Categories: ستمبر 2019

فضائل حسین رضی اللہ عنہ بزبان سید الکونین ﷺ….!

قرآن سنت میں سیدین حسنین کریمین رضی اللہ عنہما کے فضائل مناقب مشترکہ وارد ہوئے ہیں ہمارے نزدیک دونوں کا رتبہ یکساں ہے کیونکہ دونوں بھائی رسولِ دو جہاں ﷺ کے نواسہ اور صحابیان اور سیدنا علی المرتضی اور سیدہ فاطمہ رضی اللہ عنھما کے لخت جگر میں سے ہیں ۔

ہم یہاں اگر حسنین کریمین رضی اللہ عنھما کی مفصلا فضائل مناقب بیان کریں تو یقینا ایک ضخیم کتاب تیار کی جاسکتی ہے لیکن اختصارا کے ساتھ موقع کی مناسبت سے فقط سیدنا حسین رضی اللہ عنہ کے مناقب پر چند وہ احادیث ذکر کرتے ہیں جو خود اللہ کے رسول ﷺ نے بزبانِ نبوت بیان فرمائے ہیں ۔

سیدنا حسین رضی اللہ عنہ اھل بیت میں سے ہیں :

سیدہ ام سلمہ رضی اللہ عنہا سے روایت ہے کہ نبی کریم ﷺ نے سیدنا علی، فاطمہ، حسن اور حسین رضی اللہ عنہم کے بارے میں فرمایا:

اللَّهُمَّ هَؤُلَاءِ أَهْلُ بَيْتِي

اے میرے اللہ ! یہ میرے اہل بیت ہیں۔(المستدرک ۴۱۶/۲ حدیث نمبر 3585سندہ حسن و صححہ الحاکم علیٰ شرط البخاری) مسند احمد (۲۹۲/۶ ح ۲۶۵۰۸ ) میں صحیح سند سے اس حدیث کا شاہد (تائیدی روایت) موجود ہے ۔ سیدنا علی، سیدہ فاطمہ، سیدنا حسن اور سیدنا حسین کے اہلِ بیت میں ہونے کے بیان والی حدیث سیدنا عمر بن ابی سلمہ رضی اللہ عنہ (ترمذی: ۳۷۸۷ و سندہ حسن) سے مروی ہے ۔

میں ان سے محبت کرتا ہوں :

عطاء بن یسار (تابعی) رحمہ اللہ بیان کرتے ہیں کہ انہیں ایک آدمی (صحابی) نے بتایا: انہوں نے دیکھا کہ نبی کریم ﷺ حسن اور حسین رضی اللہ تعالیٰ عنہما کو سینے سے لگا کر فرما رہے تھے :

اللَّهُمَّ إِنِّي أُحِبُّهُمَا فَأَحِبَّهُمَا

اے اللہ ! میں ان دونوں سے محبت کرتا ہوں تو (بھی) ان دونوں سے محبت کر۔ (مسنداحمد حدیث نمبر- 23133 و سندہ صحیح)

یہ میرے بیٹے ہیں ـ :

نبی کریم ﷺ نے فرمایا :

هَذَانِ ابْنَايَ وَابْنَا ابْنَتِيَ، اللَّهُمَّ إِنِّي أُحِبُّهُمَا فَأَحِبَّهُمَا وَأَحِبَّ مَنْ يُحِبُّهُمَا

یہ دونوں (حسن و حسین) میرے بیٹے اور نواسے ہیں، اے میرے اللہ ! میں ان دونوں سے محبت کرتا ہوں تو بھی ان دونوں سے محبت کر اور جو ان سے محبت کرے تو اس سے محبت کر۔(الترمذی : حدیث نمبر-3769 و سندہ حسن)

سیدنا حسین رضی اللہ عنہ سے محبت ۔

سیدنا ابو ہریرہ رضی اللہ عنہ سے مروی ہے کہ :

خَرَجَ عَلَيْنَا رَسُولُ اللَّهِ صَلَّى اللهُ عَلَيْهِ وَسَلَّمَ وَمَعَهُ حَسَنٌ وَحُسَيْنٌ هَذَا عَلَى عَاتِقِهِ، وَهَذَا عَلَى عَاتِقِهِ، وَهُوَ يَلْثِمُ هَذَا مَرَّةً، وَيَلْثِمُ هَذَا مَرَّةً، حَتَّى انْتَهَى إِلَيْنَا، فَقَالَ لَهُ رَجُلٌ: يَا رَسُولَ اللَّهِ، إِنَّكَ تُحِبُّهُمَا، فَقَالَ: مَنْ أَحَبَّهُمَا فَقَدْ أَحَبَّنِي، وَمَنْ أَبْغَضَهُمَا فَقَدْ أَبْغَضَنِي

رسول اللہ ﷺہمارے ہاں تشریف لائے،اس وقت آپ نے سیدنا حسن رضی اللہ عنہ کو ایک کندھے پر اور سیدنا حسین رضی اللہ عنہ کو دوسرے کندھے پر اٹھایا ہوا تھا، آپ ﷺکبھی اس کا بوسہ لیتے اور کبھی اُس کا، یہاں تک کہ آپ ﷺچلتے چلتے ہمارے پاس آگئے،

ایک آدمی نے کہا: اے اللہ کے رسول! کیا آپ ﷺ کوان دونوں سے محبت ہے؟ آپ ﷺنے فرمایا: جسے ان دونوں سے محبت ہے،اسے مجھ سے محبت ہے اور جس نے ان دونوں سے بغض رکھا، اس نے مجھ سے بغض رکھا۔ ( مسند احمد : 12406 )

سیدنا حسین رضی اللہ عنہ سے بغض :

سیدنا ابوہرضی اللہ عنہ سے مروی ہے کہ رسول اللہ ﷺ نے فرمایا : جسے حسن حسین رضی اللہ عنھما سے محبت ہے، اسے مجھ سے محبت ہے اور جس نے ان دونوں سے بغض رکھا، اس نے مجھ سے بغض رکھا۔ ( مسند احمد : 12406 )

دنیا میں میرے پھول ہیں :

سیدنا عبداللہ بن عمر رضی اللہ عنھما سے مروی ہے کہ رسول اللہ ﷺ نے فرمایا :

إِنَّ الْحَسَنَ وَالْحُسَيْنَ هُمَا رَيْحَانَتَايَ مِنَ الدُّنْيَا

”حسن اور حسین رضی الله عنہما یہ دونوں میری دنیا کے پھول ہیں“۔( سنن ترمذی : 3770 )

حسین قبائل میں سے قبیلہ ہے :

سیدنا یعلی بن مرہ رضی اللہ عنہ سے مروی ہے کہ رسول اللہ ﷺ نے فرمایا :

حُسَيْنٌ مِنِّي وَأَنَا مِنْ حُسَيْنٍ،‏‏‏‏ أَحَبَّ اللَّهُ مَنْ أَحَبَّ حُسَيْنًا، ‏‏‏‏‏‏حُسَيْنٌ سِبْطٌ مِنَ الْأَسْبَاطِ .

”حسین مجھ سے ہیں اور میں حسین سے ہوں اللہ اس شخص سے محبت کرتا ہے جو حسین سے محبت کرتا ہے، حسین قبائل میں سے ایک قبیلہ ہیں“( سنن ترمذی : 3775 )

حسین مجھ سے ہے ـ:

سیدنا یعلی بن مرہ رضی اللہ عنہ سے مروی ہے کہ : ہم نبی اکرم ﷺ کے ساتھ کھانے کی ایک دعوت میں نکلے، دیکھا تو حسین رضی اللہ عنہ ) گلی میں کھیل رہے ہیں، نبی اکرم ﷺ لوگوں سے آگے نکل گئے، اور اپنے دونوں ہاتھ پھیلا لیے، سیدناحسین رضی اللہ عنہ بچے تھے، ادھر ادھر بھاگنے لگے، اور نبی اکرم ﷺ ان کو ہنسانے لگے، یہاں تک کہ ان کو پکڑ لیا، اور اپنا ایک ہاتھ ان کی ٹھوڑی کے نیچے اور دوسرا سر پر رکھ کر بوسہ لیا، اور فرمایا:

حُسَيْنٌ مِنِّي وَأَنَا مِنْ حُسَيْنٍ، ‏‏‏‏‏‏أَحَبَّ اللَّهُ مَنْ أَحَبَّ حُسَيْنًا، ‏‏‏‏‏‏حُسَيْنٌ سِبْطٌ مِنَ الْأَسْبَاطِ .

حسین مجھ سے ہیں اور میں حسین سے ہوں، اللہ اس سے محبت رکھے جو حسین سے محبت رکھے، اور حسین نواسوں میں سے ایک نواسہ ہیں ۔ ( سنن ابن ماجہ : 114 ، سنن ترمذی : 3775 )

جو جنتی شخص دیکھنا چاہتا ہو :

سیدنا جابر‌رضی اللہ عنہ سے مرفوعاً مروی ہے کہ:

مَنْ سَرَّه أَنْ يَّنْظُر إِلىَ رَجُلٍ مِّنْ أَهَل الْجَنَّة فَلْيَنْظُر إِلَى الْحُسَين بْن عَلِي .

جس شخص کو یہ بات پسند ہو کہ وہ اہل جنت کا ایک فرد دیکھے وہ حسین بن علی رضی اللہ عنہ کو دیکھ لے۔( مسند ابی یعلی الموصلی : 4773 ، الصحیحہ للالبانی : 3586 )

جنت میں رفاقت رسول ﷺ :

ابو فاختہ سے مروی ہے کہ سیدنا علی رضی اللہ عنہ نے کہا:

زَارَنَا رَسُولُ اللهِ صَلَّى اللهُ عَلَيْهِ وَسَلَّمَ وَبَاتَ عِنْدَنَا وَالْحَسَنُ وَالْحُسَيْنُ نَائِمَانِ، فَاسْتَسْقَى الْحَسَنُ فَقَامَ رَسُولُ اللهِ صَلَّى اللهُ عَلَيْهِ وَسَلَّمَ إِلَى قِرْبَةٍ لَنَا فَجَعَلَ يَعْصِرُهَا فِي الْقَدَحِ، ثُمَّ جَاءَ يَسْقِيهِ، فَنَاوَلَ الْحَسَنَ، فَتَنَاوَلَ الْحُسَيْنُ لِيَشْرَبَ فَمَنَعَهُ وَبَدَأَ بِالْحَسَنِ، فَقَالَتْ فَاطِمَةُ: يَا رَسُولَ اللهِ كَأَنَّهُ أَحَبُّهُمَا إِلَيْكَ. قَالَ: إِنَّهُ اسْتَسْقَى أَوَّلَ مَرَّةٍ ، ثُمَّ قَالَ رَسُولُ اللهِ صَلَّى اللهُ عَلَيْهِ وَسَلَّمَ : إِنِّي وأياكِ وَهَذَيْنِ، وَهَذَا الرَّاقِدَ، يَعْنِي عَلِيًّا، يَوْمَ الْقِيَامَةِ فِي مَكَانٍ وَاحِدٍ یعنی فاطمة وولديها: الحسن والحسين

رسول اللہ ﷺہم سے ملاقات کرنے کے لئے آئے۔رات ہمارے پاس گزاری، حسن اور حسین رضی اللہ عنہ ما سوئے ہوئے تھے۔ حسن‌رضی اللہ عنہ نے پانی مانگا، رسول اللہ ﷺ مشکیزہ کے پاس گئے اور اس میں سے پیالے میں پانی انڈیلا، پلانے لگے تو حسین رضی اللہ عنہ نے پیالہ پکڑ لیا اور پینا چاہا تو آپ ﷺ نے اسے منع کر دیا اور حسن رضی اللہ عنہ سے ابتداء کی، سیدہ فاطمہ رضی اللہ عنہا نے کہا: اے اللہ کے رسول! لگتا ہے حسن آپ کو زیادہ پیارا ہے؟ آپ ﷺ نے فرمایا: نہیں حسن نے پہلے پانی مانگا تھا، پھر رسول اللہ ﷺ نے فرمایا: میں اور تم یہ دونوں اور یہ سونے والا( یعنی علی) قیامت کے دن ایک مکان میں ہوں گے۔ یعنی فاطمہ اور اس کے دو بیٹے: حسن اور حسین ۔( المعجم الکبیر للطبرانی : 2556 ، الصحیحہ للالبانی : 3457 )