تبصرہ کتاب

کتاب کا نام  :  سفر نامہ پنجاب

مؤلف  :  محمد یوسف نعیم

طباعت:-۴۶صفحات-غیر مجلد

ناشر:عبد الرحمان دارالکتاب کراچی

جناب محمد یوسف نعیم صاحب نے اپنی تالیف زیرِ تبصرہ کو تمام اہلِ علم کے لیے دورانِ سفر وقت کا درست مصرف قرار دیا ہے ۔ انہوں نے اس مختصر مطالعاتی دورہ کی یادداشتوں کو کتابی صورت دے کر یقینا ایک مستحسن اقدام کیا ہے ۔جس میں آدابِ سفر سے آغاز کرتے ہوئے جام پور ضلع راجن پور کے الفرید میونسپل لائبریری اور اس شہر کا تفصیلی ذکر کرتے ہوئے بتایا ہے کہ معروف سرائیکی شاعر خواجہ غلام فرید سے منسوب یہ لائبریری ۳۲ سال سے اہلِ جام پور کے لیے معلوماتی تسکین کی خدمت انجام دے رہی ہے ۔

راجن پور کی پاکستان پبلک لائبریری کا ذکر کرتے ہوئے انہوں نے بتایا کہ یہ قیصر خلیل صاحب کی ذاتی لائبریری ہے جس میں شاعری ، افسانہ ، جاسوسی کتب ، تاریخِ اسلام اور سفرناموں پرتقریباً ۶۰۰۰ کتب کا ذخیرہ ہے اور یہاں یومیہ ۶۰/۷۰ افراد مطالعہ کے لیے حاضر ہوتے ہیں۔

لائبریری حضرت خواجہ غلام فرید مٹھن کوٹ کے بارے میں ان کا کہنا ہے کہ محکمۂ اوقاف کی یہ لائبریری بے توجہی و شکستگی کا منظر پیش کرتی ہے باوجودیکہ وہاں کتابوں کا معقول ذخیرہ ہے اور اسے سرکاری سرپرستی حاصل ہے ۔آگے چل کر انہوں نے قصر فرید میوزیم کے مفصل تذکرہ میں بتایا ہے کہ یہ میوزیم ۲۴ گھنٹے کھلا رہتا ہے ۔۱۰/۱۲ افراد مامورِ خدمت ہیں اور یہاں محققین کے لیے قیام و طعام کا انتظام بھی ہے ۔میوزیم میں خواجہ موصوف کے زیرِ مطالعہ ۱۰۰ کتبِ قلمی کے علاوہ ۱۵۰۰ مسودات بھی ہیں۔

عبد الرحمان اسلامک لائبریری پیپلز کالونی ملتان کے موضوع پر ان کا بیان ہے کہ ۱۹۹۷ء میں قائم شدہ اس لائبریری میں علم حدیث و تفسیر پر ۴۰۰۰ کتب ہیں۔

مولف نے عوامی دارالمطالعہ رینالہ خورد کا ذکر کرتے ہوئے بیان کیا ہے کہ ۱۹۸۰ء کی قائم شدہ اس لائبریری میں ۴۰۰۰ کتب کا ذخیرہ موجود ہے یہ کتب قرآنیات ، تفسیر ، سیرت ، تاریخ اسلام ، شخصیات ، حدیث اور اقبالیات کے علاوہ بچوں کے موضوع پر محیط ہیں ۔ الغرض مولف کا یہ سفر نامہ مفید اور خاصا دلچسپ ہے ۔