ایک مسلمان کے دوسرے مسلمان پر حقوق

اسلام ایک مکمل جامع دین ہے یہ کسی بھی پہلو پر کسی کی بھی حقوق کی خلاف ورزی یا ناانصافی نہیں کرتاہے جس طرح اللہ اور بندے کے باہم حقوق وفرائض ہیں ، شوہر وبیوی کے ، رشتہ داروں کے پڑوسی کے ، غلاموںکے ، حاکموںوغیرہ کے باہم حقوق وفرائض ہیں ٹھیک اسی طرح ایک مسلمان بھائی کے دوسرے مسلمان بھائی پر کچھ حقوق وفرائض ہیں ۔

آج نفسا نفسی کا دور ہے ، خود غرضی ، مفاد پرستی کادور دورہ ہے ۔ یہی سبب ہے کہ آج ہم نے آپس کے حقوق کو پس پست ڈال دیا ہے۔ تبھی ہم اتنے بے حس ، خودغرض ، سنگدل ، سخت دل ہوگئے ہیں۔ آج ہمیںضرورت احساس ذمہ داری کی ہے اور باہم حقوق وفرائض کے ادا کرنے کی اگر ہم ایک دوسرے کے حقوق دیانتداری سے ادا کریں تو وہ دن دور نہیں جب محبت ، امن وامان کا گہوارہ ہوگا۔ قرآن وسنت میں ہم جائزہ لیں تو ایک مسلمان کے دوسرے مسلمان بھائی پر مندرجہ ذیل حقوق عائد ہوتے ہیں ۔

پہلا حق

جب بھی ہماری کسی بھی مسلمان بھائی سے ملاقات ہوتو فوراً اسے سلام کریں ۔سلام میں پہل کرنے والے کیلئے دس نیکیاں ہیں اور سلام کو عام کرنے کا حکم بھی دیا گیا ہے نیز جنت میں جنتیوں کا آپس میں کلام بھی سلام ہی ہوگا۔ بہت سے لوگ سلام میں پہل کرنے میں شرمندگی اور خود کو کمتر خیال کرتے ہیں حالانکہ ایسانہیں ہے ۔اللہ تعالیٰ کے قریب وہ شخص ہے جو سلام میں پہل کرے۔ کسی بھی مجلس یا محفل میں ایک سے زائد افراد ہوتو نام لے کر سلام ہرگز نہ کرے۔ سلام کے بعد مصافحہ کرنے سے ان دونوں مسلمانوں کی ایک دوسرے سے علیحدگی سے پہلے ہی بخشش کردی جاتی ہے ۔ مصافحہ ایک ہاتھ سے کریں۔ دونوں ہاتھوں سے مصافحہ ثابت نہیں ہے ۔ ملاقات کے وقت سلام کے بعدمصافحہ حدیث سے ثابت ہے مگر معانقہ اور بوسہ ثابت نہیں ہے صرف ہاتھ ملانے پر اکتفا کیا جائے۔

دوسرا حق

کسی بھی مسلمان کو چھینک آئے تو اس کے ’’اَلْحَمْدُ لِلّٰہِ‘‘ کے جواب پر ’’یَرْحَمُکَ اللّٰہُ‘‘ کہنا پھر چھینکنے والا ’’یَہْدِکُمُ اللّٰہُ وَیُصْلِحُ بَالَکُمْ‘‘ کہے۔ بہتر ہے کہ چھینکنے والا اپنا ہاتھ یا رومال منہ پر رکھ لے۔

تیسرا حق

اگر کوئی بیمار ہوتو اس کی عیادت کرے، مزاج پرسی کرے اور شفا کی دعا مانگے۔

چوتھا حق

اگر کوئی مرجائے تو اس کی نمازِ جنازہ میں شریک ہو۔

پانچواں حق

اگر کوئی مسلمان بھائی کسی معاملے میں قسم ڈال دے کہ تم یہ کام کرلو تو اس کی قسم پوری کرے بشرطیکہ ناجائز بات نہ ہو ۔

چھٹا حق

کوئی بھی مسلمان آپ سے کسی بھی معاملے میں کسی قسم کی خیر خواہی اور مشورے کا طالب ہو ۔کسی بات کے درست ہونے کے متعلق دریافت کرے تو آپ کیلئے لازم ہے کہ اس کی اچھائی کو مدِنظر رکھتے ہوئے خیر خواہی کریں اور صحیح اور سچی بات کریں۔

ساتواں حق

جو کچھ اپنے لئے پسند کیا جائے ویسا ہی اپنے مسلمان بھائی کیلئے پسند کرے۔ اور جو چیز اپنے لئے ناپسند ہوتو وہ ان کیلئے بھی ناپسند ہونی چاہیے۔

آٹھواں حق

مسلمان بھائی کو مدد اور تائید کی ضرورت ہوتو فوراً اس کی مدد کریں اور اس سے ہرگز دریغ نہ کریں ۔ چاہے وہ ظالم ہو یا مظلوم ۔ اگر ظالم ہے تو اس کے ہاتھ پکڑ کر ظلم سے باز رکھـنا ہی مدداس کی ہے۔

نواں حق

ہر مسلم اپنے مسلمان بھائی کیلئے عاجزی اختیار کرے اور غرور وتکبر سے اجتناب کرے۔ اس کی جگہ پر خود نہ بیٹھے کسی مجلس میں ہوتو اس کے لئے جگہ بنائے اور وسعت پیدا کرے۔

دسواں حق

کسی بھی مسلمان بھائی سے تین دن سے زیادہ گفتگو بند نہ کرے تین دن کی ناراضگی کے بعد فوراً خود پہل کرنا چاہیے جتنا بڑا ہی جھگڑا کیوں نہ ہو تین دن سے زیادہ ناراضگی حرام ہے۔ جس شخص نے تین دن تک تعلق منقطع رکھا اور وفات پاگیا وہ جہنم میں داخل ہوگا۔ اسی طرح سے اگر ایک سال تک بھائی سے بات نہ کی تو وہ ایسے ہے جیسے اس نے اپنے مسلمان کا خون بہا دیا ۔ انا للہ

اسی طرح ایک مسلمان کا دوسرے مسلمان پر یہ حق بھی ہے کہ اس کی پیٹھ پیچھے برائی (غیبت) نہ کرے۔ حقیر نہ جانے ، شکایت نہ کرے (مگر جائز) ، عیب جوئی نہ کرے ، مذاق نہ اڑائے ، برے القاب سے نہ پکارے نام نہ بگاڑے ، چغلخوری نہ کرے ، گالی نہ دے ، حسد وجلن کا جذبہ نہ رکھے، اس کے بارے میں برے گمان نہ کرے ، جاسوسی نہ کرے ، دھوکہ نہ دے ، امانت میں خیانت نہ کرے ، وعدہ خلافی نہ کرے ، جھوٹ نہ بولے، اچھے اخلاق کا مظاہرہ کرے ، بڑا ہے تو اس کی عزت وتوقیر کرے اور اگر چھوٹا ہے تو اس پر رحم وشفقت کرے ، اپنے بھائی کی لغزشوں وغلطیوں کو معاف کرے اس کے عیب پر پردہ ڈالے ، کوئی بھی ایسی بات سننے یا جاننے کی کوشش نہ کرے جو وہ اس سے چھپا رہا ہو۔

ہر مسلمان دوسرے مسلمان بھائی کے حقوق وفرائض تسلیم کرے اور یہ نہ سمجھیں کہ یہ سب فقط مسلمانوں کے آپسی حقوق ہیںبلکہ یہ سمجھے کہ یہ اللہ کی عبادت ہے چونکہ اسی ربِ باری تعالیٰ نے ہمیں ان چیزوں کا حکم دیا ہے اور یہ اس کی قربت کی راہیں ہیں ہر ہر مسلمان اپنے آپ کو ان آداب سے آراستہ کرے تو یقینا یہ دنیا ایک امن وامان ومحبت کا باغ بہار بن جائے گی۔