیقت میں وہ بھی غیر وں کے فرمانبردار ہیں ان کی اصلیت بھی کھل کر سامنے آگئی ہے ان کے ماضی کا داغدار ہونا تو سب کو معلوم تھا مگر حال کا اب پتہ چلا ہے کہ سابقہ بیوی فرماتی ہیں کہ میرے اور عمران کے کتوں کی بھی آپس میں نہیں بنی ۔

اس کے ساتھ جماعت اسلامی کی عقل کا بھی ماتم کرنے کو دل چاہتا ہے کہ ملک میں اسلامی نظام کی تنفیذ کا دعویٰ کیا جاتا ہے اس ملک کو اسلامی، فلاحی اسٹیٹ بنائیں گے اس ملک کو سیکولر نہیں بننے دیں گے جماعت سے ایسی توقع کی جانی بھی چاہیے کیونکہ اس کا مطلب یہ ہے کہ ہم ملک کو لادین قوتوں کے ہاتھ میں نہیں جانے دیں گے مگر جماعت اسلامی سے پوچھا جائے کہ حالیہ الیکشن میں سیٹ ایڈجسٹمنٹ کن سے کی جارہی ہے ؟ ان سے جن کے گھر میں کتے پلتے ہیں جن کے کتوں کے لیے روم اور بیڈ مخصوص ہیں کیا یہ سیکولر ذہن رکھتے والے لوگ نہیں ، جماعت اسلامی تو ایک نظریاتی جماعت ہے ، یہ بات سمجھ سے بالاتر ہے کہ یہ بھی کرسی اور اقتدار کی ہوس میں اس قدر آگے چلی جائےکہ ملحدانہ خیالات رکھنے والے لوگوں سے الحاق کرلے گی ، ہم اپنے حکمرانوں کی بات کر رہے تھے بات کہیں اور نکل گئی ہمارے حکمران اغیار کی غلامی میں بہت آگے نکل گئے ہیں کہ انہیں نہ اپنے دین کی کوئی خبر اور نہ ہی ملکی قوانین کا کوئی علم ہے ملکی آئین یہ بات واضح طور پر مکتوب ہےکہ پاکستان کا سپریم لاء قرآن وسنت ہوگاکوئی قانون اگر قرآن وسنت کے متصادم د ہوگا تو اسے کالعدم قرار دیدیا جائے گا ۔

۱۴ نومبر ۱۹۹۱ء کو پاکستان کی فیڈرل شریعت کورٹ نے ہر قسم کے سودی کاروبار کو حرام قرار دیکر ملکی معیشت کو جلد اس سے پاک کرنے کا تاریخ ساز فیصلہ دیا تھا اور ۲۳ دسمبر ۱۹۹۹کو سپریم کورٹ کے شریعت اپلیٹ بنچ نے بھی اس کی توثیق کی تھی۔

یہی وجہ ہے کہ اسلامی جمہوریہ پاکستان ، جس کے آئین میں سود کو ختم کرنے کی ذمہ داری حکومت کی ہے اس مملکت کے صدر ممنون حسین کو یہ جرأت ہوتی ہے کہ وہ علماء سے کہتے ہیں کہ ’’ہائوس بلڈنگ کے قرضے پر سود کی ادائیگی کے لیے راستہ نکالیں‘‘ ۔ ہاؤس بلڈنگ کے قرضے حکومت کے زیر انتظام دیے جاتے ہیں اور صدر محترم اپنے ماتحت محکمے کو سود سے منع نہیں کر سکتے لیکن علماء سے کہتے ہیں کہ کوئی راستہ نکالیں۔ یعنی حکومت تو یہ حرام کھاتی رہے گی، آپ دینے والوں کی تسلی کے لیے کوئی راستہ نکالو۔ یہ توقع علماء سے کیوں لگائی گئی۔ اس لیے کہ اس مملکت خداداد پاکستان کے کچھ اسکا لرز نے ایک ایسے بینکاری نظام کو حیلوں کے ذریعے اسلامی بنا کر پیش کیا جس کی ساری کی ساری اساس ہی سودی نظام پر ہے، ان لوگوں کا حال بھی علمائے یہود کا سا ہے جن کا خاصا تھا کہ حیلہ سازی و بہانہ بازی اور مختلف طریقوں سے اللہ تعالیٰ کے نازل کردہ احکامات سے روگردانی کا راستہ نکالنا ۔ لیکن رسول اللہ صلی اللہ تعالیٰ علیہ و سلم نے اپنی امت کے بارے میں ایسے ہی ایک خطرے سے آگاہ فرمایا:’’عَنْ أَبِي سَعِيدٍ رَضِيَ اللَّهُ عَنْهُ، أَنَّ النَّبِيَّ صَلَّى اللهُ عَلَيْهِ وَسَلَّمَ، قَالَ:تَتَّبِعُنَّ سَنَنَ مَنْ قَبْلَكُمْ شِبْرًا بِشِبْرٍ، وَذِرَاعًا بِذِرَاعٍ، حَتَّى لَوْ سَلَكُوا جُحْرَ ضَبٍّ لَسَلَكْتُمُوهُ، قُلْنَا يَا رَسُولَ اللَّهِ: اليَهُودَ، وَالنَّصَارَى قَالَ: فَمَنْ‘‘(صحيح البخاري 4/ 169)

سیدنا ابو سعید رضی اللہ عنہ روایت کرتے ہیں کہ رسول اللہ (صلی اللہ علیہ وآلہ وسلم) نے فرمایا تم لوگ اپنے سے پہلے لوگوں کی (ایسی زبردست پیروی کرو گے (حتیٰ کہ) ایک ایک بالشت اور ایک ایک گز پر (یعنی ذرا سا بھی فرق نہ ہوگا) حتیٰ کہ اگر وہ لوگ کسیسانڈے کے سوراخ میں داخل ہوئے ہوں گے تو تم بھی داخل ہو گے ہم نے عرض کیا یا رسول اللہ (صلی اللہ علیہ وآلہ وسلم) یہود و نصاری مراد ہیں آپ (صلی اللہ علیہ وآلہ وسلم) نے فرمایا پھر اور کون مراد ہوسکتا ہے۔

’’جب سپریم کورٹ نے اپنے تاریخ ساز فیصلے مورخہ 23 دسمبر 1999ء میں بینکاری سود کو حرام قرار دیا تو اقتدار کے ایوانوں میں ہل چل مچ گئی۔ فوری طور پر جو پالیسی ترتیب دی گئی اس کے اہم ستون یہ تھے۔ 1- عدالتوں کے ذریعے سود کے حرام ہونے کو متنازعہ رکھا جائے تا کہ پوری قوم کنفیوژن کا شکار رہے۔2 – حکومت عدالت میں یہ مؤقف اختیار کرے کہ اسلام نے تو اصل میں رباء کو حرام قراردیا جب کہ بینکاری سود تو رباء ہے ہی نہیں۔ -3 موجودہ جدید بینکاری کی طرز پر ایک اسلامی بینکاری نظام قائم کیا جائے جو سودی نظام کے شانہ بشانہ چلتا رہے اور جسے اسلامی قرار دینے کے لیے شریعہ ایڈوائز مقرر کیے جائیں۔

یوں ایک ہی بینک لوگوں کو یہ سہولت دے کہ اگر وہ چاہیں تو اسلامی بینکاری کے تحت اکاؤنٹ کھولیں یا عام بینکاری کے تحت۔ یعنی چاہے تو اس بینک کی دکان سے حرام کاروبار کریں یا حلال۔ یہ ایسے ہی ہے کہ ایک قصاب کی دکان پر خنزیر اور بکری کا گوشت بیک وقت دستیاب ہو۔ اس وقت 22 اسلامی بینک بیک وقت یہ سہولت فراہم کر رہے ہیں اور ان بینکوں میں بیٹھے شریعہ ایڈوائزر اور مفتیان کرام خاموش ہیں بلکہ اسٹیٹ بینک کا شریعہ ایڈوائزی بورڈ بھی خاموش ہے۔ کیسے ہو سکتا ہے کہ ایک قصاب کی دکان پر خنزیر کا گوشت بھی بک رہا ہو اور آپ کہیں کہ میں تو اس بات کی تنخواہ لیتا ہوں کہ یہاں بکری کا گوشت خالص ہے یا نہیں۔ اگر اسلامی بینکاری واقعی حلال ہے تو مروجہ بینکاری کو بند کیوں نہیں کرتے۔ سب کچھ تو ویسا ہی ہے‘ عمارت‘ چیک بک‘ اے ٹی ایم کارڈ‘ قرضہ اسکیمیں وغیرہ وغیرہ۔ لیکن ہم نے ہی تو حیلہ سازی سے انھیں قائم رکھا ہوا ہے۔ صرف ایک شرعی حیلہ بیان کر دوں۔ اجارہ سکوک‘ یہ ایک طرح کے بانڈ کی قسم ہے۔ مثلاً واپڈا اگر ایک ڈیم بنانا چاہتا ہے تو وہ اپنے ڈائریکٹروں کی ایک کمپنی بنائے گا جسے SPV یعنی Siecial Purpose Vehicle کہتے ہیں۔

یہ کمپنی اس ڈیم کی عالمی کنسلٹیسٹ سے قیمت لگوائے گی جسے Valuation کہتے ہیں۔ یہ قیمت اسلامی بینک اجارہ سکوک کی انوسٹمنٹ کے ذریعے ادا کر دیں گے جس سے وہ ڈیم بنے گا۔ اب یہ کمپنی جو اسی ادارہ کے ڈائریکٹروں پر مشتمل ہو گی‘ ڈیم کو واپڈا کو استعمال کرنے کے لیے دے گی۔ اب واپڈا سے جو رقم کمپنی حاصل کرے گی اسے سود نہیں کرایہ کہا جائے گا۔ اس پر سب سے مضحکہ خیز بات یہ ہے کہ ہر صبح اس ڈیم کا کرایہ سودی بینکوں کے سود کی شرح ناپنے کے نظام KIBOR یا LIBOR کے ذریعے ادا ہو گا۔ یعنی جس دن شرح کم اس دن کرایہ کم اور جس دن شرح زیادہ اس دن کا کرایہ زیادہ۔ کیا خوبصورت نفع اور نقصان کی حصہ داری نکالی ہے۔ کیا کسی عالم دین نے اپنا مکان کرائے پر دیا ہے اور ہر روز اس کا کرایہ KIBOR یا LIBOR کے ریٹ دیکھ کر وصول کرتا ہو۔ پوری کی پوری اسلامی بینکاری حیلہ سازی پر مبنی ہے جسے اسلامی بینکاری تو نہیں حیلہ بینکاری کیا جا سکتا ہے‘‘(اقتباس از اوریامقبول )

سود تو وہ لعنت ہے جو صرف ملت اسلامیہ میں ہی حرام نہیں بلکہ ہندو مذہب جو کہ کروڑوں معبودوں کے پجاری ہیں ان کے مذہب میں بھی یہ حرام ہے، جس کا اندازہ آپ اس عبارت سے بخوبی لگا سکتے ہیں، جیساکہ مغل شہزادے 'داراشکوہ اور معروف ہندوپنڈت کے درمیان ہونے والے مکالمے سے واضح ہے ۔داراشکوہ نے پنڈت صاحب سے پوچھا کہ کیا مسلمان پر سود کا لیناحرام اور اہل ہنود پر حلال ہے ؟تو پنڈت صاحب نے جواب دیا: اہل ہنود پر سود لیناحرام سے بھی زیادہ برا ہے ۔اس پر دارا شکوہ نے سوال کیا کہ پھر سود لیتے کیوں ہیں ؟تو پنڈت جی نے کہا کہ یہ رواج پاگیا ہے اور اس کا رواج پانا اس کے نقصان سے بے خبر ہونے کی وجہ سے ہے۔[اسرار معرفت :۲۱]

اغیار نے ملت اسلامیہ کو ہر دور میں معاشی، معاشرتی،غرض ہر قسم کا نقصان پہنچایا۔ملت اسلامیہ کے معاشی نظام کو نا کام کرنے کے لیے اُنہوں نے کبھی سرمایہ دارانہ نظام مسلط کیا،کبھی اشتراکی نظام کے فوائد بتا کر ملت اسلامیہ کی ہر سطح پر بیخ کنی کی ہے تاکہ مسلمان ہمیشہ کے لیے اقتصادی طور پر غلام بن کر رہیں۔لیکن افسوس صد افسوس مسلمانوں نے اپنے پاس الٰہی تعلیمات ہوتے ہوئے بھی اغیار کی تقلید کی اور اس میں اپنی معاشی کامیابی اور نجات سمجھنے لگے

رَأَيْتُ لَيْلَةَ أُسْرِيَ بِي، لَمَّا انْتَهَيْنَا إِلَى السَّمَاءِ السَّابِعَةِ فَنَظَرْتُ فَوْقَ - قَالَ عَفَّانُ: فَوْقِي - فَإِذَا أَنَا بِرَعْدٍ وَبَرْقٍ وَصَوَاعِقَ "، قَالَ: " فَأَتَيْتُ عَلَى قَوْمٍ بُطُونُهُمْ كَالْبُيُوتِ فِيهَا الْحَيَّاتُ تُرَى مِنْ خَارِجِ بُطُونِهِمْ، قُلْتُ: مَنْ هَؤُلَاءِ يَا جِبْرِيلُ؟ قَالَ: هَؤُلَاءِ أَكَلَةُ الرِّبَا(مسند أحمد (14/ 285)

رسول اللہ صلی اللہ علیہ وسلم نے ارشاد فرمایا شب معراج میں جب ہم ساتویں آسمان پرپہنچے تو آپ ﷺنے اوپر کی طرف نظر اُٹھا کر دیکھا تو اچانک گرج، بجلی اور کڑک محسوس کی آپﷺ نے ارشاد فرمایا ایک ایسی قوم پر میرا گزرہوا جن کے پیٹ ایسے تھے جیسے (بڑے بڑے ) مکان ہوں جن میں سانپ (بھرے ہوئے) تھے جو پیٹوں سے باہر صاف طور پر نظر آرہے تھے میں نے پوچھا جبریل یہ کون لوگ ہیں انہوں نے بتایا کہ یہ سود خور ہیں‘‘

افسوس کی بات یہ ہے اس مملکت خداداد کے سربراہ بجائے اس کے کہ اس نظام کو ختم کریں اس کی حلت کی حیلہ سازی کا راستہ نکالنا چاہتے ہیں، سود کی سنگینی میں احادیث مذکورہ کے علاوہ اور بھی بے شمار نصوص وارد ہوئے ہیں ایک اور حدیث مبارکہ میں میرے اور آپ کے آقا جناب محمدرسول اللہ ﷺ کا ارشاد گرامی ہے، جسے سیدنا عبد اﷲ بن حنظلہ رضی الله عنہ نے روایت کیا ہے کہتے ہیں کہ رسول اﷲ صلی الله علیہ وسلم نے فرمایا : ”سود کا ایک درہم ، جسے انسان جانتے بوجھتے کھاتا ہے ، وہ 36 مرتبہ زنا کاری سے بھی بدتر ہے “۔ ( صحیح : مسنداحمد ، طبرانی )

آج ہم اللہ کے عذاب کو دعوت دینے جارہے ہیں جو رب پچھلی قوموں کو صفحہ ہستی سے مٹا سکتا ہے جو کہ ہم سے کہیں زیادہ طاقتور تھیں، اگر ہم نے بھی اپنی روش نہ بدلی توورنہ ایک دن ہم اپنے ہاتھوں سے ہی تاریخ کا حصہ بن جائیں گے اور ہماری داستان تک نہ ہو گی داستانوں میں۔