فتنہ دجال ایک عظیم فتنہ ہے ۔دجّال کا فتنہ انسانی تاریخ کی ابتدا سے لے کر انتہا تک کے تمام فتنوں سے بڑا اور خطرناک فتنہ ہے . جس کی شدّت کا اندازہ اس بات سے بھی لگایا جا سکتا ہے کہ ہر نبی نے اپنی قوم کو فتنہ دجال سے ڈرایا ہے ۔دجال کا معنی ہے دھوکہ اور فریب دینے والا جو لوگوں کو اپنی تلبیس کے ذریعے گمراہ کرے گا ۔اس کی علامت یہ ہوگی اس کے دونوں آنکھوں کے درمیان کافر لکھا ہوا ہوگا جسے ہر مؤمن شخص پڑھ لے گا خواہ پڑھا لکھا ہو یا ان پڑھ ۔ دجال کو اللہ تعالی بعض اختیارات دیں گے جس کے ذریعے وہ لوگوں کو آزمائے گا ۔درحقیقت فتنہ دجال ایک عظیم آزمائش ہے جس کے ذریعے اللہ تعالیٰ نیک اور بد کی تمیز کریں گے ۔اللہ تعالیٰ نے اس کے ساتھ جنت اور آگ آنکھ کی بصارت کے مطابق بنا دی، لیکن اس کی جنت آگ ہے اور اس کی آگ جنت ہے، پس جو اس کی اطاعت کرے گا وہ اس جنت میں داخل ہو گا جیسے وہ لوگوں کو دیکھتا ہے، لیکن یہ ایک ایسی جنت ہے۔ جس میں جلتی ہوئی آگ ہے اور جو اس کی نافرمانی کرتا ہے وہ اس کی آگ میں داخل ہوتا ہے۔آگ وہ ہے جسے لوگ دیکھتے ہیں، لیکن یہ جنت اور اچھا، میٹھا پانی ہے۔
لیکن بعض لوگوں کا خیال ہے کہ دجال کے پاس الٰہی تصرفات ہوں گے ۔حالانکہ دجال کے پاس بعض وہ چند اختیارات ہونگے جو اللہ تعالیٰ اس کو دے گا ۔کئی مقامات پر وہ بے بس ہوگا ۔اگر اس کے پاس الٰہی تصرفات ہوتے تو اس کو بے بسی کا سامنا نہیں کرنا پڑتا ۔
دجال کی بے بسی کے حوالے سے چند احادیث ملاحظہ فرمائیں ۔
1۔ دجال اس قدر اللہ تعالیٰ کے سامنے بے بس و مجبور ہوگا کہ اپنی آنکھوں کے درمیان سے لکھا ہوا کافر نہیں مٹا سکے گا ۔
نبی کریم ﷺنے فرمایا :
دجال کی دونوں آنکھوں کے درمیان کفر یعنی کافر لکھا ہوا ہوگا۔
مجاہد بیان کرتے ہیں کہ ہم سیدناعبداللہ بن عباس رضی اللہ عنہماکی خدمت میں حاضر تھے۔ لوگوں نے دجال کا ذکر کیا کہ نبی کریم ﷺ نے فرمایا ہے کہ اس کی دونوں آنکھوں کے درمیان کافر لکھا ہوا ہوگا۔ تو سیدناابن عباس رضی اللہ عنہما نے فرمایا کہ میں نے تو یہ نہیں سنا۔ ہاں آپ ﷺ نے یہ فرمایا تھا کہ گویا میں سیدناموسیٰ (علیہ السلام) کو دیکھ رہا ہوں کہ جب آپ وادی میں اترے تو لبیک کہہ رہے ہیں۔
2۔ دجال رب ہونے کا دعویٰ کرے گا حالانکہ وہ دجال کانا ہوگا اور اس کی آنکھ بھی پھوٹی ہوئی ہوگی۔ کانا ہونا عیب اور نقص ہے اللہ تعالیٰ تمام عیوب اور نقائص سے پاک ہے ۔دجال اس قدر مجبور ہوگا کہ اپنی آنکھ کو درست بھی نہیں کرسکے گا ۔
نبی کریم ﷺنے فرمایا:
دجال کی ایک آنکھ اندھی ہے اس کی دونوں آنکھوں کے درمیان کافر لکھا ہے پھر اس کے ہجے کیئےیعنی ک، ف، ر اور ہر مسلمان اسے پڑھ لے گا۔
نبی کریم ﷺنے فرمایا :
’’تمہیں اچھی طرح معلوم ہے کہ اللہ تعالیٰ کانا نہیں ہے اور آپ نے ہاتھ سے اپنی آنکھ کی طرف اشارہ کیا اور دجال مسیح کی دائیں آنکھ کانی ہوگی، جیسے اس کی آنکھ پر انگور کا ایک اٹھا ہوا دانہ ہو۔‘‘
3۔ دجال سورة الکھف کا مقابلہ نہیں کر سکے گا ۔
نبی کریم ﷺنے فرمایا :
’’جو آدمی سورت کہف کی ابتدائی دس آیات یاد کرلے گا وہ دجال کے فتنہ سے محفوظ رہے گا۔ ‘‘
4۔ دجال کے بے بس ہونے کی یہ بھی دلیل ہے کہ چالیس دنوں میں پوری دنیا کا چکر لگانے کے باوجود بھی مکہ اور مدینہ میں داخل نہیں ہوسکے گا ۔
نبی کریم ﷺنے فرمایا:
’’مدینہ والوں پر دجال کا رعب نہیں پڑے گا اس دن مدینہ کے سات دروازے ہوں گے ہر دروازے پر دو فرشتے پہرہ دیتے ہوں گے۔‘‘
نبی کریم ﷺنے فرمایا:
دجال آئے گا اور مدینہ کے ایک کنارے قیام کرے گا، پھر مدینہ تین مرتبہ زلزلہ آئے گا اور اس کے نتیجے میں ہر کافر اور منافق نکل کر اس کی طرف چلا جائے گا۔
نبی کریم ﷺنے فرمایا:
’’مدینہ کے راستوں پر فرشتے ہیں نہ اس میں طاعون داخل ہو سکتا ہے نہ ہی دجال۔‘‘
نبی کریم ﷺنے فرمایا:
’’دجال مدینہ تک آئے گا تو یہاں فرشتوں کو اس کی حفاظت کرتے ہوئے پائے گا چنانچہ نہ دجال اس کے قریب آسکتا ہے اور نہ طاعون، ان شاء اللہ۔‘‘
نبی کریم ﷺنے فرمایا:
’’کوئی ایسا شہر نہیں ملے گا جسے دجال پامال نہ کرے گا، سوائے مکہ اور مدینہ کے، ان کے ہر راستے پر صف بستہ فرشتے کھڑے ہوں گے جو ان کی حفاظت کریں گے پھر مدینہ کی زمین پرتین مرتبہ زلزلہ آئے گا۔ جس سے ایک ایک کافر اور منافق کو اللہ تعالیٰ اس میں سے باہر کر دے گا۔‘‘
5۔ دجال مجاہد کو دوبارہ قتل نہیں کر سکے گا ۔
(صحيح البخاري : 1882,7132)
’’سیدنا ابو سعید خدری رضی اللہ عنہ فرماتے ہیں کہ ہم سے رسول اللہ ﷺ نے دجال کے متعلق ایک لمبی حدیث بیان کی، آپ ﷺ نے اپنی حدیث میں یہ بھی فرمایا تھا کہ دجال مدینہ کی ایک کھاری شور زمین تک پہنچے گا اس پر مدینہ میں داخلہ تو حرام ہوگا۔ (مدینہ سے) اس دن ایک شخص اس کی طرف نکل کر بڑھے گا، یہ لوگوں میں ایک بہترین نیک مرد ہوگا یا (یہ فرمایا کہ) بزرگ ترین لوگوں میں سے ہوگا وہ شخص کہے گا کہ میں گواہی دیتا ہوں کہ تو وہی دجال ہے جس کے متعلق ہمیں رسول اللہ ﷺ نے اطلاع دی تھی دجال کہے گا کیا میں اسے قتل کر کے پھر زندہ کر ڈالوں تو تم لوگوں کو میرے معاملہ میں کوئی شبہ رہ جائے گا؟ اس کے حواری کہیں گے نہیں، چنانچہ دجال انہیں قتل کر کے پھر زندہ کر دے گا۔ جب دجال انہیں زندہ کر دے گا تو وہ بندہ کہے گا اللہ کی قسم! اب تو مجھ کو پورا حال معلوم ہوگیا کہ تو ہی دجال ہے دجال کہے گا لاؤ اسے پھر قتل کر دوں لیکن اس مرتبہ وہ قابو نہ پا سکے گا۔‘‘
6۔ دجال سیدنا عیسیٰ علیہ السلام کا سن کر نمک کی طرح پگھلنے لگے گا ۔ جس طرح پانی میں نمک پگھل جاتا ہے ۔
نبی کریم ﷺنے فرمایا:
’’سیدناعیسیٰ بن مریم علیہ السلام نازل ہوں گے اور مسلمانوں کی نماز کی امامت کریں گے پس جب اللہ کا دشمن انہیں دیکھے گا تو وہ اس طرح پگھل جائے گا جس طرح پانی میں نمک پگھل جاتا ہے اگرچہ سیدنا عیسیٰ علیہ السلام اسے چھوڑ دیں گے تب بھی وہ پگھل جائے گا یہاں تک کہ ہلاک ہوجائے گا لیکن اللہ تعالیٰ اسے سیدناعیسیٰ علیہ السلام کے ہاتھوں سے قتل کرائیں گے پھر وہ لوگوں کو اس کا خون اپنے نیزے پر دکھائیں گے۔‘‘
7۔ دجال کو سیدنا عیسی علیہ السلام قتل کریں گے ۔
نبی کریم ﷺنے فرمایا:
’’میرے اور سیدنا عیسیٰ علیہ السلام کے درمیان کوئی نبی نہیں ہے ‘ اور وہ اترنے والے ہیں ‘ جب تم انہیں دیکھو گے تو پہچان جاؤ گے کہ درمیانی قامت والے ہیں اور رنگ ان کا سرخ و سفید ہو گا ‘ ہلکے زرد رنگ کے لباس میں ہوں گے ‘ ایسے محسوس ہو گا جیسے ان کے سر سے پانی ٹپک رہا ہو ‘ حالانکہ نمی (پانی) لگا نہیں ہو گا۔((انتہائی نظیف اور چمکدار رنگ کے ہوں گے)) وہ لوگوں سے اسلام کے لیے قتال کریں گے ‘ صلیب توڑ دیں گے اور خنزیر کو قتل کریں گے ‘ جزیہ موقوف کر دیں گے۔اللہ تعالیٰ ان کے زمانے میں اسلام کے علاوہ دیگر سب دینوں کو ختم کر دے گا۔وہ مسیح دجال کو ہلاک کریں گے۔سیدنا عیسیٰ علیہ السلام زمین میں چالیس سال رہیں گے ‘ پھر ان کی وفات ہو گی اور مسلمان ان کا جنازہ پڑہیں گے۔‘‘
نبی کریم ﷺنے فرمایا:
يَقْتُلُ ابْنُ مَرْيَمَ الدَّجَّالَ بِبَابِ لُدٍّ. (سنن الترمذي : 2224)
’’سیدنا عیسیٰ علیہ السلام دجال کو باب لد کے پاس قتل کریں گے۔‘‘
8۔ دجال بے اولاد و بانجھ ہوگا ۔
’’سیدنا ابوسعید خدری رضی اللہ عنہ بیان کرتے ہیں کہ ہم حج یا عمرہ کرنے کی غرض سے چلے اور ابن صائد ہمارے ساتھ تھا ہم ایک جگہ اترے تو لوگ منتشر ہوگئے میں اور وہ باقی رہ گئے اور مجھے اس سے سخت وحشت و خوف آیا جو اس کے بارے میں کہا جاتا تھا اور اس نے اپنا سامان لا کر میرے سامان کے ساتھ رکھ دیا تو میں نے کہا گرمی سخت ہے اگر تو اپنا سامان درخت کے نیچے رکھ دے ( تو بہتر ہے) پس اس نے ایسا ہی کیا پھر ہمیں کچھ بکریاں نظر پڑیں وہ گیا اور ایک (دودھ کا) بھرا ہوا پیالہ لے آیا اور کہنے لگا :اے ابوسعید !پیو میں نے کہا گرمی بہت سخت ہے اور دودھ بھی گرم ہے اور دودھ کے ناپسند کرنے کے سوائے اس کے ہاتھ سے بچنے کی اور کوئی بات نہ تھی یا کہا اس کے ہاتھ سے لینا ہی ناپسند تھا تو اس نے کہا :اے ابوسعید !میں نے ارادہ کیا ہے کہ ایک رسی لے کر درخت کے ساتھ لٹکاؤں پھر اپنا گلا گھونٹ لوں اس وجہ سے جو میرے بارے میں لوگ باتیں کرتے ہیں ۔اے ابوسعید !جن سے رسول اللہ ﷺ کی حدیث مخفی ہے (ان کی تو الگ بات ہے) اے انصار کی جماعت! تجھ پر تو پوشیدہ نہیں ہے کیا تو لوگوں میں سب سے زیادہ رسول اللہ کی حدیث کو جاننے والا نہیں حالانکہ رسول اللہ ﷺ نے فرمایا دجال کافر ہوگا اور میں مسلمان ہوں کیا رسول اللہ ﷺ نے نہیں فرمایا وہ بانجھ ہوگا کہ اس کی کوئی اولاد نہ ہوگی حالانکہ میں اپنی اولاد مدینہ میں چھوڑ کر آیا ہوں کیا رسول اللہ ﷺ نے نہیں فرمایا تھا کہ وہ مدینہ اور مکہ میں داخل نہ ہوگا حالانکہ میں مدینہ سے آرہا ہوں اور مکہ کا ارادہ ہے سیدنا ابوسعید خدری رضی اللہ عنہ نے کہا قریب تھا کہ میں اس کے عذر قبول کرلیتا پھر اس نے کہا اللہ کی قسم میں اسے پہچانتا ہوں اور اس کی جائے پیدائش سے بھی واقف ہوں اور یہ بھی معلوم ہے کہ وہ اس وقت کہاں ہے میں نے اس سے کہا تیرے لئے سارے دن کی ہلاکت و بربادی ہو۔
یہ چند دلائل سے معلومات ہوتا ہے کہ دجال اللہ تعالیٰ کے سامنے بے بس و لاچار ہوگا ۔
قسط نمبر : 7 وقال: {وَلَا تَقُولُوا ثَلاثَةٌ انتَهُوا}[النساء: 171]وقال: {وَلا تَقُولُوا لِمَنْ أَلْقَى إِلَيْكُمُ…
آٹھ مواقع جب ملائکہ آپ کے لیے دعا کرتے ہیں، ان مواقع کو کثرت سے…
قَالَ رَحِمَهُ اللهُ: شیخ الاسلام محمد بن عبدالوہاب رحمہ اللہ کہتے ہیں: بِسْمِ اللهِ الرَّحْمَنِ…
سچ ہے کہ مرد کے اوپر باہر کی ذمہ داریاں زیادہ ہوتی ہیں، لیکن بیوی…
1۔ تراویح کی وجہ تسمیہ لفظ «تراویح» عربی زبان زبان کا لفظ ہے اس کی…