ذو القعدہ حرام مہینوں میں سے پہلا مہینہ ہے : ذو القعدہ، ذوالحجہ اور محرم (لگاتار) پھر رجب۔
’’بے شک مہینوں کی گنتی، الله تعالیٰ کے نزدیک، بارہ مہینے ہیں،… ان میں سے چار حرمت والے ہیں۔‘‘
اس کو ذو القعدہ اس لیے کہا جاتا ہے کیونکہ لوگ اس مہینے میں جنگوں اور قتل وغارت سے بیٹھ رہتے تھے۔ اس لیے کہ یہ حرمت والا مہینہ تھا اور وہ اس میں سفر حج کے لیے سامان تیار کرتے تھے۔
زمانہ جاہلیت میں عرب اس حرمت والے مہینے کی تعظیم کرتے تھے، وہ اس مہینے میں نہ کسی سے لڑتے، نہ ہی کسی سے بدلہ لیتے، حتی کہ اگر کوئی اپنے باپ یا بھائی کے قاتل کو بھی دیکھ لیتا توبھی اس سے بدلہ نہ لیتا اور نہ ہی اسے دھتکارتا۔
الله تعالی نے حرمت والے مہینوں میں ایک دوسرے پر ظلم کرنے سے منع کیا ہے :
’’ان میں اپنی جانوں پر ظلم نہ کرو۔‘‘
پس ان مہینوں میں ظلم کرنا باقی مہینوں کی نسبت زیادہ گناہ کا باعث ہے اور ان کی حرمت کی شدت کی وجہ سے ان میں ظلم اور گناہ کرنا زیادہ بڑا کام ہے۔
امام قتادہ رحمہ اللہ کہتے ہیں کہ دوسرے مہینوں کی نسبت ان حرمت والے مہینوں میں ظلم بہت بڑا گناہ اور بوجھ ہے اگرچہ ظلم ہر حال میں بڑا گناہ ہے مگر الله تعالیٰ جس کام کے(گناہ) کو چاہے بڑھادے۔
حرمت والے مہینوں میں اپنی جان پر ظلم دو طرح سے ہوتاہے:
1۔ فرائض کو ترک کرنے سے، جیسےنماز اور اس طرح کے دیگر واجبات کو چھوڑ دینا۔
2۔ حرام کاموں کا ارتکاب کرنے سے ،جیسے بےحیائیوں کا ارتکاب کرنا، والدین کی نافرمانی کرنا، قطع رحمی کرنا اور دیگر حرام کام سرانجام دینا۔
ذو القعدہ حج کے مہینوں میں سےایک مہینہ ہے جن کے متعلق الله تعالیٰ نے فرمایا:
’’حج کے مہینے جانے پہچانے ہیں ۔‘‘
صحیح بخاری میں معلق روایت ہے: سیدناابن عمر رضی اللہ عنہما کہتے ہیں کہ اس سے مراد شوال، ذوالقعدہ اور ذوالحجہ کے پہلے دس دن ہیں ۔
ذو القعدہ میں عمرہ کرنا مسنون ہے، نبی کریمﷺ نےکل چار عمرے کیےاور وہ سب ذو القعدہ میں ہی کیے۔
شیخ ابن باز رحمہ الله کہتے ہیں کہ ذو القعدہ میں عمرہ کرنا سب مہینوں سے افضل ہے سوائے رمضان کے، بلکہ سلف صالحین کی ایک جماعت سے مروی ہے کہ وہ اس مہینے میں عمرے کو رمضان سے بھی افضل قرار دیتے ۔
امام ابن قیم رحمہ اللہ نے ذو القعدہ اور رمضان کے مابین عمرے کی فضیلت میں تردد کا اظہار کیا۔ وہ کہتے ہیں کہ ہم اس کے بارے میں الله تعالیٰ سے استخارہ کرتے ہیں کہ جو اس کے نزدیک افضل ہے اس کی طرف ہماری راہنمائی کردے ۔
ذو القعدہ میں روزہ رکھنا مستحب ہے جیسا کہ بعض سلف سے مروی ہے۔ لیکن اس مہینے میں روزے کی کوئی خاص فضیلت نہیں ہے۔
ذو القعدہ میں عظیم واقعات پیش آئے ہیں۔اسی مہینے میں الله تعالی نے سیدنا موسی علیہ السلام سے تیس راتوں کا وعدہ کیا جیسا کہ امام مجاہد، مسروق اورابن جریج رحمہم اللہ وغیرہ سے مروی ہے کہ بنو قریظہ کے ساتھ غزوہ بھی اسی مہینے میں ہوا۔
ذو القعدہ میں ہی سن 6 ہجری میں صلح حدیبیہ ہوئی جسے الله تعالی نے فتح مبین کا نام دیا :
’’بے شک ہم نے تمہیں فتح دی، ایک کھلی فتح۔‘‘
سیدناعمر رضی الله عنہ نے کہا اے الله کے رسول کیا یہ فتح ہے؟ آپ ﷺ نے فرمایا کہ ہاں ۔
ایک مسلمان حرمت والے مہینوں کی تعظیم کرتا ہے خاص طور پر ان میں الله کی حدود کا لحاظ رکھتا ہے، فرائض کی ادائیگی کرتا ہے، الله تعالیٰ کی اطاعت کی حرص رکھتا ہے اور حرام کاموں اور الله تعالیٰ کی ناراضگی کے کاموں کے ارتکاب سے بچتا ہےاور حدودسے تجاوز نہیں کرتا۔
امام ابن رجب حنبلی رحمہ اللہ کہتے ہیں کہ جس آدمی کو ان حرمت والے مہینوں میں نیک عمل کرنے کی ہمت ہو تو اسے چاہیے کہ وہ اپنی جان پر نافرمانیوں سے رک جانے کے ساتھ رحم کھائے۔
مثلا والدین کا اولاد پر ظلم ،شوہر و بیوی کا ایک دوسرے پر ظلم ، یتیم کا مال کھانا، چوری کرنا،رشوت لینا وغیرہ۔
حرمت والے مہینے شروع ہوچکے ہیں لہذا گناہوں اور نافرمانیوں سے توبہ کر لی جائے،مثلا :شرک، والدین کی نافرمانی، قطع رحمی، سود خوری، جھوٹ، غیبت، چغلی، حسد وغیرہ۔
یہ مہینے افضل زمانوں میں سے ہیں جن میں نیکیوں کا اجر کئی گنا بڑھ جانے کی امید ہوتی ہے، اس لیےان مہینوں سے فائدہ اٹھایا جائے اور الله تعالیٰ کی اطاعت کے کاموں میں آگے بڑھا جائے ۔
الله تعالیٰ ہم سب کو اس کی توفیق عطا فرمائے۔آمین۔
قسط نمبر : 7 وقال: {وَلَا تَقُولُوا ثَلاثَةٌ انتَهُوا}[النساء: 171]وقال: {وَلا تَقُولُوا لِمَنْ أَلْقَى إِلَيْكُمُ…
آٹھ مواقع جب ملائکہ آپ کے لیے دعا کرتے ہیں، ان مواقع کو کثرت سے…
قَالَ رَحِمَهُ اللهُ: شیخ الاسلام محمد بن عبدالوہاب رحمہ اللہ کہتے ہیں: بِسْمِ اللهِ الرَّحْمَنِ…
سچ ہے کہ مرد کے اوپر باہر کی ذمہ داریاں زیادہ ہوتی ہیں، لیکن بیوی…
1۔ تراویح کی وجہ تسمیہ لفظ «تراویح» عربی زبان زبان کا لفظ ہے اس کی…