عقیدہ اور عقیدت میں فرق

يٰۤاَهْلَ الْكِتٰبِ لَا تَغْلُوْا فِيْ دِيْنِكُمْ ﴾ (النساء: ۱۷۱)

’’اے اہل کتاب ! اپنے دین میں حد سے نہ بڑھو ۔‘‘

یہودیوں نے سیدناعزیرuکی محبت میں اور عیسائیوں نے سیدہ مریم، سیدناعیسیٰi اور بزرگوں کی عقیدت میں غلو کیا جس بنا پر وہ گمراہ قرار پائے۔ سرورِ دو عالم نے عقیدہ اور عقیدت کا فرق سمجھاتے ہوئے امت کو اس عقیدت اور محبت سے روک دیا ہے کہ جس سے آدمی شرک جیسے گناہ میں مبتلا ہو کر گمراہ ہو جائے۔

عَنْ عُمَرَ قَالَ قَالَ رَسُوْلُ اللهِ لَا تُطْرُوْنِیْ کَمَا اَطْرَتِ النَّصَارَی ابْنَ مَرْیَمَ فَاِنَّمَا اَنَا عَبْدُهٗ فَقُوْلُوْا عَبْدُاللهِ  وَرَسُوْلُهٗ))  (رواه البخاری: کتاب أحادیث الأنبیاء)

’’سیدناعمرt ذکر کرتے ہیں کہ اللہ کے رسولﷺ نے فرمایا: ’’میری تعریف میں مبالغہ آرائی نہ کرنا‘ جس طرح عیسائیوں نے عیسٰی بن مریمuکی شان میں مبالغہ کیا ہے۔ میں ’’اللہ‘‘ کا بندہ ہوں لہٰذا مجھے اللہ کا بندہ اوراس کا رسول ہی سمجھنا۔ ‘‘

عَنِ ابْنِ عَبَّاسٍ قَالَ: قَالَ رَسُولُ اللهِ غَدَاةَ الْعَقَبَةِ وَهُوَ عَلَى نَاقَتِهِ الْقُطْ لِي حَصًى فَلَقَطْتُ لَهُ سَبْعَ حَصَيَاتٍ هُنَّ حَصَى الْخَذْفِ فَجَعَلَ يَنْفُضُهُنَّ فِي كَفِّهِ وَيَقُولُ أَمْثَالَ هَؤُلَاءِ فَارْمُوا ثُمَّ قَالَ يَا أَيُّهَا النَّاسُ إِيَّاكُمْ وَالْغُلُوَّ فِي الدِّينِ فَإِنَّهُ أَهْلَكَ مَنْ كَانَ قَبْلَكُمُ الْغُلُوُّ فِي الدِّينِ (سنن ابن ماجه: باب قدر حصی الرمی[حسن])

’’سیدنا عبداللہ بن عباس رضی اللہ عنہما بیان کرتے ہیں کہ اللہ کے رسول ﷺ نے جمرئہ عقبہ کی صبح اس وقت ارشاد فرمایا کہ جب آپ اپنی اونٹنی پر سوار تھے۔ مجھے فرمایا: میرے لیے کنکریاں چن کر لاؤ، میں نے آپ کو سات کنکریاں لاکر دیں۔ آپ نے انہیں اپنی ہتھیلی میں ہلاتے ہوئے فرمایا: ان جیسی کنکریاں مارو، پھر فرمایا: ’’لوگو ! دین میں غلو کرنے سے بچو کیو نکہ تم سے پہلے لوگ دین میں غلو کرنے کی وجہ سے ہلا ک ہوئے تھے۔‘‘

انسان کامادہ (Root)اُنس سے ہے، اس بنا پر لوگ ایک دوسرے سے محبّت کرتے ہیں اور کرنی چاہیے۔ دینِ اسلام انسانی فطرت کا ترجمان ہے۔ اس نے جائز محبت کرنے سے منع نہیں کیا، مطالبہ صرف یہ ہے کہ کسی کی محبّت میں حد سے نہیں بڑھنا چاہیے ۔ البتہ اللہ اور اس کے رسول کے ساتھ دنیا وما فیہا سے بڑھ کر محبت کرنی ہے۔ مگر نبی کریمﷺ ، اہلِ بیت، صحابہ کرام   ، علماء اور نیک لوگوں کی محبت ’’اللہ ‘‘کی محبت کے تابع ہونی چاہیے کیونکہ اللہ تعالیٰ نے اپنی محبت کو تمام عقیدتوں اور محبتوں میں سب سے پہلے رکھا ہے۔

 ﴿ قُلْ اِنْ كَانَ اٰبَآؤُٔكُمْ وَ اَبْنَآؤُكُمْ وَ اِخْوَانُكُمْ وَ اَزْوَاجُكُمْ وَ عَشِيْرَتُكُمْ وَ اَمْوَالُ ا۟قْتَرَفْتُمُوْهَا وَ تِجَارَةٌ تَخْشَوْنَ كَسَادَهَا وَ مَسٰكِنُ تَرْضَوْنَهَاۤ اَحَبَّ اِلَيْكُمْ مِّنَ اللّٰهِ وَ رَسُوْلِهٖ وَ جِهَادٍ فِيْ سَبِيْلِهٖ فَتَرَبَّصُوْا حَتّٰى يَاْتِيَ اللّٰهُ بِاَمْرِهٖ١ؕ وَ اللّٰهُ لَا يَهْدِي الْقَوْمَ الْفٰسِقِيْنَ۰۰ ﴾ (التوبة: ۲۴)

’’فرمادیںاگرتمہارے باپ، تمہارے بیٹے، تمہارے بھائی، تمہاری بیویاں، تمہارے خاندان اور اموال جو تم کماتے ہو، تجارت جس کے گھاٹے سے تم ڈرتے ہو اور مکانات جنہیں تم پسند کرتے ہو،اگر تمہیں ’’اللہ‘‘ اور اس کے رسول اور اس کی راہ میں جہاد کرنے سے زیادہ عزیز ہیں توانتظار کرو، یہاں تک کہ ’’اللہ‘‘ اپنا حکم لے آئے کیونکہ ’’اللہ ‘‘نافرمان لوگوں کو ہدایت نہیں دیتا۔‘‘

نبی کریم ﷺ نے اسی بنا پر اپنی محبّت کی بجائے ’’اللہ‘‘ کی محبّت کو مرکز اور معیار قرار دیا ہے۔

عَنْ أَبِي ذَرٍّ قَالَ قَالَ رَسُولُ اللهِ أَفْضَلُ الْأَعْمَالِ الْحُبُّ فِي اللهِ، وَالْبُغْضُ فِي اللهِ (سنن ابی داود: باب مجانبۃ اهل الاهواء[حسن])

سیدناابو ذر رضی اللہ عنہ بیان کرتے ہیں کہ اللہ کے رسول ﷺ نے فرمایا: ’’اللہ ‘‘کے لیے محبت کرنا اور ’’اللہ ‘‘کے لیے کسی سے ناراض ہونا افضل ترین عمل ہے۔‘‘

عَنْ أَبِي الدَّرْدَاءِt قَالَ قَالَ رَسُولُ اللهِ e كَانَ مِنْ دُعَاءِ دَاوُدَ يَقُولُ: ﴿اَللّٰهُمَّ إِنِّي أَسْأَلُكَ حُبَّكَ وَحُبَّ مَنْ يُحِبُّكَ، وَالعَمَلَ الَّذِي يُبَلِّغُنِي حُبَّكَ اَللّٰهُمَّ اجْعَلْ حُبَّكَ أَحَبَّ إِلَيَّ مِنْ نَفْسِي وَأَهْلِي، وَمِنَ المَاءِ البَارِدِ ﴾  قَالَ وَكَانَ رَسُولُ اللهِ إِذَا ذَكَرَ دَاوُدَ يُحَدِّثُ عَنْهُ قَالَ كَانَ أَعْبَدَ البَشَرِ (سنن الترمذی: أبواب الدعوات[حسن])

’’سیدنا ابوالدرداء رضی اللہ عنہ سے مروی ہے کہ اللہ کے رسول ﷺنے فرمایا :سیدنا داودعلیہ السلام کی دعاؤں میں ایک دعا یہ بھی تھی: ’’اے اللہ ! میں تجھ سے تیری محبت چاہتا ہوں اور اس کی محبت بھی چاہتا ہوں جو تجھ سے محبت کرتاہے، اور ایسے عمل کی توفیق مانگتا ہوں جس سے مجھے تیری محبت نصیب ہو جائے۔ اے اللہ! اپنی محبت کو میرے لیے ،میری جان، میرے اہلِ خانہ اور ٹھنڈے مشروب کی چاہت سے بھی زیادہ کر دے۔‘‘ اللہ کے رسولﷺ نے یہ بھی فرمایا: ’’داؤدعلیہ السلام تمام لوگوں سے زیادہ عبادت کرنے والے تھے۔ ‘‘

شرک اور غلو کرنے والا خالقِ کائنات کی محبت سے بڑھ کر دوسروں سے محبت اور تعلق رکھتا ہے، حالانکہ سب سے زیادہ محبت اللہ اور اس کے رسولﷺ کے ساتھ ہونی چاہیے۔باقی تمام محبتیں اس محبت کے تابع ہوناضروری ہیں۔ لیکن مشرک ’’اللہ‘‘ کی ذات اور اس کی محبت کے مقابلے میں دوسروں کو ترجیح دیتا ہے۔ اس کے برعکس سچے اور سمجھدار مسلمان کادل اللہ اور اس کے رسولﷺکی محبت سے اس طرح لبریز ہوتا ہے کہ وہ اس کے مقابلے میں دنیا کی کسی چیز کو ترجیح نہیں دیتا۔ اس محبت کے لیے نبی کریم ﷺدعا کیا کرتے تھے:

اَللَّهُمَّ إِنِّي أَسْأَلُكَ فِعْلَ الخَيْرَاتِ وَتَرْكَ المُنْكَرَاتِ وَحُبَّ المَسَاكِينِ وَأَنْ تَغْفِرَ لِي وَتَرْحَمَنِي وَإِذَا أَرَدْتَ فِتْنَةً فِي قَوْمٍ فَتَوَفَّنِي غَيْرَ مَفْتُونٍ وَأَسْأَلُكَ حُبَّكَ وَحُبَّ مَنْ يُحِبُّكَ وَحُبَّ عَمَلٍ يُقَرِّبُ إِلَى حُبِّك (رواه الترمذی: باب ومن سورة صٓ[صحیح])

’’اے اللہ! میں تجھ سے نیک اعمال کرنے کی توفیق، بُرے اعمال سے بچنے کی ہمت اور مساکین سے محبت کرنے کی التجاء کرتا ہوں، الٰہی!مجھے معاف کردے اور مجھ پر رحم فرما، جب قوم پر کوئی آزمائش آئے تو مجھے اس آزمائش سے پہلے فوت کر لینا، اے اللہ! میں تجھ سے تیری محبت مانگتاہوں اور اس کی محبت بھی چاہتا ہوں جو تجھ سے محبت کرتاہے، اور ایسے عمل کی توفیق چاہتا ہوں جس سے مجھے تیری محبت نصیب ہو جائے۔‘‘(یہاں آزمائش سے مراد عذاب ہے۔)

عَنْ أَبِیْ هُرَیْرَةَ قَالَ قَالَ رَسُوْلُ اللهِ سَبْعَةٌ یُظِلُّهُمُ اللهُ فِیْ ظِلِّهٖ یَوْمَ لَا ظِلَّ اِلَّا ظِلُّهُ۔۔ وَرَجُلَانِ تَحَآبَّا فِی اللهِ اجْتَمَعَا عَلَیْهِ وَتَفَرَّقَا عَلَیْهِ……(رواه البخاری: باب الصدقة بالیمین)

سیدنا ابو ہریرہ رضی اللہ عنہ اللہ کے رسول ﷺ کا فرمان نقل کرتے ہیں: ’’قیامت کے دن ’’اللہ ‘‘سات آدمیوںکو اپنے عرش کا سایہ نصیب فرمائیں گے ، اس دن کوئی چیز سایہ فگن نہیں ہو گی۔ …ان میں دو آدمی وہ ہوں گے جو آپس میں ’’اللہ ‘‘کے لیے محبت کرتے ہیں اور اسی بنا پر ایک دوسرے سے ملتے اور الگ ہوتے ہیں۔‘‘

قرآن مجید کے ارشاد اور حدیث مبارکہ کی روشنی میں یہ بات واضح ہوئی کہ سچی اور حقیقی محبّت کا معیار اور مدار ’’اللہ‘‘ کی محبت ہے۔ اس کے باوجود بے شمار لوگ ایسے ہیں جو دوسروں بالخصوص اپنے معبودوں اور بزرگوں سے ایسی محبت کرتے ہیں جیسی اللہ تعالیٰ سے محبت کرنی چاہیے۔

﴿ وَمِنَ النَّاسِ مَنْ يَّتَّخِذُ مِنْ دُوْنِ اللّٰهِ اَنْدَادًا يُّحِبُّوْنَهُمْ۠ كَحُبِّ اللّٰهِ١ؕ وَالَّذِيْنَ اٰمَنُوْۤا اَشَدُّ حُبًّا لِّلّٰهِ١ؕ وَلَوْ يَرَى الَّذِيْنَ ظَلَمُوْۤا اِذْيَرَوْنَ الْعَذَابَ١ۙ اَنَّ الْقُوَّةَ لِلّٰهِ جَمِيْعًا١ۙ وَّ اَنَّ اللّٰهَ شَدِيْدُ الْعَذَابِ۰۰ ﴾ (البقرۃ: ۱۶۵)

’’ بعض لوگ ایسے ہیں جو دوسروں کو ’’اللہ‘‘ کا شریک بنا کر ان سے ایسی محبت کرتے ہیں جیسی ’’اللہ ‘‘سے محبت کرنی چاہیے جبکہ ایمان والے ’’اللہ ‘‘ کی محبت میں بہت آگے ہوتے ہیں۔ کاش کہ مشرک لوگ وہ کچھ دیکھ لیں جو وہ عذاب کے وقت دیکھیں گے کہ تمام قوت ’’اللہ‘‘ ہی کے پاس ہے اور ’’اللہ‘‘ سخت عذاب دینے والا ہے۔‘‘

یہ حقیقت ذہن میں رہے کہ محبت ایک فطری جذبہ ہے جو ہر انسان اور ہر جاندار میں پایا جاتاہے۔ حکم یہ ہے کہ تم اپنے ’’رب‘‘ اور اس کے فرمودات سے سب سے زیادہ محبت کرو ۔

تم کسی کے احسان کی وجہ سے محبت کرتے ہو تو اللہ تعالیٰ تمہارا سب سے بڑا محسن ہے، کسی سے قرابت داری کی وجہ سے محبت کرتے ہو تو وہ سب سے بڑھ کر تمہارے قریب ہے، تم کسی سے اس کے جمال وکمال کی وجہ سے محبت کرتے ہو تو کائنات کا سارے کا سار اجمال و کمال اسی کا دیا ہوا ہے اور اللہ تعالیٰ سب سے زیادہ اجمل اور اکمل ہے، کسی کے اقتدار اور اختیار کی بناپر تعلق جوڑتے ہو تو اس سے بڑھ کر کسی کے پاس اختیار اوراقتدار نہیں۔ غرضیکہ کسی سے سچی محبت کرنے کے جو بھی محرکات اوراسباب ہو سکتے ہیں ان سب کا مالک اللہ تعالیٰ ہے، پھر سب سے زیادہ محبت اسی کے ساتھ کیوں نہ کی جائے؟

اللہ تعالیٰ کی محبت کے ساتھ اس کے رسول محمد مصطفی، احمد مجتبیٰ ﷺ کے ساتھ ساری مخلوق سے بڑھ کر محبت ہونی چاہیے تب جا کر آدمی کا ایمان مکمل ہوتا ہے:

عَنْ أَنَسٍ قَالَ قَالَ النَّبِيُّ لَا یُؤْمِنُ أَحَدُکُمْ حَتّٰی أَکُوْنَ أَحَبَّ إِلَیْهِ مِنْ وَّالِدِهٖ وَوَلَدِهٖ وَالنَّاسِ أَجْمَعِیْنَ (رواه البخاری:  باب حب الرسول من الإیمان)

’’سیدنا انس رضی اللہ عنہ بیان کرتے ہیں کہ نبی کریم ﷺ نے فرمایا: ’’تم میں سے کوئی شخص اس وقت تک مومن نہیں ہوسکتاجب تک میں اسے اس کے والدین، اُس کی اولا د اور تمام لوگوں سے بڑھ کر عزیز تر نہ ہو جائوں۔ ‘‘

نبی کریم ﷺ کے فرمان کی لطافت اور ذہانت پر غور فرمائیں، آپ نے یہ نہیں فرمایا کہ میرے ساتھ اللہ تعالیٰ سے زیادہ یا اس کی محبّت جیسی محبّت کرو۔ بلکہ یہ فرمایا ہے کہ میرے ساتھ اپنے والدین، اپنی اولاد اور تمام لوگوں سے بڑھ کریہاں تک کہ اپنی جان سے بھی زیادہ محبّت کرو۔ بالفاظِ دیگر خالق سے زیادہ نہیں بلکہ پوری مخلوق سے بڑھ کرمیرے ساتھ محبت کرو۔

عَنْ عَبْدِ اللهِ بْنِ هِشَامٍ قَالَ كُنَّا مَعَ النَّبِيِّ وَهُوَ آخِذٌ بِيَدِ عُمَرَ بْنِ الخَطَّابِ فَقَالَ لَهُ عُمَرُ يَا رَسُولَ اللهِ لَأَنْتَ أَحَبُّ إِلَيَّ مِنْ كُلِّ شَيْءٍ إِلَّا مِنْ نَفْسِي فَقَالَ النَّبِيُّ لاَ وَالَّذِي نَفْسِي بِيَدِهِ حَتَّى أَكُونَ أَحَبَّ إِلَيْكَ مِنْ نَفْسِكَ فَقَالَ لَهُ عُمَرُ فَإِنَّهُ الآنَ وَاللهِ لَأَنْتَ أَحَبُّ إِلَيَّ مِنْ نَفْسِي فَقَالَ النَّبِيُّ الآنَ يَا عُمَرُ  (رواه البخاری: باب کیف کانت یمین النبی )

’’سیدنا عبداللہ بن ہشام رضی اللہ عنہ بیان کرتے ہیں کہ ہم نبی کریمﷺ کے ساتھ تھے اور آپ نے سیدنا عمر بن خطاب رضی اللہ عنہ کا ہاتھ تھاما ہوا تھا۔ سیدناعمر رضی اللہ عنہ نے عرض کی اللہ کے رسول ﷺآپ مجھے میری جان کے علاوہ ہر چیز سے زیادہ عزیز ہیں۔ آپﷺنے فرمایا: اس ذات کی قسم جس کے ہاتھ میں میری جان ہے، اس وقت تک تمہارا ایمان کامل نہیں ہو سکتا جب تک تم مجھے اپنی جان سے زیادہ محبوب نہ سمجھو، سیدناعمررضی اللہ عنہ نے عرض کی اللہ کی قسم اب آپ میری جان سے بھی زیادہ مجھے عزیز ہو چکے ہیں۔ فرمایا: ’’اے عمر !اب تیرا ایمان مکمل ہوا ہے۔‘‘

لیکن اکثر لوگوں نے بالخصوص مذہب کے دعوے داروں کی غالب اکثریت نے انبیاء اور بزرگوں کی محبّت میں اس حد تک غلو اختیار کر رکھا ہے کہ انبیاء کرام کو ’’رب‘‘ کا درجہ دے دیا ہے اور بزرگوں کو انبیاء کے برابر کر رکھا ہے۔