روداد تقریب تکمیل صحیح بخاری

علوم اسلامیہ کی عظیم بین الاقوامی دانش گاہ جامعہ ابی بکر الاسلامیہ میں اس سال سند فراغت حاصل کرنے والے علماء کرام کے اعزاز میں 38 ویں سالانہ عظیم الشان ، فقید المثال تقریب صحیح بخاری 13 مارچ 2022ء کو بڑے تزک واحتشام کے ساتھ منعقد ہوئی۔

تقریب دو نشستوں پر مشتمل تھی پہلی نشست بعد از نماز عصر منعقد ہوئی جس میں اسٹیج سیکریڑی کے فرائض جامعہ کے نہایت قابل قدر استاذ فضیلۃ الشیخ عبد المجید حفظہ اللہ نے سر انجام دیئے۔ خطبہ مسنونہ کے بعد شیخ محترم نے آیت کریمہ

هَلْ يَسْتَوِي الَّذِيْنَ يَعْلَمُوْنَ وَ الَّذِيْنَ لَا يَعْلَمُوْنَ  (الزمر:9)

کی روشنی میں تقریب کی اہمیت اُجاگر کی اور آنے والے مہمانوں کو خوش آمدید کہا۔

تقریب کا باقاعدہ آغاز المعہد الرابع سے امسال فراغت پانے والے طالب علم قاری محمد آصف کی مسحور کن آواز میں تلاوت کلام پاک سے ہوا۔ تلاوت کلام پاک کے بعد نظم کیلئے المعہد الرابع کے ہی طالب علم عمیر ظفر محمدی کو مدعو کیاگیا جنہوں نے نعت رسول مقبول ﷺ پڑھ کر محفل کو چارچاند لگا دیئے۔ اس کے بعد خصوصی خطاب کے لیے محدث جلالپور فضیلۃ الشیخ محمد رفیق الأثری رحمہ اللہ کے صاحبزادے فضیلۃ الشیخ اسامہ رفیق الاثری کو مدعو کیاگیا جنہوں نے  اِتَّبِعُوْا مَاۤ اُنْزِلَ اِلَيْكُمْ مِّنْ رَّبِّكُمْ  (الأعراف:3)کی روشنی میں آج کے دور میں بالعموم اور طالب علموں کے لیے بالخصوص درپیش آنے والا ایک بڑا فتنہ ’’انکار حدیث ‘‘کی حقیقت کو واضح کیا اور چند مثالیں دے کر حدیث کی حجیت کو ثابت کیا نیز ان کا کہنا تھا کہ قرآن دستور اساسی ہے اور حدیث اس دستور کی دفعات کی حیثیت رکھتی ہے۔

دوسرے خطاب کیلئے معروف مترجم اور کئی ایک کتابوں کے مصنف فضیلۃ الشیخ سعید مجتبیٰ السعیدی حفظہ اللہ کو مدعو کیاگیا جنہوں نے شریعت میں ناسخ ومنسوخ کی اہمیت کو اُجاگر کیا۔ناسخ ومنسوخ کی مختلف قسمیں اور ان کی مثالیں کے ساتھ اپنی گفتگو کو واضح کرتے ہوئے شیخ محترم کا کہنا تھا کہ ناسخ ومنسوخ ہر شریعت میں چلا آرہا ہے۔ اور یہ اللہ کا مخلوق پر خاص انعام ہے انسان کی عقل ناقص ہے وہ ہر ناسخ ومنسوخ کی حکمت کو نہیں سمجھ سکتے۔ مزیاں برآں انہوں نے اجمالا ناسخ ومنسوخ کی چند اقسام کا تذکرہ بھی کیا۔

تیسرے خصوصی خطاب کیلئے فضیلۃ الشیخ ابو عمرمحمد یوسف الطالقانی حفظہ اللہ جو کہ جامعہ ہذا میں منجھے ہوئے استاذ ہیں اور علم الرجال میں کافی رسوخ رکھتے ہیں کو مدعوکیا گیا انہوں نے محترم جناب فضیلۃ الشیخ اسامہ رفیق حفظہ اللہ کی بات کو آگے بڑھاتے ہوئے منکرین حدیث کا مدلل رد کیا اور حدیث کو حجت نہ ماننے والوں پر کڑی علمی تنقید کی اور اس کے ساتھ اذان مغرب پر پہلی نشست اپنے اختتام کو پہنچی۔

دوسری نشست کا آغاز نماز مغرب کے بعد ہوا اس نشست میں اسٹیج سیکریٹری کے فرائض حسب دستور جامعہ کے سینئر استاذ ہر دلعزیز فضیلۃ الشیخ محمد طاہر آصف حفظہ اللہ نے سرانجام دیئے جنہوں نے بہت احسن انداز میں یہ فریضہ سرانجام دیا۔

دوسری نشست کا باقاعدہ آغاز المعہد الرابع کے طالبعلم قاری عبدالرحمن کی دلنشین آواز میں تلاوت کلام پاک سے ہوا۔ تلاوت کے بعد کلمۃ الطالب میں امسال سند فراغت حاصل کرنے والے طالبعلم عبید الرحمن کو دعوت دی گئی جنہوں نے تعلیمی مراحل کے اختتام پر جامعہ کے اساتذہ ودیگر انتظامیہ کا شکریہ ادا کیا اور اس عزم کا اظہار کیا کہ ہم ان شاء اللہ آخری دم تک اعلاء کلمۃ اللہ کیلئے کوشاں رہیں گے۔

اس کے بعد نظم کے لیے مرکز اول ’’ب‘‘ کے طالب علم سیدمعاذ الرحمن کو دعوت دی گئی جنہوں نے تقریب بخاری کی مناسبت سے خوبصورت انداز میں نظم پیش کی۔ کلمۃ ابناء الجامعہ میں فضیلۃ الشیخ محمد حسین لکھوی حفظہ اللہ جو کہ جامعہ کے مدیر التعلیم بھی ہیں ان کو کلمہ ابناء الجامعہ کے لیے مدعو کیاگیا شیخ موصوف نے اپنے جذبات کا اظہار کرتے ہوئے فرمایا کہ میں اور میرے بچپن کے دوست فضیلۃ الشیخ محمد طاہر باغ حفظہ اللہ جو کہ میرے ہی گاؤں سے تعلق رکھتے ہیں،بچپن سے ایک دوسرے کے ساتھ ہوتے تھے یہاں تک کہ جامعہ میں بھی ساتھ پڑھا اور جامعہ الامام محمد بن سعود میں بھی ساتھ ہی داخلہ ہوا اور عرصہ 30 سال سے جامعہ میں تدریسی اور انتظامی ذمہ داریاں سرانجام دے رہے ہیں۔ علاوہ ازیں انہوں نے اپنے علمی خاندان کا تذکرہ خیر فرمایا اور اپنے محسن الشیخ ڈاکٹر خلیل الرحمن لکھوی کا خصوصی شکریہ ادا کیا جو انہیں جامعہ لانے کا سبب بنے۔ مزید برآں انہوں نے مؤسس الجامعہ الشیخ پروفیسر محمد ظفر اللہ مرحوم رحمہ اللہ کا تذکرہ فرماتے ہوئے ان کی جامعہ سے محبت اور ان کے اخلاص کا تذکرہ فرمایا۔ کلمہ ابناء الجامعہ میں فضیلۃ الشیخ محمد طاہر باغ حفظہ اللہ نے بھی اپنے جذبات کا اظہار کرتے ہوئے جامعہ سے جڑی کئی یادوں کو تازہ کیا اورجامعہ ابی بکر کے تعلیمی معیار کے چند واقعات سنائے جن کو سن کر جامعہ کے تعلیمی معیار کی قابلیت کا اندازہ ہوا۔ انہوں نے مزید فرمایا کہ جب میں اور شیخ محمد حسین لکھوی حفظہ اللہ جامعہ الامام سعود میں زیر تعلیم تھے تو شیخ ظفر اللہ رحمہ اللہ آکر ہم سے ملاقات میں یہی کہتے تھے کہ آپ نے جامعہ آنا ہے اور اپنی ذمہ داریاں سنبھالنی ہیں۔ اور الحمد للہ ہم تاحال جامعہ میں تدریسی اور انتظامی ذمہ داریاں سرانجام دے رہے ہیں۔ مزید برآں انہوں نے طلبہ کو نصیحت کرتے ہوئے کہا کہ اللہ سے نیکی کی توفیق مانگا کریں وہی توفیق دیتاہے اور وہی اجر بھی دیتاہے۔

اس کے بعد خصوصی خطاب کے لیے شیر سندھ مولانا محمد ابراہیم طارق حفظہ اللہ کو مدعو کیاگیا جنہوں نے اپنے مخصوص انداز میں محفل کو گرما دیا۔ ان کا کہنا تھا کہ الحمد للہ مجھے ابن الجامعہ ہونے پر فخر ہے علاوہ ازیں انہوں نے طلبہ کو نصیحت کرتے ہوئے کہا کہ اخلاص کا دامن کبھی نہ چھوڑیں اللہ دنیا کی تمام نعمتیں آپ کی جھولی میں ڈال دے گا۔ اللہ تعالیٰ عمل کی توفیق عطا فرمائے۔  ان کے بعد کلمۃ الجامعہ کے لیے مدیر الجامعہ فضیلۃ الشیخ ضیاء الرحمن المدنی حفظہ اللہ کو مدعو کیاگیا جنہوں نے خصوصی طور پر ابناء الجامعہ ومحسنین کا شکریہ ادا کیا۔ دریں اثناء انہوں نے پروجیکٹر سکرین پر جامعہ کے منصوبہ جات، شعبہ جات اور مستقبل کے منصوبہ جات پر سیر حاصل بریفنگ دی اور جامعہ کی تمام نئی کاوشوں کا مختصر تعارف کروایا اور اس عزم کا اظہار کیا کہ ان شاء اللہ ہم جامعہ کو بہتر سے بہتربنانے کے لیے کوشاں ہیں۔ اللہ تعالیٰ شیخ محترم کی تمام کاوشوں کو شرف قبولیت سے نوازے۔آمین

ان کے بعد درس بخاری کے لیے بقیۃ السلف استاذ الاساتذہ فضیلۃ الشیخ  حافظ مسعود عالم حفظہ اللہ کو دعوت دی گئی جو کہ درس بخاری کے لیے فیصل آباد سے تشریف لائے تھے۔ شیخ محترم نے مختصر حمد وثناء کے بعد درس کا آغاز عربی زبان میں کیا اور فراغت حاصل کرنے والے علماء کو مبارکباد پیش کی اور قیمتی نصیحتیں فرمائیں ۔ پھر شیخ محترم نے اپنی سند بیان کی اور دین میں سند کے امتیاز کو بیان فرمایا۔ شیخ محترم کا کہنا تھا کہ امام بخاری کا ایک ہی درس ہے کہ لوگ نبی کریم ﷺ کی زندگی کی پیروی کریں ۔ امام بخاری نے کتاب کا نام بھی ’’الجامع الصحیح المسند المختصر من أمور  رسول الله صلى الله عليه وسلم وسننه وأيامه‘‘ اس لیے رکھا کیونکہ اس میں پوری حیاۃ النبی ﷺ آپ کو مستند حدیثوں کے ذریعے مل جائے گی۔ آخری حدیث بخاری کی میزان سے متعلق ہے جس میں اخلاص کو تولا جاتاہے دین کے نظام عدل سے ہی دنیا سے ظلم کو ختم کیاجاسکتاہے اور اس حدیث کی سند غریب ہے جبکہ یہ سند کوفی ہے۔ علاوہ ازیں طلبہ کو نصیحت کرتے ہوئے ان کا کہنا تھا کہ الکتاب والسنة بفهم السلف ہی اہل السنہ کا طریقہ ہے اور ان شاء اللہ اسلام کا مستقبل روشن ہوگا اور منزل تک پہنچ جانا اہم نہیں بلکہ رستوں پر چلتے رہنا زیادہ اہم ہے اور جامعہ کی نسبتیں جماعت مجاہدین کی طرف ہیں اور سیدین شہیدین رحمہما اللہ (شہداء بالاکوٹ) کی طرف ہیں تو ان نسبتوں پر فخر بھی کریں اور ان کی لاج بھی رکھیں۔ اس کے علاوہ انہوں نے دور حاضر کے علماء کو تلقین فرمائی کہ فتوے بازی سے گریز کریں سب کو ساتھ لے کر چلیں مگر اس کا مطلب ہرگز یہ نہیں ہے کہ اپنے صحیح موقف سے ہٹ جائیں بلکہ اگلے کے غلط موقف کو پیار ومحبت سے مل جل کر ٹھیک کروالیں۔ اللہ تعالیٰ کے لیے تقوی اور اخلاص پیدا کریں، علمی سفر جاری رکھیں اور علم میں رسوخ پیدا کریں تعلق باللہ کو مضبوط رکھیں، اللہ سب کا حامی وناصر ہو۔ آمین

اور اسی پر شیخ صاحب کے درس کا اختتام ہوا اس کے بعد نتائج کے اعلان کے لیے مدیر الامتحانات ڈاکٹر محمد افتخار احمد شاہد حفظہ اللہ کو مدعو کیاگیا اور انہوں نے طلبہ کے سالانہ نتائج کا اعلان کیا اس کے بعد فارغ التحصیل ہونے والے طلبہ کی دستار بندی کی گئی اور اس کے بعد ہر کلاس میں اوائل کے مابین مختلف مہمانان گرامی کے ہاتھوں انعامات وتحائف دیئے گئے۔اور آخر میں اختتامی کلمات کے لیے جامعہ ابی بکر الاسلامیہ کے سرپرست بقیۃ السلف مولانا محمد عائش  حفظہ اللہ کو مدعو کیا گیا انہوں نے دعا کے ساتھ اس پُر وقار تقریب کا اختتام کیا۔

اس کے بعد نمازِ عشاء ادا کی گئی اور عشاء کی ادائیگی کے بعد مہمانوں کی ضیافت کا اہتمام کیاگیا ۔