نکاح وطلاق میں احتیاط کی ضرور ت

حدیث نمبر: 40

عَنْ اَبِیْ ہُرَیْرَۃَ رضی اللہ عنہ اَنَّ رَسُوْلَ اللّٰہِ صلی اللہ علیہ وسلم قَالَ : ثَلاَثٌ جِدُّہُنَّ جِدٌّ وَہَزْلُہُنَّ جِدٌّ ، اَلنِّکَاحُ ، وَالطَّلاَقُ  وَالرَّجْعَۃُ ۔

تخریج : سنن الترمذی ، حدیث نمبر ۱۱۸۴ ، سنن أبی داؤد ، کتاب الطلاق ، حدیث نمبر ۲۱۹۴

روای کا تعارف : حدیث نمبر 15 کی تشریح میں ملاحظہ فرمائیں

معانی الکلمات  :

ثَلاَثٌ :تین three

جِدُّہُنَّ : انکا ارادہ کرناits significance

اَلنِّکَاحُ :نکاح Marriage

جِدٌّ:Significant / seriour / important

الطَّلاَقُ : طلاق Divorce

ہَزْلُہُنَّ : انکا مذاق its Joke 

ھَزْلٌ : to Joke / to emaciate

الرَّجْعَۃُ : رجوع   To turn back 

ترجمہ :

سیدنا ابو ہریرۃ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : تین (چیزوں) کاارادہ کرنے سے بھی وہ واقع ہوجاتی ہیں اور مذاق میں بھی انکا وقوع ثابت ہوجاتاہے ۔نکا ح ، طلاق اور رجوع ۔

تشریح :

دین اسلام عمومی طور پر انسان کو اپنی زندگی کے جملہ امور میں سنجیدگی اور متانت کا درس دیتاہے۔ تاہم چند قیود وضوابط کے ساتھ خوش طبعی کیلئے مذاق کی بھی اجازت دیتاہے ، چنانچہ خود رسول کریم  ﷺ سے ایسی چند مثالیں بھی ملتی ہیں لیکن چند امور ایسے ہیں جن میں انتہائی احتیاط کا حکم ملتاہے ان امور میں سے تین اس حدیث میں مذکور ہیں جن کا تعلق حلال وحرام سے ہونے کے ساتھ ساتھ باہمی اتفاق وجوڑ اور اختلاف وتوڑ سے بھی ہے۔

چو نکہ نکاح سے ایک عظیم رشتہ قائم ہوتاہے لہذا تمام پہلوؤں پر اچھی طرح غوروفکر اور باہمی مشورے سے مستقل بنیادوں پر یہ رشتہ استوار کرنے کی ترغیب ہے۔ محدود وقت کیلئے اسکا اقدام منع ہے۔ یہ الگ بات ہے کہ نکاح کے بعد اتفاقاً کچھ معاملات ایسے ہوجائیں کہ علیحدگی کرنا پڑ جائے۔ مذاق مذاق میں نکاح کرلینا مذاق تصور نہیں ہوگا بلکہ واقعتا وہ نکاح جملہ احکام کا اطلاق کے ساتھ واقع ہوجائے گا۔اسی طرح طلاق انتہائی معیوب اقدام ہے جس سے معاشرے میں عورت کے ساتھ ساتھ مرد کا مقام بھی بہت متأثر ہوتاہے ۔رجوع (طلاق کے بعد) صلح واتفاق کی طرف واپسی ہے جو مستحسن ہے ، لہذا ان اقدامات میں مذاق جائز نہیں ۔ حدیث کی رو سے یہ مذاق تصور نہ ہوگا بلکہ اصل حکم لاگو ہو جائے گا۔ واللہ اعلم