قسط نمبر: 5
60. صرف خواہش کرنے پر کھانا مل جانا
سیدناابو امامہ رضی اللہ عنہ سے روایت ہے کہ جنتی شخص جنت کے پرندوں میں سے ایک پرندے کے کھانے کی خواہش کرے گا، وہ اس کے ہاتھ میں پکا ہوا اور ٹکڑے کیے ہوئے کی صورت میں آگرے گا۔
61.جنتیوں کی پرندوں کے گوشت سے خاطر تواضع
سیدناانس رضی اللہ عنہ سے مروی ہے وہ کہتے ہیں کہ رسول اللہﷺ نےفرمایا: جنت میں اونٹوں کی گردنوں کے برابر پرندے ہوں گے، جو درختوں میں چرتے پھریں گے، سیدناابو بکر رضی اللہ عنہ نے عرض کیا: اے اللہ کے رسولﷺ! پھر تو وہ پرندے خوب صحت مند ہوں گے، آپ ﷺ نے فرمایا: انہیں کھانے والے ان سے بھی زیادہ صحت مند ہوں گے۔
62.جنت میں ایک آدمی کو سو آدمیوں کے برابر قوت ملنا
سیدنا زید بن ارقم رضی اللہ عنہ سے مروی ہے وہ کہتے ہیں کہ رسول اللہ ﷺ نے مجھ سے فرمایا: بےشک اہل جنت میں سے ایک آدمی کو کھانے میں، پینے میں، شہوت اور جماع میں سو آدمیوں کی طاقت دی جائے گی، تو یہودیوں میں سے ایک آدمی نے کہا: جب بندہ کھائے اور پیئے گا تو اس کو قضائے حاجت کی ضرورت بھی ہوگی، تو رسول اللہ ﷺ نے اس سے فرمایا: جنتیوں میں سے کسی ایک کی حاجت ایک پسینے کی صورت میں ہوگی، جو اس کی جلد سے بہے گا تو اس سے اس کا پیٹ سکڑ جائے گا (یعنی اس کی حاجت پوری ہو جائے گی)۔
63. جنت میں بڑے بڑے پھل
سیدناعتبہ بن عبد السلمی رضی اللہ عنہ سے مروی ہے کہ ایک دیہاتی شخص نبی کریم ﷺ کی خدمت میں حاضر ہوا اور حوض کوثر اور جنت کے متعلق سوالات پوچھنے لگا، پھر دیہاتی نے پوچھا: کیا جنت میں میوے ہوں گے؟ آپ ﷺ نے فرمایا: ہاں!۔۔۔۔اس دیہاتی نے پوچھا: جنت میں انگور ہوں گے؟ آپ ﷺ نے فرمایا: ہاں! اس نے پوچھا: اس کے خوشوں کی موٹائی کتنی ہوگی؟ آپ ﷺ نے فرمایا: چتکبرے کوے کی ایک مہینے کی مسلسل مسافت جس میں وہ رکے نہیں، اس نے پوچھا: اس کے ایک دانے کی موٹائی کتنی ہوگی؟ آپ ﷺ نے فرمایا: کیا تمہارے والد نے کبھی اپنی بکریوں میں سے کوئی بہت بڑا مینڈھا ذبح کیا ہے؟ اس نے کہا: جی ہاں! نبی ﷺ نے فرمایا: پھر اس نے اس کی کھال اتار کر تمہاری والدہ کو دی ہو اور یہ کہا ہو کہ اس کا ڈول بنالو؟ اس نے کہا جی ہاں! دیہاتی کہنے لگا: اس طرح تو وہ ایک دانہ ہی مجھے اور میرے تمام اہل خانہ کو سیراب کر دے گا، آپ ﷺ نے فرمایا: ہاں! اور تمہارے تمام خاندان والوں کو بھی سیراب کر دے گا۔
64.جنت میں جھکے ہوئے پھل
سیدنا براء بن عازب رضی اللہ عنہ سے اللہ تعالی کے اس فرمان وَذُلِّلَتْ قُطُوفُهَا تَذْلِيلًا(الإنسان:14) کے بارے میں روایت ہے کہ جنتی لوگ جنت کے پھلوں اور میووں سے، اُٹھتے بیٹھتے اور لیٹتے کھاتے رہیں گے۔
65.جنت میں بغیر گٹھلی کے میٹھے اور نرم پھل
سیدنا ابن عباس رضی اللہ عنہما سے روایت ہے، وہ فرماتے ہیں کہ جنت کی کھجوروں کے تنے سبز زمرد کے ہیں اور کھجور کی ٹہنیوں کا ابتدائی حصہ سرخ سونے کا ہے اور اس کی ٹہنیوں کا چھلکا جنتیوں کا لباس ہوگا،ان میں سے کچھ چھوٹے کپڑے اور کچھ حُلے ہوں گے اور اس کے پھل، مٹکوں اور ڈولوں کے برابر ہوں گے، وہ دودھ سے زیادہ سفید اور شہد سے زیادہ میٹھے اور مکھن سے زیادہ نرم ہوں گے، ان میں گٹھلیاں نہیں ہوں گی۔
66.جنت میں انگوروں کے گچھے کی لمبائی
سیدنا عبد اللہ بن ابی الہدیل سے روایت ہے، وہ کہتے ہیں کہ ہم عبد اللہ بن مسعود کے ساتھ شام یا عمان میں تھےتو لوگوں نے جنت کا تذکرہ کیا، پس انہوں نے کہا: جنت کے انگوروں کے گچھوں میں سے ایک گچھا یہاں سے لےکر صنعاء [یمن] تک بڑا اور لمبا ہوگا۔
67.جنت میں ایک انگور کے جوس سے ایک بڑا ڈول بھر جانا
سیدنا ابو سعید خدری رضی اللہ عنہ سے روایت ہے وہ کہتے ہیں کہ رسول اللہ ﷺ نے فرمایا: مجھ پر جنت پیش کی گئی تو میں گیا اور اس سے انگوروں کا خوشہ توڑنے لگا تاکہ میں اسے تم کو دکھا دوں، تو میرے اور اس کے درمیان رکاوٹ حائل کر دی گئی۔ پس ایک شخص نے کہا: اے اللہ کے رسول! انگور کے دانے کا پانی کتنا ہوگا؟آپ ﷺ نے فرمایا: سب سے بڑے ڈول کے برابر جو تمہاری ماں نے کبھی بنایا ہو۔
68.جنت میں مشروب اور برتنوں کا خود پاس آجانا
سیدنا ابو امامہ رضی اللہ عنہ سے روایت ہے وہ فرماتے ہیں کہ جنت والوں میں سے ایک شخص جنت کی شراب کی خواہش کرے گا پس (ٹونٹی والی کیتلی کی طرح کا) برتن اس کے ہاتھ میں آجائےگا، تو وہ پی لے گا۔ پھر وہ برتن اپنی جگہ پر واپس چلا جائے گا۔
69.جنت کے خوبصورت بستر
سیدنا ابن مسعود رضی اللہ عنہ سے اللہ عزوجل کے اس فرمان کے بارے میں روایت ہے «جن کا اندرونی حصہ موٹے ریشم کا ہوگا»[الرحمٰن 54] وہ کہتے ہیں کہ تمہیں اندرونی حصے کے بارے میں یہ خبر دی گئی ہے تو بیرونی حصے کی کیفیت کیا ہوگی۔
70.جنت میں دو چاندی اور دو سونے کے باغ
سیدناابو بكر بن عبد الله بن قيس اپنے والد سے روایت کرتے ہیں کہ رسول اللہ ﷺنے فرمایا: (جنت میں) دو باغ چاندی کے ہوں گے جن کے برتن اور تمام دوسری چیزیں چاندی کی ہوں گی، اور دو باغ سونے کے ہوں گے جن کے برتن اور تمام دوسری چیزیں سونے کی ہوں گی۔
71.جنت کے پھلوں کے غلافوں سے کپڑوں کا نکلنا
سیدناابو سعید خدری رضى الله عنہ سے روایت ہے کہ رسول اللہ ﷺنے فرمایا: طوبی جنت کے ایک درخت کا نام ہے جس کی مسافت سو سال کے برابر ہے، اور اہل جنت کے کپڑے اس درخت کے پھلوں کے چھلکوں سے نکلیں گے۔
72.جنت میں موتیوں کے ہار
سیدنا ابو ذر رضی اللہ عنہ بیان کرتے ہیں کہ رسول اللہ ﷺ نے فرمایا: … مجھے جنت میں لے جایا گیا، میں نے دیکھا کہ اس میں موتیوں کے ہار ہیں۔
73.جنت میں سونے کی کنگھیاں
سیدنا ابو ہریرہ رضی اللہ عنہ سے روایت ہے وہ کہتے ہیں کہ رسول اللہ ﷺ نے فرمایا: …..اہل جنت کی کنگھیاں سونے اور چاندی کی ہوں گی۔اور ان کی انگیٹھیوں میں (جلانے کے لئے) خوشبودار لکڑی ہوگی۔
74.اہل جنت کے سونے کے برتن
سیدنا ابو ہریرہ رضی اللہ عنہ سے روایت ہے وہ کہتے ہیں کہ رسول اللہ ﷺ نے فرمایا: جنت میں جنتیوں کے برتن سونے کے ہوں گے۔
75.جنت میں چاندی اور شیشے کے برتن
ابو بکر بن عبد اللہ بن قیس اپنے والد (ابو موسی اشعری) سے روایت کرتے ہیں کہ رسول اللہ ﷺ نے فرمایا: دو باغ چاندی کے ہیں۔ ان دونوں کے برتن اور ان کا دیگر سازو سامان چاندی کا ہوگا۔ اور دو باغ سونے کے ہیں۔ ان کے برتن اور دیگر سازو سامان بھی سونے کا ہوگا۔اور جنت عدن میں اہل جنت اور ان کے رب کے دیدار میں کوئی چیز حائل نہیں ہوگی، البتہ! رب کے چہرے پر کبریائی کی چادر ضرور ہوگی۔
(جاری ہے)
قسط نمبر : 7 وقال: {وَلَا تَقُولُوا ثَلاثَةٌ انتَهُوا}[النساء: 171]وقال: {وَلا تَقُولُوا لِمَنْ أَلْقَى إِلَيْكُمُ…
آٹھ مواقع جب ملائکہ آپ کے لیے دعا کرتے ہیں، ان مواقع کو کثرت سے…
قَالَ رَحِمَهُ اللهُ: شیخ الاسلام محمد بن عبدالوہاب رحمہ اللہ کہتے ہیں: بِسْمِ اللهِ الرَّحْمَنِ…
سچ ہے کہ مرد کے اوپر باہر کی ذمہ داریاں زیادہ ہوتی ہیں، لیکن بیوی…
1۔ تراویح کی وجہ تسمیہ لفظ «تراویح» عربی زبان زبان کا لفظ ہے اس کی…
رمضان کی فرضیت : رمضان کے روزے ہرمکلف مسلمان مرد وعورت پرفرض ہیں اور جوبچے…