شاید کہ تیرے دل میں……

محترم قارئین ! مہنگائی ،معاشی بد حالی غیر ذمہ دارانہ رویے ، عمومی بے حسی، اسلامی اقدارو تعلیمات سے بیگانہ روی، سیاسی عدم استحکام ، اشرافیہ کی من مانیاں اپنے عروج پر ہیں ۔ مسائل کے انبار نے قوم کو ایسے دوراہے پر لا کھڑا کیا ہے جہاں قوم کی اکثریت مایوسی کا شکار اور زندگی سے بیزار ہو چکی ہے ۔ موجوہ حالات پر خون کے جتنے آنسو بہائے جائیں کم ہیں ، لیکن محض آنسو بہا کرخاموش تماشائی بن جانا مسائل کا حل نہیں ہے ان سب المیوں سے بڑھ کر آج کا سب سے بڑا المیہ آنے والے خطرات سے تجاہل عارفانہ ہے ۔بقول شاعر:

وائے ناکا می متائے کارواں جاتا رہا                                      کارواں کے دل سے احساس زیاں جاتا رہا

آئیے دیکھیںکہ ہمارے بگاڑ کے بنیادی اسباب کونسے ہیں ؟حالانکہ دین اسلام نے تو انسانیت کو ایسی ہدایات اور تعلیمات سکھائی ہیں جن پر عمل کرکے معاشرے کے افراد اپنے معاشرے کو مثالی اورآئیڈیل معاشرہ بنا سکتے ہیں کیونکہ حسنِ معاشرت اسلامی تعلیمات کا تخصص ہے ، اسلام نے ایک پر سکون معاشرہ تعمیر کرنے کا حکم دیا ہے جس میں دشمنیاں ،مخالفتیں اور شکر رنجیاں نہ ہوں بلکہ ہر طرف اخوت و محبت، اخلاص وایثار اور عفوودرگزر کا دور دورا ہو ، اسلام کے پیروکار سائبان الفت میں طمانیت کی زندگی گزاریں اور ’’رحماء بینہم‘‘ کی عملی تصویر بن جائیں۔انہی تعلیمات اسلامیہ میں سے سب سے بنیادی تعلیم اللہ کی زمین پر اس کے احکامات کی روشنی میں عدل وانصاف کا نفاذ ہے ۔ ہمارے معاشرے کے بگاڑ کا بنیادی سبب عدل انصاف کا فقدان اور ہر طرف ظلم وتعدی کا بڑھتا ہوا سیلاب ہے کیونکہ جن ممالک اور معاشروں میں انصاف کے تقاضے پورے نہیں کیے جاتے وہ بتدریج اپنی ترقی او خوشحالی کی دولت سے محرو م ہوتا چلا جاتا ہے اور وہاں کے عوام پریشانیوں اور مشکلات کا شکار رہتے ہیں۔

کامیاب اور قابل رشک معاشرے کی تشکیل کیلئے ہر سطح پر عدل کا نفاذ سب سے پہلی اور بنیادی ذمہ داری ہے جیسا کہ ارشاد رب العالمین ہے

{اِنَّ اللہَ یَأمُرُ بِا لعَدْلِ وَالاِحْسَانِ وَاِیْتَائِ ذِی الْقُرْبیٰ } (النحل: ۹۰)

’’بے شک اللہ تعالیٰ عدل واحسان او ررشتہ داروں کو کچھ دینے کا حکم دیتا ہے ‘‘

اور ایک دوسری جگہ پر ارشاد فرمایا:

{وَاِذَا قُلْتُمْ فَا عْدِلُوْا وَلَو کَانَ ذَا قُرْبیٰ } (الانعام: ۱۵۲)

’’او ر جب بات کرو تو انصاف کی کرو چاہے وہ رشتہ دار ہی کے(خلاف) کیوں نہ ہو‘‘

اسی طرح امام العادلین محمد رسول اللہ  ﷺ نے فرمایا: ’’عادل حکمران کو اللہ تعالیٰ قیامت کے دن اپنے عرش تلے جگہ عطا فرمائے گا۔‘‘

اور دوسری حدیث میں ارشاد فرمایا:

(اِنَّ الْمُقْسِطِیْنَ عِنْدَاللّٰہِ عَلَی مَنَابِرَمِنْ ُنوْرِعَنْ یَّمِیْنِ الرَّحْمٰنِ عَزَّوَجَلَّ وَکِلْتَا یَدَیْہِ الَّذِیْنَ یَعْدِلُوْنَ فِیْ حُکْمِہِمْ وَأَہْلِیْھِمْ وَمَا وَلَّوْا ) (صحیح مسلم ، کتاب الامارۃ ، حدیث نمبر :۳۴۰۶)

’’عدل کرنے والے اللہ رب العزت کے نزدیک نور کے منبروں پر ہونگے وہ جو اپنے فیصلہ جات ، اہل وعیال اور اپنی رعایا کے ساتھ عدل وانصاف کا فیصلہ کرتے ہیں‘‘

شیخ الاسلام ابن تیمیہ رحمہ اللہ اپنی تصنیف ’’السیاسۃ الشرعیۃ ‘‘ میں رقمطراز ہیں کہ اللہ تعالیٰ عدل کرنے والی حکومت کو قائم رکھتا ہے اگرچہ وہ کافر ہی کیوں نہ ہو جبکہ ظلم وجور والی حکومت کو پنپنے نہیں دیتا اگرچہ وہ اسلامی حکومت ہی کیوں نہ ہو‘‘

ملک عزیز میں طویل ترین جدوجہد اور تحریک کی بدولت عدلیہ آزاد ہوئی ہے لیکن حقیقت میں یہ آزادی اس وقت تصور کی جائیگی جب عدلیہ قرآن وسنت کے مطابق اپنے فیصلے کرے گی اور عوام الناس چیف جسٹس افتخار محمد چوہدری اور دیگر جج صاحبان سے توقع رکھتے ہیں کہ وہ سلطنت خداداد پاکستان کے عدالتی نظام میں دوررس اصلاحات کرتے ہوئے آسان ،سستا اور تیز ترین انصاف کی فراہمی کو یقینی بنائیں گے تاکہ آئندہ سے کوئی شخص حصول انصاف کے مدارج سے تنگ آکر انصاف خریدنے کیلئے سو چ بھی نہ سکے ۔  کیونکہ جس عوام کی جدوجہد کی بدولت ججز بحال ہوئے ہیں انصاف کے تقاضے پورے نہ ہوئے تو یہی عوام ان کو بے حال بھی کرسکتی ہے ۔

اندازِ بیاں اگرچہ شوخ تونہیں                  شاید کہ دِل میں اتر جائے میری بات