’’ اے نبیﷺہم نے آپ کی طرف کتاب برحق نازل کی ہے لہٰذا آپ اپنی تابعداری کو خالص کرتے ہوئے صرف اللہ کی بندگی کریں۔‘‘
’’اے نبیﷺ انہیں بتلائیں کہ مجھے حکم دیا گیا ہے کہ میں اپنی تابعداری کو اللہ کے لیے خالص کر کے اُسی کی بندگی کروں۔‘‘
یہی حکم پہلے لوگوں کو دیا گیا تھا
’’اور انہیں اس بات کا حکم دیا گیا تھا کہ صرف ایک اللہ کی عبادت کرو اور اپنی تابعداری کو اسی کے لیے خالص کر کے بالکل یکسو ہو کر نماز قائم کرو اور زکوٰۃ دو یہی مستقل دین ہے۔‘‘
اخلاص کا لفظ خلوص سے نکلا ہے۔ جس کا معنٰی ہے کہ جو کام کیا جائے اس میں مکمل طور پر یکسوئی اور للہیت پائی جانی چاہیے، گویا کہ اس میں کسی حوالے اور اعتبار سے کسی کی شراکت کا تصور نہیں ہونا چاہیے۔ اس کے لیے قرآن مجید میں حنیف کا لفظ بھی بولا گیا ہے ، حنیف اور مخلص اسے کہا جاتا ہے کہ جس کی نیت اور عمل میں کوئی دوسرا شریک نہ ہو۔ شریعت کی زبان میں ایسا کام جو صرف اور صرف اللہ تعالیٰ کی رضا کے لیے کیا جائے، گویا کہ نمود و نمائش سے بچنے کا نام اخلاص ہے۔ قرآن مجید نے امت کے لیے اس کی اہمیت اور افادیت واضح کرنے کے لیے سیدنا ابراہیم علیہ السلام کو نمونہ (Model) کے طور پر پیش کیا ہے۔
’’تمہارے لیے ابراہیم علیہ السلام اور اس کے ساتھیوں میں بہترین نمونہ ہے۔‘‘(الممتحنة:۴)
’’فرما دیجیے کہ اللہ تعالیٰ نے سچ فرمایا بس تم سب یکسو ہو کر ملت ابراہیم کی پیروی کرو، وہ مشرک نہیں تھے۔‘‘
’’یقیناًابراہیم علیہ السلام ایک پیشوا تھا ، اللہ کا فرماں بردار ، صرف اللہ کا ہوجانے والا ، وہ مشرکوں سے نہ تھا ۔ ‘‘
انبیاء کرام علیہم السلام لوگوں کو اپنی زبان سے صرف اخلاص کا حکم نہیں دیا کرتے تھے بلکہ وہ ان کے لیے سراپا اخلاص ہوا کرتے تھے یہی وجہ ہے کہ وہ نبوت کے بھاری اور مشکل ترین کام پر کسی سے ایک دمڑی کے روا دار نہیں تھے۔
’’نبی کریمﷺاِن سے فرما دیں اگر میں نے تم سے کوئی اجر مانگا ہے تو وہ اپنے پاس رکھو۔ میرا صلہ تو اللہ تعالیٰ کے ذمہ ہے اور وہ ہر چیز پرنگران ہے۔ ‘‘
’’اس کتاب سے موسیٰ علیہ السلام کا تذکرہ فرمائیں وہ نہایت مخلص رسول اور نبی تھا۔‘‘
’’اور ہمارے بندے ابراہیم اور اسحاق اور یعقوب علیہم السلام کا ذکر فرمائیں جو بڑی قوتِ عمل رکھنے والے اور صاحبِ بصیرت تھے۔ ہم نے انہیں آخرت کی فکر رکھنے کی بنا پر خاص کر لیا ہے۔‘‘
حدیثِ مبارکہ میں اخلاص کے مفہوم کو بڑی آسان زبان میں یوں بیان کیا گیا ہے:
’’سیدنا عمر بن خطاب رضی اللہ عنہ بیان کرتے ہیں کہ اللہ کے رسول ﷺ نے فرمایا: تمام اعمال کا انحصار نیتوںپر ہے ،آدمی اپنی نیت کے مطابق ہی صلہ پائے گا۔ جس نے اللہ اور اس کے رسول کے لیے ہجرت کی اس کی ہجرت اللہ اور اس کے رسول کے لیے ہے، اور جس نے دنیا کے فائدے یا کسی عورت سے نکاح کرنے کے لیے ہجرت کی اس کی ہجرت اسی کے لیے ہو گی۔‘‘
’’سیدنا ابوہریرہ رضی اللہ عنہ بیان کرتے ہیں کہ اللہ کے رسولﷺ نے فرمایا: بلاشبہ اللہ تعالیٰ تمہارے جسموں اور شکل وصورت کو نہیں دیکھتا وہ تمہارے دلوں کو دیکھتا ہے ، یہ بیان کرتے ہوئے آپ نے اپنی انگلی سے اپنے سینے کی طرف اشارہ فرمایا۔ ‘‘
’’اے نبیﷺ ان سے فرمادیں کہ مجھے حکم دیا گیا ہے کہ میں اپنی تابعداری کو اللہ کے لیے خالص کر کے اُسی کی بندگی کروں، اور مجھے حکم دیا گیا ہے کہ میں سب سے پہلے تابعدار بنوں، انہیں بتلائیں کہ اگر میں اپنے رب کی نافرمانی کروں تو مجھے عظیم دن کے عذاب سے ڈر لگتا ہے۔ فرما دیں کہ میں تو اپنی اطاعت کو اللہ کے لیے خالص کر کے اس کی بندگی کروں گا۔ تم اس کے سوا جس جس کی بندگی کرنا چاہتے ہو کرتے رہو،فرما دیں کہ یقیناً وہ لوگ نقصان پانے والے ہیں کہ جنہوں نے قیامت کے دن اپنے آپ کو اور اپنے اہل وعیال کو نقصان میں ڈال دیا، اچھی طرح سُن لو کہ یہ بہت بڑا نقصان ہے۔‘‘
اے رسول ﷺآپ لوگوں پر واضح فرما دیں کہ میرے اللہ نے مجھے حکم دیا ہے کہ میں اس کی عبادت بلاشرکتِ غیرے اس طرح کروں جس طرح اس نے مجھے اپنی عبادت کرنے کا حکم دیا ہے ،حالا ت جیسے بھی ہوں مجھے حکم ہے کہ میں سب سے پہلے اپنے رب کا فرما نبردار بنوں اور اس کی توحید کا پرچار کرتا رہوں۔ اس کے ساتھ مجھے یہ بھی حکم ہوا ہے کہ میں برملا اعلان کروں کہ میں اپنے رب کی نافرمانی کرتے ہوئے قیامت کے عظیم دن سے ڈرتا ہوں یعنی اگر میں اپنے رب کی نافرمانی کروں تو میں بھی اس کے عذاب سے نہیں بچ سکتا۔ اس لیے مجھے باربار تاکید کی گئی ہے کہ میں کھلے الفاظ میں کہوں کہ میں صرف ایک ’’اللہ ‘‘کی عبادت کرتا رہوں گا۔
اخلاص کا دوسرا معنٰی کلمہ طیبہ ہے جس میں توحید کا اثبات اور شرک کی نفی کی گئی ہے اسی لیے سورۃ ’’قل ہو اللہ‘‘ کا نام سورۃ الاخلاص رکھا گیا ہے۔
’’سیدنا عثمان بن عفان رضی اللہ عنہ بیان کرتے ہیں کہ میں نے اللہ کے رسولﷺ کو فرماتے ہوئے سنا کہ مجھے ایسے کلمے کا علم ہے کہ جو بندہ اسے سچے دل کے ساتھ پڑھے گا، تو اس پر جہنم کی آگ حرام کر دی جائے گی، سیدنا عمر رضی اللہ عنہ نے سیدنا عثمان رضی اللہ عنہ سے کہا: میں آپ کو بتاؤں کہ وہ کون سا کلمہ ہے؟ وہ کلمہ اخلاص ہے جو اللہ تعالیٰ نے محمدﷺ اور ان کے اصحاب رضی اللہ عنہم پر لازم ٹھہرایا تھا، یہ وہی کلمہ تقویٰ ہے جو نبیﷺ نے اپنے چچا ابوطالب کی موت کے وقت اس کے سامنے پیش کیا تھا، اور یہ کلمہ اس بات کی شہادت دیتا ہے کہ اللہ کے سِوا کوئی عبادت کے لائق نہیں۔‘‘
’’سیدنا ابوہریرہ رضی اللہ عنہ بیان کرتے ہیں کہ انہوں نے اللہ کے رسولﷺ سے پوچھا کہ قیامت کے دن آپ ﷺکی شفاعت کن لوگوں کو حاصل ہو گی؟ فرمایا: ابوہریرہ رضی اللہ عنہ مجھے یقین تھا کہ تجھ سے پہلے اس بارے میں مجھ سے کوئی نہیں پوچھے گا۔ کیونکہ میں حدیث کے بارے میں آپ کی رغبت کو جانتا ہوں۔ سنو! قیامت کے دن میری شفاعت سے فیض یاب ہونے والا وہ شخص ہو گا، جو خلوص دل کے ساتھ ’’لَا اِلٰہَ اِلَّا اللّٰہُ ‘‘ پڑھنے والا ہو گا۔‘‘
’’سیدنا ابوہریرہ رضی اللہ عنہ بیان کرتے ہیں کہ میں نے سیدنا ابوبکر صدیق رضی اللہ عنہ کو منبر رسول پر یہ کہتے ہوئے سنا کہ گزشتہ سال اور آج کے دن نبیﷺ کو فرماتے ہوئے سنا تھا ، یہ کہہ کر ابوبکر صدیق رضی اللہ عنہ رو پڑے اور ان کی آنکھوں سے آنسو جاری ہو گئے، پھر تھوڑی دیر کے بعد فرمایا کہ میں نے آپﷺ کو ارشاد فرماتے ہوئے سنا کہ کلمہ اخلاص سے بڑھ کر تمہیں عافیت دینے والی کوئی بڑی چیز نہیں دی گئی، اس لئے اس کے ساتھ اللہ تعالیٰ سے عافیت مانگا کرو۔‘‘
اخلاص اس قدر ضروری ہے کہ آپ نے فوت ہونے والوں کے بارے میں ارشاد فرمایا:
’’سیدنا ابوہریرہ رضی اللہ عنہ بیان کرتے ہیں کہ میں نے اللہ کے رسولﷺ کو فرماتے ہوئے سنا: جب تم میت کے لیے نماز جنازہ پڑھو تو اس کے لیے خلوص دل سے دعا کیا کرو۔‘‘
’’عبداللہ بن عمر w نبی معظم ﷺسے بیان کرتے ہیںکہ آپ نے بتلایا کہ ایک دفعہ تین آدمی سفر کر رہے تھے کہ انہیں بادو باراں نے آلیا وہ اس طوفان سے بچنے کے لیے پہاڑ کی غار میں بیٹھ گئے۔ اچانک غار کے منہ پر پتھر آگرا۔ جس سے ان کا نکلنا مشکل ہوگیا۔انہوں نے آپس میں مشورہ کیا کہ ایسا نیک عمل یاد کرو کہ جو تم نے صرف اور صرف اللہ کی رضاکے لیے کیا ہو، تاکہ آج اس کا واسطہ دے کر اللہ تعالیٰ سے دعا کی جائے۔ شاید اس مصیبت سے اللہ تعالیٰ ہمیں نجات عطافرما دے۔ان میں سے ایک نے کہا : اے اللہ! تو جانتا ہے کہ میرے والدین بہت بوڑھے ہو چکے تھے اور میرے چھوٹے چھوٹے بچے تھے اور میں ان کی گزران کے لیے بکریاں چرایا کرتاتھا۔ جب میں شام کو واپس لوٹتا اور بکریوں کا دودھ دوہتا تو اپنے بچوں سے پہلے اپنے والدین کو دودھ پلایا کرتا تھا۔ ایک دن مجھے بکریوں کے لیے بڑی دور چارہ دستیاب ہوا۔ جس وجہ سے میں جلد گھر واپس نہ آسکا، یہاں تک کہ رات ہوگئی۔میںنے دیکھا کہ میرے والدین سو چکے ہیں۔ میں نے دودھ دوھیا اور دودھ کا برتن لے کر ان کے سرہانے کھڑا ہو گیا اور میں نے انہیں جگانا پسند نہ کیا اورمجھے یہ بھی پسند نہ تھا کہ اپنے والدین سے پہلے بچوں کو دودھ پلاؤں۔ جب کہ میرے بچے میرے قدموں میں بھوک کی وجہ سے بلک رہے تھے۔ میں اور میرے بچے طلوعِ فجر تک اسی حالت میں رہے۔ اے اللہ! توجانتاہے کہ اگر میں نے یہ کام صرف تیری رضا کے لیے کیاتھا تو، تُو ہمارے لیے اتنا رستہ کھول دے کہ ہم آسمان دیکھ سکیں۔ اللہ تعالیٰ نے ان کے لیے اتنا پتھر ہٹا دیا کہ انہیں آسمان نظر آنے لگا۔دوسرے شخص نے دعا کی‘ اے اللہ! مجھے اپنے چچاکی بیٹی کے ساتھ اس قدر محبت تھی کہ جتنی زیادہ سے زیادہ ایک مرد کسی عورت سے کرسکتا ہے۔ میں نے اس سے اپنی خواہش کا اظہار کیا۔اس نے کہا میں اس وقت تک نہیں مانوں گی کہ جب تک تو مجھے سودینار نہیں دے گا۔میں نے کوشش کر کے سودینار اکٹھے کیے اور دینار لے کر اس کے پاس گیا اور جب میں اس کے پاؤںمیں بیٹھ گیا۔ تو اس نے کہا: اللہ کے بندے! اللہ سے ڈر اور حلال کیے بغیر میری حیا کا پردہ چاک نہ کرو۔ میں اس سے اٹھ کھڑاہوا ۔اے اللہ! تو جانتاہے کہ اگر میں نے یہ برائی تیرے خوف سے چھوڑی تھی توہمارے لیے راستہ کھول دے۔نبیﷺ فرماتے ہیں کہ ان کے لیے تھوڑا سا رستہ اورکھل گیا۔تیسرے نے دعاکی ‘الٰہی! میں نے ایک مزدور کوایک فرق چاول تقریباً سوا چھ کلو کی مزدوری پر رکھا ۔ جب اس نے اپنا کام مکمل کرلیا تو اس نے اپنی مزدوری کا مطالبہ کیا تو میں نے اس کے سامنے اس کا حق پیش کیا لیکن اس نے اسے تھوڑا سمجھا اور وہ اسے چھوڑ کرچل دیا۔ میں ان چاولوں کو کاشت کرتا رہا ، یہاں تک کہ میں نے ان سے کچھ گائے خریدیں اورایک چرواہا رکھا۔ کچھ مدت کے بعد وہ شخص آیا اور اس نے کہاکہ اللہ سے ڈرو اورمجھ پر زیادتی نہ کرو اورمیرا حق مجھے دے دو۔میں نے اس سے کہاکہ یہ گائے اور ان کا چرواہا لے جاؤ۔اس نے کہا: اللہ سے ڈرو اورمیرے ساتھ مذاق نہ کرو۔ میں نے کہا میں تیرے ساتھ مذاق نہیں کررہا۔ یہ تیرا ہی مال ہے اس لیے ان بیلوں اور چرواہے کو لے جائو، وہ ان کو لے گیا۔ اے اللہ تو جانتا ہے کہ اگر میں نے یہ کام تیری رضا کے لیے کیا تھا تو ہمارے لیے غار کا باقی دہانہ بھی کھول دے اللہ تعالیٰ نے ان کا راستہ کھول دیا۔ ‘‘
ابھی عرض کیا ہے کہ عقیدۂ توحید کا دوسرا نام اخلاص ہے اور یہ ایسی سوچ اور فکر ہے کہ جس کی بنیاد پر بظاہر ایک چھوٹی سی نیکی انسان کے زندگی بھر کے اعمال پر بھاری ثابت ہوتی ہے اور انسان کی نجات کا ذریعہ بن جاتی ہے۔جس کے لیے اللہ کے رسولﷺ نے دو مسافروں کا واقعہ بیان فرمایا ہے:
’’سیدنا طارق بن شہاب رضی اللہ عنہ بیان کرتے ہیں کہ اللہ کے رسول ﷺ نے فرمایا: ایک آدمی مکھی کی وجہ سے جنت میں داخل ہو گیا اور دوسر امکھی کی وجہ سے جہنم میںچلا گیا۔صحابہ رضی اللہ عنہم نے عرض کی اللہ کے رسول !وہ کس طرح؟آپ نے فرمایا دو آدمی ایک بت پرست قو م کے پاس سے گزرے جو بتوں کے نام نذرانہ دیے بغیر گزرنے نہیں دیتے تھے۔ انہوں نے ان دونوں میں سے ایک کو کہا کہ کوئی نذرانہ پیش کرو۔ اس نے کہا میرے پاس نذرانے کے لیے کچھ نہیں۔ انہوں نے کہاکہ ایک مکھی ہی نذرانہ کر دو۔ اس نے مکھی پکڑی اور اس کا نذرانہ دے دیا۔ انہوں نے اس کا راستہ چھوڑ دیا۔ اس وجہ سے وہ جہنم میں داخل ہو ا ۔ انہوں نے دوسرے سے بھی نذرانہ دینے کے لیے کہا۔ اس نے جواب دیا کہ میں اللہ تعالیٰ کے سوا کسی کے لیے نذرانہ نہیں دوں گا۔ انہوں نے اس کی گردن اُڑا دی تو وہ جنت میں داخل ہو گیا۔‘‘
دونوں میں یہ فرق ہے کہ مشرک انتہائی مشکل کے وقت اللہ تعالیٰ کو اخلاص یعنی صرف اسے پکارتا ہے اور موحد ہر حال میں اللہ تعالیٰ کو پکارتا ہے۔
’’وہی ذات ہے جو تمھیں خشکی اور سمندر میں چلاتا ہے ، یہاں تک کہ جب تم کشتیوں میں ہوتے ہو اور وہ انھیں لے کرموافق ہوا کے ساتھ چل پڑتی ہیں اور وہ اس پر خوش ہوتے ہیں اور جب ان کشتیوں کے مخالف ہوا آجاتی ہے اور ان پر ہر طرف سے موجیں چھاجاتی ہیں اور وہ سمجھ لیتے ہیںکہ یقیناً انہیں گھیر لیا گیا ہے ، تو وہ اللہ کو اس طرح پکارتے ہیں کہ ہر قسم کی تابعداری اس کیلئے خاص کرنے والے ہوتے ہیں اور وہ کہتے ہیں کہ اگر تو نے ہمیں اس سے نجات دے دی تو ہم ضرور شکر کرنے والوں سے ہوں گے ۔‘‘
’’جو لوگ اللہ کی راہ میں اپنا مال خرچ کرتے ہیں، ان کی مثال اس دانے جیسی ہے جس میں سے سات بالیاں نکلیں اور ہر بالی میں سو (۱۰۰) دانے ہوں اور اللہ تعالیٰ جسے چاہتا ہے اسے بڑھا چڑھاکر دیتا ہے اور اللہ تعالیٰ بڑی وسعت والا، اور سب کچھ جاننے والا ہے۔ ‘‘
’’سیدنا ابوہریرہ رضی اللہ عنہ بیان کرتے ہیں اللہ کے رسولﷺنے فرمایا: جس نے اپنی پاک کمائی سے ایک کھجور کے برابر صدقہ کیاآپ نے مزید فرمایا کہ اللہ تعالیٰ صرف پاکیزہ چیز ہی قبول فرماتا ہے۔ یقیناً اسے اللہ تعالیٰ اپنے دائیں ہاتھ میں لیتے ہیں اور اسے صدقہ کرنے والے کے لیے بڑھاتے رہتے ہیں جس طرح تم میں سے کوئی اپنے بچھڑے کو پالتا ہے یہاں تک کہ اس کا کیا ہوا صدقہ پہاڑ کے برابر ہوجاتاہے۔‘‘
’’سیدنا انس رضی اللہ عنہ بیان کرتے ہیں عبدالرحمٰن بن عوف رضی اللہ عنہ ہجرت کر کے مدینہ آئے تو نبی اکرم ﷺ نے ان کے اور سعد بن ربیع انصاریw کے درمیان مواخات قائم کی،سعد رضی اللہ عنہ مال دار آدمی تھے انھوں نے عبدالرحمن بن عوف رضی اللہ عنہ سے کہا میں اپنے مال کو دو حصوں میں تقسیم کرتا ہوں آدھا مال میرا ہے اور آدھا آپ کا ہو گا، اور میں آپ کی شادی کا بھی انتظام کرتا ہوں۔ عبدالرحمن بن عوف رضی اللہ عنہ نے کہا: اللہ تعالیٰ تمہارے مال اور اہل میں برکت فرمائے۔ آپ مجھے مارکیٹ کے بارے میں معلومات دیں۔ اس کے بعد عبدالرحمن بن عوف رضی اللہ عنہ بازار جاتے اور وہاں سے گھی اور پنیر لا کر بیچتے، مدینہ میں ٹھہرے ہوئے ہمیں تھوڑے ہی دن گزرے تھے کہ عبدالرحمن رضی اللہ عنہ نبیﷺ کی خدمت میں حاضر ہوئے اور ان کے لباس پر زرد رنگ کے نشان تھے۔ نبی اکرمﷺنے اس سے پوچھا کہ یہ رنگ کیسا ہے ؟ عبدالرحمٰن رضی اللہ عنہ نے کہا : اللہ کے رسولﷺ! میں نے ایک انصاری عورت سے شادی کی ہے، پوچھا: کتنا مہر ادا کیا ہے؟ انہوں نے کہا گٹھلی کے برابر سونا یا اس سے تھوڑا سا کم ہو گا، رسول معظم ﷺ نے فرمایا:ولیمہ کرو خواہ ایک بکری ہی ذبح کرو۔‘‘
’’سیدنا اسلم رضی اللہ عنہ بیان کرتے ہیں کہ میں نے عمر بن خطاب رضی اللہ عنہ کو بیان کرتے ہوئے سنا کہ اللہ کے رسول ﷺ نے ایک دن ہمیں صدقہ کرنے کا حکم دیا۔ اس وقت میرے پاس بہت مال تھا، میں نے سوچا کہ اگر میں ابوبکر رضی اللہ عنہ سے سبقت لے جا سکتا ہوں تو وہ آج کا دن ہو گا، چنانچہ میں اپنا آدھا مال لے آیا۔ اللہ کے رسول ﷺنے پوچھا: اپنے گھر والوں کے لیے کیا چھوڑا ہے؟ میں نے کہا: آدھا مال چھوڑ کر آیا ہوں۔ پھر ابوبکرصدیق رضی اللہ عنہ اپنا مال لے کر آئے، تو ان سے اللہ کے رسولﷺ نے پوچھا: ”اپنے گھر والوں کے لیے کیا چھوڑ کر آئے ہو؟ انہوں نے کہا میں ان کے لیے اللہ اور اس کے رسول کو چھوڑ کر آیا ہوں۔سیدنا عمر رضی اللہ عنہ فرماتے ہیں کہ میں نے اپنے دل میں سوچا کہ میں ابوبکر رضی اللہ عنہ سے کبھی نہیں بڑھ سکتا ۔‘‘
’’سیدنا ابو مسعود انصاری رضی اللہ عنہ فرماتے ہیں کہ ہمیں صدقہ کرنے کا حکم دیا گیا۔ اس وقت ہم اپنے کندھوں پر بوجھ اٹھاکر مزدوری کیا کرتے تھے۔ ابو عقیل رضی اللہ عنہ اس مزدور ی سے آدھا صاع کھجور لے کر آئے تو منافقوں نے کہا کہ ابو عقیل کے صدقے کی اللہ کو کیا ضرورت تھی۔ (عبدالرحمن بن عوف رضی اللہ عنہ )بہت سامال لائے تو منافق کہنے لگے اس نے اتنا صدقہ ریاکاری کے لیے کیا ہے اس وقت یہ آیت نازل ہوئی ۔ ‘‘
’’جولوگ صدقات میں فراخ دلی سے حصہ لینے والے ایمانداروں پرطعن کرتے ہیں جو اپنی محنت کے سواکچھ اپنے پاس نہیں پاتے وہ لوگوں کو مذاق کرتے ہیں اللہ ان سے مذاق کرے گاان کے لیے دردناک عذاب ہے ۔‘‘
’’سیدنا ابو سعید خدری رضی اللہ عنہ بیان کرتے ہیں کہ اللہ کے رسول ﷺ نے فرمایا : تم میرے صحابہ کو گالی نہ دو، اس لیے کہ اگر تم میں سے کوئی احد پہاڑ کے برابر سونا خرچ کرے، تب بھی وہ صحابہ رضی اللہ عنہم کے ایک مد یا آدھے مد کے برابر ثواب نہیں پا سکتا۔‘‘
’’ان لوگوں پر کوئی گناہ نہیں اور کمزوروں ، نہ بیماروں اورنہ ان لوگوں پرجوخرچ کرنے کے لیے کوئی چیز نہیںپاتے جب کہ وہ اللہ اور اس کے رسول کے لیے مخلص ہیں نیکی کرنے والوں پر اعتراض کی کوئی گنجائش نہیں اور اللہ بخشنے والا نہایت مہربان ہے۔اور نہ ان لوگوں پر کوئی گناہ ہے جو آپ کے پاس آئے ہیں تاکہ آپ انہیں سواری دیں تو آپ نے فرمایا کہ میں اپنے پاس کوئی سواری نہیں پاتا کہ جس پر تمہیں سوار کروں یہ سُن کر وہ واپس ہوئے تو اس غم سے ان کی آنکھیں آنسوئوں سے بہہ رہی تھیں کہ وہ خرچ کرنے کے لیے کچھ نہیں پاتے۔‘‘
’’سیدنا جابر رضی اللہ عنہ بیان کرتے ہیں کہ ہم ایک غزوۂ میں رسول معظمﷺ کے ساتھ تھے، آپ نے فرمایا: بلاشبہ مدینہ میںکچھ ایسے لوگ ہیں جو اپنے گھروں میں بیٹھے ہونے کے باوجود جہاں تم نے قیام کیا وہ ہر جگہ تمھارے ساتھ تھے یا کسی وادی کو تم نے عبور کیا حالانکہ وہ اپنی بیماری کی وجہ سے مدینہ میں ٹھہرےہوئے ہیں۔ ‘‘
اس فرمان میں نبی ﷺ نے خلوص کی وجہ سے ان لوگوں کو غزوہ تبوک میں شریک تصور کیا ہے جوبیماری یا سواریاں نہ ہونے کی وجہ سے اس میں شریک نہ ہوسکے تھے بے شک وہ شریک ِسفر نہیں تھے لیکن ان کے اخلاص اور دعائیں مسلمانوں کے ساتھ تھیں ۔اس لیے آپ نے انہیں ثواب میں شریک فرمایا۔
(مخلص بندے غریبوں سے کہتے ہیں کہ ) ’’ہم تمہیں صرف اللہ کی خاطر کھلا رہے ہیں ہم تم سے نہ کوئی جزا چاہتے ہیں نہ شکریہ۔ ہمیں اپنے رب سے اس دن کے عذاب سے ڈر لگتا ہے جو بڑا مصیبت والا اور طویل دن ہو گا۔‘‘
پس اللہ انہیں اس دن کے شر سے بچا لے گا اور انہیں تازگی اور سرور عطا فرمائے گا اور انہیں صبر کے بدلے جنّت اور ریشم کا لباس پہنایا جائیگا۔
وہاں وہ اونچی مسندوں پر تکیے لگائے بیٹھے ہوں گے، نہ انہیں دھوپ کی گرمی ستائے گی نہ سردی کی ٹھنڈک۔ ان پر جنّت کی چھائیں سایہ فگن ہو گی ۔
اور جنت کے پھل ان کے قریب تر ہوں گے، ان کی خدمت میں چاندی کے برتن اور شیشے کے پیالے پیش کیے جارہے ہوں گے۔ شیشے بھی وہ جو چاندی کی قسم کے ہونگے اور ان کو ٹھیک اندازے سے بھرا ہو گا۔ وہاں انہیں شراب کے ایسے جام پلائے جائیں گے جس میں سونٹھ کی آمیزش ہو گی اور جنّت میں ایک چشمہ ہو گا جس کا نام سَلْسَبیل ہے۔
ان کی خدمت کے لیے ایسے لڑکے دوڑتے پھر رہے ہوں گے جو ہمیشہ ایک جیسے رہیں گے، تم انہیں دیکھو تو سمجھو کہ یہ تو موتی بکھیر دیے گئے ہیں۔ تم جدھر بھی نگاہ اٹھائو گے نعمتیں ہی نعمتیں اور ایک بڑی سلطنت دیکھو گے۔
اور انہیں کہا جائے گا یہ تمہاری جزا ہے اور تمہاری کوشش کی قدر افزائی ہو گی۔ (الدھر: ۹ تا ۲۲)
’’اے ایمان والو !اپنی خیرات کو احسان جتلا اور ایذا دے کر برباد نہ کرو، جس طرح وہ شخص جو اپنا مال لوگوں کے دکھاوے کے لیے خرچ کرتا ہے وہ اللہ تعالیٰ اور قیامت پر ایمان نہیں رکھتا۔ اس کی مثال اس صاف پتھر کی طرح ہے جس پر معمولی سی مٹی ہوپھر اس پر زور دار بارش برسے اور وہ اسے صاف کر دے، ایسے ریا کاروں کو اپنی کمائی سے کچھ حاصل نہیں ہوگااور اللہ تعالیٰ کافروں کو ہدایت نہیں دیتا ……کیا تم میں سے کوئی یہ چاہتا ہے کہ اس کا کھجوروں اور انگوروں کا باغ ہو جس میں نہریں بہتی ہوں اور اس میں ہرقسم کے پھل ہوں اور اس کے مالک کو بڑھاپا آچکا ہو، اس کے ننھے منھے بچے ہوں اور اچانک باغ کو آگ کا بگولا آلے جس سے باغ جل جائے۔ اسی طرح اللہ تعالیٰ تمہارے لیے آیات بیان کرتا ہے تاکہ تم غور و فکر کرو۔‘‘
’’سیدنا ابوہریرہ رضی اللہ عنہ بیان کرتے ہیں اللہ کے رسول ﷺنے فرمایا: جُبُّ الحزن سے اللہ کی پناہ مانگا کرو۔ صحابہ رضی اللہ عنہم نے عرض کی اللہ کے رسولﷺ جُبُّ الحزن کیا ہے ؟آپ نے فرمایا: یہ جہنم کی وہ وادی (Ward) ہے کہ جس سے جہنم ایک دن میں سو بار پناہ مانگتی ہے۔ ہم نے عرض کی: اللہ کے رسولﷺ اُس میں کون داخل کیے جائیں گے۔آپ نے فرمایا: قراء جو اپنے اعمال میں دکھلاوا کرتے ہیں۔ ‘‘
’سلیمان بن یسار کہتے ہیں کہ جب لوگ سیدنا ابوہریرہ رضی اللہ عنہ کی مجلس سے چلے گئے تو شام کے رہنے والے ایک آدمی نے ابوہریرہ رضی اللہ عنہ سے کہاکہ ہمیں وہ حدیث بیان کرو، جو آپ نے اللہ کے رسولﷺ سے سنی ہو۔ سیدنا ابوہریرہ رضی اللہ عنہ نے فرمایا: ہاں، میں نے اللہ کے رسولﷺ کو فرماتے ہوئے سنا کہ قیامت کے دن سب سے پہلے تین قسم کے لوگوں کا فیصلہ کیا جائے گا: 1 شہید کو لایا جائے گا، اللہ تعالی اسے اپنی نعمتیں یاد کروائے گا، اور وہ ان کا اقرار کرے گا۔ اللہ تعالی اس سے پوچھے گا: تو نے کیا عمل کیا وہ کہے گا: میں نے تیرے راستے میں جہاد کیا، یہاں تک کہ میں تیرے راستے میں شہید ہو گیا۔ اللہ تعالی فرمائے گا: تو جھوٹ بول رہا ہے، تو نے اس لئے جہاد کیا تھا تاکہ تجھے بہادر کہا جائے اور تجھے بہادر کہہ دیا گیا، حکم دیا جائے گا کہ اسے چہرے کے بل گھسیٹ کر جہنم میں پھینک دیا جائے گا۔ 2 علم سیکھنے، سکھلانے اور قرآن مجید پڑھنے والے کو لایا جائے گا، اللہ تعالی اسے اپنی نعمتوں کا تعارف کرائے گا، وہ اقرار کرے گا۔ اللہ تعالی فرمائے گا: تو نے کیا عمل کیا ہے؟ وہ کہے گا: میں نے آپ کی خاطر علم سیکھا اور سکھایا اور قرآن پڑھا اور پڑھایا، اللہ تعالی فرمائے گا: تو جھوٹ بول رہا ہے، اس سے تیرا مقصد یہ تھا کہ تجھے عالم کہا جائے اور تو قرآن اس لیے پڑھا کرتا تھا کہ تجھے قاری کہا جائے، سو تجھے تو کہا گیا تو اس کے بارے میں حکم ہو گا کہ اسے چہرے کے بل گھسیٹ کر جہنم میں ڈال دیا جائے گا۔ 3 پھر ایسے آدمی کو لایا جائے گا جسے اللہ تعالی نے خوشحال کیا اور اسے ہر قسم کا مال دیا، اللہ تعالی اسے اپنی نعمتوں کے بارے میں پوچھے گا، وہ ان کا اقرار کرے گا۔ اللہ تعالی فرمائے گا: تو نے اس بارے میں کیا عمل کیا ہے؟ وہ کہے گا: میں جہاں تجھے خرچ کرنا پسند تھا، میں نے اپنا مال تیرے لیے وہاں خرچ کیا۔ اللہ تعالی فرمائے گا: تو جھوٹ بول رہا ہے، تیرے خرچ کرنے کا مقصد یہ تھا کہ تجھے سخی کہا جائے اور تجھے سخی کہہ دیا گیا ہے۔ اس کے بارے میں بھی حکم ہو گا، کہ اسے چہرے کے بل گھسیٹ کر جہنم میں پھینک دیا جائے گا۔‘‘
قسط نمبر : 7 وقال: {وَلَا تَقُولُوا ثَلاثَةٌ انتَهُوا}[النساء: 171]وقال: {وَلا تَقُولُوا لِمَنْ أَلْقَى إِلَيْكُمُ…
آٹھ مواقع جب ملائکہ آپ کے لیے دعا کرتے ہیں، ان مواقع کو کثرت سے…
قَالَ رَحِمَهُ اللهُ: شیخ الاسلام محمد بن عبدالوہاب رحمہ اللہ کہتے ہیں: بِسْمِ اللهِ الرَّحْمَنِ…
سچ ہے کہ مرد کے اوپر باہر کی ذمہ داریاں زیادہ ہوتی ہیں، لیکن بیوی…
1۔ تراویح کی وجہ تسمیہ لفظ «تراویح» عربی زبان زبان کا لفظ ہے اس کی…