الشیخ عبدالرحمن ثاقب

تعارف

نام: عبدالرحمن ثاقب بن خادم علی

تاریخ پیدائش: 4 جنوری 1973

جامعہ ابی بکرالاسلامیہ کراچی میں 1986 میں داخلہ لیا۔ ابتدا المعھد المتوسطہ سے ہوئی جو کہ تین سال پر مشتمل تھی۔ اس شعبہ میں تین اساتذہ کرام سے کسب علم کیا۔ شیخ محمد داؤد احمد صاحب، شیخ سلیمان خان صاحب اور شیخ عبداللطیف ارشد رحمہ اللہ

اسکے بعد المعھد الثانویہ کا ایک سال مکمل کیا اور اس فصل میں شیخ ابوعمار عمر فاروق سعیدی صاحب، شیخ ابوعبدالمجید محمد حسین بلتستانی صاحب، شیخ عبدالرحمن چیمہ صاحب اور شیخ ایمن الدقاق صاحب حفظھم اللہ سے علم حاصل کیا۔

( اس کے بعد چار سال جامعہ الاحسان الاسلامیہ کراچی میں تعلیم حاصل کی اور جنوری 1994 میں فراغت حاصل کی)

فراغت کے بعد دو سال تک جامعہ ابی بکرالاسلامیہ کراچی میں شعبہ انتظامی امور میں ذمہ داری نبھائی۔

آٹھ سال تک مدرسہ دارالقرآن والحدیث بھریاروڈ ضلع نوشہرو فیروز سندھ میں تدریسی فرائض سر انجام دے اور تین دفعہ صحیح بخاری پڑھانے کا شرف حاصل ہوا۔ جنوری 2005 سے تاحال ( سترہ سال) مرکزی جامع مسجد اہل حدیث مارچ بازار سکھر میں امامت و خطابت کے فرائض سر انجام دے رہا ہوں۔

اللہ تعالیٰ کی توفیق اور فضل و کرم سے کچھ کتب کا سندھی زبان میں ترجمہ کرنے، کچھ کتب مرتب کرنے اور مختلف رسائل و جرائد میں مضامین بھی لکھے ہیں۔

سندھی زبان سے اُردو میں ترجمہ کی گئی کتب میں سے تمییز الطیب من الخبیث بجواب رسالہ تحفۃ الحدیث از علامہ سید بدیع الدین شاہ راشدی رحمہ اللہ، مروجہ فقہ کی حقیقت از علامہ سید بدیع الدین شاہ راشدی رحمہ اللہ، ارسال الیدین از سید محب اللہ شاہ راشدی رحمہ اللہ اور اصلی مسنون تراویح از ڈاکٹر عبدالحفیظ سموں صاحب حفظہ اللہ شامل ہیں۔

ذاتی کتب تذکرۃ اکابرین اہل حدیث مطبوع، راشدی خاندان زیرطباعت اور تذکرہ علماء اہل حدیث سندھ زیرترتیب ہے۔

مختلف جرائد و مجلات میں مضامین بھی لکھے ہیں۔ ماہنامہ اسوہ حسنہ کراچی، ماہنامہ تفہیم الاسلام احمدپور شرقیہ، ماہنامہ دعوت اہل حدیث حیدرآباد، ہفت روزہ اہل حدیث لاہور، پندرہ روزہ صحیفہ اہل حدیث کراچی اور ہفت روزہ الاعتصام لاہور

تنظیمی سفر:

میرا تنظیمی سفر اہل حدیث یوتھ فورس پاکستان سے شروع ہوا جو کہ حلقہ گلشن اقبال کراچی کی ذمہ داری سے ہوتا ہوا کراچی ڈویژن کا جنرل سیکریٹری، مرکزی جمعیت اہل حدیث پاکستان کراچی کا سیکریٹری نشر واشاعت اور اب کافی سالوں سے صوبائی ناظم تبلیغ کی ذمہ داری نبھا رہا ہوں۔

مستقبل کے منصوبوں میں بھریاروڈ ضلع نوشہرو فیروز جوکہ بندہ ناچیز کا آبائی شہر ہے وہاں پر طالبات کے لیے ایک دینی درسگاہ « کلیہ سیدہ فاطمۃ الزھراء رضی اللہ عنہا للبنات « کا قیام ہے۔ جس کے لیے جگہ خرید لی گئی ہے اور اب تعمیر شروع کی جائے گی۔ ان شاءاللہ

اللہ تعالیٰ تکمیل کی توفیق عطا فرمائے۔ آمین