آئیے حدیث رسول صلی اللہ علیہ وسلم پڑھیں

خواتین اور مرد حضرات کی خوشبو – حدیث نمبر ۴۷

عن أبی ہریرۃ رضی اللہ عنہ قال قال رسول اللہ ا : طِیبُ الرِّجَالِ مَا ظَہَرَ رِیحُہُ وَخَفِیَ لَونُہُ وَطِیبُ النِّسَائِ مَا ظَہَرَ لَونُہُ وَخَفِیَ رِیحُہُ ‘‘

تخریج : سنن الترمذی ، حدیث نمبر :۲۷۸۷، سنن النسائی ، حدیث نمبر :۵۱۲۱
راوی کا تعارف :حدیث نمبر ۱۵ کی تشریح میں ملاحظہ کریں ۔

طِیبُ: خوشبو Perfume

الرِّجَالِ : مرد Men

مَا ظَہَرَ: جو ظاہر ہو Which is aparent
رِیحُہُ : اس کی بُو Its smell

خَفِیَ: پوشیدہ Hidden

لَونُہُ : اس کا رنگ Its colour

النِّسَائِ: عورتیں Women

ترجمہ : سیدنا ابو ہریرہ رضی اللہ عنہ سے روایت ہے کہ رسول اللہ نے فرمایا : مرد حضرات کی خوشبو وہ (ہونی چاہیے ) جس کی خوشبو ظاہر ہو اور اس کا رنگ ظاہر نہ ہو (جبکہ) عورتوں کی خوشبو وہ (ہونی چاہیے ) جس کا رنگ ظاہر ہو اور خوشبو پوشیدہ ہو۔
تشریح : دین اسلام طہارت، اچھی وضع قطع ، تہذیب اور شائستگی پر بہت زور دیتا ہے ، رسول اللہ ﷺ نہ صرف کہ ذاتی طور ان چیزوں کو پسند اور اپنا معمول بناتے تھے بلکہ امت کو بھی یہ معاشرتی تعلیمات دیتے تھے ۔
ہمہ وقت صاف ستھرا اور معطر رہنا پسندیدہ معمول تھا۔ اس سلسلہ میں آپ ﷺ کی تعلیمات درج ذیل ہیں :
۱۔ مرد اور خاتون دونوں حلال خوشبو استعمال کریں ، اپنے جسم ولباس کی صفائی اور بہتر وضع قطع کا اہتمام کریں ۔
۲۔ مرد حضرات ایسی خوشبو استعمال کریں جسکا رنگ نمایاں نہ ہو صرف خوشبو محسوس ہو جبکہ خواتین اپنے بناؤ سنگھار میں صرف ایسی چیزیں استعمال کریں جنکی خوشبو نہ ہو تو بھی کوئی حرج نہیں البتہ رنگ زیادہ ظاہر ہو۔
۳۔ خاتون گھرسے باہر نکلتے وقت(جہاں غیر محرم مردوں کے پاس سے گزرنا اور آنا جانا متوقع ہو) اپنی زیب وزینت اور رنگ وغیرہ بھی چھپالیں تاکہ کوئی مرد ان کی طرف متوجہ نہ ہو۔
۴۔ غیر محرم مرد حضرات کے درمیان گھومنا ، تیز خوشبو لگا کر ان کے آمنے سامنے آنا شدید مذموم فعل ہے ۔
واضح رہے کہ عورت اپنے شوہر کیلئے زیب وزینت کی جملہ اشیاء جن کی خوشبو بھی بہت تیز ہو استعمال کرسکتی ہے مگر باہر نکلتے وقت مذکورہ بالا آداب کی پابندی ضروری ہے ۔ موجودہ معاشرے میں معمول بن گیا ہے کہ خواتین گھر سے باہر نکلتے وقت میک اپ اور پرفیوم لگاتی ہیں ۔ یہ بہت بڑ ا جرم اور فتنہ ہے ، یہ سارا اہتمام صرف اپنے شوہر کیلئے کرنا ہی جائز ہے ۔ واللہ اعلم