Categories: مارچ2012

تفسیر سورۃ النور قسط25

اجمالی مفہوم :

گذشتہ آیات میں اللہ تعالیٰ نے اپنے نور کو بیان کیا اور اس کی مثال بھی بیان فرمائی اب اس کے بعد مساجد کا ذکر فرمایا ہے کہ اللہ کے نور کی ہدایت سے فیض یاب ہونے والے لوگ ان گھروں میں پائے جاتے ہیں ۔ ان مساجد کو بلند کرنے اور ان میں ذکر الٰہی کرنے کا حکم دیا گیا۔ وہ لوگ جن کے دل اللہ کے نور سے منور ہیں وہ ان مساجد میں صبح وشام اس کی تسبیح پڑھتے ہیں اس کی پاکی بیان کرتے ہیں اور اس کا نام کثرت سے لیتے ہیں۔

بیوت سے یہاں مراد مسجد ہے یعنی سجدہ گاہ اور پورے قرآن مجید میں سجدہ کا لفظ اپنے معنوی اعتبار سے اطاعت اور فرمانبرداری کے معنوں میں استعمال ہوا ہے اور عملی مفہوم کے اعتبار سے ایک خاص کیفیت کا نام ہے۔ اور اس سجدہ گاہ کے لیے قرآن مجید نے ’’ مسجد‘‘ کی بلیغ اصطلاح استعمال کی ہے جو کہ اللہ کے لیے خاص ہے اور مسجد کے حوالے سے ایک خاص جواب جو عرف عام میں غلط فہمی کو دور کرنے کے لیے ہے کہ اسلام میں مسجد کی عمارت صرف نماز پڑھنے کے کام کے لئے مخصوص نہیں اس میں اسلامی مملکت کے مختلف امور سرانجام دیئے جاسکتے ہیں اور مسجد پر اعتبار سے اسلامی حکومت کا مرکز متصور ہوتی ہے لیکن افسوس آج کے حکمران جن کا مسجد سے تعلق صرف برائے دکھلاوہ رہ گیا ہے۔

اسلام میں مسجد کا تصور عیسائیت یا صوفیاء میں رہبانیت کے تصور کی بھی نفی کرتاہے کیونکہ رہبانیت کا نام ترکِ دنیا، ترکِ لذت وترکِ زیبائش وآرائش اسلام نے مسجد کے ذریعہ اس غلط تصور کی بیخ کنی کی اور واضح لفظوں میں بتایا کہ مسجد اجتماعیت کی علامت ہے آپس میں مل بیٹھنے کا نام ہے بلکہ اطاعت وفرمانبرداری کا اجتماعی محسوس مظہر ہے۔ اور اس طرح ان تمام چیزوں کا غلط مفہوم ختم کیاگیا۔ دنیا کے مسخر شدہ وسائل اور انعامات سے مستفید نہ ہونا اللہ کے فضل وکرم کی توہین ہے اور ان کا چھوڑنا گناہ اور بدعت ہے؟

مساجد میں ایک بات خاص طور پر مدنظر رکھی جائے کہ اس کو نقش ونگار سے سنوارنا اور مختلف زیب وآرائش سے خوبصورت بنانا اس سے منع فرمایا گیاہے۔ اسلام نے اپنے تمام مظاہر میں سادگی کا حکم دیا ہے اور جو حسن سادگی میں ہوتاہے وہی حسن اصل ہوتاہے جبکہ مذکورہ بالا اشیاء سے شئے کی اصل حقیقت کا حسن چھپ جاتاہے اور اس بے جا ریب وآرائش اور نقش ونگار کو ایک حدیث میں تو قرب قیامت کی علامت میں سے بتایا گیاہے۔(ابوداؤد ، کتاب الصلاۃ باب فی بناء المساجد)

لہٰذا مساجد میں کئے جانے والے اعمال کا مرکزی خیال ’’اللہ کی رضا کا حصول‘‘ خواہ اس کا تعلق دین سے ہو یا دنیا سے اگر ان اعمال کا محور اللہ کے علاوہ کوئی اور ہے تو واضح شرک ہے جیسا کہ قرآن حکیم میں ہے:

وَّاَنَّ الْمَسٰجِدَ لِلہِ فَلَا تَدْعُوْا مَعَ اللہِ اَحَدًا (الجن:۱۸)

’’اور یہ کہ بلاشبہ مساجد اللہ کے لیے ہیں، پس اللہ کے ساتھ کسی کو مت پکارو۔‘‘

اور مساجد میں ذکر الٰہی اور دیگر امور کی انجام دہی کا تعلق کسی خاص وقت سے نہیں بلکہ قرآن مجید نے ’’ الغدو والآصال‘‘ کے ذریعے دن اور رات دونوں کو اس میں شامل کردیاہے کہ اہل ایمان جن کے دل اللہ کے نور سے منور ہیں اور وہ ایمان وہدایت سے فیض یاب ہوچکے ہیں وہ صبح وشام اللہ کی رضا کے حصول کے لیے اللہ کا ذکر کرتے ہیں اور نماز پڑھتے ہیں اور اس کی عبادت کرتے ہیں اور ان تمام کیفیات کو ’’تسبیح‘‘ سے تشبیہ دی گئی ہے کہ ذکر الٰہی ، نماز، عبادت ودیگر امور سب نیکی میں شمار ہوں گے بشرطیکہ وہ اللہ تعالیٰ کے لیے ہوں۔