وہ ذات قسم اٹھارہی ہے جس کے سوا کسی اور کی قسم اٹھانا جائز نہیں۔ اور قسم اٹھانے کی ضرورت نہ تھی کیونکہ ’’وَمَنْ اَصْدَقُ مِنَ اللّٰہِ حَدِیْثاً ‘‘ (النساء :۸۷) اللہ سے زیادہ سچی بات کس کی ہوسکتی ہے۔
فرمایا: تمام بنی نوعِ انسان خسارے میں ہے مگر چار صفات کے حامل لوگ اس سے مستثنی ہیں۔ صاحبِ ایمان و صاحبِ عمل اور اہلِ حق واہلِ صبر۔
امام شافعی رحمہ اللہ فرماتے ہیں :
’’اللہ تعالیٰ کوئی اور سورت نازل نہ بھی فرماتے تو لوگوں پر حجت قائم کرنے کیلئے یہی ایک سورت کافی تھی۔‘‘
یہ سورت مختصر مگر جامع کلام کا بے نظیر نمونہ ہے ۔ چند الفاظ میں ایک جہاں معنی پنہاں ہے ، گویا محاورے کی زباں میں دریا کو کوزے میں بند کرنا۔
اصحابِ رسول ﷺ جب آپس میں ملتے تو ایک دوسرے کو سورئہ عصرضرور سناتے۔
زندگی برف کی طرح پگھل رہی ہے ۔انسان جن کاموں میں بھی اپنی مہلتِ عمر کو صرف کررہاہے وہ سب کے سب خسارے کے سودے ہیں۔ نفع میں صرف وہ لوگ ہیں جو ان چار صفات سے متصف ہوکر زندگی گزاریں ۔
اس کی مثال زہر کی ہے۔ زہر انسان کیلئے مہلک ہے ۔ زہر کی مہلک خاصیت اپنی جگہ اٹل ہے۔ اس سے کوئی فرق نہیں پڑتا کہ ایک شخص نے اس کو کھایا یا ایک قوم نے اسے کھانے کا فیصلہ کرلیا ہے یا دنیا بھر کے انسانوں کااجماع اس پر ہوگیا ہے کہ زہر کھانا چاہیے۔ ٹھیک اسی طرح یہ بات اپنی جگہ اٹل ہے کہ چار مذکورہ بالاصفات سے خالی ہونا انسان کیلئے خسارے کاموجب ہے۔اس قاعدہ کلیہ میں ، اس بات سے فرق نہیں پڑتا کہ کوئی ایک شخص یا کسی قوم، یا دنیا بھر کے انسانوں نے کفر و بدعملی ، اور ایک دوسرے کو باطل کی ترغیب دینے اور بندگئ نفس کی تلقین کرنے پر اتفاق کرلیاہے۔
قرآن ، خسران کو اپنی خاص اصطلاح بنا کر فلاح کے مقابلے میں استعمال کرتاہے۔ قرآن کا تصور ِ فلاح محض دنیوی خوشحالی کا ہم معنی نہیں بلکہ دنیا سے لیکر آخرت تک انسان کی حقیقی کامیابی پر حاوی ہے ، اسی طرح قرآن کا تصورِ خسران بھی محض دنیوی ناکامی یا خستہ حالی کاہم معنی نہیں بلکہ دنیا سے لیکر آخرت تک انسان کی حقیقی ناکامی ونامرادی پر حاوی ہے۔
جب قرآن پورے زور اور قطعیت کے ساتھ کہتاہے کہ :{ إِنَّ الْإِنسَانَ لَفِی خُسْرٍ } ’’درحقیقت انسان بڑے خسارے میںہے۔‘‘ تو اس کا مطلب دنیا اور آخرت دونوں کا خسارہ ہے اور جب وہ کہتاہے کہ اس خسارے سے صرف وہ لوگ بچے ہوئے ہیں جن کے اندر حسب ذیل چار صفتیں پائی جاتی ہیں تو اس کا مطلب دونوں جہانوں میں خسارے سے بچنا اور فلاح پاناہے۔
ابدی کامیابی کی شرطِ اوّل ایمان ہے ۔ ایمان کیا ہے؟
’’زبان سے اقرار ، دل سے تصدیق اور اعضاء وجوارح سے اعمالِ خیر کا صدور۔‘‘
سیدناعمر بن الخطاب رضی اللہ عنہ فرماتے ہیں : بَیْنَمَا نَحْنُ جُلُوْسٌ عِنْدَ النَّبِیِّ ﷺ اصحابِ رسول مجلسِ رسول میں تشریف فرما تھے۔ ’’اِذْ طَلَعَ عَلَیْنَا رَجُلٌ ‘‘ اچانک ایک شخض نمودار ہوا ۔ ’’شَدِیْدُ بَیَاضِ الثِّیَابِ ‘‘ انتہائی سفید لباس زیب تن کیے ہوئے۔ شَدِیْدُ سَوَادِ الشَّعْرِ‘‘گہرے سیاہ بالوں والا۔ ’’لاَ یُرَی عَلَیْہِ أَثَرُ السَّفَرِ ۔ نہ تو مسافر دکھائی دیتا تھا کیونکہ کوئی آثارِ سفر نہیں ۔ وَلاَ یَعْرِفُہُ مِنَّا اَحَدٌ ۔ اور نہ ہی مقیم تھا کیونکہ ہم میں سے کوئی بھی اسے پہچانتا نہیں تھا۔ فَأَسْنَدَ رُکْبَتَیْہِ إِلَی رُکْبَتَیْہِ ، وَوَضَعَ کَفَّیْہِ عَلَی فَخِذَیْہِ ۔ لیکن بڑے ہی مہذبانہ اور متعلمانہ انداز سے رسول اللہ ﷺ کے سامنے زانوئے تلمذ تہہ کیے اور استفسار کیا۔ یَا مُحَمَّدُ ! أَخْبِرْنِیْ عَنِ الْإِسْلاَمِ ۔ اے محمد ﷺ ! مجھے اسلام کے بارے میں بتلائیں۔ آپ نے جواب دیا : الْاِسْلاَمُ اَنْ تَشْہَدَ اَنْ لاَّ اِلٰہَ إِلاَّ اللّٰہُ وَأَنَّ مَحَمَّداً رَسُوْلُ اللّٰہِ و َتُقِیْمُ الصَّلاَۃَ وَتُؤْتِیَ الزَّکَاۃَ وَتَصُوْمَ رَمَضَانَ وَتَحُجَّ الْبَیْتَ إِنِ اسْتَطَعْتَ إِلَیْہِ سَبِیْلاً ۔
اسلام شہادتَین کی گواہی دینا ، صوم وصلاۃ اور زکوۃ وحج بیت اللہ کی ادائیگی کانام ہے۔ پھرسائل نے بڑی ہی حیران کن بات کی۔ قاَلَ صَدَقْتَ۔ آپ نے سچ فرمایا۔ سیدناعمر رضی اللہ عنہ بھی اپنی حیرانی کااظہار فرماتے ہیں : فَعَجِبْنَا لَہُ یَسْأَلُہُ وَیُصَدِّقُہُ ۔ عجیب سائل ہے سوال بھی کرتاہے اور تصدیق بھی کیے جارہاہے۔ گویا خود ہی مُدّعی ، خود ہی منصف۔ پھر سوال کیا۔
أََخْبِرْنِیْ عَنِ الْإِیْمَانِ !ایمان کیاہے؟ جواب دیا۔
ایمان باللہ ۔اللہ کو ایک ماننا اور اس کی ذات وصفات میں کسی کو شریک نہ جانناہے۔
توحید ربوبیت، توحید الوہیت، اور توحید اسماء وصفات کی معرفت حاصل کرنا بھی ضروری ہے۔
اس کی مِثل ومثیل کوئی نہیں نہ ذات میں نہ صفات میں، وہ اپنی نظیر آپ ہے۔
جس طرح اللہ کی ذات وصفات میں کوئی شریک نہیں ،اسی طرح محمد رسو ل اللہ ﷺ کی نبوت و رسالت اور اطاعت میں بھی کوئی شریک نہیں۔
’’اے اہل ایمان! اللہ اور رسول اللہ ﷺ کی اطاعت کرو، اور اپنے اعمال کو غارت نہ کرو۔‘‘
اور محض دعوئ ایمان نہیں بلکہ ایسا ایمان لاؤ جیسا ایمان لانے کا حق ہے۔
ایمان بالرسالۃ میں ملائکہ ، انبیاء ، کتب الہیہ اور خود قرآن پر ایمان لانا بھی شامل ہے کیونکہ یہ ان تعلیمات میں سے ہے جو اللہ کے رسول نے دی ہیں۔
سائل نے احسان ، قیامت اور علاماتِ قیامت کے بارے میں بھی سوالات کیے جب وہ جاچکا تو رسول اللہ ﷺ نے کہا :’’یَا عُمَرُ ! أَتَدْرِیْ مَنِ السَّائِل؟عمر! جانتے ہو سائل کون تھا؟ عمر رضی اللہ عنہ نے عرض کی:اَللّٰہُ وَرَسُوْلُہُ اَعْلَمُ ۔ رسول اللہ ﷺ نے فرمایا: فَاِنَّہُ جِبْرِیْلُ أَتَاکُمْ یُعَلِّمُکُمْ دِیْنَکُمْ ۔ یہ جبرائیل تھے جو تمہیں تمہارا دین سکھلانے آئے تھے۔ (مسلم فی کتاب الایمان )
خسارے سے بچنے کی دوسری شرط عملِ صالح ہے۔ عملِ صالح دو چیزوں سے مشروط ہے۔ اخلاصِ نیت اور اتباعِ سنت۔ یعنی ہر عمل خالص اللہ کیلئے ہو اور رسول اللہ ﷺ کی سنت اور طریقے کے مطابق ہو۔
’’لا الہ الا اللہ محمد رسول اللہ‘‘ کا معنی ومفہوم بھی یہی ہے کہ عبادت صرف اللہ کی ،اور اطاعت صرف رسول اللہ کی (ﷺ )۔
نیت اعمال کی روح ہے۔ جس طرح بے روح جسم بے کار ہے اُسی طرح اعمال بے وزن ہوں گے اگر نیت خالص نہ ہوگی۔ ریا تو رائی کے دانے کے برابر بھی قبول نہیںکیونکہ یہ تو شرک اصغر ہے۔
نیت اعمال کی اساس ہے ۔بنیاد اگر ٹیڑھی ہے تو ’’تاثریا دیوار کج‘‘ عمارت آسمان کی رفعتوں کو چھوکر بھی کج ہی رہے گی۔ ایک گلاس خالص دودھ میں ایک قطرہ پیشاب ملانے سے دودھ خالص نہیں رہتا یہی مثال عملِ خالص کی ہے۔ اُسے طبیعتِ انسانی قبول نہیں کرتی اور اِسے ذاتِ ربانی بھی۔
قبولیتِ اعمال کی دوسری شرط اتباعِ سنت ہے۔ قرآن بیان کرتاہے۔
روز قیامت بہت سے چہروں پر ذلت چھائی ہوگی اور تھکادینے والے اعمال کرنے والے آگ کا ایندھن بن جائیںگے۔
عبادات اور اعمال شاقہ کے باوجود لوگ جہنم میں جائیں گے کیونکہ ان کے اعمال باطل مذہب کے مطابق یا بدعات پر مبنی ہوںگے۔
فرمان الٰہی ہے :
اے نبی کہہ دو! اگر اللہ سے دعوئ محبت ہے تو اس کی دلیل اطاعتِ رسول اللہ ہے۔ اس آیت نے تمام دعوے دارانِ محبت کیلئے کسوٹی اور معیار مہیا کردیاہے کہ محبت الٰہی کا طالب اگر اتباعِ محمد ﷺ کے ذریعے یہ مقصد حاصل کرنا چاہتاہے تو پھر وہ یقینا کامیاب ہے اور اپنے دعوے میں سچاہے ورنہ وہ جھوٹا بھی ہے اور اس مقصد کے حصول میں ناکام بھی رہے گا۔
’’جس نے ایسا کام کیا جس پر ہمارا معاملہ نہیں ہے یعنی ہمارے بتلائے ہوئے طریقے سے مختلف ہے تو وہ مردود ومستردہے۔‘‘
ایمان کے بغیر عمل بیکار ہے ۔ ایمان اور عملِ صالح کی مثال پھول اور خوشبو کی سی ہے۔ پھول ہے تو خوشبوہے ، ایمان ہے تو عملِ صالح ہے۔
اعمال ،عدمِ ایمان کی وجہ سے اللہ کے ہاں بالکل بے وزن ہوں گے۔ قرآن نے ایسے اعمال کو سراب اور اندھیروں سے تشبیہ دی ہے۔
ان کے اعمال کی مثال سراب کی ہے جسے پیاسا شخص دور سے پانی سمجھتاہے لیکن جب اس کے پاس پہنچتاہے تو اسے کچھ بھی نہیں پاتا۔
یا پھر اس کی تمثیل ایسی ہے جیسے گہرے سمندر میں اندھیرا ، جسے موج نے ڈھانپ لیاہو، پھر اس کے اوپر ایک اور موج ، اور اس کے اوپر بادل۔‘‘
تاریکی پر تاریکی مسلط ہے۔
آدمی اپنا ہاتھ نکالے تو اسے اپنا ہاتھ بھی سجھائی نہ دے۔
ایک اور مثال دے کر فرمایا:
ان کے اعمال مثل اس راکھ کے ہیں جس پر تیز ہو ا آندھی والے دن چلے۔‘‘
ایمان اور عملِ صالح کا تعلق بیج اور درخت کا سا ہے۔جب تک بیج زمین میں نہ ہو ، کوئی درخت پیدا نہیں ہوسکتا، لیکن اگر بیج زمین میں ہو اور کوئی درخت پیدا نہ ہورہا ہوتو اس کے معنی یہ ہیں کہ بیج زمین میں دفن ہوکررہ گیا۔
خِرد نے کہہ بھی دیا لا الہ تو کیا حاصل
دل ونگاہ مسلماں نہیں تو کچھ بھی نہیں (اقبال)
’’بادیہ نشین کہتے ہیں ہم ایمان لائے ۔ آپ کہہ دیں درحقیقت تم ایمان نہیں لائے بلکہ کہو کہ ہم اسلام لائے کیونکہ ابھی تک ایمان تمہارے دلوں میں پوری طرح راسخ نہیں ہوا۔‘‘
کامیاب زندگی کے رہنما اصولوں میں سے حق وصبر کی تلقین وتاکید کرنابھی ہے۔ ارشاد ربانی ہے :
تم میں سے ایک جماعت ایسی ہونی چاہیے جو بھلائی کی طرف لائے اور نیک کاموں کا حکم کرے اور برے کاموں سے روکے۔
امت محمدیہ کا شرف وفضل اور امتیاز کیا ہے؟
اس آیتِ مبارکہ میں امتِ مسلمہ کو ’’خیرِامت‘‘ قرار دیاگیاہے اور اس کی علت بھی بیان کردی گئی ہے جو امر بالمعروف ، نہی عن المنکر اور ایمان باللہ ہے۔ گویا یہ امت اگر ان امتیازی خصوصیات سے متصف رہے گی تو ’’خیرِ امت‘‘ ہے، بصورتِ دیگر اس امتیاز سے محروم قرار پاسکتی ہے۔
امر بالمعروف ونہی عن المنکر کے ترک کی وجہ سے وبال وعذاب کی سخت وعید وارد ہوئی ہے۔
امتِ خیر ہونا یقینا ایک اعزاز ہے ، یہ جو سہرا سجاہے یقینا اس کے بھی کچھ تقاضے ہیں۔
” Uneasy Lies the head , that wears the crown “
راہ حق میں جو آزمائشیں اور مشکلات آئیں انہیں خندہ پیشانی سے برداشت کرنا ہی صبر ہے۔
یہ شہادتِ گہہ الفت میں قدم رکھناہے
لوگ آساں سمجھتے ہیں مسلماں ہونا
(اقبال)
’’ایمان وعملِ صالح‘‘ اور’’ تواصی بالحقِ والصبر‘‘ میں باہم دِگر کیا تعلق ہے؟
جس طرح ’’ایمان‘‘ سے ’’عملِ صالح‘‘ وجود میں آتاہے اسی طر ح ’’عملِ صالح ‘‘ سے ’’تواصی‘‘ وجود میں آتاہے۔ جس شخص کی نگاہوں میں ’’حق ‘‘ محبوب ہوجائے گا تو وہ اس کی خاطر ’’صبر واستقامت‘‘ کی کڑیاں بھی جھیلنے پر آمادہ ہوجائے گا۔ صبر درحقیقت محبتِ حق سے پیدا ہوتاہے۔ حق کے بارے میں حق پرست اور پرستارِ حق کا علم، اس کی محبت اور اس کی غیرت بڑھ جائے گی۔ وہ صرف یہی نہیں چاہے گا کہ خود ہی اس سے محبت کرے بلکہ یہ بھی چاہے گا کہ ساری دنیا اس سے محبت کرے اور وہ جہاں کہیں بھی حق کو مظلوم ومقہور اور باطل کو غالب وفتح مند دیکھے گا، تڑپ اٹھے گا اور غیور واو لو العزم انسان کی طرح دوسروں کو بھی ابھارے گا کہ وہ حق کی حمایت کیلئے کمر بستہ ہوں۔
ہم میں سے ہر کوئی اپنا احتساب خود کرے، اپنے گریبان میں جھانک کر خود سے سوال کرے، کیا وہ کامیاب زندگی کے ان رہنما اصولوں کو مشعلِ راہ بنا کر حیاتِ مستعار بسر کر رہاہے یا خسارے کا سودا کیے بیٹھاہے۔ اللہم لا تجعلنا منہم ۔ ٰامین
قسط نمبر : 7 وقال: {وَلَا تَقُولُوا ثَلاثَةٌ انتَهُوا}[النساء: 171]وقال: {وَلا تَقُولُوا لِمَنْ أَلْقَى إِلَيْكُمُ…
آٹھ مواقع جب ملائکہ آپ کے لیے دعا کرتے ہیں، ان مواقع کو کثرت سے…
قَالَ رَحِمَهُ اللهُ: شیخ الاسلام محمد بن عبدالوہاب رحمہ اللہ کہتے ہیں: بِسْمِ اللهِ الرَّحْمَنِ…
سچ ہے کہ مرد کے اوپر باہر کی ذمہ داریاں زیادہ ہوتی ہیں، لیکن بیوی…
1۔ تراویح کی وجہ تسمیہ لفظ «تراویح» عربی زبان زبان کا لفظ ہے اس کی…