قیام اللیل کے ثمرات وبرکات

1۔ قیام اللیل غفلت سے بچاتا ہے

سیدنا عبداللہ بن عمرو بن العاص رضی اللہ عنہما سے روایت ہے کہ رسول اللہ  ﷺ  نے فرمایا:

مَنْ قَامَ بِعَشْرِ آيَاتٍ لَمْ يُكْتَبْ مِنَ الْغَافِلِينَ.

جو شخص دس آیتوں کی تلاوت کے ساتھ قیام اللیل کرے گا وہ غافلوں میں نہیں لکھا جائے گا۔(سنن ابی داود: 1398)

ایک روایت کے لفظ ہیں:

مَنْ قَرَأَ بِمِائَةِ آيَةٍ فِي لَيْلَةٍ لَمْ يُكْتَبْ مِنَ الْغَافِلِينَ.

جو شخص ایک سو آیتوں کی تلاوت کے ساتھ قیام اللیل کرے گا وہ غافلوں میں نہیں لکھا جائے گا۔  (الصحيحة: 643)

2۔ بندے کا نام ذاکرین میں لکھا جاتا ہے۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا:

إِذَا أَيْقَظَ الرَّجُلُ أَهْلَهُ مِنَ اللَّيْلِ فَصَلَّيَا أَوْ صَلَّى رَكْعَتَيْنِ جَمِيعًا كُتِبَا فِي الذَّاكِرِينَ وَالذَّاكِرَاتِ.

جب شوہر اپنی اہلیہ کو رات کے وقت جگاتا ہے اور وہ دونوں نماز پڑھتے یا دو رکعتیں ادا کرتے ہیں تو ان کا اندراج ذاکرین و ذاکرات میں ہوتا ہے ۔ (سنن ابی داود: 1309)

3۔ فرشتوں کی حاضری حاصل ہوتی ہے

سیدنا جابر بن عبداللہ رضی اللہ عنہ سے روایت ہے کہ رسول اللہ ﷺ نے فرمایا:

إذا قامَ أحدُكُمْ يصلِّي مِنَ الليلِ، فَلْيَسْتَكْ، فإنَّ أحدَكُمْ إذا قرأَ في صلاتِهِ، وضعَ مَلَكٌ فاهُ على فيهِ، ولا يخرجُ من فيهِ شيءٌ إلّا دخلَ فَمَ المَلَكِ.

جب تم میں سے کوئی رات کو قیام کرے تو مسواک کرلے کیونکہ جب تم میں سے کوئی ایک قیام اللیل میں قرآن کریم کی تلاوت کرتا ہے تو فرشتہ اپنا منہ اس کے منہ پر رکھ لیتا ہے اور اس کے منہ سے جو کچھ نکلتا ہے وہ فرشتے کے منہ میں داخل ہوتا ہے۔(صحيح الجامع: 720)

4۔ دعائیں قبول ہوتی ہیں

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا:

يَنْزِلُ رَبُّنَا تَبَارَكَ وَتَعَالَى كُلَّ لَيْلَةٍ إِلَى السَّمَاءِ الدُّنْيَا حِينَ يَبْقَى ثُلُثُ اللَّيْلِ الْآخِرُ، يَقُولُ : مَنْ يَدْعُونِي فَأَسْتَجِيبَ لَهُ مَنْ يَسْأَلُنِي فَأُعْطِيَهُ مَنْ يَسْتَغْفِرُنِي فَأَغْفِرَ لَهُ

 بلند اور برکتوں والا ہمارا پروردگار  ہر رات کو اس وقت آسمان دنیا پر آتا ہے جب رات کا آخری تہائی حصہ رہ جاتا ہے ۔ وہ کہتا ہے: کوئی مجھ سے دعا کرنے والا ہے کہ میں اس کی دعا کو قبول کروں، کوئی مجھ سے مانگنے والا ہے کہ میں اسے عطا کروں کوئی مجھ سے بخشش طلب کرنے والا ہے کہ میں اسے بخش دوں ۔(صحیح بخاری: 1145)

5۔ اللہ تہجد گذار بندے پر فخر کرتا ہے

سیدنا عبد اللہ بن مسعود  ‌رضی ‌اللہ ‌عنہ سے روایت ہے کہ نبی کریم ﷺ نے فرمایا:

ہمارا رب دو آدمیوں پر فخر کرتا ہے، ایک وہ آدمی جو اپنے بچھونے، لحاف، بیوی اور قبیلے کے درمیان سے اٹھ کھڑا ہو کر نماز پڑھتا ہے، اللہ تعالی کہتا ہے:

یَا مَلَائِکَتِی انْظُرُوْا إِلٰی عَبْدِی ثَارَ مِنْ فِرَاشِهِ وَوِطَائِهِ وَمِنْ بَیْنِ حَیِّهِ وَأَهْلِهِ إِلٰی صَلَاتِهِ، رَغْبَةً فِیمَا عِنْدِی، وَشَفَقَةً مِمَّا عِنْدِی.

اے فرشتو! میرے اس بندے کی طرف دیکھو، وہ نماز کے لیے اپنے بستر، بچھونے، قبیلے اور بیوی کے پاس سے کھڑا ہو گیا ہے، اس چیز کی رغبت کے لیے جو میرے پاس ہے اور اس چیز سے ڈرتے ہوئے جو میرے پاس ہے اور دوسرا وہ آدمی جس نے اللہ تعالی کے راستے میں جہاد کیا، ہوا یوں کہ اس کا لشکر شکست کھا گیا، لیکن جب اسے یہ معلوم ہوا کہ بھاگ جانے میں کتنا گناہ ہے اور دشمن کی طرف لوٹ جانے میں کتنا ثواب ہے تو وہ دشمن کی طرف پلٹ پڑا، یہاں تک کہ اس کا خون بہا دیا گیا، اس کا یہ قدم اس چیز کی رغبت کے لیے تھا، جو میرے پاس ہے اور اس چیز سے بچنے کے لیے تھا، جو میرے پاس ہے، پس اللہ تعالیٰ اپنے فرشتوں سے کہتا ہے:

انْظُرُوْا إِلَی عَبْدِی، رَجَعَ رَغْبَةً فِیمَا عِنْدِی، وَرَهْبَةً مِمَّا عِنْدِی، حَتَّی أُهَرِیقَ دَمُهُ.

 میرے بندے کی طرف دیکھو، وہ میرے انعامات کی رغبت کی بنا پر اور میرے عذاب سے ڈرتے ہوئے لوٹ آیا، یہاں تک کہ اس کا خون بہادیا گیا۔(مسند احمد: 4816)

6۔ اجر عظیم حاصل ہوتا ہے

اللہ رب العالمین کا فرمان ہے:

تَتَجَافٰى جُنُوْبُهُمْ عَنِ الْمَضَاجِعِ يَدْعُوْنَ رَبَّهُمْ خَوْفًا وَّ طَمَعًا١ٞ وَّ مِمَّا رَزَقْنٰهُمْ يُنْفِقُوْنَ۰۰۱۶فَلَا تَعْلَمُ نَفْسٌ مَّاۤ اُخْفِيَ لَهُمْ مِّنْ قُرَّةِ اَعْيُنٍ١ۚ جَزَآءًۢ بِمَا كَانُوْا يَعْمَلُوْنَ

ان کے پہلو (رات کے وقت) اپنے بستروں سے جدا ہوتے ہیں وہ اپنے پروردگار کو ڈر اور امید کے ساتھ پکار رہے ہوتے ہیں اور ہم نے ان کو جو رزق دیا ہے، وہ اس میں سے خرچ کرتے ہیں۔چنانچہ کسی نفس کو کچھ پتہ نہیں ہے کہ ایسے لوگوں کے لیے آنکھوں کی ٹھنڈک کا کیا سامان ان کے اعمال کے بدلے میں چھپا کر رکھا گیا ہے۔( السجدة: 17،16)

7۔ مغفرت حاصل ہوتی ہے

سیدنا ابو امامہ رضی اللہ عنہ سے روایت ہے کہ رسول اللہ ﷺنے فرمایا:

عَلَيْكُمْ بِقِيَامِ اللَّيْلِ ؛ فَإِنَّهُ دَأَبُ الصَّالِحِينَ قَبْلَكُمْ، وَهُوَ قُرْبَةٌ إِلَى رَبِّكُمْ، وَمَكْفَرَةٌ لِلسَّيِّئَاتِ، وَمَنْهَاةٌ لِلْإِثْمِ.

قیام اللیل کیا کرو یہ صالحین کا طریقہ ہے اس میں تمہارے رب کی قربت ہے اور یہ گناہوں کو مٹانے والا اور برایوں سے روکتا ہے۔(سنن ترمذى: 3549)

8۔ قیامت کے دن کا وقوف آسان ہوتا ہے

سیدنا عبداللہ بن عباس رضی اللہ عنہما فرماتے ہیں:

مَنْ أَحَبَّ أَنْ يُهَوِّنَ اللهُ عَلَيْهِ الْوُقُوفَ يَوْمَ الْقِيَامَةِ، فَلْيَرَهُ اللهُ فِي ظُلْمَةِ اللَّيْلِ سَاجِدًا وَقَائِمًا يَحْذَرُ الْآخِرَةَ، وَيَرْجُو رَحْمَةَ رَبِّهِ

جو شخص یہ چاہتا ہے کہ قیامت کے دن اس کا کھڑا ہونا آسان ہو پس اللہ اسے رات کے اندھیروں میں سجدے اور قیام کی حالت میں دیکھے آخرت سے ڈرتے ہوئے اور اپنے رب کی رحمت کا امید رکھتے ہوئے۔ (تفسير القرطبي: 239/15)

امام اوزاعی رحمہ اللہ فرماتے ہیں:

مَنْ أَطَالَ الْقِيَامَ فِي صَلَاةِ اللَّيْلِ هَوَّنَ اللهُ عَلَيْهِ طُولَ الْقِيَامِ يَوْمَ القيامة

جو بندہ قیام اللیل میں طویل قیام کرے گا اللہ قیامت کے دن اس کا کھڑا ہونا آسان کر دے گا۔ (البدایة والنهاية: 125/10)

9۔ جنت حاصل ہوتی ہے

سیدنا معاذ بن جبل رضی اللہ عنہ فرماتے ہیں: ایک دن میں رسول اللہ ﷺ کے ساتھ سفر پر تھا ایک دن چلتے ہوئے جب میں آپ کے قریب ہوا تو عرض کیا: اے اللہ کے نبی! مجھے کوئی ایسا عمل بتائیں جو مجھے جنت کے قریب اور جہنم سے دور کردے۔ آپ ﷺنے فرمایا: تونے بہت بڑا سوال کیا ہے لیکن اس کے لیے یہ آسان ہے جس کے لیے اللہ آسان کردے۔

تَعْبُدُ اللهَ وَلَا تُشْرِكُ بِهِ شَيْئًا، وَتُقِيمُ الصَّلَاةَ، وَتُؤْتِي الزَّكَاةَ، وَتَصُومُ رَمَضَانَ، وَتَحُجُّ الْبَيْتَ. ثُمَّ قَالَ : أَلَا أَدُلُّكَ عَلَى أَبْوَابِ الْخَيْرِ ؟ الصَّوْمُ جُنَّةٌ ، وَالصَّدَقَةُ تُطْفِئُ الْخَطِيئَةَ، وَصَلَاةُ الرَّجُلِ فِي جَوْفِ اللَّيْلِ

 اللہ کی عبادت کر اس کے ساتھ کسی کو شریک نہ کر، نماز قائم کر، زکوات ادا کر، رمضان کے روزے رکھ، بیت اللہ کا حج ادا کر، اور صدقہ گناہوں کو مٹا دیتا ہے اور آدمی کا رات کو نماز ادا کرنا۔(مسند احمد: 22016)

10۔ جنت میں گھر عطا ہوتا ہے

سیدنا علی رضی اللہ عنہ سے روایت ہے کہ نبی کریم ﷺ نے فرمایا:

إِنَّ فِي الْجَنَّةِ غُرَفًا تُرَى ظُهُورُهَا مِنْ بُطُونِهَا، ‏‏‏‏‏‏وَبُطُونُهَا مِنْ ظُهُورِهَا، ‏‏‏‏‏‏فَقَامَ أَعْرَابِيٌّ، ‏‏‏‏‏‏فَقَالَ:‏‏‏‏ لِمَنْ هِيَ يَا رَسُولَ اللهِ ؟ قَالَ:‏‏‏‏ لِمَنْ أَطَابَ الْكَلَامَ، ‏‏‏‏‏‏وَأَطْعَمَ الطَّعَامَ، ‏‏‏‏‏‏وَأَدَامَ الصِّيَامَ، ‏‏‏‏‏‏وَصَلَّى لِلَّهِ بِاللَّيْلِ وَالنَّاسُ نِيَامٌ.

جنت میں ایسے بالاخانے ہیں جن کا بیرونی حصہ اندر سے اور اندرونی حصہ باہر سے نظر آئے گا،  یہ سن کر ایک اعرابی نے کھڑے ہو کر عرض کیا: اے اللہ کے رسول! وہ کس کے لیے ہیں؟ آپ نے فرمایا: جو اچھی بات کرے، کھانا کھلائے، خوب روزہ رکھے اور اللہ کی رضا کے لیے رات میں نماز پڑھے جب کہ لوگ سوئے ہوئے ہوں۔ (سنن ترمذی: 1984)

11۔ انشراح صدر ہوتا ہے

سیدنا ابوہریرہ رضی اللہ عنہ سے روایت ہے کہ رسول اللہ ﷺنے فرمایا:

يَعْقِدُ الشَّيْطَانُ عَلَى قَافِيَةِ رَأْسِ أَحَدِكُمْ ، إِذَا هُوَ نَامَ ثَلَاثَ عُقَدٍ يَضْرِبُ كُلَّ عُقْدَةٍ عَلَيْكَ لَيْلٌ طَوِيلٌ فَارْقُدْ ، فَإِنِ اسْتَيْقَظَ فَذَكَرَ اللهَ انْحَلَّتْ عُقْدَةٌ ، فَإِنْ تَوَضَّأَ انْحَلَّتْ عُقْدَةٌ ، فَإِنْ صَلَّى انْحَلَّتْ عُقْدَةٌ ، فَأَصْبَحَ نَشِيطًا طَيِّبَ النَّفْسِ وَإِلَّا أَصْبَحَ خَبِيثَ النَّفْسِ كَسْلَانَ.

شیطان آدمی کے سر کے پیچھے رات میں سوتے وقت تین گرہیں لگا دیتا ہے اور ہر گرہ پر یہ افسوں پھونک دیتا ہے کہ سو جا ابھی رات بہت باقی ہے پھر اگر کوئی بیدار ہو کر اللہ کو یاد کرنے لگتا ہے تو ایک گرہ کھل جاتی ہے پھر جب وضو کرتا ہے تو دوسری گرہ کھل جاتی ہے ۔ پھر اگر نماز پڑھتا ہے تو تیسری گرہ بھی کھل جاتی ہے ۔ اس طرح صبح کے وقت آدمی چاق و چوبند خوش مزاج رہتا ہے ۔ ورنہ سست اور بدباطن رہتا ہے ۔ (صحیح بخاری: 1142)

12۔ اللہ کی قربت ملتی ہے

سیدنا ابوامامہ رضی اللہ عنہ سے روایت ہے کہ نبی کریم ﷺ نے فرمایا:

أَقْرَبُ مَا يَكُونُ الرَّبُّ مِنَ الْعَبْدِ فِي جَوْفِ اللَّيْلِ الْآخِرِ، ‏‏‏‏‏‏فَإِنِ اسْتَطَعْتَ أَنْ تَكُونَ مِمَّنْ يَذْكُرُ اللهَ فِي تِلْكَ السَّاعَةِ فَكُنْ

 رات کے آخری نصف حصے میں اللہ رب العالمین اپنے بندے کے بہت قریب ہوتا ہے، اگر تم ان لوگوں میں سے ہو سکو جو رات کے اس حصے میں اللہ کا ذکر کرتے ہیں تو تم بھی ان میں سے ہو جاؤ۔ (سنن ترمذی: 3579)

13۔ قیام اللیل کی شفاعت حاصل ہوتی ہے

سيدنا ابن عمرو رضی اللہ عنہما سے روایت ہے کہ رسول اللہ ﷺنے فرمایا:

الصِّيامُ والقرآنُ يَشْفَعانِ للعبدِ، يقولُ الصِّيامُ: ربِّ إنِّي مَنَعْتُهُ الطَّعامَ والشَّرابَ بِالنَّهارِ؛ فَشَفِّعْنِي فيهِ، ويقولُ القُرْآن: ربِّ مَنَعْتُهُ النَّوْمَ بِالليلِ، فَشَفِّعْنِي فيهِ، فيشَفَّعانِ.

روزہ اور قرآن قیامت کے دن شفاعت کریں گے روزہ کہے گا: اے اللہ میں نے اسے دن کو کھانے پینے سے روکے رکھا پس تو اس کے حق میں میری شفاعت قبول فرما۔ قرآن کہے گا: میں نے رات کو اسے نیند سے روکے رکھا پس تو اس کے حق میں میری شفاعت قبول فرما اور ان دونوں کی شفاعت قبول کی جائے گی۔ (صحيح الترغيب والترھیب: 984)

14۔اللہ کی رحمت حاصل ہوتی ہے

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا:

رَحِمَ اللهُ رَجُلًا قَامَ مِنَ اللَّيْلِ فَصَلَّى وَأَيْقَظَ امْرَأَتَهُ.

‏‏اللہ اس بندے پر رحم فرمائے جو رات کو اٹھ کر نماز پڑھتا ہے اور اپنی بیوی کو بھی جگاتا ہے۔ (سنن ابی داود: 1308)

15۔جسمانی بیماریوں سے دفاع ملتا ہے

سیدنا بلال رضی اللہ عنہ سے روایت ہے کہ رسول اللہ ﷺ نے فرمایا:

عَلَيْكُمْ بِقِيَامِ اللَّيْلِ فَإِنَّهُ ۔۔۔۔۔۔ مَطْرَدَةٌ لِلدَّاءِ عَنِ الجَسَدِ.

قیام اللیل کیا کرو یہ جسمانی بیماریوں سے دفاع کرتا ہے۔ (صحیح الجامع: 4079)

16۔مؤمن کو شرف حاصل ہوتا ہے

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا:

شَرَفُ الْمُؤْمنِ صَلَاتهُ بِاللَّيْل ، وعِزُّه اسْتِغْنَاؤُهُ عَمَّا في أَيْدِي النَّاس.

مومن كا شرف رات كو نماز پڑھنے میں ہے، اور اس كی عزت اس چیز سے غنی ہوجانے میں ہے جو لوگوں کے ہاتھ میں ہے۔(الصحیحة: 1903)

17۔ قیام اللیل برائی سے بچاتا ہے

سیدنا ابوہریرہ رضی اللہ عنہ سے روایت ہے:

إِنَّ فُلَانًا يُصَلِّي بِاللَّيْلِ، فَإِذَا أَصْبَحَ سَرَقَ، قَالَ : إِنَّهُ سَيَنْهَاهُ مَا تَقُولُ.

ایک شخص رسول اللہ ﷺ کے پاس آئے اور کہا: فلاں شخص رات کو قیام کرتا ہے اور دن کو چوری کرتا ہے آپ ﷺ نے فرمایا: عنقریب رات کا قیام اسے اس عمل سے روک دے گا جو تو بیان کر رہا ہے۔ (مسند احمد: 9778)

18۔قیلولہ کا حصول ہوتا ہے

جو شخص قیام اللیل کرے گا اسے ضرور قیلولہ کی ضرورت پیش آئے گی اور قیام اللیل کی برکت سے قیلولہ کی سنت پر بھی عمل ہوگا رسول اللہ ﷺکا فرمان ہے:

قِيلُوا، فإنَّ الشياطينَ لا تَقيلُ.

قیلولہ کیا کرو بیشک شیاطین قیلولہ نہیں کرتا۔ (الصحیحة: 1647)

19۔ عبادت کی لذت حاصل ہوتی ہے

ابن المنکدر رحمہ اللہ فرماتے ہیں:

ما بقي من لذَّاتِ الدُّنيا إلا ثلاثٌ: قيامُ الليلِ، ولقاءُ الأخوانِ، والصلاةُ في جماعةٍ

دنیا کی لذت صرف تین چیزوں میں باقی جاکے بچی ہے: قیام اللیل میں، دوستوں سے ملاقات کرنے میں، اور جماعت سے نماز پڑھنے میں۔

(الأبانة عن أسباب الإعانة: 22/1)

سلف صالحین کو قیام اللیل میں بہت زیادہ لذت حاصل ہوتی تھی۔ علی بن بکار رحمہ اللہ فرماتے ہیں:

منذ أربعين سنة ما أحزنني إلا طلوع الفجر.

گزشتہ چالیس سالوں سے مجھے کسی چیز نے اتنا غمگین نہیں کیا جتنا سورج طلوع ہونے نے کیا۔ (یعنی سورج طلوع ہونے سے میرے قیام اللیل کا وقت ختم ہو جاتا ہے۔)(أحياء علوم الدين:/5 248)

فضيل بن عياض رحمہ اللہ فرماتے ہیں:

إذا غربت الشمس فرحت بالظلام لخلوتي بربى وإذا طلعت حزنت لدخول الناس على .

جب سورج غروب ہوتا ہے تو میں اندھیرے میں اپنے رب سے خلوت اختیار کرنے کی وجہ سے خوش ہوتا ہوں اور جب سورج طلوع ہوتا ہے تو لوگوں کے داخل ہونے سے غمگین ہو جاتا ہوں۔(أحياء علوم الدين:/5 248)

20۔ قیام اللیل چہروں کو تازگی بخشتا ہے

امام نصر مروزی رحمہ اللہ نقل کرتے ہیں:

وَقِيلَ لِلْحَسَنِ رَحِمَهُ اللهُ: مَا بَالُ الْمُتَهَجِّدِينَ مِنْ أَحْسَنِ النَّاسِ وُجُوهًا؟ قَالَ: لأَنَّهُمْ خَلَوْا بِالرَّحْمَنِ فَأَلْبَسَهُمْ مِنْ نُورِهِ نُورًا

حسن بصری رحمہ اللہ سے کہا گیا: عبادت گزاروں کے چہرے پورے دنیا سے زیادہ خوبصورت ہونے کی کیا وجہ ہے؟ تو آپ رحمہ اللہ فرمایا: کیونکہ انہوں نے رحمان کی عبادت کے لیے خلوت اختیار کی اس نے ان کے چہروں کو اپنے نور سے منور کردیا ہے۔(مختصر قیام اللیل: 58/1)

21۔ قیام اللیل فتنوں سے بچاتا ہے

سیدہ ام سلمہ رضی اللہ عنہا سے مروی ہے کہ:

سُبْحَانَ اللهِ ، مَاذَا أُنْزِلَ اللَّيْلَةَ مِنَ الْفِتَنِ ، وَمَاذَا فُتِحَ مِنَ الْخَزَائِنِ ، أَيْقِظُوا صَوَاحِبَاتِ الْحُجَرِ ، فَرُبَّ كَاسِيَةٍ فِي الدُّنْيَا عَارِيَةٍ فِي الْآخِرَةِ.

ایک رات نبی کریم ﷺ نے بیدار ہوتے ہی فرمایا: سبحان اللہ ! آج کی رات کس قدر فتنے اتارے گئے ہیں اور کتنے ہی خزانے کھول دیے گئے ہیں ۔ ان حجرہ والیوں کو بیدار کرو۔(صحیح بخاری: 115)

قیام اللیل میں مصروف شخص ضرور ان فتنوں سے محفوظ رہے گا جو رات کے وقت اتارے جاتے ہیں۔