تبصرۂ کتب

مصنف: ابو نعمان بشیر احمد

صفحات: 48

ناشر : دار المصنفین (لاہور)

اصول فقہ ایک عظیم فن ہے جس کے ذریعہ نصوص سے جدید پیش آمدہ مسائل کا حل استنباط کیاجاتاہے۔ اس فن کی ضرورت واہمیت کے پیش نظر اسے مدارس وکالج کے طلباء وطالبات کو باقاعدگی سے پڑھایا جاتاہے۔ اس فن پر عربی زبان میں مختصر ومطول کتب کافی مقدار میں پائی جاتی ہیں لیکن اشد ضرورت تھی کہ اردو زبان میں ابتدائی طلباء وطالبات کے لیے بنیادی اصطلاحات اور اصول کی مختصر، جامع اور آسان ترین کتاب جدید اسلوب پر تصنیف کی جائے۔ اس ضرورت کو دیکھتے ہوئے ہمارے بھائی ابو نعمان بشیر احمد حفظہ اللہ شیخ الحدث مرکز علوم اسلامیہ ستیانہ بنگلہ (فیصل آباد) نے ’’مفتاح الاصول‘‘ کے نام سے انتہائی جامع اور آسان ترین کتاب اصول فقہ پر مرتب کی ہے۔ اہل ذوق کو ضرور مطالعہ کرنا چاہیے۔

میں مدارس ووفاق کے منتظمین سے گزارش کروں گا کہ اسے داخل نصاب کریں تو بہت اچھے نتائج حاصل ہوں گے۔

كتاب : القراءة خلف الإمام

تاليف: امام ابو بکر احمد بن حسین بیھقی رحمہ اللہ

مترجم و محقق : الشيخ امان الله عاصم حفظہ اللہ

صفحات: 496

ناشر: انصار السنہ لاہور

تبصرہ: محمد سلیمان جمالی

قارئین کرام! امام کے پیچھے مقتدی قراءت کرے یا خاموش رہے یہ مسئلہ مختلف فیہ ہے جب کہ رسول اللہ ﷺ کی احادیث ،صحابہ کرام رضی اللہ عنہم کے آثار اور سلف صالحین رحمہم اللہ کا موقف یہ ہے کہ مقتدی کو سورۃ فاتحہ کی قراءت کرنی چاہیے ورنہ اس کی نماز مکمل نہیں ہوگی ۔ بلکہ اس کی نماز ہی نہیں ہوگی۔ اس بات کے اثبات پر علماء نے مستقل کتب تالیف کی ہیں جن میں امام محمد بن اسماعیل بخاری رحمہ اللہ کی کتاب «جزء القراءۃ خلف الإمام» اور اس کے بعد امام ابو بکر احمد بن حسین بیھقی رحمہ اللہ کی کتاب «القراءة خلف الامام» قابل ذکر ہے۔. بعد الذکر کتاب امام بخاری رحمہ اللہ کی کتاب کے بعد اس عنوان پر ایک دستاویز کی حیثیت رکھتی ہے ۔ یہ کتاب درج ذیل سولہ ابواب پر مشتمل ہے۔

1 قرآن کی قراءت نماز کا رکن ہے اور ہر رکعت میں قراءت واجب ہونے کے دلائل۔

2 قراءت کے بغیر نماز نہیں ہوتی، اور اگر نمازی صرف سورۃ فاتحہ کی قراءت کرلے تو کافی ہے چاہے وہ امام ہو یا مقتدی

3 امام ہو، مقتدی ہو یا اکیلا ، حدیث کے عمومی الفاظ کے تحت سورۃ فاتحہ کی قراءت کے بغیر نماز نہیں ہوتی۔

4 سورۃ فاتحہ کے بغیر نماز ناقص ہے۔ اللہ تعالی نے بندے کی نماز کو اپنے اور بندے کی درمیان تقسیم کیا ہے۔ اور اللہ نے نماز میں سے جو حصہ تقسیم کیا ہے وہ سورۃ فاتحہ کی قراءت ہے۔

5 دیگر صحابہ کی روایات، جنہوں نےسیدنا ابوہریرہ رضی اللہ عنہ کی طرح بیان کیا ہے کہ نماز (رب اور بندے کے مابین) تقسیم شدہ ہے۔ امام، مقتدی اور اکیلے (سب) کی نماز سورت فاتحہ پڑھے بغیر ناقص ہے۔

6 ہر نمازی کی قراءت سورۃ فاتحہ سے شروع ہونے اور اس حکم میں امام، مقتدی اور اکیلے کا کوئی فرق نہ ہونے کے دلائل۔

7 مقتدی پر سورۃ فاتحہ واجب ہونے کے خصوصی دلائل، اور رسول اللہ ﷺکا فرمان کہ فاتحہ کے بغیر نماز درست نہیں۔ چاہیے نمازی امام ہو،مقتدی ہو یا اکیلا اور چاہے نماز جہری ہو یا غیر جہری۔

8 سورۃ فاتحہ کو دیگر قراءت سے  مستثنی کرنے والی  سیدنا عبادہ رضی اللہ عنہ کی حدیث کے صحیح ہونے پر شواہد روایات۔

9 نبی ﷺنے مقتدی کوقراءت سے نہیں بلکہ قراءت میں بلند آواز کرنے سے منع کیا ہے۔

10 مقتدی کے سورۃ فاتحہ پڑھنے کے دلائل۔

11 مقتدی، امام کے پیچھے قراءت کرے گا اور منع تو لوگوں کی باہمی گفتگو سے کیا گیا ہے۔

12 امام کے پیچھے مقتدی کی قراءت کے دلائل۔

13 مقتدی کے لیے قراءت لازمی ہونے کے دلائل۔

14 قراءت کرنا مقتدی کے لیے واجب ہونے کے دلائل

15 امام کے پیچھے قراءت کرنے اور اس کا حکم دینے کے متعلق، صحابہ کرام رضی اللہ عنہم کے آثار۔

16 نام ذکر کیے بغیر متعدد صحابہ کرام رضی اللہ عنہم کی اور تابعین و اتباع تابعین رحمہم اللہ کی ایک بڑی جماعت کی روایات۔

17امام کے پیچھے، جہری نماز کی بجائے صرف سری نماز میں قراءت واجب قرار دینے والوں کے دلائل۔

18 ان لوگوں کے دلائل، جو کہتے ہیں کہ کسی بھی حال میں امام کے پیچھے قراءت جائز نہیں ۔

قارئین کرام !آخر الذکر ابواب میں قراءت فاتحہ کے مانعین کے دلائل کا جائزہ لیا گیا ہے اور انہیں ضعیف و غیر ثابت کیا گیا ہے ۔ آپ رحمہ اللہ یہ تالیف مخطوط حالت میں مکتبہ علامہ سید بدیع الدین شاہ راشدی رحمہ اللہ میں اجزاء حدیثیہ نمبر 94 میں محفوظ ہے۔ دوسرا قلمی نسخہ ترکی کے مکتبہ احمد ثالث نمبر1/11127۔ 18 میں محفوظ ہے۔

تیسرا مدینہ منورہ میں مکتبہ عارف حکمت نمبر 80/193 میں محفوظ ہے اور چوتھا نسخہ ہندوستان کے شہر پٹنہ میں مکتبہ خدا بخش نمبر 41/3 پر محفوظ ہے۔

اس کو پہلی مرتبہ مکتبہ دارالبشائر بیروت نے سن 1433ہجری بمطابق 2012 عیسوی الشیخ ابو بسطام محمد بن مصطفی نے شائع کیا ہے ۔

ہمارے دوست محترم الشیخ امان اللہ عاصم حفظہ اللہ رقم طراز ہیں: یہ نسخہ اب تک کے جملہ مطبوعہ نسخوں کی بہ نسبت زیادہ معتبر ہے۔ یہ نسخہ تین مستند مخطوطات سے تقابل شدہ ، نہایت مفید وعلمی ابحاث سے مزین اور تخریج شدہ ہے۔

اسی طرح اس کا دوسرا نسخہ جامعہ ام القری میں «ایم اے، حدیث و علوم حدیث» کی سند حاصل کرنے کے لیے مقالے کے طور پر لکھا گیا ہے۔ جس کے محقق عیسی بن محمد بن عیسی المسلمی اور نگران فضیلة الشيخ علامہ وصی اللہ بن محمد عباس حفظہ اللہ ہیں۔ تین جلدوں پر مشتمل یہ مقالہ 1414 ہجری کو تحریر کیا گیا ہے جسے دار طیبة الخضراء مکہ مکرمہ نے «القراءة خلف الإمام» کے نام سے دو جلدوں میں شائع کیا ہے۔

تیسرا نسخہ علامہ فیض الرحمان ثوری رحمہ اللہ کی تحقیق وتخریج اور علامہ الشیخ محمد رفیق اثری رحمہ اللہ کی مراجعت کے ساتھ اثری ادارہ نشر وتالیف جلال پور پیر والا ملتان نے ذوالقعدہ 1439 میں شائع کیا ہے۔

چوتھا نسخہ مولوی تلطف الرحمان رحمہ اللہ کے اہتمام سے 1915 عیسوی دہلی ہندوستان سے شائع ہوا ہے۔

پانچواں نسخہ ادارہ احیاء السنہ گھرجاکھ گوجرانوالہ پنجاب پاکستان سے شائع ہوا۔

چھٹا نسخہ  دارالکتب العلمیہ بیروت نے ابو ہاجر محمد بن السعید زغلول کی تخریج وتحقیق کے ساتھ 1984 عیسوی کو شائع کیا ۔

ساتواں نسخہ اس کا مترجم نسخہ ہے جو مولانا خالد گھرجاکھی نے ترجمہ کیا ہے جو احیاء السنہ گھرجاکھ گوجرانوالہ نے 1970 عیسوی میں شائع کیا ہے۔

قارئین کرام! مطبوع نسخ کے مختصر اشاریے میں آپ نے ملاحظہ کیا کہ اس کا مترجمہ نسخہ صرف ایک ہی شائع ہوا ہے جو اندازاً 1970 میں شائع ہوا ہے۔ لیکن اس نسخے میں کافی چیزوں کی کمی تھی مثلا اس میں عربی عبارتیں حذف تھیں صرف اردو ترجمہ نقل کیا گیا تھا اور اس میں بھی اسناد کا ترجمہ نہیں تھا۔ کسی بھی روایت کی تخریج نہیں تھی صرف احادیث کے ارقام کا اہتمام کیا گیا تھا۔ الغرض اس بات کی شدت سے ضرورت تھی کہ دور حاضر کے معیار کی مطابق اس کتاب کا ترجمہ اور تحقیق پیش کیا جاتا۔ لہذا یہ بیڑا ہمارے فاضل دوست نوجوان محقق الشیخ امان اللہ عاصم حفظہ اللہ نے اٹھایا اور پھر اس کا حق ادا کرکے دکھایا۔ شیخ حفظہ اللہ نے اس کا ترجمہ کرتے وقت چار مخطوطات اور چھے مطبوع عربی نسخوں سے تقابل کیا ہے۔ جن سے مختلف مقامات پر عبارت کی تصحیح و تفہیم کے لیے مدد لی ہے ۔

تمام احادیث کی تخریج  نقل کردی ہے تاکہ جو احادیث امام بیہقی رحمہ اللہ نے دیگر ائمہ کی مرویات سے نقل کی ہیں ان کے حوالہ جات کی مکمل نشاندہی ہو سکے۔ اس ضمن میں آپ حفظہ اللہ نے الشیخ ابو بسطام محمد بن مصطفی کے محقق نسخے میں مذکور تخریج سے استفادہ کیا ہے۔ اور تمام روایات پر صحت و ضعف کے اعتبار سے استنادی حکم بھی نقل کر دیا ہے۔ جس کے لیے آپ حفظہ اللہ نے الدکتور عیسی بن محمد المسلمی کے نسخے سے استفادہ کیا ہے ۔

احادیث وآثار کی اسناد کا بھی مکمل ترجمہ نقل کیا ہے اسی طرح امام بیہقی نے جو ابواب بندی کی ہے آپ حفظہ اللہ نے مذکورہ روایات اور وضاحتی ابحاث کو بعض مخصوص سرخیوں کے ساتھ نمایاں کیا ہے تاکہ بحث کے تسلسل اور سیاق و سباق کو سمجھنے میں آسان ہو ۔ اسی طرح امام بیہقی کا تعارف، کتاب کا نام ، کتاب کی مولف سے نسبت کی توثیق، اور کتاب میں امام بیہقی کا منہج ، اس کے عربی مخطوطات اور مطبوع نسخوں کا تعارف بہت خوبصورت انداز میں پیش کیا ہے اور مختصر مگر جامع حاشیہ بھی لگایا ہے ۔ بہت سہل اور سلیس ترجمہ کیا ہے۔ یقینا یہ ترجمہ سابق ترجمے کے مقابلے میں بہت معیاری اور محقق ترجمہ ہے اور اس سے قبل اردو زبان میں اس طرح کی کوئی چیز پیش نہیں ہوئی۔ اردو زبان جاننے والوں کے لیے یہ کتاب یقینا ایک تاریخی دستاویز کی حیثیت رکھتی ہے۔ جسے انصار السنہ نے اپنی روایات کے مطابق معیاری اعلی کاغذ دیدہ زیب سرورق کے ساتھ 496 صفحات میں شائع کیا ہے۔ فن حدیث سے محبت رکھنے والوں کے لیے ضروری ہے کہ وہ اس کتاب کا مطالعہ کریں اور اسے اپنے مکتبہ کی زینت بنائیں اور اس عظیم کارنامے پر مترجم ومحقق فضیلة الشيخ امان اللہ عاصم حفظہ اللہ اور ناشر محترم المقام ابو حمزہ عبدالخالق صدیقی حفظہ اللہ صد مبارک کے مستحق ہیں ۔ دعا ہے کہ اللہ رب العزت اس کتاب کو ہم سب کے لیے نفع بخش بنائے اور مؤلف مترجم محقق اور ناشر کے لیے صدقہ جاریہ بنائے۔آمین